港女師奶_c9modeon's Profile

一開始見OpenRice咁多好評，一直都好想試，今次難得即日book到位，就帶着男朋友開開心心咁去試 入到去登記，已經同我哋講一係就現金俾錢一係就PayMe俾錢坐低咗之後，見到個餐牌都即刻好興奮，又講到佢嘅品牌成立，對食物既用心咁點咗餐之後，就滿有期待等上餐叫左個一汁三菜，先來嘅係個凍豆腐見到賣相唔錯，滿有期待，一食落去，好多水，好多渣，未食過一個咁難食嘅豆腐，其實都幾難，心諗好好地買返嚟唔使煮加啲醬就可以上碟，搞咩 叫左個豚肉高麗卷，還好，但舊肉好似霉霉地個飯好似冷飯，又唔熱，一嚿嚿，好似返煮咗好多次咁 另外亦都叫左個慢煮叉燒烏冬，叉燒好食，煮得好淋，整體真係唔錯食到一半，叫咗個甜品就上咗嚟， 張枱完全冇位，個侍應完全冇意欲幫我哋整理，企喺度唔郁，旨意我哋騰空個位置俾佢。心諗甜品後上好正常，或者見到張枱冇位，都會問一問，呢個係最基本嘅服務，俾緊既唔係快餐店嘅價錢 。咁就盡快食咗啲野，將冇用嘅碟，就放喺隔離嘅吉枱，有個侍應好緊張咁即刻拎起，用消毒藥水係咁噴張枱，格主個口罩都見到西面，仲同我哋講可以叫佢哋收碟，男朋友話張枱細，個侍應仲好串咁話：係呀，你咪舉手叫我哋收囉，就發脾氣咁走咗去，心諗搞咩，其實都last order 左，你又唔會再入人，要執枱要噴消毒藥水，你咪之後先噴，唔使係個客食緊面前係咁喺度噴，另外，又心諗又唔係好多枱，見到食完又唔執，仲喺度咁大聲講嘢，又西面，嘢食再好食但咁嘅服務態度都唔使再有下次，何況嘢食又唔係咁好食 。都買單嘅時候， 問係唔係有PayMe，個侍應好似話我哋冇PayMe，得轉數快，仲好唔耐煩咁同我哋講個acct number，心諗而家係我俾錢，搞到我欠左你咁，呢間嘢又唔係特別好食，仲食到一肚氣，又唔係坐得舒服，真係唔使再黎。返到屋企，仲係好激氣，喺度睇食評，原來都有人話服務態度差，I'm not alone  咁就祝佢好運，呢間餐廳唔使旨意再去…Read More

這店比以前差了太多啦…. 記得年頭黎食，俾佢個招牌黑松露忌廉海鮮烏冬驚豔左，一直念念不忘，之後發現佢銅鑼灣有分店，就打算再食，點知個時話冇師傅整。 再一次到筲箕灣行山，當然好想再食! 仲帶埋朋友去食，點知唔食好過食，極失望而回，我估都不了。首先，一入到去就俾店員帶到去佢地叫後場既空間食，環境簡陋，仲慘過去連鎖快餐店，好焗促，最得意係所有店員都唔知邊張枱打邊張枱，每次捧餐入黎都逐個位問，去睇，感覺好差，已經好想走，但因為太想食個烏冬而留下。黑松露忌廉海鮮烏冬 – 差差..一上到黎，用匙羹舀左一下，都心知不妙.. 稀左咁多… 飲一啖就知出事，個湯底稀左好多，有味但唔濃，記得上次係好滿足，今次只有失望的味道三文魚好鞋，帶子冇味，朋友說只係整熟左放上去既味道。由於太失望，都冇咩心機食啦，呢間都不了朋友食既壽喜燒火鍋只可以話係正常，但唔值個個價🍴八沢🚗 地址：筲箕灣筲箕灣東大街59-99號東威大廈地下7號舖[港女師奶指數]抵食指數：🌕🌗🌑🌑🌑Encore指數：🌗🌑🌑🌑🌑…Read More

之前聽朋友講呢度燒賣好食，但嚟過兩三次都撞唔啱佢嘅時間，呢排有睇到佢嘅報導，話佢每一日都係人手製作自己包，令我更加想食，隔住個mon都流晒口水🤤，試到佢嘅真身！ 燒賣 $8/5粒今次終於比我試到，食落去係比較煙韌，食得出佢有魚肉味，真係唔係平時嗰啲燒賣，真心好好食，食一串真係唔夠。加埋佢個辣汁，少少炒香過嘅辣椒，簡直食唔停，差啲仲食晒朋友個串😂😂魚蛋 $5/5粒自己本身唔係太鍾意食魚蛋，又拎咗朋友一粒試下，魚蛋個質感比較厚實，唔係彈牙嗰隻，加上自己麻麻哋魚蛋，都係食返燒賣開心啲🍴林記小食🚗 地址： 石硤尾偉智里1-3號白田購物中心G25號舖[港女師奶指數]抵食指數：🌕🌕🌕🌕🌗Encore指數：🌕🌕🌕🌕🌖…Read More

紅茶冰室真係幾時都咁多人，食過幾次，佢嘅食物質素都係咁好，今次試埋佢個脆皮叉燒包，都真係冇令人失望。個皮係墨西哥菠蘿包嘅嗰個脆皮，個皮好酥鬆，入口即溶嘅感覺，而裏面嘅叉燒餡雖然唔係好多，但勝在味道好好，同個脆皮好夾，成件事食落去都好好味，唯一有少少不足嘅地方，就係叉燒唔夠，同個包底油多咗啲，但整體來講都好好食。🍴 紅茶冰室🚗 地址：觀塘駿業街56號中海日升中心地下[港女師奶指數] 抵食指數：🌕🌕🌕🌕🌑Encore指數：🌕🌕🌕🌕🌖…Read More

記得上年好多人打卡嘅甜姨姨棉花冰，今年終於試到喇，叫咗個黑極🌚－芝麻味嘅棉花冰，裏面有芝麻雪糕、芝麻、豆腐花。黎到嘅時候真係嚇咗一跳，份量真係好大🍨，嗰冰疊到好高，食第一啖就覺得芝麻味超濃，個冰好棉，食到裏面有一粒粒嘅芝麻粹，再加埋裏面嘅好濃郁嘅芝麻雪糕，感覺超級滿足😆，完全明白點解之前咁多人打卡，人氣咁高。佢仲有一個芝麻醬，話如果唔夠甜我哋可以落埋，加埋落去層次真係好豐富，食到最底，到豆腐花嘅時候，落埋個芝麻醬，味道啱啱好😋整體來講，好食好食，但如果個價錢再平番啲，就會食密啲，下次好想食佢個醬爆－花生醬🥜！🍴甜姨姨私房甜品🚗 地址：銅鑼灣耀華街11號地舖[港女師奶指數] 抵食指數：🌕🌕🌗🌑🌑Encore指數：🌕🌕🌕🌑🌑…Read More

同朋友行完山，就嚟咗呢間度食午餐，坐室外嘅位置，感受住微風，睇住啲小朋友喺度玩，真係好寫意！呢度叫個午市套餐，就會包埋個沙律飲品湯自助吧，叫一個小菜，大概$60-80幾，就可以有埋個自助吧，食到飽飽😙。我哋叫咗幾個小菜，柚子排骨，排骨好有柚子味，酸酸甜甜，好開胃，朋友都食到讚不絕口。黎到我最鍾意食嘅XO醬爆茄子斑腩，煲仔菜上嚟嘅時候好香，好惹味，食落去好香嘅XO醬，班腩整得好滑，茄子入晒味，送飯一流，但呢個煲仔菜都有少少重口味，但係好食既。最後有南瓜肉鬆蒸水蛋，個蛋蒸得好滑，加埋南瓜，甜甜地，好開胃，反而肉鬆就唔係好食到，細都見唔到，配埋個豉油一齊食好味。整體來講，呢一個價錢，有個半自助餐，真心抵，加埋呢個環境，喺天台吹着風，傾住計，食住住家菜，連朋友都話好似返咗屋企食飯咁，真心推介！👍🏻👍🏻🍴銀杏館 婆婆廚房🚗 地址：油塘高超道38號大本型空中花園R01號舖[港女師奶指數] 抵食指數：🌕🌕🌕🌕🌗Encore指數：🌕🌕🌕🌕🌗…Read More

見到呢間做特色卷物都好高人氣，就趁喺觀塘試一試佢，我哋預早訂咗位準時去到，結果嚟到嘅時候職員發現冇留枱，見佢急急逼人埋單，等咗一陣先到入座。呢度主打卷物，有好多款式，各有特色，揀到花多眼亂，仲有其他串燒、壽司、鍋物、小食，但係卷物既價錢就偏貴，加埋一，接近$100條，睇嚟都當然要試一次，我哋一共叫咗兩個卷物，兩個壽司、茄子燒、玉子燒。🍆 茄子燒上面係加咗櫻花蝦同埋個醬汁一齊燒，食落去有鹹香鹹香嘅味道，好香櫻花蝦味，都唔錯，但略嫌醬汁就鹹咗啲。🥚 玉子燒上面好多醬汁，基本上係食醬汁多過個玉子燒，醬汁就似食燒八爪魚丸嘅味道，但食唔到本身玉子燒嘅味，顯得有啲失色。 🍣 兩個壽司，三文魚同埋劍魚腩，三文魚就正常發揮，劍魚腩比較硬，唔夠鮮味，一般一般，呢個就真係比較失望。嗰兩個卷物，想碟都幾靚，但頓時間有啲失落，因為份量都好少，叫咗蜘蛛（軟殼蟹、牛油果、蟹柳、青瓜），同紅龍卷（芝士、炸蝦、吞拿魚）。兩個卷其實都唔差，裏面嘅雜物都係好鬆脆，個人鍾意食紅龍卷多啲，佢嘅芝士加埋落個炸蝦，味道好出，加埋上面塊吞拿魚，食完之後好滿足🥳；而軟殼蟹既蜘蛛，軟殼蟹嗰炸粉比較厚，感覺就麻麻😣。整體來講，係唔錯，但係有點略貴，2個人食都唔太夠飽，之後再去左搵食🥲，另外環境有啲迫，好嘈，呢個價錢可以食得更舒服。🍴古今二🚗 地址：觀塘觀塘道436-446號官塘工業中心4期1樓B室[港女師奶指數] 抵食指數：🌕🌗🌑🌑🌑Encore指數：🌕🌗🌑🌑🌑…Read More

一直都好鍾意食喇沙🍜，黎到觀塘就搵到呢間淨係開平日嘅餐廳，啱時間就一定要試吓佢，兩點幾去到，依然咁多人，令到我有啲期待，叫咗個蠔仔喇沙滲滲加多杯拉荼茶☕。最值得一讚嘅係個湯底係分開，拎走嘅時候唔會驚淋晒，一打開個湯底，嗰陣喇沙味撲鼻而來，令到我都忍唔住即刻飲番啖湯，一飲之後，就覺得有啲失望，可能係期望太大，個湯底比較普通，一般水準，冇咩驚喜，亦都唔會好濃；個蠔仔都幾鮮甜，唔錯，但拉茶就真係麻麻哋，好稀好淡味。整體來講，不過不失，但價錢來講就有啲貴，加埋杯嘢飲都要60幾蚊，但係見到佢個餐牌仲有好多其他嘅嘢食，都會令我想返嚟再試😶。🍴拿督星馬大飯店🚗 地址：觀塘海濱道190號觀塘碼頭熟食市場1樓20號舖[港女師奶指數] 抵食指數：🌕🌕🌗🌑🌑Encore指數：🌕🌕🌗🌑🌑…Read More

我真係好鍾意食心太軟🤩，以前黑布街有一間食焙茶心太軟，佢執咗之後係我心目中都冇一間可以取代到佢嘅地位，見到介紹有開心果心太軟，就即刻走咗去試，結果真係冇令我失望。食心太軟最鍾意係喺頂到開一個窿，之後慢慢食，咁先可以食晒所有裏面嘅流心，食第一啖，已經感受到超濃嘅開心果，即刻非常滿足🥰，個乳酪可以揀原味或者菠蘿味，第一次用乳酪去配搭心太軟，酸酸甜甜，個感覺都唔錯，同埋食乳酪個感覺冇雪糕咁邪惡，輕盈啲，罪惡咁都冇咁重🤪個心太軟真係一絕，開心果味好重，佢有啲應該係玄米脆脆伴碟，混埋一齊食，又多一個層次，仲有幾粒開心果，食埋真係好滿足🥳🥳。另外仲試咗佢個 cheesecake🍰 係比較軟身，而且唔係好重芝士味，個餅底比較容易散，輕盈啲，我自己鍾意食比較硬身同濃烈啲，所以都係推薦心太軟，見到佢有個榛子心太軟，下個月仲有期間限定嘅玄米心太軟，已經約咗朋友一齊要去試下！👭心太軟嘅超級粉絲😋🍴想甜嚐甜🚗 地址：西環堅尼地城士美菲路15號地下[港女師奶指數] 抵食指數：🌕🌕🌕🌕🌑Encore指數：🌕🌕🌕🌖🌑…Read More

呢排都係觀塘，就發現觀塘食個飯比起灣仔仲貴，選擇又唔係好多，啲價位都比較高，有朋友就介紹我去個飯堂度食，嗰度好平好抵食，雖然我成日都經過，但一直都冇入去試，今次終於的起心肝入去試吓。佢似係一間舊式嘅飯堂，但入到去就好有人情味既感覺，價錢真係好抵， 30幾蚊一盒飯，下午茶時間仲送嘢飲，喺觀塘來講都算係好抵，佢係下午茶嘅時候加$2仲可以叫早餐嘅嘢食，由於唔知食乜好，就試吓佢嘅早餐：炸紅腸米加火腿奄列再加牛油方包，加多杯茶走，外賣都係$31，呢個價錢真係冇得輸，早餐都食唔到。雖然都冇乜期望，個火腿奄列嘅蛋都炒得好嫩滑，紅腸就切到好薄，都方便咬，但個即係咁就一般，茶走反而有驚喜，個茶底好濃，飲到舊式茶餐廳嘅味道，整體來講，呢個價錢，都還可以，下次可以試埋佢既飯，呢間真係糧尾之選。🍴家樂茶餐廳🚗 地址：觀塘鴻圖道55號幸運工業大廈1樓A座[港女師奶指數] 抵食指數：🌕🌕🌕🌕🌖Encore指數：🌕🌕🌖🌑🌑…Read More

忙完成日，見到附近有呢間日式連鎖餐廳，就入去試吓，之前都有聽朋友講過，話係吉野家嘅高級版，一直都心思思想試。點左個鐵板角切和牛配燒魂丼，配個大福再加杯玄米茶。一上碟，最吸睛嘅係燒魂丼，一隻半山熟嘅蛋係中間，周圍鋪滿晒紫菜，淨係食呢碗飯都已經好滿足；反而個鐵板和牛既賣相就一般，雖然係連鎖店食和牛都冇太大嘅期望，但我諗起碼都可以加強食慾，一如所料，個牛唔太稔，反而有啲比較硬；個大福都係好一般，整體來講，呢間食過一次就已經夠了。🍴廿一堂 🚗 地址：將軍澳唐賢街19號天晉匯二期地下G08號[港女師奶指數] 抵食指數：🌖🌑🌑🌑🌑Encore指數：🌘🌑🌑🌑🌑…Read More

今日咁啱要去將軍澳搵朋友，當然可以錯過搵食嘅環節，一開OPENRICE，榜首就係呢間，當然要去試吓佢！一開始入坐嘅時候都好順利，非繁忙時間一去到就入咗，到點餐用QR code 揀好晒準備落單嘅時候，先發現要用佢指定嘅付款模式，如果唔係就要行返出去櫃檯俾錢，第一次嚟食都真係覺得好唔方便 （不過都應該冇第二次）叫咗個鹽酥雞排牌滷肉飯加多杯金牌咖啡，隔左唔夠1分鐘即刻上菜，我都心知不妙，但見佢個賣相都好唔錯，都有啲期待。食咗一啖之後，就迅速超級失望，嗰個雞排只係暖，嗰個炸粉硬晒，雖然真係冇乜油，但硬到完全唔想食，嗰個雞好鞋，完全係一碟趕客mode的飯，個滷肉飯冇乜香味，一個普通不過嘅飯，整體來講，賣相好好，但食落完全失望。  好貫徹地，佢個金牌咖啡都係失望之作，首先冇咖啡嘅香味，好淡。整餐來講，係超級失望。🍴桂花小幸 🚗 地址：將軍澳唐德街1號將軍澳廣場1樓133-135號舖[港女師奶指數]抵食指數：🌘🌑🌑🌑🌑Encore指數：🌘🌑🌑🌑🌑…Read More

Jollibee 一直俾人嘅感覺都係姐姐的集中地，好少人會去食，但係鍾意食肉醬意粉同炸雞嘅我就俾佢一個組合嘅套餐吸引咗，走咗去試，結果一試就愛上了。本來去連鎖快餐店都唔會有太大嘅期望，佢正常質素都覺得唔錯，但佢嘅炸雞又真係幾出色，個皮會脆，炸雞好有肉汁， 真係Juicy既，雖然佢個肉醬意粉係一般貨色，應該係話少少蕃茄醬再加幾粒腸仔，腸仔咬落去嗰個感覺就差d，但蕃茄醬都ok。整體來講咁嘅價錢都叫做中上，如果月尾想食炸雞同肉醬意粉嘅話，都真係會再返嚟，有時同朋友喺度坐耐啲都冇人講你走，因為都幾多位（當然我係指平日夜晚啦）。今次加咗個炸雞條，個雞條都有啲鞋，麻麻哋，都係食返我既至愛就可以。🍴 Jollibee🚗 地址：灣仔軒尼詩道310至312號地下——————————[港女師奶指數] （滿分為5分）抵食指數：🌟🌟🌟Encore指數：🌟🌟🌟…Read More

成日都想食漢堡包，但係一諗到佢乾爭爭，就會即刻揀咗其他嘢食，講咗四個月左右，今次終於的起心肝走去食，就去試吓朋友話好食嘅呢間，平時行過都見到幾多人，正所謂元祖師奶話齋食肆睇多唔多人就知好唔好食，特登同朋友去試吓。我哋兩個人，分別是雙層牛肉漢堡同埋魚柳包，各切一半，大家都可以試吓，個魚柳包嚟到嘅時候，都真係失望左一下，因為佢中間只係三條魚柳條，唔係平時見到一塊魚柳，個口感一定差啲，但係佢嘅薯條都好粗身，總算有啲期待。相反，個雙層牛肉漢堡一黎，大家都真係嘩嘩聲，事關佢真係好厚，睇落去都好Juicy咁，令人好期待。唔等得嘅我，影咗相之後就即刻食咗個漢堡包先，由於個包太厚，一啖真係食唔晒，食落去真係好多牛肉，但係冇睇落去咁Juicy，反而有少少乾，肉就夠味嘅，漢堡包個包軟硬度適中，整體來講不過不失，只能說一般。至於冇乜期望嘅魚柳包，因為只係得三條魚條，所以都唔係太有感覺，反而係有啲失望，嗰個奇趣雞反而令我哋更失望，其實佢似麥樂雞，但粉好多，連鍾意食麥樂雞嘅朋友都冇乜點食。整體而言，今次真係有啲失望，今次食咗漢堡包，可能在下次食都要等四個幾月，個人來講都係鍾意食啲有汁嘅嘢食。 🍴 Burger Home🚗 地址：灣仔軒尼詩道233號地下B舖——————————[港女師奶指數] （滿分為5分）抵食指數：🌟Encore 指數：🌟…Read More

每次經過都會看到一大張poster 宣傳日本的蘋果批，看起來很像很好吃，幾次都看到有顧客絡繹不絕，心想都想一試。今次放工，到店的時候，發現旁邊的 cheesecake 更吸引，就買左蘋果批旁邊的cheesecake，今次試一試雙層牛奶芝士蛋糕(官方的名字真的不記得了)。 店員介紹2個cheesecake 既分別，話日式芝士(又唔記得左名, 係平D 個個) 芝士就淡味D，雙層牛奶芝士就會濃味D，鍾意食得重口味D 既我就當然會揀個雙層牛奶芝士。返到屋企, 急不及特就拎出黎! 食一啖，上面的牛奶味真係好濃呢，好rich 既感覺，同中間既濃濃既芝士都好夾，滿足呢! 唯一就係個個蛋糕就冇咩驚喜，我諗如果係做埋曲奇餅底就真係不得了啦!佢其他cake 就冇咩興趣啦，都係蛋糕+cream 比較多，係揀既時間，聽到有個客要訂20幾件cake，應該係做散水餅，蛋糕$20一件來說都是一個不錯的選擇。下次都會有少少興趣試一試雙層朱古力的呢!🍴 Cocolo Tokyo Cake Factory🚗 地址：灣仔皇后大道東200號利東街地庫1樓B36號舖—————————— [港女師奶指數] （滿分為5分）抵食指數：🌟🌟 Encore 指數：🌟…Read More