一行8人想食個生日飯，朋友介紹下去咗呢間大廚料理食私房菜，連茶芥加一人頭$500多啲。坐低冇耐就冷氣機滴水，滴正係我頂帽到，簡單嘢坐過啲就解決到，不過之後提咗幾次上菜位滴水都硬係要係滴水位上菜🤷♂️人齊上菜。第一碟 - 鵝肝煎豆腐、蟹皇醬配法包。我個鵝肝正常但煎得唔太夠香，蟹皇法包普通。屋企人食食下件鵝肝叫我哋［好聲呀］我諗佢哋可能見裡面生生哋，叫我哋留意下，中意食鵝肝嘅我就冇乜為意；之後老婆叫我食埋阿囡件鵝肝，一咬之下，我感覺被成千上萬嘅死魚重重包圍我嘅味蕾，腥到癲！我終於明白屋企人係話件鵝肝［好腥呀］，唔係叫我［好聲呀］！第2碟 - 炸松葉蟹鉗配柚子雜果沙律。味道同去飲嘅炸蟹蚶相約，沙律係生果加沙律醬。我食到個蟹蚶中間，突然咬到啲硬嘢，原來個蟹蚶連殼藏咗係舊肉裡面，好在啲牙夠硬淨，比較之後嘅餸亦好小事。跟住第3第4度菜不過不失就唔多講。直接講上弦級數嘅第5碟 - 蠔皇南非28頭乾鮑扣澳洲海參鵝掌/花菇。鵝掌花菇係2揀1，我哋要4個鵝掌4個花菇，上菜時竟然係鵝掌花菇有齊，真正被抽走嘅係海參。能夠將扭蛋概念用於係私房菜上，呢條橋食神都未必諗到。不過之後有換返條海參俾我哋就算啦，但條海參好似冇乜洗冇乜刷過咁樣，個面鋪住一層白色嘢帶有粒粒，喚醒咗我底子裡嘅密集恐懼。隻乾飽個鮑邊就好似飽歷滄桑咁，望住佢化化哋嘅鮑邊，我以為自己食到散光。隻鮑魚就如臨煮前中咗化骨綿掌，啲毒未入晒去而外圍就化化哋，裡面實如擦膠，可見師傅內功深厚。之後乳鴿部分太咸；蝦乾啫啫通菜煲又反而甜多過咸，最後一個海鮮泡飯已經食到冇晒求生慾望。講咁多經點解當時唔投訴呢？其實啲餸未上晒我都驚俾人加料，食完埋單我有投訴，個收銀姐姐話應該食嗰時同佢講，但每上一道菜投訴一次嘅話，相信都係覺得我玩嘢。整體嚟講十分難食。呢一餐飯嘅所有嘢都完全癲覆我對私房菜嘅認知，刷新咗我對私房菜嘅三觀，人生第一次啲餸未齊就想走人。…Read More
