第一次寫食評，平日對餐廳同嘢食都冇乜要求，但呢間餐廳嘅員工服務態度，同食物質素真係好差。因為公司附近得呢一間越南嘢，所以跟同事嚟食，食過兩三次，一次差過一次，本身諗住俾下機會佢先再食，但食完今次真係冇下次了。食過生牛肉湯河，湯河冇乜味，肉質次次都好硬好嚡。今次試佢餐牌推薦嘅香茅豬扒湯河（附圖），碗河嚟到竟然係恆温嘅，好似已經放咗好耐咁，見人哋嗰d送到嚟係出煙嘅，所以就想換一碗。點知員工個個都再三推搪，話不如加d熱湯俾我唔換得唔得，講嚟講去就係唔肯換碗新嘅。最後拖咗我十幾分鐘先肯換。話就話香茅豬扒，但佢望落同食落，都同我認知中嘅香茅豬扒差勁遠，得嗰兩三舊之餘，仲要有一舊係連住大骨，又硬又冇味。間餐廳有左右兩邊嘅area，之前試過俾員工A帶去右邊area坐低完，又俾員工B叫返起身去左邊area同人搭枱，勁逼咁坐。如果係多客其實都明白嘅，但係間舖成個右邊area得一枱有坐人，其他全部係空枱都唔俾人坐得舒服d咁食，真係有d無語。價錢嚟講唔係平，再加埋佢咁嘅質素真係超唔值，希望大家唔好中伏。
…查看更多
…查看更多
