heato's Profile

老實講，店名似日式串燒，點知入咗間中國日本奇奇怪怪嘅餐廳，餐牌不倫不類，無端端滲啲東北菜嘅嘢。如果諗住去食日本串燒，注定失望不過佢多散叫嘅麵食同飯類，叫做可以平平哋落樓塞飽個肚算數。串燒冇乜驚喜，叫咗牛肉串，太乾，硬柴柴。另外叫咗雞翼，叫做正常。另外餐廳衛生有待改善，餐枱上邊永遠有食物嘅漬，唔叫唔會有人走來抹枱，抹完你用乾紙巾再抹，都係黑色。落單自助，埋單唔該你請移玉步都係自助，叫咗碗粉，都唔會攞碗仔都係自助，你好難叫得郁啲員工幫幫手。生意難做，食客都唔係容易做。…Read More

食過9萬幾次，決定都俾個好評佢。好少呢類點心舖，一個人去飲茶扮孤獨的美食家都唔尷尬。最尷尬係，食餐飯，店員有機會叫你轉兩三次位，地方有限，就係咁啦。食物方便，所有點心即叫即蒸，時間都係要俾佢，因為新鮮整同一早整定，係食得出嘅。不過我試過蘿蔔糕入邊仲係冰嘅，不過店員都好幫手即刻處理。店員大部份都係譚仔阿姐，好似唔太明後生仔想講乜咁。叫做食物搭救啦，性價比非常高，簡單講，抵食大件，亦都算好食嘅。會再幫襯，抵佢開多兩間分店。另外，佢啲燉湯足料，唔貴，個雪梨糖水都非常好食，兩個人分享都足夠，呢個價錢，呢種材料，你阿媽唔係仲話要自己煲呀吓？…Read More

費事煮，是但搵間易搵位嘅中菜同屋企人食飯。而家有片皮鴨優惠，真係非常經濟。半隻鴨，加一斤石斑，雖然係養魚，但係一斤左右斑加酒樓蒸魚豉油薑蔥，覺得夠交貨合格，北京樓片皮鴨都係有保證，雖然而家好多酒樓都做緊，始終佢哋呢間老牌酒樓都唔會馬虎，侍應全部都係大媽，不過殷勤招待，但永遠唔會識同你講廣東話。另外加咗個鴨湯雲吞，係成餐最好食嘅一個湯品，耐唔耐都會嚟幫襯，鍾意佢傳統格局，都坐得鬆動，埋單落樓，同屋村價錢套餐都唔爭好遠。抵食。…Read More

朋友慶生午餐，餐廳揀音樂幾upbeat，啱晒星期六陽光下午。點了白酒sangria,encore 咗杯，另外杯mocktail 一般，普通酸酸甜甜Berry味道。不過配全tapas嚟講都夾到。octopus 質地自己唔太鍾意，太淋，冇咗原來texture. 個suckling pig 做得唔錯，夠脆肉味一流。食tapas 唔為飽肚，輕輕鬆鬆又一個週末下午。…Read More

weekend飯聚，兩個女仔，燒肉都食得唔多，嗌咗幾款肉，野菜，𧐢仔，再嗌個冷麵，啱啱好。燒肉質素OK，新鮮，選擇亦都叫多，但係肉質衰好，都要調味料錦上添花，就係爭咗呢樣嘢啦，失色咗啲。叫咗杯桃味乳酸梳打，但係都係偏淡味。臨走有一舊Mochi，同一個杏仁香精布甸餸，是但食咗佢就走啦。…Read More

生活艱難，傾生意，我永遠唔會待薄自己個胃。叫個商務套餐，乜都有啲，酒店嚟講又唔太難食。佢係老牌中菜廳，老實講商務午餐都可以好精緻，但係呢間，真心算冇嘢，價錢唔平又唔貴，可以有其他更好選擇。唯一剩低嘅，就係服務多，但係留意多同好又係另一個層次。點心界大把後起之秀，就算普通點心小店嘅點心都做得唔差，相反呢度就已經冇乜特色。話佢難食唔係，但你又唔會為咗佢嘅食物返轉頭，第一道蝦餃燒賣，合格，冇評語。另外灌湯餃，食完隻餃，冇想令你攞起個碗飲埋個湯。牛肉麵炆得夠腍，味道毫無無特別好。甜品，竟然係Hea到冇得再Hea嘅紅豆沙。鍾意食老陳皮嘅我，食咗三啖就放低了。如果今時今日，酒店仲覺得仲有好多人有興趣食佢$500一位嘅Hea餐，我都覺得摸不着頭腦。…Read More

個人特別欣賞呢種老式太太hightea Cafe，每次去到都會諗起城中富豪太太掌摑傳聞，令成件貴婦high tea時件特別立體。又一城食飯唔算好多嘢揀，唔太肚餓是但搵間西餐，服務算正常，特別欣賞佢對餐具同table setting嘅要求，餐具拎上手，係同其他食店質感好唔一樣，就係用緊以前舊式酒店有銀器嘅感覺。老實講，食物質素大不如前，但係擺盤，格調，服務，做足俾你成個Menu，可以揀嘅嘢食唔算多，就係可以俾你享受吓Hospitality嘅感覺。叫咗海鮮飯，同埋一個意粉，中規中矩啦用料係OK嘅，都可以返頭再食嘅。…Read More

對屋苑商場冇乜要求，食飽就算，都費事考究係唔係沙漠。呢間叫做朋友來訪，搵間Cafe仔傾吓偈餐廳。服務整體都算好好招呼。除咗一個長髮經理就比較特別啲，可能有啲高層嘅包袱。叫咗個意粉，釀雞翼，同佢主打嘅pancake餐牌上嘅意粉都試咗7788 ，最普通嘅cabonara反而OK，但係唔知點解成個餐廳，出餐啲嘢一概唔熱。當然pancake除外。pancake係好食嘅，特別鍾意佢唔係散晒黏立質地，佢蛋味比較重，用嘅蜜糖伴碟都係唔錯，見佢點綴都用食用花，都有啲成本嘅。但係佢個membership真心有問題，明明熱食再叫pancake係可以減$25 ，我，用積分去換$10扣減張單，佢竟然攞走返我$25嘅優惠。要扣我分仲倒加我$15 ，餐廳經理，係唔係唔鍾意我先？…Read More

朋友聚餐，各自叫一份嘢食，嗌咗個share plate 豉油雞翼。細個爸爸指定飯堂，最鍾意食嘅焗豬扒飯，只可以講回憶總是美麗的。實在，都合格有找嘅。豬扒起碼都唔算薄，個汁啡色似gravy 果種，以前D豬扒飯做法同而家元素蕃笳汁係唔一樣。叫咗個疏乎厘，叫做有啲喜慶感，話晒都有閑人生日，俾個面囉，頭咁大，夠威啦。…Read More

朋友聚餐，見到一大堆海鮮倒落枱度，用手食好似好爽咁，都冇預計啲海鮮會好正。起碼啲醬汁都會令你吮手指，點知，唔算失望，但正就一定冇佢份啦。主打嘅海鮮，好失色，反而普通到極嘅carbonara 意粉，竟然100分，sauce 唔立口，feel 到落cream 面糊感算冇乜。 因為有酒鬼朋友，encore 咗round beer, 所以就叫咗一客nachos送酒，份量好夠，唔錯，傾偈冇趕走我，算而家嚟講好值得加分俾佢了。service 都算friendly, 體驗都算過關。…Read More

過大海食葡國菜，當地澳門人介紹咗呢間。環境算幾靚，叫咗幾樣葡國出名嘅嘢食，包括鴨肉炒飯，葡國腸，豬扒飯，味道不過不失，馬介休薯仔，做法都幾特別，將薯仔切絲，同馬介休一齊炒。唔算惹味，勝在夠香口。反而好鍾意佢嘅墨魚汁麵包，質地冇得頂。$10，一個，買咗幾個返屋企慢慢嘆。服務來講，相當唔錯，去食幾次，每次都忍唔住俾貼士。…Read More

星加坡過江龍，由開業時不時幫襯，總有佢獨特之處。縱然有「抄名」黑歷史，品質算無損。cold & hot kitchen 都算幾好，茶品入饡香港好少，唔知點解，香港人就淨係識去食Tea。近年見佢慢慢都唔算太有心思寫個餐牌，不過值得一讚，食材同烹調佢係算堅持，價錢好難收好平，一分錢一分貨，環境氣氛咁多年來都係做到水準。其實好過以前中環太太Cafe，就係紅唔起，但係應該唔只得我一個鍾意你，請你堅持，唔好執。…Read More

家人晚飯，簡簡單單又一餐。叫咗個豬頸肉炒河粉、魚蛋河粉，椰青，同雜錦串燒。份量夠，調味輕手但豐富，食泰菜，一定食小店。最後叫咗個芒果糯米飯，椰漿調過味嚟，咸甜交配，好唔錯。service…唔講lu。…Read More

環境OK，服務都好。價錢偏貴，標榜食物質素，用料同烹調嘅堅持。呢個組合令我俾咗三次機會佢，餐牌嘅signature 我都試晒，老實講冇小儀咪芝蓮推介咁驚喜，勉強可以話佢係Cafe嘅清泉。但比$800-$900一餐飯去食清泉，呢個經濟環境，都係時候收一收。都多相熟捧場客，所以時不時都有大party，餐廳就會偏嘈，幸好餐枱唔算細，坐就會覺得鬆動啲。叫做比夠錢嘅補償。公平啲講，用料，心機，煮法，成本唔低，但以食客嘅角度，呢個價錢，可以食到更好食。…Read More

都唔知第幾次幫襯，座位越坐越衰，冇辦法，食物質素好，坐無影凳都會繼續食。果然係米芝蓮推介甜品，幾年落嚟，絕無Hea做，綠茶甜品通常都行穩陣冇驚喜，佢都耐唔耐更新餐點選擇，食甜品食到$200落樓，肉赤，但係嗰種滿足度會令你短期內唔使再去食第二間綠茶甜品。通常一入去，一定叫個套餐，佢杯茶都真材實料，一間舖頭唔覺得佢有任何服務，又貴，但係真係去親銅鑼灣都會自己送上門。你嬴。…Read More