JM.foodie's Profile

呢排見米線關注組好多人讚譚仔呢個出品- 烤雞炸醬撈米線, 呢個出品好似早幾年都出過一排, 啲人仲講到等咗好耐終於出返, 好似好好味咁, 所以早幾日經過譚仔就一於去試下! 佢預設係10小辣, 一嚟到見到中間咁大pat辣醬都嚇一嚇, 好彩食落去其實都唔係想像中咁辣~ 碗撈米線入面有一堆酸菜, 5舊雞件, 少少芹菜同芽菜, 一大pat 炸醬同埋中間嗰堆應該係辣醬嘅嘢, 我第一時間將堆醬撈埋米線試下, 味道嚟講我覺得雖然冇乜驚喜, 但都算正正常常嘅, 醬嘅份量亦都足夠撈晒成碗米線, 夾埋啲芹菜同芽菜一齊食令到口感更加豐富, 酸菜好爽口而味道都OK~ 不過啲烤雞件真係唔多掂...一食落口一大浸應該係梳打粉嘅味....仲要5舊都有呢啲味平時出街食雞扒都好少會食到咁樣味道, 真係幾失望! 希望譚仔真係改善一下.....另外啲米線亦都煮得太硬, 感覺食落肚會好易消化不良…Read More

早排喺網上睇到有post介紹呢間餐廳, 因為個店名幾特別又易記, 早兩晚同朋友搵地方食嘢就諗起佢, 即刻上Openrice搵下有冇餐牌, 見價錢唔貴就過嚟試下!  餐廳地方唔算好大, 大概有十張枱, 但樓底高所以空間感足夠. 一入到去見到旁邊有個放咗唔同酒類嘅櫃, 再加埋牆上嘅裝飾, 整個環境感覺令我諗起之前喺日本去過嘅洋風居酒屋~ 我同朋友都唔算好餓, 於是就隨意叫咗個冷盤, 兩款小食, 一款甜品同埋梳打特飲. 冷盤試咗牛油果醬麻糬多士 ($68), 上枱時有驚喜, 用咗隻Martini杯裝住一大球牛油果醬, 個醬味道豐富而且食落好fresh, 配埋熱熱地又好香嘅麻糬多士一齊食都幾match! 麻糬多士都做到煙韌軟糯嘅口感, 不過真係要趁熱食, 因為我地有一塊攤凍咗先食個口感就會冇咁正~小食試咗鐵板豆腐 ($52) 同埋蔥花牛舌 ($58), 鐵板豆腐係熱辣辣滾住咁上枱, 嗰下已經聞到好香! 豆腐上面舖滿木魚碎郁郁下, 賣相好得~  厚厚嘅豆腐配上蒜香, 醬油同埋木魚碎, 簡簡單單已經夠好味.而蔥花牛舌亦都唔錯, 牛舌切得夠薄, 口感幾爽而且一啲都唔韌, 牛味又夠濃, 呢個小食應該都幾適合送酒~甜品揀咗柚子檸檬烙芙 ($58), 第一次食呢種形狀嘅泡芙, 口感同平時食嘅泡芙一樣咁輕盈, 上面啲柚子檸檬醬都幾香滑, 最重要係唔會好甜, 幾啱食!梳打特飲就揀咗荔枝玫瑰梳打 (加配價$22), 呢個賣相又係好靚有兩層色:), 估唔到味道都好好飲, 原來荔枝同玫瑰味係咁夾嘅~ 甜度亦拿捏得剛剛好, 有清甜嘅感覺~ 呢杯下次一定encore!呢間小店坐得舒服, 店員亦好nice~ 食物睇得出好有誠意, 下次會再嚟試吓其他嘢食~…Read More

上年已經睇過呢間社企餐廳嘅報導, 知道佢地好有心幫人仲一直派飯比有需要嘅長者, 於是尋日專登去觀塘支持下!:) 呢頭之前冇嚟過, 但原來喺觀塘地鐵站步行大約4至5分鐘就到㗎喇, 地點都方便好易搵的~ 大約中午1點半到達, 座位都差不多坐滿8成, 可能仲係lunch hour繁忙時間啦, 不過好彩都唔洗等位! 餐廳雖然係快餐自助形式, 但環境和餐具等等都乾淨企理.餐牌食物款式都幾多, 除咗有cafe常見嘅漢堡包意粉沙律之類嘅西餐, 仲有中式燒味飯同埋每日3款嘅中式客飯,  相信係滿足返長者客人嘅口味! 今次叫咗一碟蒜蓉燒汁香煎慢煮雞扒意粉 ($52), 賣相相當唔錯, 份量幾大碟, 伴碟亦唔馬虎, 有一堆沙律菜同埋甘筍仔,車厘茄,南瓜,翠玉瓜~ 整體感覺有誠意! 燒汁亦都OK, 味道唔會好鹹嗰種~ 意粉煮得剛剛好, 口感仲保留到少少彈牙, 而最讚係塊雞扒, 煎得真係好香, 塊皮仲有少少脆脆地, 雞扒肉質亦都幾嫩滑同埋冇雪味! 唯一要改善就係啲蒜蓉炸得太硬, 有幾啖咬到仲驚係咪自己咬崩咗啲牙雖然睇返餐牌價錢比之前貴咗唔少, 相信都係因為食材成本高咗太多, 但以食物質素嚟講 依家呢個價錢我仍然覺得好合理, 而且仲可以幫到其他人咁有意義, 一定會繼續嚟支持有心做好事嘅人!…Read More

本人一直都係奶茶控, 但凡知道邊度有好嘅奶茶都一定會去試試! 早排有同事告知呢一間連鎖餅店嘅支裝奶茶相當唔錯, 今次專登去買嚟品評一下見佢張tag標榜支奶茶係冇加人造色素同防腐劑, 比起便利店買嘅應該會有益啲, 而且價錢亦唔會特別貴, 單買就$15一支, 如果買嘢就加$12蚊換購, 價錢都實惠~ 呢支奶茶味道亦認真唔錯, 一來甜度對我嚟講係啱啱好, 唔會死甜咁~ 二來口感嚟講係入口醇滑,  茶香明顯, 但唔會飲到茶澀嘅味道~ 茶同奶嘅比例亦都均勻, 茶味香濃之餘又唔會淹蓋淡奶嘅濃郁, 估唔到餅店奶茶會咁好飲, 絕對可以返轉頭!…Read More

繼之前發現凱施有款焦糖香草雞蛋布甸平靚正之後, 早幾日又發現到另一款唔錯嘅甜品, 就係呢隻蕃茄啫喱杯喇~ 價錢同樣親民, 賣緊12蚊一杯, 就一於買杯一路睇波一路食啦!蕃茄啫喱喺印象中真係冇試過, 今次仲係第一次食到呢種咁特別嘅質感, 平時嘅啫喱通常都係用魚膠粉製成而會有種煙韌軟彈嘅感覺, 但呢隻啫喱入口完全唔同, 可能因為蕃茄喺比例上份量足, 令你會覺得好似食緊凝結咗嘅茄蓉咁~! 食落口充滿濃郁蕃茄味, 味道清新, 成件事即刻變得好健康而我最關心嘅酸甜度亦拿捏得剛剛好, 食嘅時候連埋啲生果粒同埋cream食, 口感就顯得更有層次喇~除咗蕃茄味之外, 呢款啫喱杯仲有柚子味添....下次都可以試埋佢~ 不過相比起蕃茄味, 我估柚子味應該就會冇咁特別喇~…Read More

新蒲崗呢頭坐得舒服而食物質素又唔錯嘅cafe唔多, 之前行過Mikiki對面見呢間cafe裝修環境都唔錯, 門口雪櫃嘅韓式唧花蛋糕仲相當吸睛於是就入去試吓個午餐!嗰次試咗佢嘅紐西蘭肉眼牛扒飯配紅酒蘑菇汁 ($108), 套餐包埋飲品, 餐湯同沙律. 飲品可以揀幾款即磨咖啡同埋茶等等, 因為眼尾稍到佢哋部咖啡機似係正嘢, 於是就叫咗凍嘅Caramel Macchiato, 味道果然好ok, 夠香滑又唔會好甜....而餐湯係洋蔥湯, 洋蔥味好香都幾好飲~而主角肉眼牛扒煎得幾靚, 聞落好香, 食落肉質幾軟腍, 而且牛味夠濃~除咗塊牛扒, 我都好鍾意佢個紅酒蘑菇汁....兩者味道拿捏得剛好, 有蘑菇味之餘又唔會過濃, 伴碟亦唔馬虎, 有成堆紅蘿蔔椰菜車厘茄粟米嘅雜菜整體感覺好有誠意, 耍讚一讚店員服務亦好有禮貌又細心!!…Read More

早排喺美心MX食咗個tea都幾正~烈焰叉蛋包拼咖喱車仔三寶 ($35),  叉燒夾炒蛋嘅包好少見, 佢仲標榜自己係大師級叉燒添!個叉蛋包的確好唔錯呀, 拎上手個包仲係熱熱地, 雖然賣相唔太靚, 但係入面份炒蛋都幾足料又夠滑~ 啲叉燒Zip咗喺個包入面所以張相睇唔到, 其實有成五六塊大大塊㗎, 而且啲叉燒質感好鬆軟, 味道又好香, 有驚喜~至於咖喱車仔三寶真係比想像中辣幾多下....我冇諗過喺間快餐店都會有咁辣嘅咖哩.....三寶即係有魚蛋豬皮蘿蔔, 每樣有三件, 個咖喱汁食落好惹味, 唔怕辣嘅話呢個都幾好食~…Read More

見好耐冇幫襯過大快活, 早幾晚嚟食咗個咖喱雜菜蛋飯 ($41)~ 一見到呢個飯就令我諗起北海道嘅湯咖喱, 又係好多雜菜㗎!! 不過當然味道就差好遠啦啲餸份量都好多呀, 除咗有隻蛋, 仲有西蘭花, 椰菜花, 車厘茄, 茄子, 薯仔等等.....雖然白飯比較少, 但有咁多雜菜食完都好飽!味道嚟講, 個咖喱汁都唔差, 食落都幾香~不過....真係完全唔辣嘅!!!淨係計咖喱汁嚟講我會比較鍾意大家樂嗰款, 香濃惹味啲~ 不過雜菜蛋呢個配搭都相當唔錯, 啱晒我呢啲有時唔想食咁多肉嘅人!…Read More

之前行過見呢間餐廳環境氣氛都唔錯, 於是星期五晚嚟咗鋸扒~試咗佢嘅香煎美國安格斯西冷牛扒Set Dinner ($149), 套餐包飲品, 餐湯同餐包,我再加$15要多客炸薯條!餐湯係甘筍忌廉湯, 味道都幾香濃, 本身一見到餐包係牛角包好高興㗎, 點知拎上手就知道個包係微波爐加熱.....已經腍晒了....好彩客炸薯條幾正, 應該係即炸嘅~ 上枱時熱辣辣好好食~~ 而主角西冷牛扒我要咗7成熟...但食落發現有啲位置似係overcooked咗, 令到質地有少少嚡, 不過塊扒係煎得幾香!味道嚟講, 無論塊牛扒定係個黑椒汁都唔錯~伴碟亦唔馬虎~感覺幾有誠意~除咗有長賴賴嘅煎豆角之外 (不過好鹹), 仲有原條小甘荀同埋紫薯蓉, 碟上面仲灑咗啲黑醋同埋羅勒油, 令到成碟嘢更加香~不過整體就更油膩了~…Read More

早排有晚買咗呢個蛋糕回家做餐後甜品~ 事緣有次行過呢間麵包店, 見到呢個睇樣已經覺得好"朱古力"嘅蛋糕, 價錢$112一個又唔算貴, 對朱古力冇乜抵抗力嘅我就自然地捧咗佢回家啦......當晚食完飯一陣就忍唔住試試佢, 以呢個價錢嚟講可以話係超值! 成個蛋糕嘅朱古力味真係好香好濃郁~ 淨係舖喺面層嘅朱古力碎條已經好好味~ 佢個名叫做"比利時層層朱古力", 所以我估佢真係用咗比利時嘅朱古力嚟製成~ 切開入面就見到係有四層朱古力mousse夾住三層朱古力海棉蛋糕咁, 梅花間竹咁一層一層~ 啲mousse同海棉蛋糕嘅質感都好柔滑, 所以整體嘅口感係好smooth~ 而個朱古力味雖然濃, 但個甜度又拿捏得幾好, 入口唔係好甜好膩嗰種~ 更啱我心水~…Read More

早排嚟呢度食咗個常餐, 呢個常餐喺早餐時段就$37, 其他時段就$43. 個餐有好多種配搭, 我就揀咗火腿炒蛋, 即烘牛油多士同埋沙嗲牛肉麵!份炒蛋份量都ok, 炒得都算滑但係可惜只係暖暖地~ 最正係份牛油多士, 多士夠厚, 咬落鬆軟又熱熱地, 真係即烘㗎啵, 好味呀! 下次再嚟食都會因為份厚多士! 而沙嗲牛肉麵就中規中距啦, 份量都唔細碗, 而且入面都有幾多牛肉, 麵質亦唔差的~另外杯熱奶茶都有驚喜, 幾好飲, 茶味奶味都夠, 而且入口算滑呀!…Read More

間唔中都會嚟呢度食嘢, 一路都覺得唔錯, 但今次真心失望.....嗰日午餐揀咗“日式板燒一級牛肉眼扒配芥末籽燒汁”, 紫薯蜂蜜拿鐵, 跟南瓜湯同埋香草多士條!個湯同多士係無問題嘅, 份牛扒質地好一般, 個汁都食唔出有芥末味嘅, 而且個燒汁都相當鹹....而最差嘅係, 杯紫薯特飲望落好吸睛諗住應該好正, 點知一飲就發現係甜到痴咗線....!! 係來自蜂蜜嘅甜味...紫薯味只係飲到少少...真係唔知佢究竟加咗幾多蜂蜜落去! 仲飲到杯嘢入面有好多一舊舊唔知係咪蜜糖嘅嘢....最後飲咗一小杯就放棄...因為甜到開始喉嚨痛了另外有個男經理嘅服務都幾差下....會呼喝個客...而且相當無禮貌!...…Read More

早排有晚嚟咗吉豚屋打邊爐, 之前嚟呢度都係食吉列豬扒飯多, 見佢有個豚肉壽喜燒鍋定食 ($69另加一) 都係差唔多價錢, 咁就試試佢啦!個鍋份量好多呀, 堆到成座山咁, 主要係因為個鍋入面有超多娃娃菜同埋芽菜, 所以墊到咁高! 上面仲有唔少金菇, 日本蔥, 八九塊豚肉, 豆腐同埋生蛋, 真係超足料! 仲有成大碗烏冬添~(或者揀白飯都得)味道嚟講都幾好, 壽喜燒湯底夠香濃, 烏冬口感滑又煙韌, 材料又咁豐富, 我覺得抵食過又好味過吉野家啊! 啲菜真係食極都仲有....吸晒壽喜燒啲味道, 食完飽到攬住個肚!!…Read More

早排過嚟太興食個tea, 本身見到有星洲炒貴刁好想試, 因為好耐冇食過~ 點知原來得返米粉, 咁就照叫星洲炒米吧 ($49包熱飲)碟炒米賣相好得! 可能始終係下午茶, 份量唔算好大碟, 不過聞落真係炒得好香~ 材料都係用最常見嘅叉燒, 炒蛋, 洋蔥, 芽菜同埋雙色椒等等去炒, 雖然係下午茶份量, 但用料都算足, 夾雜唔少炒蛋, 仲有幾隻大大地嘅蝦仁~上面仲灑咗啲芝麻粒喺上面, 味道好香濃惹味辣辣地, 正!…Read More

早排行過女人街見到呢間蛋包飯cafe好似幾好, 所以又過嚟試下! 呢度主打係佢哋嘅日式咖喱同蛋包飯, 我就叫咗日式咖哩吉列豬扒蛋包飯 (午餐$58包餐湯)呢度日式咖哩都唔錯, 有微微辣再有啲日式甜咖喱味道, 而且超多咖喱汁, 啱晒我鍾意撈飯食嘅人~ 蛋包飯嘅蛋其實做得幾嫩滑, 但就似蛋蓋飯多啲....因為只係一份炒蛋放在白飯上面....唔係底面包住嗰種! 不過一匙白飯連埋咖喱汁同埋滑蛋+蛋汁一齊食, 我覺得都係幾好味的, 而且呢度裝潢佈置都幾靚幾舒服~比較遜色就係塊吉列豬扒嘅賣相...望落太淺色...而且豬扒都偏薄...勝在熱辣辣, 味道都可以!…Read More