一狼's Profile

深仔記卯咗，就行過嚟呢間，都唔駛我講，一睇就知唔正宗，蔡生話雲吞要喺碗底，要有韮黃，都估到湯冇大地魚味，中哂！點解有菜心嘅？麵太腍，味精湯，夠膽屎收$39碗（深仔記$36），佩服佩服。如果你想靜靜地打躉，滑手機同朋友吹水，呢間係好地方，好過坐對面公園，雖則裝修都有啲心思，有啲懷舊feel，侍應態度不錯，但20度都唔開「冷」氣，只開fan，打開門就算，有食客企正門口食煙又唔理，攪到煙味四處，想人返轉頭都難。…Read More

此店名號喺新蒲崗無人不識，竟然落腳旺角，野心不小，路過唔少次，而家先發現佢，食牛什考佢牌，聽過老闆佢嘅故事，都好似幾有心機煮嘢咁，新蒲崗飯店一啲都唔平，記得最好食係鹵水鵝。面頭幾啖湯又真係幾好飲，食到碗底先覺得都幾鹹下，牛什都正常夠腍，牛肚有過腍現象，加埋啲大腸起粉（仲有沙），有理由懷疑佢係隔夜嘅，唔多新鮮，貴人十幾蚊，一啲都唔值，只係幫佢交租啫，又畀名號伏咗（彩蛋：隔離枱阿叔投訴啲雲吞裏面凍，叫師傅焗耐啲喎）。…Read More

被稱為「大圍必食」，就緊係要試下，唔試就冇得_。餐廳細細間，非常懷舊，枱仔細細要坐四人，座位唔多，一入到嚟就問你幾位，安排你坐邊度，冇乜機會一人坐4人卡位啦。此店名物 生煎肉餅飯，開價$62(加熱飲要+$9)，充滿信心，令人好奇，食落就知唔係好多肥膏果種，但唔嚡口，大部份都係豬肉，仲有陳皮、土魷等材料，味道唔單調，油水唔多，真係煎出嚟嘅，外脆內軟，大大塊食得幾滿足嘅。飯有自製甜豉油，味道配合不錯，但只得幾條菜心伴碟，感覺值$50。…Read More

真係幾好奇疏乎厘都可以做專門店，唔試過口就會痕，呢家嘢唔係隨街可食到，印象中只係喺酒店自助餐食過，賣到仲貴過碟叉雞飯，唔食真係冇得_，所以拎定錢畀佢賺，如果甜品都整得唔好就出嚟行，就唔好怪人唔幫襯你。榴槤忘返要$60，都係慳皮啲食過大路啲嘅芒果味$50(但本menu標價$48)，結果都係幾好食嘅，似食緊天使蛋糕，微微地甜，等你食極唔夠，要encore咁滯，裏面係濕池池鬆泡泡嘅蛋糕，一定填唔飽你個肚，畀你一種青春美麗少艾向你欲拒還迎嘅感覺，等你下次唔返轉頭唔得，呢啲咪識做生意囉，不過我覺得自己整會好食過佢。…Read More

三日假期，緊係要食啲好嘢助興，所以栽程嚟到大圍，嚟食一碗幾貴嘅麵。網民大多推薦 海龍皇麵$138，所以就唔諗其他直接試。先嚟一啖鮮橙色嘅蝦湯，係幾鮮甜，但又唔係純蝦肉嘅味道，飲得出係蝦頭蝦腦蝦殼一齊熬出嚟嘅結果，不錯的。啲麵好幼身，亦都好快腍，再食下粗過手指尾嘅大蝦，感覺唔係新鮮活蝦，必係急凍嘢，即時覺得有啲掃興，除此之外仲有帶子，蟹肉都正常急凍嘢味，勿而軒唔係我杯茶，不足一提。可能真係希望愈大，失望就愈大，用咗兩餐嘅價錢食，駛大咗，下餐罰自己卯得食，當減肥。論呢麵嘅價值，頂多係$80。…Read More

呢間店有兩個舖喺埋一齊，一間賣鹵水鵝外賣廍，一間係主打牛腩牛什嘅餐廳，作為牛粉嘅我，就緊係要試試。室內座位較鬆動，坐得舒服，侍應招呼殷勤，但嘅係QR落單，係傳統人手落單。睇個餐牌，崩沙腩麵好有信心地叫價$58碗:)，掃落去就見牛沙瓜$48，最終貪新鮮就叫咗碗牛沙瓜麵，因為好少見到，更好少食。牛沙瓜即係牛嘅第四個胃，俗稱皺胃，佢啲皺頁炆到夠哂稔，有啲霉了，胃身就有啲彈力，有啲嚼勁:)，湯底話明係牛骨湯，冇欺場，鮮甜好飲，必見底，下次再嚟。…Read More

去到大隴街，多數都係食牛什河，今次就特登唔食，食其他嘢，行前啲就見呢間，舖面傳統，唔靚仔，但都車水馬龍，食客大都係麻甩佬只得返個近門口位，客觀認為應該唔係伏店，就大膽啲入去坐。除咗米線，仲有炒粉麵飯粥，碟頭飯，非常麻甩嘅嘢食。諗住簡簡單單又一餐，就叫咗豬潤米線$26(因為夠平又少食)，比想像中好食，豬潤厚身鮮甜有咬口夠粉，魔鬼美食炸蠔餅$48，脆到不得了，蠔仔比較大隻，夠新鮮，not bad，見廚師只係用煎pan煎，應該唔係用萬年油，所以食後喉嚨冇唔c服，好過廟街嗰啲，有時食嘢真係唔好睇外表。…Read More

聽聞有羊肉店新開，就專程去太子食，但羊雜賣哂，就去返附近華記食，上次食車仔麵，今次食牛雜麵，而家多葱多芫茜都要加$1，湯底甜甜地，似足兒時車仔麵嘅味道，牛膀好厚身，等於人哋兩塊咁厚，大腸邊嘅油脂真係卯得頂，但腸身明顯未炆夠，靭到咬唔開，好似條膠水管咁，卒之都係要放棄，嘥料，牛肺唔入味，金錢肚一樣咬唔開，可能係好生意得滯，煮唔切，其實唔應該畀人食，寧願停咗佢。本來對呢間店都有期望，今次嘅遭遇真係令人失望:(。…Read More

由於女友太多嘅關係，攪到前列腺有啲問題，就即刻諗到去呢間叫個騸牯牛肉麵$54補一補。呢度啲蕃茄湯貨真價實，絕不會係茄醬茄膏扮蕃茄湯，湯底有啲厚身，有啲料到，甜甜地，好容易飲哂。騸牯牛即係痷咗嘅牛，雖然唔多老嚟，但肉質真係滑啲，真係辛苦哂牛牛哥。日式拉麵都煮得唔錯，黏黏靭靭，恰到好處。場內有多個「良知」嘅大字，用心良苦。牆上仲貼埋其他餐廳嘅食物圖，互相幫助，夠哂大方。各位若真係操勞過度，就嚟攝取多啲蕃茄紅素啦，對身體好有益㗎。…Read More

喺隔離食完魚旦+豬手麵，加埋成$80都仲未飽，咁啱有茶檔，就走過去八下。見西多士張相都幾吸引，又好耐冇食西多士$22，見呢間咁出名，就破戒啦。傳統嘅西多士係有兩塊方包，中間夾住一層花生醬，再浸蛋漿炸，但呢件西多士薄切切，唔夠咬口，花生醬微量，花生醬唔係貴，麵包唔係貴，雞蛋唔係貴，咁樣西客就太孤寒了吧？不過都尚算香口，蜜糖只點少少就夠，因鍾意食蛋香。杯奶茶$15普普通通，冇乜茶味，奶水一樣，不足一談。都唔知點解佢會成名🦍?…Read More

Ricky 生(張錦祥)係豬手專家，佢話連續食豬手幾個月都唔厭，佢好推薦呢間，係佢飛佛頭三位，真係要試下。星期六兩點幾仲要排隊等位，見有半唐番仔+金髮鬼妹坐埋一台，喺度拍緊嘢介紹食品。一坐低就唔駛諗就叫碗豬手麵應援，睇落都靚仔，咬落又真係稔與實之間，虛與浮之端，雌與雄之交錯般，如果味道再濃一啲就更正。見搭枱兩個客叫淨墨魚丸同淨魚蛋，咁必然事有蹺蹊，唔食就執輸，二者選其一，就叫淨魚蛋。食落又真係鮮甜美味，軟滑可口，彷彿墮進無底深淵，不能自拔。但兩碗食哂，成$80都仲未飽，典算? 聽到老闆有熟客想買都唔畀，因為唔夠。佢仲話鍾_紅同_瀾都係長期買嘅，咁老闆對腳就唔駛要啦咁。…Read More

行經牛頭角道，唔想食咁heavy嘢，見到有粉麵專家店，有我嘅賣飛佛咪走入去試吓囉，未入去之前就睇到佢冇乜裝修，招牌白底紅字，個款睇萿好街坊好traditional嘅麵舖，好似好有歷史咁嘅感覺。入到去見門口旁咁啱有個凹位，最啱我呢啲單拖客坐，我諗都唔駛諗就叫咗碗牛什河。啖湯都幾香甜，金錢肚都半爽稔嘅，豬大腸又有肥膏，有油香，牛膀就例牌得一塊，罕有嘢，我明嘅，然後就食番啖河粉，做乜厚過豬皮咁呀?即時倒扣廿分，就好似將神奇女俠嫁畀豬八戒咁，嘥料呀! 河粉斷估都唔會係自己製造嘅，攞貨都唔好貪平，而家香港人食嘢都嘴刁好多，唔係學以前咁塞飽就算，而且碗麵唔係平，唔係$20，係$35，所以應該有番應有嘅質素，店內所有員工都係上咗年紀嘅，應該都比我識食，而且自詡專家，就唔好咁失威喇。…Read More

香港傳統糖水舖，賣少見少，好難搵到間真正好食嘅，網上有人評價呢間既傳統又好味嘅合桃露，剛好路經該地，所以就放心去捧場一下。本來都想試下亀靈膏，但好多人讚佢哋合桃露好食,所以都係揀咗合桃露嚟食。唔知係咪年尾收爐嘅關係，呢碗合桃露色水已經唔似樣，偏淺色，有網評話合桃露特別滑，但又唔多覺得，只覺得特別稀，唔厚身，唔掛碗，合桃味欠捧，只係一碗幾甜嘅糖水，我只可以講"伏"字，$26一碗，我寧願用粉沖嚟食了。…Read More

今日放下晝，去TST藝術館歎冷氣，兼且附庸風雅一番。又收到消息話馬家莊竟然結業了，好突然，我突然失去了我至愛嘅咖喱羊腩飯。嚟唔切去見佢最後一面，心裏懷念佢嘅㗎喱(嚟止對岸嘅惠記清真羊腩飯之咳)。咁啱又想去海防道熟食中心食嘢，咁啱openrice有人讚話佳記巴基斯坦咖哩正，所以諗都唔諗就去食，諗住可以懷念一下馬家莊。坐低後姐姐好好招呼，抹乾淨張枱畀我坐。我就點咗咖喱牛腩飯。飯嚟到就急不及待飲下啲㗎喱汁，嘩，我頂吖，又冇油香，又唔杰，水一樣咁，只得辣椒嘅死辣。就算係茶記都唔會出呢啲貨式畀人食，牛腩係腍，但唔香唔辣兼冇味，好似浸水浸咗幾晚嘅肉類咁，一啲都唔好食，食佢係嘥quota，唯有放低$54走人，投訴亦冇用，佢唔駛我教，即走去隔離冇幾遠食豬扒雙蛋飯沖喜下。呢個世界高處未算高，低處也未算低。現今飲食世界從來都競爭大，就算係一個冇冷氣供應嘅熟食中心。你唔畀心機，心存僥倖，那怕係一次，就會永遠損失一個客。你覺得我唔重要，但千千萬萬嘅我亦會出現。…Read More

本想去好耐未去過嘅葵廣踩場，睇下有乜新意思，但兩腿唔聽話，行到葵興站就罷休了，心諗葵興都可能有好嘢食。唔想食茶記，好耐冇食燒味飯，見興盛咁近咁大間，有燒味食就費事再行，就入去喇。見兩位青春少艾啱啱食飽，心諗呢間都應該唔差啩。咁就直接叫賣飛佛叉油雞飯，熱奶茶。星期日，兩點鐘冇乜人，靜靜地幾好，碟飯好快就到，頂吖，係又燶邊又有白白肥膏嘅叉燒呀！唔似係賣淨，唔似係隔夜嘅叉燒呀！食落又香口又濃味又爽口，我真係以為去咗間高級酒樓呀！差啲好似家燕姐咁叫出嚟：好好味呀呀呀呀呀! 可惜油雞係畀咗雞翼位我，都預咗唔會兩味都畀好嘢我，仲有個老火湯，有蓮藕章魚，有陳皮味，唔係例水咁簡單，係令我感到家庭幸福嘅湯水。唔夠喉再叫杯奶茶，本應要+$16，但姐姐幫我改一改單，當係跟餐，咁就慳番$8，抵讚。我一條友，有手臂擱在椅背上，輕輕鬆鬆歎茶，感覺真係好正，雖然環境不比什麼cafe好，但味覺嘅滿足同呢種無拘無束感至係我最like嘅感覺。我下次一定會再嚟。…Read More