比利仔's Profile

大年初三，去黃埔睇戲，考慮咗一陣見有位就入去呢間店舖，點知非常後悔！ 叫兩碟燒臘飯，油雞得四件，兩件肉兩件幾乎全骨，我碟燒鵝仲經典，五舊皮包骨，同阿姐講，佢都話唔得，幫我換，換返嚟啲燒鵝我認為係隔夜嘅，時間係上晝11點，燒臘檔啱啱開始，啲燒鵝凍嘅同埋啲皮係塌陷嘅。😓我係燒臘專家，食燒臘飯食到屋企人要制止我，我真係有資格講永遠唔會再幫襯太興，呢啲係不能原諒嘅錯誤，順手就斬五舊皮包骨嘅燒鵝比客人，點解唔思考一下呢！ 店舖經理都好有責任。…Read More

飲食業待客友善係最基本最基本，呢間餐廳超額完成，而且食物高質素，環境清雅，值得一再幫襯！ 前日晚餐，依家早餐，今晚再嚟食煎魚！ 好嘅餐廳一定要密啲幫襯。我哋每人只係食咗一半已經飽，跟住問服務員我哋第日可唔可以兩個人分一個早餐，佢笑住溫言軟語地答話😊：可以㗎，冇問題㗎。…Read More

3 號風球下一車六人黃昏前出發去容龍別墅食海鮮！固定程序：先去老鼠洲買奄仔蟹生蠔鮑魚龍蝦花甲海鮮🦞🦐🐟⋯⋯ → 容龍呢度高檔、烹調技巧高，好坐，米芝蓮三星級嘅招呼，性價比高！我哋都話諗唔起香港有邊間食店嘅招呼勝過今晚嘅容龍別墅，上上下下包括執枱嘅姐姐都係好細心好溫暖，招呼好好，猶勝大灣區。 記住係喺九成半入座率嘅時候表現都咁好！👏🏼👏🏼👏🏼我哋六個人都非常滿意，仲要提多一樣嘢就係揸車去食真係好方便，落大雨都唔怕。Cheers 🥂😆！…Read More

幫襯過 10 幾次，介紹鼓勵唔少人嚟，包括社會事件期間特登支持！價錢真係唔平，一人份羊肉麵過百，但係如果食得開心係唔會計較，今次講一樣嘢：兩個人坐低，size 係一張棋哥燒鵝嘅兩人對食位，擺低碟烤鴨已經冇位擺其他嘢，同服務員反映，佢哋態度一般，我叫佢取消其他 order，食完呢個即刻走，個女侍應話唔緊要，雖然後來總經理來打圓場，但係呢樣嘢已經足夠令客人唔再返轉頭。 其實隔籬枱兩位女士反應同我哋一樣（左右隔離只係相距大約呎半），兩個人睇見張枱 size 嘅時候同樣嘩一聲！ 大快活嘅兩人枱 size 同佢差唔多，但係人哋成個晚飯套餐只係六十幾。香港飲食業好唔爭氣，以為城中鴨子應該高級啲啦，幫襯多年以來一路目擊服務員都係用同一對手執骨又攞碗筷俾我！🤮（佢戴住手套，直程連洗手嘅意欲都冇埋，佢自己對手就保持乾淨囉。😏）…Read More

買單嘅時候用 Alipay，因為啱啱轉了信用卡，所以有少少阻滯，只係阻咗幾分鐘，老闆同老闆娘竟然露出不耐煩的神色，幾次催促用其他方式繳付，當時係冇客人嘅，完全冇，因為已經係下晝 2:00 之後，團餐嘅人食晒走咗。 唔係啩，我真係熟客，幫襯咗 40 年，因睇我的 post 及我親自帶嚟食嘅人心算都有幾十個！ 呢件事睇到佢哋嘅心腸，太過分啦咁樣待客，查實我一直都知佢呢個餐食物味道正常但係性價比低（昨天蟶子唔新鮮），價錢同我食開嘅西貢勝記差唔多，但係勝記嘅出品、服務同埋環境都比佢好！我食咗個幾鐘見只有幾枱散客，其他嘅都係團餐，搞到環境好嘈好混亂，以前一直都係咁，不過我包容，因為兼顧人情味所以不斷返嚟食。 由紅磡揸車加埋隧道費泊車費，本來食得開心就唔會計較。 其實之前一日我個老友已經叫我唔好去歡樂，去新陶園，佢係熟客，好後悔唔聽佢講。不過唔緊要，歡樂幫我做咗決定。啲差勁嘅餐廳難道唔知道我哋真係有好多其他選擇？！…Read More

見老友嚟呢度食煎魚飯，雖然見 OpenRice 劣評如潮，今日我頂着大太陽行嚟食，全身冒汗，見到門口有煎魚飯寫住喺度，坐低咗都見到牆壁餐牌第二項係煎魚飯包括烏頭同埋鱸魚，但係我叫嘅時候佢話唔做，叫我食蒸，我望住個餐牌話淨係想食煎魚，佢話廚師唔做，太忙唔肯做！ 當時只不過係上晝 11:29，三成入座率。 咁我唯有離開。唔係激氣，係覺得好好笑，佢要自殺我都冇辦法，我唯一嘅做法就係奉勸身邊嘅人包括同區嘅街坊老友唔好嚟幫襯，當然包括我自己啦！ 我使睇你面色？ 我使睇你心情？ 又或者等佢長期只有一成入座率我先至嚟食啦，咁應該唔會太忙可以煎比我食喇掛。（我個老友話佢一次平日一次星期六都係午餐時段嚟食煎魚）…Read More

帶埋屋企人慕名而來，點知非常失望！Book 位嘅時候已經要忍住度氣，接電話嘅女士兩次交往都係冇乜禮貌，半死不活的語氣，問兩句答一句。昨晚嚟到食啦，點知中伏 -乳豬：1/4 隻，味道正常，都算 OK，但係唔值三百幾蚊。古法鹽焗雞：算係全晚最 OK 嘅，不過亦都只係正常好食，$568！鴛鴦醬脆皮蝦球：醬唔好味，所謂鴛鴦其實味道非常接近，一般嘅炸物整兩 pat 醬而已。帶子多士：唔好味，好油。七味脆皮豆腐：完全失敗，我每逢飲茶食飯都會叫呢道餸，可謂專家，但係佢個皮又硬又厚。蒜子浸菜心：真係經典，雖然味道 OK，但係要 $118 ，大約只有半斤。大膽講句錢唔係問題，如果啲嘢好食又食得開心其實已經唔計較，弊在又貴又唔好食，態度又一般。 六個人 $2,000，冇話平貴，係唔值。…Read More

名不符實，啲嘢好普通，係個叉燒比較好($188 五件!!!)，芋角、莎翁根本唔合格，宮廷荷花酥直頭難食，唔好食到要食剩！唔明點解成日排長龍，最不能接受就係我哋食點半鐘竟然呢樣又話賣晒嗰樣又話冇，還要若無其事，點能夠咁樣呢？！佢送俾我下次可以用嘅贈券我丟了進垃圾桶。兩個月前訂桌，懷著期望帶埋仔仔女女開開心心而來，好失望，共銀 $1,591，另外泊車錢都蝕埋！ 真係唔好怪人哋要北上，坐得好過佢出品好過佢，我相信 800¥ 已經 OK。隔了成個禮拜才寫食評，皆因本來想留口德，但老友鼓勵我要寫，以警惕後來者，以免中招。…Read More

去廁所要取鎖匙行 5 分鐘，然後回帶。 今天忍住不去，走的時候仍要取鎖匙行 5 分鐘去，然後行 5 分鐘還匙(一定是冤枉路，因餐廳在偏僻街角，不會順路)。試過同老友來吹水兩個鐘，邊飲邊食，小個便卻要消失 15 分鐘，幾冇癮下。下雨天更麻煩，繞外圍去廁所是露天的，正式是日曬雨淋夏熱冬冷。(不肯定還是可走室內?)同行女士說下次不來了 – 女士有很多理由要去化妝室的啊！餐廳不錯，可惜！…Read More

第 6 次幫襯。 最少兩名服務員疑似有上呼吸道感染，repeatedly 咳嗽、清喉嚨 & 打噴嚏。另外就是飲食行業的死症 : 一對手套用到老，用手套只是保持員工雙手清潔，1.5 小時內見服務員用同一對手套清檯面、拿檯面上剩菜骨頭、按電腦 screen、搜尋櫃內物品、現金找續 ... 最恐怖是給我倆安排餐具、添水、上菜 ...我吃完很擔心。 飲食業似乎仍未知死？ 想有第 4 波疫情？除了上述，我整體上是滿意的，包括環境 & 食物素質。…Read More

根據情報，來深水埗呢間一鵞試菜。 一個人唔叫得太多嘢，焦糖叉燒拼黑椒燒鵝飯，加多個三日醉香鳳珍肝就算啦！ 可能轉咗人，中伏！😩(1) 所謂招牌燒鵝非常一般，只係勉強合格。 我話要半肥瘦叉燒，佢俾咗一啲又乾又瘦又鞋嘅我，我樓下後巷嗰間燒臘檔好食D；（2）例湯非常一般 & 飯唔夠熱；（3）三日醉香鳳珍肝，無端端有三份一係腎嚟嘅，仲係邊皮位最硬嗰啲 &（4）每樣野都比餐牌貴（請對比照片），問阿姐佢先講新餐牌未印出嚟；冇貴唔貴嘅嘢，只有值唔值得。 咁樣洗咗 $93，非常唔值得。 雖然話要愛護小店，但係都要通知啲老友費事中伏，重點係浪費 quota，因為深水埗有其他好多好嘢食。 不過唔緊要，係一個經歷，唔伏過就揾唔到真美味。…Read More

環境好，食物素質高。 有一個專業嘅烤爐，根本就似歐洲嘅高級餐廳，而且可以慢慢坐慢慢食。 仲有仲有，叫佢加芝士，佢係專人用成件芝士喺我面前刨俾我嘅，唔係比一樽卡夫自己沈。 嚴重推介！ 爆分！ 三人共銀 $300 竟然有找！！…Read More

一如既往的老實(這對愛食海鮮的我來說非常重要)，價錢公道。 以往(包括我與親友)在海港偶會碰上沒禮貌、態度不佳的招待人員，但不愛投訴的我通常會包容。 哈，今次給我遇上一位男經理(西服沒有別上名字，見圖) & 一位李姓的大家姊(見圖)，他倆有禮、親切、勤快、以客為本的服務態度卻一定要表揚！ 例如經理見我們揀海鮮遇上困難便立即主動的協助，以半跑的方式陪我太太去魚缸，而李姓的大家姊則一眼關七，多次親切的主動提供服務。 哈，假如我是開酒樓的一定挖角！ …Read More

天氣咁好，一車兩老今日都係要行吓山輕鬆下。 西貢 菠蘿輋 黃屋村，尾站西貢食海鮮就番歸。通常幫襯米之蓮全記，同埋米之蓮勝記。 間唔中洪記。 今日終於嚟金輝試菜食海鮮。 唉，唔得，煮得好求其，例如個蝦都唔新鮮，分量亦及唔上其他食店，餸菜唔夠熱，上碟好求其，好快一次過嚟晒。 公平 D 講，不會把她跟貴 1倍的米之蓮勝記做比較，但仍遠遜價錢相若的米之蓮全記同埋洪記。 以為位處偏僻會俾心機 D 做，哎，失望，最慘係 quota 被佔用了，opportunity cost好大！ 價錢冇特別平。 唔會再嚟。…Read More

老友介紹，湯、咖喱、奶茶都高水準。 價錢合理。但係佢哋好烏龍，短短的 35 分鐘我見證了 : 有一個人叫湯飯唔記得俾飯、會漏單、外賣蒸肉餅飯竟然又係唔記得俾飯、有兩個地盤叔叔發脾氣、我放下刀叉擤鼻(因咖哩頗辣)竟想收走我的豬排... 隔離台堂食蒸肉餅飯只係得一碗飯，完全唔夠食，更何況係地盤叔叔。 但係侍應嘅態度幾好，我會再嚟幫襯（其他快餐都啱我胃口），因為我見到個蒸肉餅好靚。 所以態度真係好緊要！我知生龍一定會看 Openrice, 寄語真的要改進，否則會走下坡，飯量一定要大 50%，又或者提醒顧客可以點大飯(惜食，顧客要求才多 50%，坊間不少食店已在實行。)。…Read More