stustuuuuu's Profile

小店一家 但有無比人情味。蒸魚、鴨肉、玻璃肉肉餅、蒜蓉娃娃菜、浸雞、老火雞湯，全部都好有誠意，亦都冇味精，有家嘅味道亦都好健康特別要讚月桂奶茶，好香桂花味，香港獨有，原來係老闆親自研發，必嗌之選老闆好好人，每台客都會傾吓偈，大家都係街坊，充滿情懷。環境也算舒服，地方不大，但係衛生乾淨。原來所有餸都係老闆一個人煮，功架十足。菜式極都有特色，蕃茄炒鮑魚都係第一次食，估唔到咁好食！香港人要多多支持呢類小店…Read More

難得放假去咗淺水灣，沙灘隔離有一排餐廳，啲餐廳大部份都充滿外國人，經過見到呢間大部份都係香港人，而且有位，所以就入咗去首先環境係非常嘈吵，仲要喺門口度擺咗一把好大嘅風扇，全程吹住我同朋友，但係我哋太肚餓所以照落單我哋嗌左兩個$168嘅all day breakfast同一杯咖啡。等左15分鐘，食物就到左。見到呢兩份全日早餐，係有少少失望。首先份量係好細，比得呢個價錢係會expect 份量大啲。炒蛋份量係半隻但都唔知有冇，腸仔得一條，大啡菇好細舊，多士上面嘅將揸得三分之一。不過估唔到每樣嘢食都係咁難食。首先炒蛋冇蛋味，份量細到一啖食晒，大啡菇、煙肉、腸仔，全部都燒竉晒，呢啲咁基本嘅嘢都做唔好，仲要係煮完之後非常難食！最難食係啲豆同多士，啲豆連埋啲汁非常乾身，仲難食過罐頭嗰啲！呢個質素點解會俾得出？個多士先係極品，一咬落去硬過石頭，仲有啲酸味，上面嘅綠色着唔知係乜嘢醬，食咗一啖已經冇再食，佢仲有一舊好細究嘅唔知乜嘢，咬落又係冇味，完全唔知自己食咗啲乜！仲要係呢個價錢！真係好嬲！雖然我好肚餓，但呢個餐我食咗一半已經食唔落去，買單嘅時候同侍應反映好難食，希望佢哋真係有改善！杯咖啡原來佢哋漏咗單，我哋即刻叫佢唔好整，費事中多一次伏！呢份絕對係我食過最難食但又最貴嘅all day breakfast!!…Read More

平時都有食開沙田嘅大喜屋，今日特登嚟到講到銅鑼灣食放題，食5:00嗰輪，當日朝早已經訂咗位。呢間大喜屋面積幾大，入到去大概三份一位置坐咗人，帶位個侍應帶我哋坐咗係一張有兩個人坐緊、枱面用阻隔格住左嘅四人枱，張枱極細，同隔離嗰位基本上係勁近。 因為唔想同其他人坐得咁迫，我哋就掉咗去後面一張四人枱坐。落單嗰張紙個男侍應冇幫我哋拎去新枱，留低坐喺舊枱。我哋之後叫侍應佢哋先肯比落單紙我哋，我知道可以用張單落單，所以就問返嗰位男侍應，佢完全無視我哋，繼續幫我哋用紙入單。之後我再同另一個女侍應講可否比張落單qr code紙我，佢就極差嘅語氣話我地究竟有冇係入嚟嘅時候俾人帶位，係咪自己走入嚟，我回覆說有人帶我哋入嚟，佢之後就搵咗經理，經理居然當面叫我哋要出返去等人帶位。明明我哋有人帶位，佢唔俾我哋坐另一張枱，逼我哋坐係好逼夾嘅位置。作為客人唔通連選擇座位的權利都冇？驚你仲要大聲答我叫我哋出返去入，呢個時候朋友拎完嘢返嚟都比佢哋沒收，非常嬲！咁大間餐廳得三份一位置有人，點解唔俾我哋坐！而且態度仲要咁差，咁樣趕我哋走，永不光顧！…Read More

佢嘅沙嗲牛算係全港頭三，外賣差咗少少，但都好龍濃味。多士厚度適中，但都香滑的。之前食過荃灣嗰間非常高質，依家可能係新開，整體方面仍需努力。個麵亦都林晒，建議分開碗上。最需要改善嘅係服務態度，我係買外賣，收銀個中年大媽超級冇禮貌，好似唔想做生意咁，本身嗌凍檸茶之後轉熱檸茶佢啤住我仲要話咁鬼麻煩，今時今日咁嘅服務態度我唔會再幫襯！佢話完我本身都想走人，但太熱愛佢嘅沙嗲牛好似好難食。絕對需要換咗個個呀姐…Read More