eatgoodwest.hk's Profile

同朋友用coupon黎食野，我叫咗刺身盛合、帆立貝、三文魚壽司、鰻魚、玉子燒同埋鰻魚牛肉飯。餐廳比我嘅感覺係走中間路線，但略嫌等候時間太長，例如一份凡立貝壽司要等咗差不多半個小時先會有，同埋壽司唔算太新鮮，不過刺身就幾好食同新鮮，值得一讚。熟食方面就叫咗玉子燒同埋鰻魚牛肉飯，我唔係太推介玉子燒，一夾就散。同埋啲熟食都等咗好耐，鰻魚牛肉飯都夠熱，但係個汁同埋撈飯嘅湯太濃同太鹹。我哋四個人一共食咗$1200 ，唔算話真係好貴，但食物味道一般，服務亦都唔算太好（買單時先發現，一杯茶都要比$20）…Read More

同朋友食生日飯，聽聞呢間lunch都好抵食，所以我哋一行三個人就訂咗呢間，但唔係坐吧枱，我哋三個人各自叫咗一個14貫壽司餐，佢每次三件四件咁樣上，壽司嘅飯量唔算多，魚生都算幾有鮮味，但始終個感覺同坐吧枱好唔同，另外美中不足嘅地方係每一次侍應介紹時，都係極快咁樣講完，亦都冇話俾我哋知食壽司嘅先後次序，同埋去到食甜品嗰陣時，睇返啲相先發現原來佢比少咗件壽司我哋，雖然佢後尾都係會補返，但係係希望我哋食完雪糕再俾我哋，個感覺上邊唔係太好，所以整體來講今次嘅壽司體驗都係一般般，而我亦都覺得佢哋嘅服務態度需要改善。…Read More

星期日同屋企人嚟呢度食早餐，附近嘅餐廳全部都滿晒，但剩係得呢一間係有位，平時喺其他地方都有食過，心諗應該都冇乜大問題，點知就中伏。首先遊樂餐去到有嘢食，我哋足足等咗25分鐘，而其實我哋只不過係叫咗吐司同埋蛋，完全冇諗過點解一間好普通嘅餐廳，食呢啲都要等咁耐，吹左幾次單之後，終於來，啲嘢食都係普普通通，冇咩特別，然後我哋再叫咗杯熱奶茶，杯奶茶係暖嘅，完全唔熱，實在係有啲過分，希望餐廳都可以檢討吓佢嘅服務同埋人手安排。總括而言，除非你有好多時間，否則都唔建議喺度食。…Read More

今次第一次同朋友嚟食廚師發板，用嚟慶祝我生日，因為用咗生日優惠，嗰日餐廳都免費請我哋飲清酒，清酒嘅質素都唔錯。入返正題我哋嗰日食咗中間嗰個餐，我都係一個好唔錯嘅享受，前菜都好好味，其中一道菜色係師傅用蕃茄汁再加辣汁撈埋落去一啲刺身度食，好有驚喜，而且識落都好新鮮同鮮甜，佢仲有一個煙燻嘅菜式，係有驚喜嘅。壽司都係差不多類型嘅壽司，整體上面都好新鮮同埋鮮甜，特別想讚一讚師傅同埋呢度嘅服務，喺食飯嘅過程入邊師傅一路都會問我哋夠唔夠食，同埋好詳細咁樣介紹唔同嘅魚同埋時令嘅食材，成餐飯食落都好舒服，食完Menu上面嘅嘢之後，師傅仲額外請我哋食多兩件壽司，好開心🥳…Read More

以前未有疫情時，一年點都會去一次台灣，每次去都會去夜市食滷味，而燈籠滷味嘅出現就某程度上彌補左去唔到台灣嘅失望，今日早咗收工，趁冇乜人排隊就嚟咗登龍街呢間度食，員工嘅服務態度都好好，出菜都好快。因為有太多選擇，所以同朋友叫咗一個二人餐，二人餐嘅份量都好多，兩個男仔都食得飽嘅，滷味都好入味，不過個人覺得鹹咗少少，而餸嘅份量都多，再加埋小食同埋嘢飲，兩個人食其實都好飽，特別推介佢嘅鹽酥雞，炸得好脆，食完成餐飯再食多一兩件，都仲係好脆，真心唔錯。…Read More

同朋友嚟呢間餐廳慶祝生日，約佢一齊嚟食午餐，一入到門口，已經感受到好有歐洲嘅氣氛，餐廳整體環境都唔錯，我哋一日嗌咗一個午餐，前菜我哋嗌左沙律，啲菜都好新鮮好好味，我帶咗一個牛肉他他拼薯條，味道都好有驚喜，朋友平時唔食生牛肉，但都食咗幾啖，味道唔錯，薯條都炸得好鬆脆。感覺上午餐都比較抵食，推介比喺附近返工又想食好嘢嘅朋友仔。不過美中不足嘅係，嗰日訂枱時都有同餐廳講係慶祝朋友生日，希望可以喺甜品上面寫上生日嘅字句，但係當日係唔記得咗，令到成件事有少少美中不足。…Read More

呢間喺北角地鐵站一出嘅日本小店，啲嘢食雖然比正常貴咗少少，但食物嘅質素真係好高，雖然舖頭細細間，但係服務一啲都唔馬虎，今次同朋友一齊去食咗壽司拼盤，同埋其他嘢食，魚生非常新鮮，亦都好足料，強烈推介大家可以去試吓！另外都有嗌咗蟹子沙律，同埋日式炸雞，兩樣嘢都好好食，不過因為嗰日太肚餓，所以冇影到相。見到佢午餐都好抵食，而且魚生飯都有唔同嘅選擇，如果喺附近返工嘅朋友，可以一試。嗰日朋友都有嗌酒飲，侍應都有詳細地介紹，非常好👍🏻…Read More