ARYINN's Profile

心思思想食好耐, 終於湊夠腳去食之前去大阪都食過佢地既招牌 - 瑞可塔芝士梳乎厘班戟 一試難忘。今次係香港開業，一定要黎回味一下。環境方面，坐位都好舒服， 偏粉紅又有似雲既燈點綴， 好有日系少女風我地三個女人今次點了三個鹹食三個甜食< 特製咖喱雞肉三文治>呢個係大推薦👍🏻雞肉鮮嫩多汁，一D都唔乾身，味道好似Tandoori Chicken 配埋個香脆麵包同蕃茄生菜，完全係喜出望外 好味！<煙三文魚忌廉汁意粉>呢個係穩陣之選份量剛剛好, 差不多每啖意粉都有煙三文魚，都幾足料， 意粉個質感係我鍾意既有𡁻頭，唔會太軟身<明太子特製和丼定食>日式健康定食定食 除左有明太子，還有熱熱的日式高湯，層層的玉子燒，口感綿密細膩，再有傳統日式蔬食牛蒡，南瓜，蓮藕，手打雞肉丸 以及糙米飯，相信係健康之選 <招牌 - 瑞可塔芝士梳乎厘班戟>充滿幸福的感覺三層既梳乎厘Pancake 空氣感十足(食得出將蛋白打至豐盈）帶有濃濃的蛋香，加埋牛油和糖漿，食指大動， 果然不負我所望，拍得住大阪原店。食完之後，會有滿滿的幸福的感覺<雜莓梳乎厘pancake>打卡一流如果你喜歡酸酸甜甜的口味，呢個都唔錯依然有十足的空氣感，口感鬆軟，但蛋香未及招牌咁濃 配上微酸的雜莓醬，不太甜<黑芝麻pancake>濃郁黑芝麻 香滑而不膩因為友人都幾喜歡黑芝麻， 所以點左呢款扁扁的pancake。pancake面層睇得出黑中帶金黃 色澤剛剛好，而且每一啖都好似食緊芝麻糊咁香滑濃郁，又有麵粉香，意外既係濕潤度亦恰到好處，再配上黑芝麻忌廉和紅豆，非常討好…Read More

有日同朋友去旺角行街時口痕痕想搵d野食下，但又唔想食熟食，想食少少甜野但又唔想食糖水咁悶，於是朋友就帶我行左黎呢間am.pm，一見到佢地招牌有梳乎厘就即刻想試下，望落最好食好似係梳乎厘+3.7牛乳雪糕，諗都唔諗即刻叫黎食lu~結果不負所望~牛乳味超濃而梳乎厘又外冷內熱，外面小小脆而入面d cream就熱辣辣，加上一啖雪糕一啖熱辣辣既梳乎厘，造就成今次美好既回憶~下次再黎既話會試埋炎燒布丁梳乎厘，睇個樣都好似好好食~如果行行下街想食甜品，真心推介呢間餐廳！…Read More

話說同班同事放工即興食飯，但落大雨廢事出咁遠，於是又留咗係牛頭角食，行行下去咗間比較少去既小菜餐廳，蘭香園。入到去都幾地道，因為見到啲小菜都係耳熟能詳既，而且好多上咗年紀既叔叔嬸嬸係到食。本來想食沙薑手撕雞，但點知侍應話要預訂，結果只能食原隻沙薑雞，上菜果刻見到俾油浸住其實都唔太開胃，但試左隻竟然一啲都唔油，味道仲好濃！令人幾意外一而其他菜式都非常有水準！好似蒸水蛋用嚟撈飯超正，金沙豆腐配炸鮮魷都好脆口！不過埋單每人都要百幾蚊，價錢係有小小貴的！…Read More

夜晚同屋企人一家四口係元朗唔知食咩好，其他餐廳又好貴，諗住平平地搵間好食既都咁難，但好彩行行下去到乳豬大王，聽人講入面啲燒味都幾出色，價錢又合理，於是直接入去。入到去見到有set套餐幾抵，26x$左右（唔知有無記錯）一碟燒味+兩碟小菜+免費飲品+白飯任裝，除返開四個人每人都係6x蚊，夜晚嚟講都算合理了！而味道都唔錯，但雞加鴨比較瘦，無咩肉，有啲失望，但出色既反而係碟麻婆豆腐，麻得嚟又岩我呢個唔太食辣既人，撈飯一流，下次有機會都會再去…Read More

其實米線都係lunch幾好既選擇，但係夏天入面，除非有冷氣之外，我都盡量唔會食，因為食到身水身汁，本來以為譚仔冷氣充足，但去到場地又多人冷氣又細，環境真係好一般...:(因此今次我無叫到平時食開既十小辣，只叫咗清湯炸醬雞肉凍檸茶，朋友叫埋碟蒜泥白肉，味道仍然咁正，不過因為怕辣上更熱，嚟到抖咗幾分鐘我先開始食，但都食到成頭大汁，炸醬加米線係好食，但食到成頭汗真係唔太開心，都係觀塘廣場果間冷氣充足啲...…Read More

平時同同事都係食外賣或者出去食，但日日出去食實在太貴了！所以都要搵幾日食啲平平地又好食既野...臻味豬扒米線就係我地其中一個選擇之一！一來價錢便宜，二來係觀塘附近有得送去公司，三來味道都算唔錯，今日我因爲腸胃有少少唔舒服，所以就叫咗個清少少既手撕雞米線。臻味好既係會將麵同湯分隔送嚟，就唔驚啲麵浸淋，而佢手撕雞其實無咩味但勝在撈埋啲麵麵幾好食，再加埋啲酸菜花生都幾好食，所以呢間野食極唔厭，每星期都會食返一兩次先正…Read More

和同事ot後一齊食飯，本來諗住去九龍灣元氣食但去到九點令都好多人，因此同同事漫無目的咁走，跟住見到間日本野就走入去食了。間野就係今日既主角-別府別府出名既係地獄，因此佢餐牌上既拉麵都用地獄起名，但夏天熱辣辣唔想食拉麵，因此叫咗個平平地又好似幾好食既定食 - 網燒牛扒定食+飲品任飲。本身都好期待，但出到嚟有啲失望，只係用個細盒裝住，一啲都唔豐富，而且燒汁太濃，搞到成盒飯都好咸，蕃茄都十分難食，不過太肚餓既關係都瞬間食哂。但下次如果要用同樣價錢，再去呢間野我會說聲不了~~…Read More

粵海酒店一樓間Edenfa係新開，之前都未試過，但有朋友話新開轉型不如上去試下就帶我上去食。一去到感覺裝修唔錯，左邊自助拎野食，右邊係座位，感覺幾寬敞，唔似平時果啲自助餐位排到好逼咁。聽朋友講Edenfa係食main set+半自助餐，main set我睇左餐牌，幾豐富，但我唔食牛，就叫左一碟法式烤焗加拿大白雪魚，因為聽個朋友講話呢到白雪魚又滑又嫩，唔似得銀雪魚咁肉質咁厚，於是就試下。試之前就出去睇下半自助餐有咩食先，都幾多選擇。環境幾靚，都幾多野食，又有海鮮任夾。青口好好食，淡淡海水鮮味，肉質徘徊煙韌與滑嫩之間，一食就食左十幾隻，果到啲ham都有幾種，肉味濃郁，仲有其他精緻既前菜，值得一食，main set未黎之前我已經食左兩大碟。食完兩碟前菜之後，終於到主菜la~主菜就係呢碟法式烤焗加拿大白雪魚，一切落去塊皮好似硬硬地，但肉就好易脆，唯有用叉兜落食，本來冇咩期望，但一食落去個口感啲肉真係勁滑，入口即溶，魚皮炸到脆卜卜，簡直係皮脆肉嫩！比起普通銀雪魚滑上幾倍，亦都鮮味幾倍，再加埋頂上面果啲粒粒番茄碎，連埋一齊食個清新得黎又有鮮味，食食下已經食哂成舊魚同埋所有配菜了。食完唔夠喉唯有再出去拎野食啦，係時候食甜品了，甜品都係啫喱果啲，無咩特別，不過佢啲生果(桃同大樹波蘿)幾好食，而且食完咁多肉之後食生果個感覺係一流！唔記得講，果到啲紅酒同白酒都味道香滑醇厚，尤其係白酒，平時唔飲酒既我都飲左兩大杯，伴埋魚肉食，一時間個口腔有幾種鮮味滾來滾去，但又唔會減走對方既鮮味，而係互相映襯，彷彿感受到大廚費盡心機，做到流哂汗既精心佈置，幾重鮮味非常暢快咁係條舌頭到流竄...嗚呀，食過真係翻尋味，值得一讚！…Read More

而家夏天真係熱到痴線！夜媽媽出街都流到成頭汗，女朋友頂唔順話要食糖水，於是我地就行過去新蒲崗食，行過去十分鍾到但都出哂汗，不過一入間糖水鋪就好涼冷氣，爽！之後再叫冰凍既糖水食，仲爽！但我突然間想食雪糕，於是叫左個雪糕船試下，芒果+朱古力味既雪糕，配上小丸子、青檸啫喱、星星啫喱同埋糯米糍，感覺上一般，冇咩心思，只係將所有野撈埋一齊。雖然一般，但係果時太熱，食完之後都好爽！女朋友叫果個真係正，甜椰坊果然應該係叫椰子類既產品，呢個小丸子椰皇(唔係好記得叫咩名)，冰凍入心入肺，入面除左面頭既小丸子外，仲有椰味啫喱，椰子本身既椰肉，同埋少少既冰塊，味道又夠濃，食落去真係透心涼！正！…Read More

接女朋友放工後再送佢番去，肚餓冇野食又想食平平地，所以就去食出名平既薩莉亞。薩莉亞出名每樣野都平，但每樣野都細細碟咁，可能等你班友食唔飽叫多啲，雖然係咁，但係我眼中佢都有個好處，就係可以每樣都食下試下，於是我同女朋友兩個人就叫左四樣野。蒜蓉汁魷魚，好好食，煎得香口焦焦地，點埋汁咬落去加埋個口感，嗚呀~食到女朋友想叫多碟。水牛芝士pizza，一般般，普通芝士加pizza底，我都係鍾意上面鋪滿哂餸既pizza，但都唔錯既。蜜汁雞翼，我覺得好普通，但女朋友係咁話好食，冇辦法...佢最鍾意就係食雞翼。波菜辣汁意粉，我幾鍾意食佢，本身已經辣辣地，唔夠辣又可以加啲辣椒仔醬落去，雖然我唔食得辣但都接受到，幾過癮。冇叫任飲，埋單夾埋都係100蚊左右，抵到爛。…Read More

星期五又係team lunch既開心時間，上午11點幾就book聘珍樓飲茶，聘珍樓環境幾靚，又夠大夠高雅，比起平時食開第二間既好X酒樓好得多，食物質素亦是。開心菊花茶一壺。咸水角好食又脆口，外脆內軟，熱辣辣咁食真係一流。(隔離兜炒麵無食到，只係想食點心。)蝦腸皮薄精塋剔透，咬落去蝦同腸粉配合得天衣無縫，再加上甜甜地既豉油，又係一流。另外一流既就係佢地既椒鹽鮮魷，外脆內脆，咬落去先係脫卜卜既皮，後來就係魷魚既鮮味，口感堅韌有咬口，一條一條咁食我一個都可以食成碟！棉花雞都OK，入面果舊「棉花」吸哂雞汁好好食，雞都滑而有鮮味，唔錯。飲茶點燒賣是常識吧，食落肉多汁多，不過可惜既係冇牛肉球。…Read More

夜晚想食個晚餐，但彩虹村裡冇咩選擇，唯一揀間比較平既頂下個肚啦。見到五十嵐係入面咁多間餐廳中晚餐最平，晚餐最平既就係$38既和風牛肉飯，有面湯有野飲算係咁。野飲有熱茶或者凍柑桔檸蜜，我揀左凍柑桔檸蜜，一飲好酸，好難飲得落口，寧願飲水好過。和風牛肉飯，牛肉雖然好多，幾似吉野家既味道，但係勁油膩，油淋淋咁擺落口都幾難頂，啲菜又硬又苦，如果唔係嫌麻煩既話，真係屋企煮好過。唯一入得口既就係碗麵豉湯....唉，算啦，求其食啲野醫下個肚就算！…Read More

某日放工唔想番屋企食於是出街食，行咗一陣兜咗個圈，去到好遠，唉好攰又唔想行，又見好耐無食過，於是上咗去食譚仔。譚仔一如既往都係好多人，但一個人食最好就係搭枱，諗都唔洗諗就落單。雞肉冬菇十小辣，雖然我唔食得辣，但女朋友曾經鬧過我話去譚仔唔食辣不如餓死算，於是我就叫十小辣頂下檔先，但可惜既係熱辣辣既麵條加上酸酸麻麻既辣味，就算譚仔開行個冷氣我都食到出哂汗，不過食果時真係幾爽，而家一路打字一路流緊口水添...下次等冬天再食過，挑戰更辣。…Read More

彩虹邨地方唔大，但麻雀雖小，五臟俱全。入面既野應有盡有，但野食比較小選擇，不過有一間冰室可以話係日日都食唔厭，全因佢唔貴加抵食。一入到鑽石冰室就好有冰室feel，其實姐係茶餐廳啦，但係乾淨好多，啲阿姐都幾nice，又多野食揀，雖然都係快餐，但我一見到晚餐有燒汁煙肉豬扒飯就即刻叫，佢日日午晚餐都唔同，但都幾好食。煙肉豬扒大大塊，味道濃，飯適中，唔會偷工減料，肚餓果時食真係眨下眼就食完，食飽飽再嘆番杯凍奶茶，佢啲凍奶茶係我食過咁多間茶記/冰室中最好飲，茶味濃奶幼滑，一流！…Read More

某日接女朋友放工，佢有野要出旺角做，做完之後我地又唔知食咩好，於是不如話去深水埗到食豆腐花啦，豆腐花就一定食呢間 - 公和荳品廠。呢間野歷史耐，勁出名，我都唔花咁多文字去解釋，只係想講入面環境雖然逼，但係好有人情味，啲阿叔阿伯阿嬸阿婆係到大聲叫野食，有番咁上下年紀既伙計落單雖然有甩漏論論盡盡咁但我都冇介意，因為可以用人情味送飯而家香港有邊間得丫？而佢啲豆腐製品真係一流，熱辣辣既豆腐花每啖入口即溶豆味濃，我可以夠膽講話全香港冇乜邊間豆腐花好食過佢！佢啲炸豆卜同炸豆腐都係一流，點埋辣醬仲fit，而埋單都只係廿幾蚊，又好食又抵，真係爽到爆炸！…Read More