Pat Tang's Profile

自從上次去咗靚靚黑白主題餐廳 URULU，仔女成日都話想再去，見到佢哋 IG 新推出超特別嘅港式 Fusion 菜，即刻就帶埋佢哋一齊嚟食！因為我好鍾意食三文魚，所以今次都有叫 #煙三文魚露筍卷，中間除咗露筍仲有沙律菜，同上次一樣，都係好夾好好食。然後就係此行嘅目標主菜，我哋叫咗 #大澳蝦醬魷魚筒鮮鳳尾蝦炒意粉，想講啲鳳尾蝦好好食，而蝦醬炒意粉，真係好特別，又估唔到可以咁夾，個魷魚筒就好得意，成個配搭都真係好 match，仔女都食唔停口。再嚟就叫咗個 #紅燒蜜汁豬腩肉五香肉丁燴意大利飯，蜜汁豬腩係特別嘅，但最特別係五香肉丁燴飯，少少辣，但成個飯好香，完全冇咗燴飯好膩嘅感覺，絕對唔會覺得怪，食落去我都表示停唔到口！另外鍾意食海鮮嘅我哋，仲叫咗 #白酒忌廉牛油煮青口配芝士多士，只可以講，個汁實在太好味啦！青口好好味，芝士多士仲想配多幾件食。而主食可以加錢轉套餐，加 $28 就可以有是日餐湯 + 餐茶，加 $38 仲多埋沙律，是日餐湯就係蕃茄蜆肉湯，酸酸地勁開胃，餐湯會配多西一塊。而沙律配醋都係勁開胃！至於甜品就叫咗 URULU 二次元立體夢幻蛋糕，爸爸話唔甜嘅 cream 先係最原始最好味，不過冇預訂嘅話就只有白色（草莓果醬 + 鮮草莓)，如果想試粉紅色/粉藍色，就要早兩日前預訂。另外，我哋仲叫咗 #熱蘋果金寶 + 雪糕球，熱熱的蘋果金寶 + 碎，配埋雪糕一齊食，真係好好味囉！至於餐茶我就叫咗凍飲 #凍檸茶，糖水份量自己加；另外仲加 $10 轉咗杯蘋果汁，劻霖話好凍好好飲。總結：餐廳好多打卡位，每次都要癲狂打卡，黑白主題本來就係好特別，而 Fusion 菜仲有幾款未試，真係要搵機會去試哂佢先得，Fusion 菜你可以話周圍都有，但係咁港式嘅 Fusion 菜你又食過未？ …Read More

無論大人定細路，都一定鍾意脆卜卜嘅食物，所以上星期日，就帶咗仔女一齊去試下呢間《人生有限杯》串燒，老老實實，個店名係其中一個吸引我去嘅原因。一入到去，木枱木凳，勁似去咗日本嘅居酒屋，好有 feel 呀！而因為我哋太肚餓嘅關係，真係一叫叫咗好多嘢食！想推薦大家嘅係，佢有 $10、$15、$20 區嘅串燒，但就要每款2串起（大家要留意返喔）！推介 #焦糖菠蘿鵝肝醬多士，好味好味好好味，鍾意食鵝肝醬必要試！下面嘅就係每次食串燒必叫嘅 #鹽燒鮮雞皮，完全冇邪惡感。之後當然唔少得 #鹽燒西班牙五花腩，食串燒食五花腩是常識吧！肥瘦一半一半，好正呀！再嚟試咗 #鹽燒鮮雞頸肉，豬頸肉就食得多，估唔到雞頸肉都幾好食喎！再嚟老公至愛 #燒雞心，好入味都幾好食！再嚟就係食 #泰式燒墨魚鬚，點咗個汁辣辣地都幾好！左下就係必推 #山椒鰻魚汁燒白鱔，好好味！右下就係 #鹽燒雞腿肉，啖啖肉好 juicy。之後就試啲特別嘢，豚肉牛油果，鍾意食牛油果要試呀！同埋 $20 區嘅 #紫菜鵪鶉蛋卷，好特別都好味道！健康啲嘅就係 #芝士菠菜卷 & #豚肉蘆筍卷，兩隻都好好食，又唔會覺得邪惡！呢3款就巨好味，有我本人好推薦嘅 #味淋魚乾，每次叫親都要爭住嚟食！再嚟左下係 #椒鹽+紫菜+泰式辣醬九肚魚，好脆好好食！右下就係 #蒜蓉欖角燒蟶子，微辣但好鮮好好食！鍾食海鮮一定要試埋 #白酒忌廉煮蜆，啲蜆肉索哂啲汁，好鬼正！平時豆苗就食得多，今次食 #雞油生炒豆苗，估唔到都幾好食！甜品食 #港式蜜糖多士夾雪糕，超級超級大滿足啦！差啲漏咗介紹 #菠蘿可爾必思 & #荔枝檸檬梳打，兩杯都好好飲㗎！最後埋單都只係 $902，大家都超級滿足，抱住個肚仔走！總結：餐廳環境都ok，我見仲有 bar 枱位置，就可以睇住廚師即燒即食，個感覺都幾正！串燒選擇都多，有仲抵食 $10 區（每款2串起），下次一定會再嚟，試下多啲其他美食。…Read More

等了又等，終於等到茶大椰灣仔店開張，仲要喺公司附近，唔係唔嚟試下話！超鍾意佢哋有堂食，店內環境好舒服，燈光好夠，最重要係冷氣都好夠！我係牛油果愛好者，所以我係一定會先試牛油果嘅飲品，呢杯係 #牛油果椰沙冰 ，呢杯超推，因為佢好勁牛油果味，唔甜，而且呢啲天氣飲沙冰絕對係一流，我拎到返公司都仲飲到沙冰，超正呀！朋友就叫咗 #木瓜椰奶 (天然甜)，咁就唔怕會好甜，而鍾意食木瓜嘅梗係要叫多個 #木瓜小椰凍 啦！啲木瓜好新鮮好好食，最重要係椰凍同椰奶都唔會好甜，好清新好啱夏天呢個季節！而我係好鍾意食甜嘢嘅，所以一嚟就睇中 #Oreo小椰凍 ，Oreo 餅碎 + 椰凍，估唔到 Oreo 都冇搶走椰凍嘅味道，又幾夾㗎喎！總結：下次想試鮮椰咖啡，同埋焦糖大椰凍，今次食完午餐先嚟，超級大滿足嘅一個中午。…Read More

話說上次食完，成家都好想再食一次串燒，所以又再幫襯過！我哋慣咗早食，所以天未黑，6點就到咗，有卡位坐真係最開心。又係必食呢個 #味淋魚乾 ，熱辣辣軟軟地，配埋沙律醬真係超超超好食。而呢個 #甜奶包，上面舊牛油好邪惡，我老公同個仔食到舔舔脷！跟住再嚟 #雞皮，燒雞⋯皮，我至細鍾意食，有冇邊個係唔鍾意食雞皮嘅？左邊係 #泰式燒豬頸肉，配埋泰式醬好好味；右面係 #七味汁燒豬大腸，好入味，超好食。而呢個 #鹽燒豚肉露荀卷，有露荀就唔怕油膩，一定一定要試；仲有 #福崗味噌松板豬，呢個又估佢唔到咁特別，好重豬味，真係值得一試。仲有 #秘製燒羊架，羊架一定係燒最好食，夠香又唔會有臊味。呢個好特別，鍾意食牛油果可以試，鋪滿紫菜嗰兩串就係豚肉牛油果，真係食咗落去先知，好夾好好味；而另外兩串就係 #明太子雞腿肉，好夾好滑好正！而上次同今次都有叫 #雞皮墨魚滑，老公大讚好食，必食；仲有 #汁燒雞心，第一次食又真係幾香口；而超鍾意食瓜嘅我，就叫咗 #鹽燒萵筍（中間） & #燒翠肉瓜，有冇同我一樣都好鍾意食燒翠肉瓜？而除咗串燒，都仲有其他食物嘅，我哋就叫咗 #蒜香牛油煮蜆，有少少酒味，我仔一個食咗好多隻。飲品今次我哋揀咗梳打 #青檸菠蘿梳打，呢杯飲品係超開胃，好好飲。總結：每次都有唔同嘅驚喜，大人細路都超滿足，下次嚟再試多啲其他嘢先得！…Read More

又到咗3月生日月，呢間餐廳絕對係我去過一次之後，一直心心念想再嚟，老公話趁住生日月，又帶我嚟到 The Grill Room 呢到！我想講餐廳內嘅浪漫氣氛，係我好鍾意呢到嘅原因之一。另一原因就係佢哋嘅 Semi-Buffet Lunch，即係半自助午餐，頭盤、小食、沙律、甜品，全自助形式，想食咩就自己拎。呢個薯仔沙律不得了，係我最愛之一。呢個通粉係令我食唔停之一，配埋啲洋蔥，粟米，成個菜都好 fresh 好想食完又食。仲有呢個羽衣甘藍藜麥沙律，醬料仲可以自由選。而午餐會跟湯，是日餐湯，好 creamy 好好飲。主菜今次我揀特別嘅 #脆皮豬腩伴香草燒菠蘿 配日式洋蔥汁，你冇睇錯，真係好似我哋平時食開嘅燒肉，但呢個煮法就好似西班牙豬腩，個皮燒到脆卜卜，咬落去卜一聲，配埋燒菠蘿，可以解膩，真係超級夾！老公就揀咗 #美國頂級牛板腱 配蘑菇燒汁，肉佢揀咗5成熟，好好食，個底仲跟咗 #南瓜蓉，成碟由主食到配菜都好好食，清咗碟。唔少得嘅梗係甜品，有 Oreo 芝士蛋糕 & 可麗露，可麗露唔太甜，出面脆脆的，內裡又煙煙韌韌，好食到停唔到口。飲品就加錢飲 Hot Latte，有靚靚拉花，味道都好好，鍾意飲咖啡必定要試。總結：每次都會有驚喜，令人好期待，浪漫嘅環境，食物嘅質素，如果你想俾驚喜男女朋友，或者老公老婆，一定要嚟試下。…Read More

鍾意周圍飲周圍食嘅我，又從未試過去中環蘭桂坊搵食，所以今次同老公上網做定功課，決定去試吓呢間美國菜。一入榮華里，就會見到易拉架廣告，跟住佢嘅指示，好快就搵到間舖。坐低之後除咗睇食咩，望住呢到嘅裝修，除咗靚仲好舒服添！午餐都有8個選擇，有選擇困難症嘅我，梗係一早睇咗介紹先嚟食！我哋就揀咗招牌菜，同埋美國菜必食嘅嘢。呢個就係 #招牌芝士牛肉潛艇堡，佢個醬汁係微辣，入面除咗牛肉，仲有洋蔥、青紅椒，芝士，想講成個包係超級 juicy，無論醬汁定餡料，好有墨西哥風味！果然同網友介紹嘅一樣，必食好味！另外，美國菜必食 #炸魚薯條，炸魚超熱辣辣上菜，配埋他他醬，魚肉好滑，鍾意食炸魚薯條嘅你一定要試。午餐飲品可以免費揀凍紅茶 / 咖啡，或者加錢轉其他飲品都得！另外，仲有特別優惠，大伙兒去食叫就好抵！總結：好滿足好飽嘅一餐，未試過食美國菜嘅你，超推薦你去試下，鍾意飲酒嘅仲可以飲埋酒，氣氛超好！…Read More

上次同阿妹自私食之後，今次就要同鍾意食蔥油嘅老公一齊嚟食！呢個就係招牌 #蔥油雞扒撈丁。好正嘅「生燒雞扒」，外面脆卜卜，入面勁 juicy，配蔥油撈，真係好好食！我今次就食 #咖哩吉列豬扒飯，咖哩好香又唔辣。吉列豬扒炸列脆卜卜，配咖哩好正呀！今次我哋仲加錢升級飲 #珍珠奶茶，跟餐加 $9 就可以轉飲。嚟遠都望到大大個餐廳招牌。午市時間都好多人，所以有機會要排隊，門口大大個餐牌，可以睇定食乜。總結：第二次食，唔會令人失望嘅 #蔥油雞扒，估唔到吉列豬扒都一樣好好食！下次一定要再嚟！…Read More

又到聖誕，又到聖誕，聖誕節梗係要食聖誕大餐啦！不過今次我哋就簡簡單單一家人，去咗荃灣廣場嘅 Homeland Kitchen，一入到嚟個就俾個裝修吸引住，好似修咗個好色彩嘅森林一樣！西餐梗係唔少得前菜，我哋就叫咗 #寶雲酥法式焗田螺配薯蓉，之前出面食過呢道菜，啲薯蓉通常都冇味，但 Homeland 呢一道菜，係上至田螺，下至薯蓉都超級入味好味。另外叫咗個小朋友至愛，其實阿媽都好鍾意食嘅 #滋味小食拼盤，拼盤有炸雞塊，吉列廣島蠔，芝士醬薯條，吉列魚手指，樣樣都脆卜卜超好食，你話小朋友點會唔愛！跟住就梗係唔少得 #Pizza 啦！我哋叫咗個 #松露牛肝菌雞肉芝士薄餅，呢個 Pizza 就真係好足料，啲芝士好多好漏好正！另一個主菜仲叫咗 #西西里龍蝦汁海鮮鐵鍋燉飯，鍾意食龍蝦汁嘅你一定要試，成個燉飯都索哂啲龍蝦汁，好入味！飲品我哋就叫咗杯 #蜂蜜柚子茶，冬天潤喉一流。而甜品都是重點之一，聖誕節一定要食甜品啦！而 Homeland 呢到係有 #寫字畫碟甜品，即係你叫甜品，加 $35 就可以有埋寫字畫碟，我哋就梗係應節寫返句 Merry Christmas 啦！如果同朋友慶祝生日，有埋寫字畫碟就梗有意思添！總結：好豐富又好美滿嘅一餐，環境同食物都好好，最重要係坐得好舒服！有埋寫字畫碟，一家人節日影張靚相留念，very nice! …Read More

我哋一家人都好鍾意食韓燒，今次食韓燒大叔係因為見到佢抵食，而且好多選擇！入到去好多 car 位，有啲座位係有兩個爐嘅！我哋4個座都好大好寬敞！坐低就可以自助落單，scan QR code 揀食物，十分方便！另外仲有自助區，自助區有配菜、醬料，再配埋自家製泡菜食，就 perfect match；仲有汽水機，冰凍柚子蜜，食韓燒怕熱氣，飲返杯柚子蜜就最啱！食物種類繁多，雞牛豬樣樣齊，有6款唔同部位嘅安格斯美牛 & 澳牛，有啲有埋醬料，燒出嚟唔洗調味就食得。如果想食海鮮刺身都得，每位加 $88 就可以升級。海鮮有半殼扇貝、虎蝦、凡立貝、青口等等⋯燒海鮮真係好好食；特別介紹 - 豬皮，燒豬皮真係必定要試；刺身有就三文魚、帶子、赤蝦⋯都係任食。當然唔少得熱食，全部都係即叫即製，保持熱度！熱食方面多款韓國小食，真係樣樣都好好食！之前講自助區，仲有即製爆谷、窩夫，自製軟雪糕機，仲有個甜品櫃，有泡芙、芝士蛋糕等等⋯記住要留返個胃嚟食甜品呀！我哋4位就送鰻魚，而我哋參加抽獎活動就抽中韓牛西冷，超級正！總結：食到好飽嘅一晚，大人細路都好啱食，約埋朋友嚟聚都一樣得，晚市放題係120分鐘，一路傾一路食就最啱。…Read More

今次又同老公去灣仔嘅「黑龍」拉麵，呢間拉麵真係好食到會翻食又翻食！佢嘅背景點都要講下嘅 - 「黑龍」拉麵 2014 年開業，係日本人開設正宗拉麵店！今次我就食咗 #沖繩鹽味豚骨拉麵，黑龍拉麵最特別嘅係佢哋嘅湯底都係好濃，不過唔想太濃，佢哋仲有提供熱湯，大家可以自行溝返淡少少，而拉麵可以揀唔同質地 (我偏向食軟麵)。而呢款拉麵有 #雪菜，真係好特別又好夾！老公就叫咗 #黑龍豚骨拉麵，而呢款拉麵係有現埋洋蔥，玉子係要另外加配，老公仲揀咗少辣，佢話辣辣哋其實好好食！另外，我哋仲加咗個 #牛筋飯，熱辣辣上格，加埋少少蔥真係食到停唔到口！雖然我哋冇飲酒，但居酒屋食小食是常識吧！今次就叫咗章魚燒 & 餃子，最特別係章魚燒有得揀醬汁！兩款小食都係好好食，好推薦大家試！而黑龍拉麵每月都會推出限定 follow 送禮，11月限定，Follow @kokuryuramen_wanchai ，仲送 #吉列蝦 一隻。留意返，每次嚟到都要排隊等，想唔洗排隊就12點開門前就去到，好似我哋第一次咁，就唔洗排，第一水人入去食！…Read More

去台灣旅行，真係日日都食好西，我哋剛剛去就晚晚夜市掃街，返到嚟香港都不忘繼續食台灣嘢！台灣除咗火鍋出名，燒肉都同樣出名！今次就同老公自私去食 #安平燒肉。而面對去完旅行洗咗好多錢都唔怕，因為我哋係食「90分鐘月光族急救吃到飽餐」，我哋食 S2 餐，有齊牛、雞、豬揀。仲要係全日供應，價錢由 $188 至 $228，如果安平會員更可以會員價 $168 至 $208 食！我就大推台灣出名嘅 #黃金泡菜，平時食嘅都係酸酸辣辣，黃金泡菜就係咸咸地，入面會有花生 (堅果敏感者要小心喔!)另外，仲食咗嫩肩板牛肉，醬燒雞爽肉，燒滷豬大腸，九層塔三杯雞，上選牛腹肉，豬五花等等⋯另外，仲有食物區任食，有 #起司鵪鶉蛋、#士林小香腸、#奶油金菇、#花枝甜不辣、#蔬菜甜不辣 等等⋯記住呢啲食物係要煮熟先食得㗎！至於醬料區，都係安平燒肉吸引之一，就係佢哋嘅「十二味醬專區」；必試 #招牌黃金醬 (蔬菜汁配台灣麻醬)，#五味醬 (經典台式醬汁)、#椒麻口水醬 (充滿花椒香氣)；你又鍾意邊一款醬汁？仲有必定要留肚食嘅 #安平櫻花蝦飯，有櫻花蝦、香蔥、海苔或秘製的滷水汁提供，可以跟住步驟嚟整，亦可以自由添加，製作一碗獨一無二嘅拌飯。甜品一定要試埋 #芋圓薑汁布丁杯，冬日甜品首選；仲有雪糕機，可以隨時整一杯嚟食，有多款配料選擇！總結：90分鐘月燒族餐真係好飽，一定要留肚食櫻花蝦飯，仲有好多飲品選擇，有冷泡茶，汽水，台式飲品。下次要帶埋仔女嚟食！…Read More

鍾意食燒賣到咩程度？老公絕對係燒賣迷，所以今次我就帶佢去咗全港最多燒賣種類嘅點心專門店 #一盅點心 。食呢個 #世一燒賣拼盤，一個由 12 種燒賣合成嘅拼盤，你又食過未呢？我想講見到張相已經覺得好勁，12 款燒賣，上到枱即刻聽到隔離枱話，咁靚嘅，我哋下次又要叫先。然後我哋係一粒粒咁試，再估下係咩，我想講有啲係有圖有答案，有啲係冇，有啲真係估唔到，差啲走去問老闆娘。除咗燒賣拼盤，點可以唔食埋點心先，我哋叫咗#筍尖蝦餃皇，蝦餃皇粒蝦好大粒，好味。再大推 #千島醬脆炸蘿蔔糕，個心係好熱㗎！配埋千島醬又估唔到咁夾。另外仲叫咗 #咖喱魷魚 & #醬皇蒸鳳爪，兩樣都好食！仲有必試必試《燉湯配蒸飯套餐》，我哋揀咗鳳爪排骨飯 + 羊肚菌茶樹菇燉水鴨湯，老公話個鳳爪排骨飯勁似以前街檔食嘅味道，我都覺得好好食。而個燉湯超足料，一定要試，套餐平 $10 㗎！另外，可以參加埋「世一燒賣挑戰賽」遊戲玩法：1。免單請你，用餐時間內，搵到比「世一燒賣拼盤」更多嘅現存餐廳！2。半價請你，食完30秒答對6款「世一燒賣拼盤」裡面嘅產品名稱！3。半價請你，出 post 喺 IG/FB/小紅書，邀請下一位挑戰選手！內容要求：介紹一盅點心並 tag 一位好友！總結：早上時間超多人，中午後會比較好，鍾意食燒賣一定要嚟食，一邊食一邊估都幾得意！…Read More

小朋友多數都鍾意食串燒？其實大人都係，可以食到唔同動物部位，串燒熱辣辣真係超級正，最好配埋啤酒，可惜老婆同仔女都唔飲得，咁就唯有叫乳酸飲，左：芒果乳酸，右：士多啤梨乳酸，酸酸甜甜好爽呀！必食推介：味淋魚乾，燒魚乾係我仔至愛，配埋沙律醬食，真係食唔停口。#韓燒泡菜五花腩，豚肉配泡菜，永無甩拖嘅配搭，泡菜唔算太辣，小朋友都話好好食！食串燒食 #雞軟骨 是常識吧？鹽燒雞軟骨，脆脆的軟骨，正！#麻辣豬大腸，對於鍾意食豬大腸嘅人表示，好惹味，不過都真係偏辣，大人食哂！#雞皮墨魚滑，好得意嘅口感，出面係脆脆嘅雞皮，入面係煙煙韌韌嘅墨魚滑，十分 match 喔！#鹽燒豚肉露筍卷，清新，配露筍即時冇咁油膩，讚讚讚！#秘製燒羊架，識食一定食燒羊架，平時屋企只可以煎，總覺得唔夠喉，今次食燒嘅，真係唔同啲！一個字「正」嚟形容。#蒜蓉燒廣島蠔，鍾意食蠔嘅老公話好味，好香好鮮甜。有小朋友怕佢唔夠飽，叫咗個 #鰻魚炒飯，一定啱食！好特別第一次食：甜奶包，就係牛油 + 煉奶，食咗咸點，食個甜點原來又幾唔錯喎！總結：4個人食，估唔到食到咁多嘢，係真係飽到上心口，超級滿足，店內冷氣好足夠，全 car 位都好舒適，串燒種類多，今次食唔到下次再嚟。…Read More

鍾意食泰國菜嘅朋友一定唔可以錯過 #沙巴泰越館 ，超推薦佢哋嘅 #豐盛二人套餐。二人餐仲有 A / B 兩款選擇！我哋揀咗 B 餐，有超開胃嘅 #酸辣無骨鳳爪，酸酸地真係好有泰國風味！仲有 #泰式炸蝦餅，配埋甜酸醬一齊食就 perfect match 啦！而泰式豬頸肉到底有幾好食？我真係可以話，食泰國菜必食豬頸肉，今次係第一次 #泰式豬頸肉沙律，估唔到又幾好味！真係食唔停口。主食我哋就揀咗 #海南雞，泰國海南雞一樣係唔少得，有骨嘅海南雞都一樣咁好味！呢個真係十個食十個都話好食， #泰式辣椒膏炒蜆，OMG！呢味餸係超香口，食落係唔辣㗎！我係狂追住食，差啲想問廚師邊到可以買到呢款辣椒膏。推推推十分推！呢款 #飛天通菜 好好食，有少少辣，但好香好好食。另外仲加配咗 #越式粉卷，我老公大愛食粉卷，正呀！飲品就可以揀 #龍眼水 / 檸茶 / 檸水，老公話龍眼水唔甜幾好飲。二人餐甜品係椰汁西米糕，我哋就另外叫咗個 #芒果糯米飯，糯米飯係魚魚造型，勁可愛，味道滿分。總結：好好食嘅泰越菜，無論係前菜、主菜，定係甜品，地點都方便，下次要帶埋仔女一齊嚟食。…Read More

之前成日介紹港島美食，今次就介紹港島一間專賣「可可」飲品嘅外賣店！就係「唂咕 Cucooland」啦！無論鍾意飲可可，定係鍾意飲朱古力嘅你，一定唔可以錯過！因為有啲朋友鍾意飲朱古力但又怕甜，咁嚟唂咕就好啱啦！因為唂咕呢到係有「純可可」100% Pure cocoa (No sugar)！仲有唔同嘅選擇，可以係橙味可可，黑芝麻可可。而我哋就揀咗 #純可可奶，奶方面仲有4款奶可選，全脂牛奶/燕麥奶/杏仁奶/椰奶。我哋揀咗全脂牛奶，熱飲，成杯嘢係好香可可味，係完全飲唔到甜味，真正享受純可可嘅味道。而當然仲有啲係有糖嘅可可飲品啦！我哋就揀咗 #特式黑朱古力 配 #杏仁蔓越莓，奶都係揀全脂奶，凍飲，真係估唔到又好夾，好好飲！另外，佢哋仲有 #黑朱古力、#可可茶 等等⋯總結：適合鍾意飲甜味可可嘅你，或者鍾諗飲純可可嘅你，佢哋仲有印仔卡可以儲印添㗎！…Read More