cristinameow's Profile

我個朋友話見過呢一間餐廳嘅好評，所以就喺話佢生日嘅時候同佢喺呢間餐廳食佢生日飯… 我哋喺一個月之前book咗位，因為都知道星期五晚一定會好多人… 我哋呢一日約咗1900，去到時候大概1910…一入到去餐廳就見到坐滿晒人淨係得返一張二人枱，因為我哋book嘅係三人，所以就覺得有啲奇怪… 入邊有兩個職員，一個係識講廣東話，佢同我哋講話其中有一台好快就會走，叫我哋等一陣，就安排咗我哋坐Bar枱… 但係我哋等咗10分鐘左右都唔覺得嗰兩個人會埋單… 我諗嗰個職員見到我哋都有啲唔耐煩，所以佢就叫咗其中一張明顯剛剛坐低嘅枱搬去二人枱，就讓張四人枱俾我哋… 因為嗰張枱係門口位，其實都真係有啲熱，加上佢呢間餐廳冇乜冷氣… 坐喺度咩都未做，其實已經開始流汗… 但係諗住如果啲嘢好食嘅話其實都冇乜所謂… 去到點餐嘅時候，我哋都有睇過好多食評就話佢哋嗰個烤全雞好食，所以其實都已經大概決定咗會點烤全雞，另外就係見到隔籬枱喺度食緊炒魷魚個樣好似幾好食，所以我哋就點多咗一份炒章魚，最後就叫埋泡菜煎餅… 我哋覺得呢個份量應該都夠我哋三個女仔食… 另外我哋仲有叫咗一個佢哋嘅米酒Cocktail… 一共有四杯，我哋係諗住每人試少少… 結果啲嘢食嚟到真係超級失望… 首先係個烤雞，上網見到啲人嘅食評全部都話個烤雞好Juicy，但係我哋嗰份烤雞嚟到超級乾，係乾到連平時鍾意食雞胸嘅朋友都話頂唔順… 個感覺就好似嗰份烤雞已經煮熟咗一次，然後佢哋再放入去個爐度焗多一次，搞到成份雞完全冇Juicy嗰個感覺… 之後我哋點咗嗰個Cocktail，我哋揀咗四隻味，但係唔知點解個職員完全好似冇留意我哋叫啲咩味，係比錯咗味道我哋… 我哋每人都試咗少少嗰幾隻味，分別係yoghurt Yuzi, yoghurt peach, Cranberry Peach, Grapefruit 味… 呢杯嘢嚟到只係得一個字可以形容就係甜… 嗰種味極度人工味… 完全冇諗過會係咁樣… 有兩杯直頭飲咗一半都飲唔落… 嚟到嘅炒章魚係最正常，但係一啲都唔特別，啲章魚嘅份量仲要勁少… 然後我哋都夾硬食咗大半份全烤雞，差唔多食咗個幾鐘，我哋嗰份泡菜煎餅都未到… 但係認真講其實都已經唔想食… 一來啲嘢已經唔好食依類就係我哋坐喺門口位成間舖頭又冇乜冷氣… 特別係嗰個職員出出入入，每一次出去都唔閂門，令到我哋坐喺門口位嘅人超級熱… 呢間餐廳仲有一樣特別嘅嘢就係，每一次有人入嚟好明顯都係book咗位，但係就唔會見到佢會有位留俾人… 而且職員好明顯都唔知道當日嘅Booking咁樣… 每一批人入嚟其實都有呢個情況… 所以如果係book咗八點幾嘅人，其實佢哋嚟到係一定冇位… 啲職員完全不在狀態，落錯單、又漏單、又控制唔到啲Booking… 去到埋單嘅時候，連可以用啲咩信用卡埋單佢哋都唔知道… 唔知佢哋兩個究竟係part-time定係點樣，但係呢個情況真係令到我哋三個好無奈，仲要係一餐生日飯… 最後我哋坐喺呢間餐廳度大概一個半鐘左右就趕住離開… 我哋望吓張單好明顯佢係冇落到泡菜煎餅… 但係我哋都冇打算再講啲咩只係想離開呢一間餐廳… 所以真係唔明啲好評係點樣嚟… 已經冇服務可言，啲嘢仲要係唔好食… 我係完全唔會再嚟，亦都唔會推薦任何朋友嚟呢度… …Read More

呢間食店位於Aeon同康怡廣場中間位置，最開初嘅時候超級多人排緊，最記得某歌手生日嘅時候，多人到係塞晒出嚟走廊… 見今日經過冇乜人，就走去試試… 佢餐牌都算多選擇，而且可以加錢跟一杯飲品（唔記得幾錢內）又或者加錢跟一份沙律加小食，因為今日唔算好餓，就點一份佢哋推薦嘅韓式醬燒牛五花吐司。結果份吐司嚟到我心知不妙… 份啲肉飛晒出面，我肉眼睇得兩塊，心諗$45應該唔會呱… 最後返到屋企一開，真係得兩塊有醬嘅肥牛，極少菜，一塊煎蛋… 心裡面真係講咗粗口…… 呢個價錢，咁嘅份量係咪少咗啲？唔知可以講咩好….. 失望到極點…如果想食吐司嘅話，我會建議大家去附近某商業大廈嘅某樓上舖食，價錢可能貴少少但足料200%…Read More

見太古城開咗一間新餃子專門店，作為餃子控梗係要去試下。平時真係好多人排隊，見今晚冇乜人排隊所以就決定一試。等咗5-10分鐘左右就有枱，一入到去好快已經知道想食咩，點知個侍應嚟到先講話個煎爐壞咗，得返烚餃.... 點解唔一早講明或者放個牌喺出面同人講呢？？唉... 是但啦，都坐低咗，咁唯有揀啲得烚餃款嘅餃子，下次先試煎餃啦。價錢上佢都唔算平，呢度講明係即叫即包，所以都等咗15分鐘左右。蟹粉餃首先嚟到，個樣同我想像中都有啲出入... 然後再試下味，普通到唔知點形容，佢唔係難食但唔知有咩特別... 然後海膽味，我食咗一件已經唔想食，佢個海膽味係有陣腥味.... 最後嚟到嘅泡菜豬肉餃係最正常... 你問我，我真係未必會再試....第一佢唔平，第二味道真係非常一般... 出面好多間餃子店真係會好食過呢間.... …Read More

平時都有叫開呢間外賣，因為我覺得佢嘅蕃茄濃湯通粉都正正常常... 今日叫foodpanda，點咗蕃茄濃湯通粉配鮮牛肉，另外咗時蔬，等咗半個鐘，結果嚟到滑蛋冇加到落去... 咁我都即時打落去問，諗住佢會即時配返俾我，打到去個阿姐單又攪唔清楚咁樣，講完一輪先話下次補返俾我... 我問佢點樣補，叫我再叫返foodpanda之後打返去同佢哋講... 真心好無奈，你比漏咗食物人，唔係應該即時送返俾人㗎咩？你仲諗住我係會叫下一次，等你再送返俾我，咁我下一次唔通食兩份炒蛋嗎？嬲到我.. …Read More

自己係呢度街坊，每日都會經呢間麵包店，從來都冇吸引過我入去。正常麵包店平時整好啲麵包都會有一陣麵包香味，好似附近另一間麵包店咁，你總會聞到或者見到佢哋拎啲新鮮麵包出嚟吸引你望兩眼，但呢一間我住咁多年都冇見過，所以我一直都冇想法去幫襯。結果，我呢排轉咗新工，返工時間趕咗好多，所以尋日喺差不多遲到嘅狀態下買咗個腸仔包。個收銀態度都已經唔好，呼呼喝喝，好似爭佢錢咁，再者，我已經係早上7點幾8點買個包，沿路一咬落去發現係凍冰冰，食落去仲要係好似已經擺咗一晚先拎出嚟咁！難食到我即刻掉咗！我之後再睇返食評，原來都有好幾個人都話呢間啲麵包質素有問題同態度差，我發誓下次就算幾趕都絕對唔會幫襯呢間嘢！…Read More

住喺長沙灣呢邊，真係好有口福... 因為好多好正嘅小店～ 呢間係我初初搬嚟呢邊就幫襯到我走嘅小店之一❤️我每次嚟幫襯佢，都必點大烤菇牛肉漢堡～ 牛肉多汁，口感又好... 仲要加埋芝士同大沖啡菇... 真係完全啱我口味！！我仲要加咗錢要咗個套餐，有埋薯條同汽水～ 呢度仲有一個經典牛肉漢堡餐，午餐價都只係$50，比其他包加錢轉餐平好多... 但呢個漢堡絕對冇因為係平啲而唔好食或者低質咗！所以真係抵到爛！！如果其他人會經過深水埗或者長沙灣，我絕對推薦佢哋嚟呢度食！…Read More

我個人好喜歡呢一間嘅生煎包，皮薄多汁... 呢個生煎包質素，又唔貴，真係抵食... 另外佢個豬扒真心大塊，肉質係好嫩，所以每次去幫襯呢兩樣嘢都係我必點！今晚唔想出去食飯，所以我喺網上外賣平台叫咗外賣... 叫咗4個生煎包，1份豬扒菜飯。我滿心歡喜打開個生煎包盒嘅時候，見到有一條毛髮嘅物體喺其中一個生煎包上面，我用筷子都好難先整得走.............. 嗰刻真係咩都唔想食..... 食物好食當然重要，但可唔可以注意一下衞生問題呢？…Read More

話說，呢一晚啲朋友同我去食生日飯... 幫襯左一間火鍋店，真係好難食.... 然後我啲朋友決定去搵一間好食嘅甜品店補返數！之前上網都見過一間野勁多好評，有陣時都好平都會好會中伏... 但係今次都決定去試一試啦...好好彩今次冇咩人排隊，等左10分鐘左右已經可以入座！佢限每個人都要點一樣甜品/飲品... 都無所謂嘅，咁我哋就一人點左一樣... 店員態度好好，又nice~ 最難忘嘅真係佢嘅拿破崙！我地點左士多啤梨拿破崙，佢個拿破崙整得好香、好鬆脆！我哋幾個好後悔只係點左一款拿破崙😂 其實佢嘅芒果窩夫都好好食！但係如果兩樣要比較的話，我真係鍾意拿破崙多啲～🥰好彩夜晚又來到呢度食甜品～咁我嘅生日飯先至冇咁失望❤️絕對絕對會再嚟幫襯！！！…Read More

朋友揀咗呢間嘢同我食生日飯，一人一個粥底打邊爐係幾好，至少揀返自己想食嘅味... 個湯底嚟到，真係淡到好似水咁，已經覺得好奇怪.... 諗住可能佢驚啲人打邊爐再加啲料個粥可能會濃所以都算... 咁佢個海鮮餐$188，嚟到啲海鮮勁少.... 一人一隻蟹仔、兩隻蝦、一隻鮑魚、一堆貝殼類嘅嘢.... 咁如果好新鮮，份量少都可以... 結果，除咗蝦，其他嘢都唔新鮮，我朋友話食到其中一個貝類仲要有怪味.... 然後望住張menu紙，啲款式好普通，又少選擇，真係唔知可以叫啲咩..... 最嬲係叫牛肉，佢平嗰隻肥牛係肥到不得了..... 好，我當你平嘢質素差，咁我哋都叫兩隻貴啲嘅牛試下... 一款係牛小排，一款係牛肩肉... 之後佢嚟兩碟牛肉，其中一碟同肥牛差不多樣，只係冇佢平嗰隻肥牛咁肥.... 我啲朋友仲以為個侍應嚟錯嘢，問佢呢碟係咪肥肉... 佢答係... 咁我哋梗係叫佢換啦！之後個侍應又叫另一個人嚟，之後再呢碟就係牛肩肉... 真係眼都凸... 我哋真係冇見過咁肥嘅牛肩肉，諗下碟肉嚟到我哋可以誤以為係肥牛就知係幾大件事... 我哋叫佢換過另一碟返嚟，結果都係咁嘅「肥牛樣」，直接叫佢取消呢碟嘢... 呢餐埋單除開人頭$300.... 幾個女仔食完都可以唔飽.... 最重要係唔好食..... $300喺旺角真係可以食到好多好嘢..... 食完第二日，我哋幾個個肚都唔舒服... 食到嬲.... 唔會再幫襯！！！！…Read More

因為太耐冇食過韓國嘢，所以今晚同男朋友喺food panda度揀咗呢間韓國餐廳嘅外賣... 然後我點咗個豆腐豬腩肉泡菜湯加飯... 個餐仲可以揀大中小辣，仲有粉絲可以加，感覺都好似幾好... 等咗30分鐘，個外賣終於到.... 拎出嚟都好大碗，望落去好似泡菜湯，仲有好多料... 但係一食第一啖，勁失望！！ 完全冇泡菜味，只有好大陣洋蔥味同辣味... 真係得個樣..... 完全唔係韓國泡菜湯嘅味道.... 如果大家真係要食韓國嘢，我唔會建議食呢間... …Read More

呢度嘅水餃好食係人都知，西洋菜餃更加係必食，我仲成日推薦俾身邊嘅朋友，如果去深水埗係一定要食西洋菜餃。西洋菜餃好大隻，而且皮好薄，而且個魚湯好好飲。之前食過佢嘅煎餃都真係好好食... 剛剛煎出嚟，唔乾又多汁... 正今次叫個炒麵諗住試下，講真，炒麵嚟嚟去去都係咁，唔會預有咩特別... 嘩！估唔到真係可以咁難食... 就算加咗醬都攪唔掂.... 唔會再叫...而且服務員嘅態度都唔好，不過去得呢一區，其實都預咗唔會有咩服務可言... 好彩餐廳環境尚算乾淨.... 但下次再嚟要點菜真係要諗清楚... 可能只係食餃會比較好...:(…Read More

雖然好多人話深水埗好多好嘢食，但其實有好多間餐廳都係伏... 呢間餐館係我屋企附近新開，見佢上次開張其實已經去過一次，嗰次冇影相... 我同男朋友兩個去食，叫咗個冰鎮咕嚕肉同金銀蛋菜，已經覺得好大份... 兩個人差啲食唔晒..今次午餐再去幫襯，個侍應不嬲都好親切，佢話除午餐嘅餐牌外，另一個餐牌啲嘢都係可以跟湯同熱飲... 於是，我叫咗個菜莆蝦球炒飯，個飯嚟到我都忍不住話「個飯炒得咁靚嘅」，隻隻蝦都好大隻，而且又係勁大份... 又有湯又有熱飲，只係正常一個午餐嘅價錢，但有晚市嘅質素... 真心可以係我假日嘅飯堂～ …Read More

剛剛搬到呢邊，而且有啲原因，成日都要好夜先食飯... 而我每次返屋企都會經過呢間泰國餐廳，仲要每次都差不多滿座，所以今晚決定試一試佢...佢串燒選擇唔算多，今次叫咗4串串燒、一份豬肉生菜包同一個椰青，雞肉串燒同雞腎串燒都好好味，而蝦餅同牛肉就一般... 但我最喜歡係佢個辣汁，點埋啲串燒夠晒惹味....豬肉生菜包都Ok~ 份量多，我本人鍾意食辣嘢，所以如果佢再辣啲我會更加喜歡咁多樣嘢比例上最貴係椰青，都要成$40個... 串燒都係平均$10幾數一串... 兩個人埋單每人$80左右，但食得飽.. 都算唔差... …Read More

我絕對唔係打手... 我都未試過食嘢係嬲到要出po鬧.. 我本身打算放上facebook鬧完就算，但我啲朋友叫我放上嚟等其他人唔好受害... 初初我見出面menu有介紹甜品，而且幾吸引，我望入間嘢望好似幾好所以我同男朋友就去幫襯... 入去嗰陣係有兩個女仔喺度表演.. 唱得好唔好聽都係其次，但支咪係大聲到我同我男朋友完全聽唔到對方講嘢... 我哋兩個人只係叫一份雞扒司華力腸鐵板餐配薯菜照燒汁同一杯椰汁紫米冰，杯嘢嚟到勁淡，啲冰仲多過啲紫米，都算... 個鐵板餐等咗我差不多半個鐘，中間仲要追咗兩次... 嚟到之後明明叫咗燒汁又冇俾，成張枱仲要冇义，我男朋友走去問個侍應：「唔該，我冇义用.. 」條友似開玩笑但態度好寸咁答：「我知我廢！」就咁行開咗，之後問佢拎返照燒汁態度仲要更差！到食落去嗰下仲嬲，啲嘢食嚟到樣樣有一大半都燶！點樣食呀？？好快食完呢啲咁嘅嘢連甜品都唔想叫... keep住聽兩把雞仔聲唱歌已經覺得好煩，啲嘢食遲仲要燶到咁，啲態度又惡劣.... 以後唔會再去呢間嘢...…Read More