好好味吖's Profile

早係十年前係旺角花園街有一間叫香格里拉嘅米線鋪，大碗味濃又多餸，但鋪租與競爭底下結業無奈可惜，近排得知觀塘開咗間同名嘅米線鋪，見狀就好想去試下係咪昔日係旺角花園街果一間呢。今日就叫個兩碗麵。香格里拉薯粉($58) - 酸辣小辣即係依家好興嘅大碗乜野餸都有啲，先講個湯頭先，酸辣湯係偏酸，酸味偏重而辣味不減，小辣與譚仔差不多；丸類就一般般，其餘配菜同為一般或過熟，唯獨是有兩片肥牛生熟程度剛好，其他真心一般。酸辣米線 ($44) - 酸辣小辣多酸兩餸，韭菜鹵肉線，韭菜鮮嫩，有少少脆口，鹵肉就入味同淋滑嘅，與大碗什錦嘅餸菜相差什遠，湯頭多了酸菜，食味比大碗什錦更係優勝。食後估計應該是同一間來的，單餸米線味道與以前差不多，味濃餸多及抵食，而大碗就得多料無食味就一般。…Read More

持名大埔廿幾年嘅大埔醉雞麵，我諗絶大多數大埔人都食過，但去到今日食佢嘅醉雞麵都係要排隊等食，今日中午1點我同太太兩個都要等咗15分鐘到先可以安排入座食晏。醉雞 有花雕味但唔係好濃個隻，適中，有淡淡啲話梅味，花雕浸得啲雞肉入味但就一定唔會係滑，有啲啲鞋口，但皮係滑身嘅，可以接受，整體雞係入味，係口感差啲。湯河正常潮式鹼水湯河味。蝦子撈面面底唔夠乾身，碟底重有啲水份係到嘅，但蝦子份量多同夠鹹香，而面底都夠煙靭，不錯的。埋單人均50，雞夠大件，味道亦唔難，到今時今日一間面家都要排隊先可以食得到，我諗一來係好食夾大件，二來係食佢嘅人情味，三來係食佢夠黃。…Read More

近依幾年香港越來越多美國連所burger專門店嚟香港開設店鋪，而Shake Shack香港嘅特許經營權係由美心攞到嘅，先唔講佢黃定藍背景先，Shake Shack嘅burger 我係美國食過好幾次，水準同服務都係中上水平嘅，而Shake Shack係沙田開分店又係點呢，就等我同大家分享一下。Smoke Shack Double ($87)先講講個面包先，係好鬆軟果隻包底嚟，可以好似海綿咁吸啲肉汁醬汁嘅，有烘底，但唔夠脆，我諗係為咗更好咁吸汁所以固意唔烘都咁脆邊嘅，牛肉肉味好濃生熟程度剛好還有好澎湃的肉汁，車打芝士同樣味道較濃，非常美式口味，煙肉好乾身脆口，咬落會帶點靭，食到煙肉鹹香味，而櫻桃辣椒粒係一個神來之筆，把成個Burger食味升華，變得有層次，從一開始咬落一個鬆軟面包，到爆汁的漢堡牛肉至脆口到有咬口嘅煙肉，口感已經相當豐富，到食味由鹹，辣，濃郁調和，整體好balance，好食。Shack Burger Double ($77)依個就係無咗煙肉改為配生菜同蕃茄，食味就無Smoke Shack 咁複雜，有啲單調，但就清新一啲嘅，我個人就覺得Smoke Shack 好食好多，因為Smoke Shack 惹味好多呢。Fries ($28)正常茶記薯條，無乜特別。石榴西柚汁 ($43)果汁一杯，無什特別。真心佢哋burger係好食嘅，由包到餡料都有用心製作嘅，配合得好好，俾70-80係值得食，而佢啲店員都好勤快地方都打理好整潔，撇除黃藍係會幫襯嘅。…Read More

早半年肥仔黎係排隊排得好誇張嘅一間人龍店嚟，基本上佢都只係靠賣一樣野就可以吸引到好多人排隊買，果樣就係鹽水雞喇，咁就已經可以證明得到佢哋嘅鹽水雞係有幾咁好食喇，難得熱潮已過，見到無人排隊，就試一試佢個鹽水雞係有幾咁好食喇。門口有個好CUTE嘅LOGO係肥仔黎本人嘅Q版，暖簾上面有肥仔黎個patpat圖，就知佢哋係行玩味輕鬆路線。我哋就order咗一份鹽水雞，加咗三個小食，鳳梨，芭樂，青瓜。先講佢個雞，份量係多，雞件個size大細剛好，一口一件，雞大至上都係嫩滑嘅，果個鹽水汁鹹味適中，不錯。鳳梨好甜，明顯係台灣貨，無呃人，多汁好食。芭樂爽口得嚟清甜，與鹽水汁好夾。青瓜脆口，清爽，好食。雞件與配料小食共吃時會有不同的口感(爽口、脆口、滑身、爆汁)及食味(酸、鹹、甜、辣)，可以互補及提味，重點只係58蚊就可以食到咁嘅美食，絶對超值。…Read More

位處於何文田太平道嘅black sugar係平時我最常會去hea嘅cafe，佢有兩個鋪位，一個係廚房連座位嘅，空間較細，得十零個位，位與位之間好迫夾，完全唔好坐唔舒服，但係喺佢旁邉另一個相連鋪，空間就大好多，有啲門口位，可以俾你放住狗一齊hea，而依度係全自助式嘅，由落單，取餐，湛水到食完清返個位都係自助式嘅，咁樣其實幾好，hea坐就最怕有個店員扮到懶有禮貌咁收你啲野其實就迫你食完就好走，依間鋪到係完全唔會發生依啲情況。講返食物先，食日我就order咗一個salad 同雙杯野飲，成為齊頭兩百銀。Parma Ham Salad ($98)沙律菜好新鮮，明顯有揀過嘅，調味有少少黑椒，黑醋同橄欖油，正正常常，HAM就係三片，同樣係正正常常咁。Iced Americano ($40)咖啡味係帶濃烈酸味，飲唔慣咁酸嘅可以係自助區加返啲水去溝淡佢，還掂americano就係espresso溝水，自助區可以令你更加容易搭配自己喜愛嘅味道呢。Ice Super Fruit Tea ($45)正正常常嘅一杯水果茶，但同樣係偏澀，同樣地唔啱飲嘅話自助可以幫到你呢。食物價錢雖然係偏貴，但勝在真係無人迫你交枱，完全可以做到cafe hea住hea住咁樣嘆吓或係到睇下書，傾下偈都絶對係一流呢。…Read More

韓國飲食文化伴隨著其娛樂文化一併入侵香港，Outdark就係其中一間韓國過江龍，今日就食咗一個海鮮煎餅 同炸雞，食味就同食開嘅韓國菜一樣，外加腌料味好濃。海鮮煎餅($118)  - 煎得唔夠脆邊，配料講真都算得上多，食味口感都叫做豐富嘅，但118得咁細份，有啲貴。甜辣炸雞($178) - 有啲乾身，辣味同甜味唔係好平衡，偏向甜身，如果可以辣返啲會更好，雞肉有啲乾身唔夠肉汁嘅，外面係脆口嘅，整體嚟講係一般。炸芝士($35) - 炸芝士就好一般，但其實係炸得唔錯嘅，係芝士來貨一般，得好淡嘅芝士味，我覺得係水芝士嚟，如果改用車打依啲味道濃啲嘅芝士去炸會好食多好。另外我哋叫咗兩枝Soju，埋單420，一人$210，我覺得係貴嘅，因為份量係偏細份，味道亦唔係特別出色，係佢啲裝飾燈光令到你覺得幾有韓式氣紛嘅。…Read More

ATUM近期多數都係食TEA時間嚟食，難得好朋友生日，又想同佢服舒食餐好，就揀咗夜晚食佢個最出名嘅Seafood Platter，同按期更改嘅餐牌。Seafood platter ($598)海鮮基本上新鮮就會好食，而ATUM嘅Seafood platter出名嘅地方係佢嘅Seafood platter係唔止新鮮，佢嘅擺盤，Sauce，同配菜都做到把食物升華嘅作用。先講講佢有啲乜野食先。生蠔 - 係Scotland貨，爽脆，帶微海水味，配上佢地嘅柚子啫喱汁，一鹹一酸，好配匹。帶子 - 大大隻LLL SIZE嚟，肉嫩有帶子鮮味。海膽 - 日本馬糞海膽，好甜，完全無臭味，新鮮份量不少。煙三文魚 - 挪威貨，大大片，色水好靚，似係野生三文魚。凍鮑魚 - 幾好咬口，唔會話好靭，但無乜食味。生拆蟹肉 - 鮮甜，蟹肉拆咗成球，一啖食落口，好滿足呢。虎蝦 - 幾大隻下，但肉質唔夠爽彈。鴨肝醬 - 小鹹，配返佢嗰啲sides，完全可以佢嘅鹹味，同可以食得到鴨肝醬 嘅金香。waiter係我哋用餐前會好循例咁講解一下Seafood platter有啲乜野海鮮同食嘅次序，如果講解時可以講慢少少同俾啲笑容就perfect喇。Roasted Cauliflower truffle cream cheese ($78)依個係幾驚喜嘅，椰菜花烤到好淋身，無散失食味，又可以做到無渣，truffle cream cheese將無乜食味嘅椰菜花提味不少，清新得嚟又濃郁，食材嘅口感又顛覆咗本來嘅想象，一絶。Crab Meat Trofie ($178)鹹蛋黃蟹肉Trofie ，鹹、鮮、煙靭就對佢嘅評價，食味好平衡，好食。經open rice book枱時講定係興祝生日重有個甜品送添呀，係個紅桑子雪杷比利時朱古力脆片，作為一個帶完美嘅結束，與伴侣經歷一個美好的晚上呢。…Read More

每次去聯和墟都會經過呢間餐廳，都會被佢外牆個圓型大鐘所吸引，對比佢附近其他小店嚟講佢嘅價錢較貴，所以一直都無幫襯。但今日眼見Lunch時間其他鋪頭都人頭湧湧，對比起佢叫做少啲人排等緊位，加上食評唔差，最後決定一試。黑松露香蜜雞翼($68)炸粉好厚，雞翼大大隻嘅，炸得幾好，重有肉汁嘅，雞翼係無黑松露同蜜糖味嘅，係果一兜汁才係整做食味來源，但蜜糖太勁，完全搶咗黑松露嘅香。土耳其羊肉卷($88)羊肉烤得香脆，有炭火味道，卷皮有啲厚，但配佢嘅醬汁又幾夾，整體而言不錯吃的。燒美國黑安格斯西冷 ($138)生熟程度幾好，內裡還juicy的，牛味濃，幾好食。INEDIT damm beer ($88)依枝啤酒幾好飲，好重蜜糖味，好易入口，不錯。…Read More

維記 - 深水埗馳名豬潤麵，由細食到大，由從前成碗白泡湯到今日個湯頭無乜泡就知道維記都着重咗相頭要好，才能吸客。今日去深水埗買喇叭，特登嚟食返碗豬潤麵，無從前咁好食了。豬潤牛肉麵($35)湯頭清咗好多，重前的白泡係啲豬潤水嘅沉澱物嚟，亦都係個湯頭鮮味嘅來源，一見個湯頭清咗咁多，就心知不妙，一試果然係無咁甜，但都唔可以話清，係由甜變咗做偏鹹，有啲失望呢，豬潤就都係厚切，生熟剛好，無煮到過老，食到粉嫩同少少彈牙，好食嘅，牛肉都係，無過老，有肉汁都係好食嘅，麵底就偏硬身，本人鐘意咁嘅口感。咖映西多士 ($19)香脆，帶蛋香，咖映味唔太濃烈，西多士都叫做煎得唔錯嘅。雖則話就話佢差咗，但期實都係好食，食得過嘅，始終你想三幾廿蚊貨仔你都佢俾啲乜野你食呀，咁嘅價錢，其實已經好唔錯嘅喇。…Read More

㗎仔飯鋪位細細只有6個座位，但坐落一都唔迫夾，店主將狹窄的鋪位都可以令到食客可以坐得舒服，抵讚呢。嚟得依到都係食佢嘅招牌日式咖哩豬扒飯。日式咖哩吉列豬扒飯吉列豬扒炸得香脆，厚度適中，肉還帶汁，極好！飯係用珍珠米，煙靭得嚟又好掛咖哩汁，完美配合。便當嚟講好食。咖哩汁係分開上的，入面重要有幾舊煮到好淋入哂味既紅蘿蔔，日式咖喱汁帶甜甜，好好道。店鋪雖少，但睇得出有心思放係食客到，不論係裝修，擺枱櫈特細微位，都看得出心思，推介呢。…Read More

下午茶時段，發現佢嘅有個Tea set好似幾吸引咁，78蚊就有一個刺身丼飯食，從來都未幫襯過佢，因為佢除咗下午茶時段之外，午餐、晚市同啲主食都唔平吓，係新城市大把選擇，average嚟講唔會揀佢，今次見到佢有個價位合理啲嘅餐，就試下佢。醃漬吞拿魚刺身丼 ($78)赤身，有明顯醃漬，但唔會太鹹，唔乜點洗點醬油都可以，魚肉同一般醬油漬嘅魚一樣唔會有彈牙口感，有啲淋身嘅，成個丼飯分量比較細，絶對係一個下午茶嘅size。炙燒三文魚牛油果丼(78)炙燒三文魚係半熟狀態，有丁點餘溫，三文魚本身係瘦嘅，炙燒後把魚油釋放咗出嚟，有魚油好食咗，牛油果就都多嘅，雙重油分，但唔會令到你覺得滿口油，加埋清新的菜苗同食，配合得幾好。作為一個輕食，佢絶對合價，但如果你係住攞嚟醫肚就唔好試喇，包你唔夠飽。今日一試後其實食味都係普普通通咁，如果正價食，我會維持之前咁諗係新城市大把選擇，average嚟講唔會揀佢。…Read More

小時光，裝修風格如店名一樣，滿滿的充滿着兒時的東西，玩具呀、海報呀、枱枱櫈櫈都是台灣八、九十年時代及或國中時代的擺設。一入到嚟就會令到你好食把時間倒退返廿幾年時前一般呢。而小時光係一間食台灣菜的餐廳，價錢就5X-6X一個餐，嘢飲就要單點嘅，散叫就都幾貴下，就好似坊間買杯珍珠奶茶咁嘅價錢一樣。我今晚就叫咗個紅燒牛肉麵 ($60)再加杯冬瓜檸檬茶($28) 紅燒牛肉麵湯底味濃有但有微微的藥材味，根腩位，夠淋身，唔秥牙，酸菜分量都幾多下，麵質幾Q彈，整體做到台灣麵特性濃味得嚟而不膩，不錯。冬瓜檸檬茶就同台灣嘢飲一樣偏甜的，叫少甜就好少少。整體用餐體不錯，全自助式，由點餐、拎餐具、取餐到收餐都係自助形式，完全同餐廳名一樣小時光，係學校小食部買野一食一樣係要靠自己一手搞掂，唯獨是味道唔係小食部級，係幾好食嘅。…Read More

嚟得鹽田梓一定要試下隻土窰雞，賣土窰雞的鄉誼茶座只有星期六日同公眾假期先開，如果唔想碰下運氣嘅話就最好先預約定隻雞先，如果唔係會有啲可惜呢。土窰雞($338) - 好有雞味，皮雖然唔係好脆但經過柴火燒過嘅煙燻味，好有風味，肉質潄滑就算雞胸位都唔鞋，雞油重好香，如果係完運動行完山扒完獨木舟之後嚟食一舊雞會更加好好味呢。五香滷牛展 ($148) - 有啲靭，但滷得入味嘅，但味道就普普通通咁。其實我哋都食咗唔少野，客家釀豆腐，煎蛋角，但都係普普通通，唯獨是隻土窰雞真係必食，有風味得嚟又好食，難得入到鹽田梓就唔好放過依個難得機會啦。…Read More

好食嘅良心店有唔少，平嘅都有唔少，但又平又好食嘅光榮絶對係當中的佼佼者，我諗除咗係得座位比較迫之外都無乜大問題，正宗港色茶記快靚正加抵！重要抵食夾大件，完全係為人民服務咁，唔乜點想賺您錢咁，作為一個茶記老闆，算係有良心。蔥油雞扒飯 -面頭勁多已煮過嘅蔥油，好香，雞扒大件得嚟又好脆口，重要炸得好好，外脆內嫩，飯重要好多，真係黐孖筋，完全係不計成本咁。作為一個香港人，真係諗唔到一個理由係唔去幫襯光榮，又平又好食，重要個老闆咁有良心，有時間就要去幫襯下喇。…Read More

位於觀塘工廈頂樓的一間cafe，如果唔係有朋友帶路根本唔會有機會試到依間cafe，由於隱蔽，所以亦帶嚟好處，就係性價比高，同我哋今晚啲客除咗我哋果枱之外清一色係女仔客，咁就大致上估到佢係傾向輕食同口味清新同健康少少，連佢啲裝修風格都係比較清新，以乾花為主，感覺還不錯呢。是晚我哋一行6人，分別就order咗以下嘅食物。池魚大根漬沙律配柚子醋 ($88) - 其實我覺得全晚最好食就個頭盤，池魚分量多有成6-7片，大根漬得入味，令到池魚本身的腥味沖得好淡，令本身唔係好受得池魚嘅人都可以食到，甜酸味與鮮味好平衡，再加上柚子醋更為甜與酸的醋夾沙律菜共食，係酸、甜、鮮的衝擊。炸蠔 ($58) - 炸漿小厚，但蠔炸得好好，蠔炸嫩滑多汁又夠熱，難得一間cafe炸物可做到出色，難得。明太子醬薯條 ($48) - 幼薯炸得剛好，明太子醬正常，但分量係多，一碟足夠4人食。北海道唐揚魔鬼魚塊($68) - 依個係驚喜嘅，魔鬼魚我未食過係好食嘅，因為腥臭味本身好重，但食完依個我改觀咗，將魔鬼魚切細粒，唐揚做法，把魔鬼魚的特性引發咗出嚟，就係肉質爽彈有咬口，由於細粒咗同唐揚做法，腥臭味無咁重同炸漿有底味，所以可以當做炸魚蛋咁食，不錯。辣味噌清酒煮蜆意大利麵 ($108) -  蜆應該改做大蜆呢，好大隻同厚肉，意大利麵正常，$108比咁大隻蜆你而唔係比蜆仔，係抵食。燒羊肉牛油炊飯配忌廉咖哩醬 ($128) - 燒羊肉係真係燒出嚟，半生熟效果，但羊肉無乜味，唔講唔知係食緊羊肉，但個牛油炊飯係好食嘅。香煎北海道和豚配燴野菜黑蒜汁 ($158) - 主食嚟講佢係最好食嘅，有豬肉同橡樹果嘅甜味，厚切得嚟生熟得宜，係日本豬我先敢食如似生熟程度呢；致於燴野菜就正常日式日味。醬油漬三文魚配牛油炊飯青醬蜆肉汁 ($158) - 三文魚生熟程度剛好，醬油漬內味，唔係白煎三文魚，鹹味適中，面頭的三文魚子更是一絶，更三文魚的鹹香味升華，好食。鰹魚熟成封門柳配紫菜薯蓉昆布牛油汁 ($168) - 封門柳好淋身，但牛肉味好重，外脆肉嫩的，橄欖油醃蒜好食，唔油膩。芒果乳酪沙冰 & 雜莓乳酪沙冰 ($58) - 大大杯，又好味。整體嚟講，佢嘅嘅食物好食又抵底，唯一可惜嘅就係佢太偏僻，唔係專登嚟係唔會無啦啦行上嚟食一間隱蔽cafe呢。…Read More