Yeungchinglammm's Profile

一年前食過一次，為之驚喜。半年後食過兩次，味道已經大不如前。星期五七點去到，人少，選了窗邊位坐，舒服寬敞，但一會後就滿座了。今日叫了田園沙拉、瑪莎拉雞、羊肉炒長飯、原味naan同乳酪烤雞。田園沙拉有青瓜、蕃茄、紫洋蔥和蘿蔔，伴咸咸酸酸的汁。上次也有吃這個，上次的味道較清新，今天的略咸，層次也單薄了一點。個人喜歡瑪莎拉咖喱口味，經典印度咖哩香料總匯，味道濃郁，伴飯或naan好吃，但略咸。雞肉份量足，不乾不柴，一份大約有5-6大件。總體滿意。羊肉炒長飯，每次必點。份量跟以前相當，裏面有約4大塊羊肉，騷味少，不吃羊也能吃。但今次的炒飯香料和調味不足，而且炒的火侯也不夠，所以不夠香，調味也沒有融合米飯裏。原味naan，每次必點，煙韌好吃，但上桌是冷的，應於已經放了一會。乳酪烤雞最為失望。叫了半隻乳酪烤雞，結果來了無骨烤雞件，還說沒有來錯。旁桌也叫乳酪烤雞，大碟非常多，這個只有5小件。鐵板夠熱，雞略咸，香料味一般，不算香濃，肉質正常不嫩也不柴，不推介。總括而言，味道和食物質素跟從前相差甚遠，一次比一次退步，不推介也不會再光顧了。…Read More

閒日午餐，經過尖東，見到一間粉紅花系cafe，餐牌幾多選擇，便入去試下。入到餐廳，座位闊落，環境光猛，有花同植物裝飾。揀咗安格斯牛肉西椒芫茜麻辣扁意粉（$148）。午餐有跟餐飲，加錢叫咗特飲（半價$31）：藍莓穀物乳酪。等了大概15分鐘意粉送到。牛肉份量幾足，舖滿碟。上面撒了一行芫茜。安格斯牛肉有牛味、有嚼勁，不是嫩滑路線。意粉煮得剛剛好，煙韌掛汁。調味非常惹味，中麻中辣，有椒香同芫荽香，意粉同牛肉入味。還有少量洋蔥碎同三色椒增加口感。整體材料同味道好夾。到藍莓穀物乳酪。比想像中大杯，顏色幾靚，杯上有一朵小花。藍莓味真實，有乳酪味，微甜。整體是沙冰質感，加有啲脆脆地顆粒，應該係穀物。整體口感豐富，味道濃厚，好飽肚。總括而言，食物同環境對得住價錢，估唔到cafe會有咁惹味香口嘅意粉，乳酪沙冰亦出色，兩樣都好滿意。…Read More

朋友喜歡養生菜式，就一齊去試。星期六中午到達，都多人。小店木系古風裝修，環境新淨，燈光柔和，座位較擠。叫了霸王雞飯配肉骨茶。雞是脾位，外皮金黃有油光。但一咬，雞肉非常鞋和韌，去到難咬的程度。碟中每一件雞都非常鞋。味道方面，雞肉本身沒調味，全靠蔥油提味。蔥油較重蔥白辛辣味，個人更喜歡蔥綠香味。豉油味淡，整碟雞咸味很輕，只有淡淡蔥味。肉骨茶則有驚喜。足料，內有一件排骨、豆卜、腐竹、杞子，排骨軟滑入味，比雞肉好食得多。湯頭濃郁，重藥材味，拌飯不錯。是日養生茶是羅漢果水。就是帶微甜的水，個人不太喜歡。總括而言，以為雞是這店的招牌菜，但肉質鞋和韌得誇張，味道亦淡，寧可去吃白切雞飯。朋友叫了藥膳雞湯麵，雞肉亦非常鞋。反而肉骨茶有驚喜，值得一試。…Read More

平時食開路德圍嗰間，見地鐵站附近又開，想試好耐了。星期日中午去到，店內外都乾淨企理，不過冇乜人，唔洗排隊就買到了。每次去豪大大都係叫：大雞排小辣。唔知點解呢間大雞排$38，路德圍$42。大雞排即叫即炸，上手非常熱，正。雞排一如既往大過塊面，表面撒了香料同辣粉，份量剛好，惹味唔會太咸。炸皮厚度適中，比路德圍更酥脆（路德圍冇咁酥，是更實淨的脆，看個人喜好）。雞肉有一定厚度，比路德圍的更滑嫩、有肉汁，非常驚喜。一個人食哂成塊都唔覺得膩，愛了。…Read More

星期六晚上，隔離幾間裝修比較精緻嘅食店都大排長龍，但呢間唔洗排隊。可能因為裝修比較簡陋，燈光白光，少少暗。不過之前食過幾次味道都唔錯，所以決定入去食。今次叫豬頸肉湯河加熱阿華田（$59，免加一）。 一嚟到，湯河非常大碗。鍾意佢豬頸肉同河分開上，啲肉唔會淋哂。豬頸肉非常入味，彈牙唔韌，有少少燶邊，份量多，好滿意。河粉軟滑，量多；牛骨湯濃，稍嫌有少少咸，自己加咗少少水，味道就啱啱好；白蘿蔔清甜無渣入味 。熱阿華田亦非常值得一讚，雖然用膠杯裝，但次次飲都咁香濃，係茶餐廳質素阿華田。總括而言，周末晚市呢個價錢呢個質素，非常滿意。…Read More

除夕夜想食韓式炸雞，本來想食李家，但冇預約冇位，唯有另覓炸雞，就搵咗呢間。入到去，侍應話今晚min charge $280，另加一，但太餓所以照入。一睇menu，佢啲嘢食唔貴，如果要meet到min charge要叫勁多嘢，好唔合理，唔明點解唔限時😑。第一round叫咗冬陰功炸雞、青檸芥末炸雞、泡菜煎餅、韓式飯卷。炸雞🤢炸雞只有雞翼同雞搥。兩款都好乾，沒有肉汁，又細隻， 裏面仲要唔係完全熟，雞肉本身亦好淡味。冬陰公味道正常，但青檸芥末味，兩種味完全唔夾，望落仲好似鼻涕。韓式飯卷😐飯太多水，好濕，配菜冇乜味，對唔上價錢。泡菜煎餅👍🏿反而泡菜煎餅幾好食，足料，多泡菜同彩椒，幾香，質感軟脆適中，調味剛好。嘢飲叫咗黃到金🤢，$58。呢杯簡直經典。呢個價錢成杯竟然一粒芒果都冇，係用平價芒果糖漿對水加冰。朋友叫咗杯曲杯沙杯都係完全冇奶香或oreo味，得糖水味。因為未夠數所以叫埋甜品，草莓窩夫👍🏿。反而呢個又有驚喜喎。窩夫新鮮熱辣，有蛋香有麵粉香，外脆內軟。有兩球雲尼拿雪糕，味道正常。不過士多啤梨薄到，成碟都唔知有冇兩粒。埋單$605，食咗好多嘢但不太滿足。尤其係叫咯咯雞但雞質素不行，嘢飲更是馬虎，對不住價錢。比較欣慰嘅只有泡菜煎餅同窩夫。總括而言，食物質素參差。價錢中規中矩，不過節日咁劏人法，不太欣賞，不會再光顧。…Read More

嚟到葵廣掃街，突然想食炸雞，經過繼光香香雞，就諗住試吓。叫咗無骨雞扒$35，中辣。雞扒即叫即炸，等咗5-10分鐘。一攞上手，首先雞扒好細塊，差唔多係豪大大雞扒一半，而且又薄又燶。食落乾柴，冇乜味，最明顯只有少少黑椒同辣味，好似食緊一塊炸嘅冇味雞胸。外皮新鮮即食都完全唔脆，只有好薄一層炸粉，係軟淋淋的。朋友叫咗細份鹽酥菇，份量不少，但都係冇味，皮亦都係淋的。總括而言，豪大大完勝。非常失望，不會再食呢間。…Read More

見到OpenRice有優惠$109一個包連薯條汽水，就諗住同朋友試吓。舖頭比較細，喺冷巷，少少難搵。去到叫外賣自取，10分鐘攞得。不過留意薯條同嘢飲都冇得upgrade，得regular薯條同汽水。行咗15分鐘返屋企，終於食得了。我叫咗個Mushroom cheese burger。一咬落去，首先感受到麵包非常鬆散，類似蛋糕質感，冇乜特別味道，個人覺得個包有啲咬口會好食啲。叫Mushroom burger, 以為係大啡菇，點知係切碎嘅菇整成嘅patty，所以係一啲都唔juicy，咬落去又係非常鬆散，冇乜特別味道，就係菇加鹽嘅味，而且煮燶咗，成個包都係一陣燶味。其他配菜正正常常，尚算新鮮，有蕃茄洋蔥酸瓜芝士，醬汁偏少，成個包都幾dry。薯條就係普通幼切薯條，攞到返去已經淋晒，都正常。味道同質感非常普通，麥當勞都好食過佢，只係勝在份量夠多。總括而言，唔明點解有咁多好評，性價比好低，Mosburger都好食過佢九條街。朋友叫咗cheeseburger都話唔好食。超級失望。…Read More

星期五大概6:30開始排隊，排咗一個鐘有得食。餐廳內氣氛唔錯，坐位不多，燈光偏暗。不過由於係主打食吉列牛，小小嘅空間充斥住油煙味，不過可以接受。冷氣都開得幾大。叫咗一個鰻魚飯，冇加定食，$78，唔使加一。等咗15分鐘送到。用木碟裝住，同埋用木匙羹，兩樣嘢都已經用到梅梅哋，觀感普通。賣相唔錯，飯粒煙靭。鰻魚唔算好肥，都算厚實，調味唔錯，夠味偏甜，汁都足夠。但因為冇其他配菜，所以食到一半會覺得好膩。最重要嘅係，食到近尾嘅部份好多骨。係細骨，好吉，唔係入口即溶嘅骨，每啖都有好多，好影響口感同食慾。總括嚟講，下次唔會再食。…Read More

下午茶時間去，叫咗一個鴛鴦手撕雞腸粉外賣，即係麻辣手撕雞加鹽焗手撕雞加腸粉，外賣$41。等咗幾分鐘就攞到外賣，都幾有效率。腸粉好滑，醬料甜醬同花生醬都比得好足。兩款手撕雞嘅調味都好食，會連埋少少汁，唔會乾。個人比較鍾意麻辣味，因為濃味啲。鹽焗嘅話如果溝埋麻辣同腸粉嘅醬汁，就會顯得有啲淡。但係最重要嘅係，雞肉非常鞋非常韌，有啲失望。$41嚟講份量算適中，女仔嘅話都叫食得飽，但唔好期望會有好多雞肉。但cp值唔算高，因為啲肉真係好鞋。雖然好鍾意食手撕雞腸粉，但應該唔會再幫襯。…Read More

喺深水埗做嘢，諗住求其食個午餐，就入咗呢間餐廳。叫咗個鹽酥雞扒肉燥飯加蜂蜜烏龍茶，total$58，諗住應該都唔會難食得去邊，點知...份量係多嘅，但個雞肉入面係一撻撻粉紅色，一咬落去，勁腥！唔知係放咗幾耐嘅肉。個皮仲要完全唔脆，係淋嘅。好少覺得啲野好難食，但呢個係我食過最腥最難食嘅炸雞扒。肉燥係普通免治豬肉，乾柴，睇相都見到係無乜汁，而且無乜味。成個飯啲味都好淡。蜂蜜烏龍茶就幾好飲。總括而言，雞扒極伏，肉燥好乾柴加無味，野飲ok，環境舒服，但絕對冇下次。…Read More

老闆娘好好人好Nice，好好笑容。見到OpenRice咁多好評，想食好耐，點知...叫咗個中份醬油炸雞。見住佢喺廚房入邊一大兜炸定嘅雞，以為佢會返炸先上菜，點知係直接加落啲醬炒下就算。所以啲雞係完全淋哂加唔熱。叫咗中份，份量都足嘅加咗三條年糕。啲雞就冇骨嘅，比較細舊，雞脾肉，所以都滑，但完全唔脆，仲要凍哂嘅炸雞，真係接受唔到。叫咗醬油味，個醬汁其實調得幾好味，唔會太鹹甜甜地好開胃。但係真係冇下次。…Read More

閒日夜晚七點幾來到，要等一陣間位。餐廳比較細，但都坐得舒服唔會太窄。裝修簡潔乾淨，木色為主。樓面得一個人，但侍應細心有禮貌。叫咗一個帶子蟹子白汁意粉同埋蒜蓉辣椒蝦意粉，加一個番薯薯條。佢啲意粉煮得啱啱好，唔會太硬，唔會太軟。蒜蓉辣椒蝦意粉少少辣，仲有炸乾蔥炸蒜喺面，幾香口。帶子蟹子白汁意粉，夠味好食。大推番薯薯條，新鮮炸起，外脆內軟。好有番薯味，面頭灑左啲糖，加埋黑松露蛋黃醬，好夾好好食，仲要淨係二十幾蚊！抵！意粉每碟大概50，抵食吖。會再幫襯。…Read More

突然好想食咖喱牛腩。個人麻麻日本／甜／唔辣／印度咖喱，即係想食嗰種濃味又辣辣地嘅咖喱。😂 行左一陣求其入左間茶餐廳，環境同衛生都麻麻，但是但啦，叫個咖喱牛腩飯先。盛惠$52無野飲，都算平過出面食了。見個環境同員工個樣都咁頹, 以為今次實中伏，應該係一pat咖喱隔離係白飯就算。點知！有驚喜喎，個樣唔頹，仲有啲胡麻醬沙律菜。再試下個咖喱，好夠味喎，又夠香辣，牛腩大部份都炆得夠林同入味，仲有埋牛根！好鍾意食牛根，通常出面要加錢，但呢度啲牛根又真係唔錯，炆到林哂同入味。牛腩同牛根分量都好夠，好滿足。Overall，地方唔算好坐, 但食物性價比高，會再黎食。…Read More

突然想食片皮鴨，近近地去左石圍角明星海鮮酒家。六點去到好少人，即刻有位，環境都寬敞光猛。因爲得自己一個，就淨係叫左片皮鴨$128。等左5-10分鐘到片皮鴨就到左，跟兩醬兩青瓜(記得以前係用京蔥)。啲皮就暖暖地，唔算熱，質地厚度都正常。但個鴨！勁凍勁乾，乾到個皮係韌嘅，好難咬。鴨肉乾到好鞋，一啲油份都無，唔知係咪放左好耐。食完有三塊西瓜送，再叫左個紅豆沙。個味道其實ok, 有陳皮味，唔太甜，有起沙，但係真係太多豆，好傑，豆多過水。Total $164, 食片皮鴨係幾平嘅, 但質量真係退步左好多，個紅豆沙真係唔多掂。不過以前食過佢啲小菜都唔錯嘅，下次可以再試下。啲姐姐都好nice。…Read More