sng8's Profile

今日嚟到呢度點咗福建海鮮滷麵，芋泥香酥鴨，砂鍋黃花魚湯。福建海鮮滷麵真心推介！好味道！我會再嚟食。香酥鴨我就覺得啲鴨韌咗啲。黃花魚湯熱辣辣嘅時候好味道，不過黃花魚太多骨。我透過OpenRice訂枱，俾咗張好靚嘅枱我哋！好驚喜！…Read More

《十里》食物質素正常。但我最想評論嘅係服務員態度。當日我同朋友慶祝，所以揀咗《十里》。訂座安排嘅位置，我好滿意。有privacy 又舒服。後來我朋友手機嚴重冇電，但我亦都冇帶充電寶。朋友就問服務員A女士：「呢度有冇得叉電？」服務員A唔使諗就話冇。過咗一陣我朋友見到服務員B女士，問同一個問題，服務員B都係答冇，但係佢有解釋，話之前10個插頭或充電寶都俾人偷咗。佢跟住問我朋友有冇帶叉電線，有就可以用我哋座位旁嘅叉電座。嗰刻我好驚喜，冇諗過座位隔離可以有叉電咁方便。好可惜我朋友帶嘅線係iPhone最新嘅線唔係USB頭，用唔到。同時嗰一刻我都好疑惑，點解服務員A無提出呢個方案？我朋友唔放棄，跟住有一位服務員C先生，我朋友問佢有冇叉電線可以借。呢位服務員C服務態度非常好。佢問我朋友信唔信得過佢，信得過可以將個電話交俾佢，我朋友因為實在太急需要電，佢答信得過，並一手將電話交俾服務員C。服務員C就喺我哋面前將我朋友電話攞去我哋睇到嘅地方叉電。佢後來仲問我朋友可唔可以等到3:30pm 因為3:30pm就可以叉到100%。我朋友話唔使，差到50%已經可以。服務員C就話：「差到50%我再話你知。」我真係非常滿意呢一位服務員C嘅服務態度，因為佢真正go the extra mile 嘗試幫客人解決問題。我係老細我都會想請/留住咁嘅員工。我決定喺OpenRice度公開表揚佢。同時我想彈第一位服務員A，佢嘅服務態度最唔掂。呢間餐廳嘢食真係唔算平，一個龍蝦泡飯$500左右一碗普通正常size 。俾得咁嘅價錢食飯老實講我對服務態度係有期望。 服務員C先生嘅服務態度才絕對符合呢啲價格。大佬，服務員A女士，我唔係去茶餐廳呀。…Read More

我嚟過呢間食幾次，佢嘅心太軟過去好有水準。朱古力流心夠多，再加碟上朱古力碎，甜甜哋，係整得好特別，好好食。今日我再嚟食，完全唔係嗰樣嘢。朱古力流心極少，完全冇晒朱古力碎，唔好食，我好失望。我表達我嘅失望，職員好好，俾咗個八八折我，不過其實我希望佢哋將來提升返水準。因為$86又好$97又好，其實我係想食好味嘅朱古力心太軟。…Read More

我第一次食La Postre，係喺尖沙咀，嗰間舖頭嘅經理好好，服務態度一流。結果男朋友話要再去多次。第二次去我哋就已經join咗做會員。當時用$500去買會員卡，佢就俾返$500現金券我哋。今日我同朋友去食，慶祝生日，首先職員輪流走埋來，明明未食完嘅食物，不停表示想收。全晚我起碼講左五次「未食完。」我都唔知佢哋趕乜嘢。我叫咗甜品，都未上，佢就俾個電話我叫我填問卷俾意見。其實我心諗我未食完喎。算啦，照同佢填。跟住我未叫埋單，職員就走埋嚟問我使唔使幫我打包食物。下？！我答佢：「未食完喎。」明明OpenRice寫明營業時間去到11pm。 10pm 就走埋嚟叫我埋單。餐飯兩個人食咗$800+，咁我夾埋$500現金券找數。為免同朋友解釋咁多關於現金券嘅事我都係好低調咁樣攝入去bill folder。點知過一陣職員就行埋來，問我會員號碼。我已經好唔鍾意。從來冇講過用現金券要會員號碼。我照俾佢。轉個頭又行埋來，話而家公司制度改咗要用Apps。我話張卡係男朋友嘅。我代唔到佢處理Apps，叫職員照正常以往咁做啦。然後佢就大大聲話咁同我：「我哋就扣你$400現金券再用信用卡。」我真係怒髮沖冠！我想低調你大大聲！搞到我有啲尷尬。老實講現金券都係真金白銀買㗎唔係免費㗎囉！仲要我係俾$500唔係$400。我唔想喺朋友面前同職員理論於是我等職員行開咗之後我再行出去櫃檯問清楚。佢先話係$500。點解咁烏龍！明明11pm先至係收工時間。佢10:15pm就將音樂熄埋。有冇搞錯啊！我同朋友慶祝生日，要嘅係氣氛，我都未走你又未關舖，點解連音樂都要熄埋！基本上就係用佢個態度不停叫你快啲走唔好阻住佢收工。我真係好嬲。我係尖沙咀La Postre嘅體驗係好好。但嚟到銅鑼灣呢間，我好失望。職員咁嘅服務態度又成日想趕你走咁樣，唔怪得10pm已經成場冇晒人得返我同個friend兩人。La Postre 嘅高層，希望你正視一下銅鑼灣員工嘅工作態度，唔好影響你餐廳嘅名聲。老實講呢間餐廳嘅食物係靚、特別同埋幾好食。今次嘅食物亦都冇失水準。所以廚師依然值得一讚。我建議大家去La Postre，就去尖沙咀嗰間。…Read More

209 笑 vs 4 哭，本來諗住一定好好食帶住高期望來，結果令人好失望。仲要係男朋友靠睇食評揀，我都唔想打擊男友的眼光所以當日冇乜表態我嘅失望。先講佢嘅煎蠔餅我都唔覺得啲蠔仔好新鮮。叫咗條桂花魚食落口又唔係好嫩口。嗰碗白汁杏仁豬肺湯又甜又鹹好怪味。再加個手撕雞又調味得好普通。男友話佢屋企樓下一間普通酒樓都整得好味過佢。我從來唔寫食評，因為少過200字唔收貨覺得好煩。但我覺得百樂小亭評分言過於實，實在唔想其他人中招所以一定要表達下。我只係可以將4哭變成5哭對290笑我都知道冇乜用。不過我真係懷疑290裏面有幾多個係打手。我哋成日靠OpenRice揀地方食嘢，好多時好多人讚嘅去到都真係好好味！例如Goonebe Chicken, 泰逍遙等。仲要埋單兩個人都要差唔多＄600。絕對唔值呢個價錢！佢個環境設計亦都唔高檔。啲枱款式唔一致唔啱格調。似係靚少少嘅大排擋。唯一想讚嘅係佢嘅杯碟個真係好靚。…Read More