rachelchanhm's Profile

今晚同朋友去咗銅鑼灣一間好有氣氛嘅西班牙餐廳，裝修好靚，暗黃燈光加特式西班牙/葡萄牙藍白磚牆，仲播住輕快音樂，成個 vibe 好啱傾偈飲嘢！重點推介佢哋嘅 西班牙烤乳豬，外皮香脆油亮，內肉質嫩得嚟又熱又juicy，啖啖肉，點埋旁邊嘅蘋果蓉，酸甜解膩，點酒汁也很正！拍得住我之前在西班牙及葡萄牙食的著名烤乳豬。 另外 ，PAN CON TOMATE簡單但出色，多士脆口，番茄茸清新，做前菜一流，絕對不比西班牙的遜色。HAM BROKEN EGGS流心蛋撈埋風乾火腿同薯仔，濃郁得嚟唔膩，撈麵包食超正！ 小食方面，PRAWN CROQUETAS外脆內 creamy，蝦味突出；CHORIZO TORTILLA 蛋香濃，辣肉腸惹味。主食 MUSHROOM ARROZ似西班牙版燴飯，蘑菇同芝士香到癲，飯底仲有少少飯焦！甜品 CHURROS即炸熱辣，沾濃朱古力醬邪惡到爆，食到停吾到口。TORRIIJA（西班牙式法式多士）外脆內軟，蛋香超濃。 Perfect !飲品我哋叫了一jar Red Sangria，生果甜味同酒香平衡，微醺收尾！整體高質，會再 encore！…Read More

今日走入長沙灣一間環境幾chill嘅 café 食午餐。食物方面，最推薦係 開心果奶蓋梳乎厘班戟，班戟厚身鬆軟，入口即溶，加上香濃唔膩嘅開心果奶蓋，甜而不膩，好味道。主食點咗 Boholic 原隻龍蝦尾全日早餐，龍蝦尾幾彈牙，煎到有少少焦香，再配炒蛋、沙律同麵包，份量足到可以頂肚一餐。飲品方面揀咗 黑糖伯爵茶鮮奶咖啡，入口先有黑糖甜香，再滲出茶香同咖啡味，幾有層次感。整體嚟講，呢間 café 氣氛舒服，價錢合理，啱晒同朋友聚會或者自己慢慢嘆返個lunch 。…Read More

呢間法國餐廳認真不錯！首先環境一流，坐喺窗邊就望到成個維港海景，夜晚仲可看到幻彩詠香江，氣氛很好，服務也貼心周到。我哋揀咗 6 course dinner，由 Amuse-Bouche 開始，Burrata Cheese 配無花果同榛子，清新又有層次。法式洋蔥湯賣相一流，香濃得嚟又唔會太膩。之後嘗到Brittany 藍龍蝦，湯底鮮甜，配埋芹菜同檸檬，非常清爽。主菜部分海鮮意大利飯有蜆肉、八爪魚同豌豆，米粒煮得剛剛好，鮮味滿分。美國頂級牛柳切開後粉嫩多汁，伴碟嘅牛尾同根莖菜令味道更豐富。甜品方面，士多啤梨 Soufflé 輕盈鬆軟，帶少少香草草本香，配雪糕食一流。最後仲有 Petits Fours，為整個晚餐劃上完美句號。總括嚟講，環境靚絕、服務貼心，以這價絕對係物有所值，下次一定會再嚟！…Read More

尖沙咀海旁嘅 Harlan’s 向來出名靚景，夜晚坐室外飲杯嘢氣氛一流。不過今次同朋友就揀咗坐室內，慢慢嘆個三道菜晚餐。頭盤一開始已經幾有驚喜。藍龍蝦他他加上鵝肝同脆雞皮，口感層次好豐富；帝王蟹配海膽同芝士脆片，鮮甜又有少少奢華感；荔枝車厘茄凍湯就清清地，配埋紅蝦同酸甜西瓜皮，幾醒胃。主菜方面，我揀咗雞胸肉卷，肉質嫩滑，配上龍蝦汁同脆炸鵝肝，味道不錯；朋友就要咗龍蝦，面層香脆，帶魚子醬同清酒忌廉汁，香濃但唔會膩。甜品係腐皮法式千層，入口帶少少豆香，幾好味。整體食物質素同環境都對得住價錢，如果想同朋友慶祝或者情侶約會，Harlan’s 算係尖沙咀睇夜景嘆西餐嘅好選擇。…Read More

呢間印度餐廳坐得幾舒服，環境不錯，燈光柔和，啱晒朋友聚會慢慢傾計。前菜叫咗個 Masala Garden Salad，清爽又有少少香料味，唔會太重手，食落幾開胃。跟住試咗 Prawn Pakora Basket，外層炸得香脆，熱辣辣上枱，配埋啲醬不錯。主菜揀咗 Chicken Tikka Masala，雞肉嫩滑，醬汁濃郁帶少少酸甜，很惹味，用嚟點 Garlic Coriander Naan 一流，蒜香加埋芫茜味，食到停唔到口。最後嘅甜品 Sticky Toffee Pudding 都不錯，暖暖嘅蛋糕配上焦糖醬，香甜但唔會過膩。體驗舒服、食物水準幾高，價錢都合理。…Read More

呢晚喺鋼鑼灣大宅食咗個 tasting menu，成個體驗很滿意。開頭嘅迎賓小食有蔥油海蜇、豆板麻辣海蜇同椒鹽糖心鮑魚，蔥油海蜇幾有特色，爽口清香；椒鹽糖心鮑魚香口美味，外脆內嫩，食落好滿足。金腿蟹肉燴冬蓉羹，冬瓜蓉清新細滑，蟹肉份量足，配上金華火腿嘅鹹香，味道層次分明，清香又夠味。廿年陳皮拔絲虎蝦球真係驚喜，蝦球熱辣香脆，加上陳皮嘅幽香，味道濃郁有深度，再食返啖荔枝中和一下，清新香甜，正到停唔到口。文火慢煮和牛，入口即溶，肥瘦適中，配埋個醬汁雖然味濃但唔會膩，底下仲有炸腸粉，口感層次豐富，襯得好好。乾燒椰菜花龍躉，魚肉新鮮彈牙，香香辣辣，幾惹味又開胃。整體嚟講，每道菜都見到用心，食材新鮮、火候到位，味道有層次。服務細心，環境舒適，無論同朋友定家人嚟，都可以慢慢享受一頓高質晚餐。…Read More

啱啱喺一間高層靚景中餐廳食咗餐晚飯，環境吾錯，睇住夜景嘆中菜，感覺寫意。「鮑汁脆皮百花海參」好有驚喜，外層脆卜卜，內裏係蝦膠包住海參，加埋蝦子柚皮同時蔬，味道層次好豐富。「迷你冬瓜盅」入面有海參、帶子、瑤柱、火腿等配料，用了豐富，湯底清甜唔膩。「香芒大蝦」就酸酸甜甜，好開胃，大蝦爽口彈牙，芒果醬唔會太霸道，啱啱好。「碧綠雲腿白玉環」係用冬瓜圈包住金華火腿粒，火腿鹹香突出，配菜清新平衡。甜品方面，「海帶綠豆沙」好特別，有啲似養生糖水，唔太甜，幾清新。「紅棗糕」煙韌帶香，口感唔錯。成餐菜式精緻又有水準，雖然價錢高啲，但景靚環境不錯，偶爾獎勵下自己都值。…Read More

喺啟德SOGO 行完街，便到這泰國餐廳食晚飯，因之前在此食過lunch ，幾好味抵食。這裡整體感覺唔錯，環境闊落舒服，服務都幾有禮貌。叫咗飛天通菜、泰式黃咖哩雞、泰式明爐魚，味道都吾錯。通菜夠鑊氣，辣勁啱啱好，唔會搶味；黃咖哩雞好香椰奶味，咖哩濃郁但唔膩，好送飯；明爐鳥頭魚，大大條，醬汁酸酸辣辣，非常開胃。兩個人食咗 $508，連服務費，平均 $254 一位，以呢個質素同環境嚟講，算係合理，當然Lunch 更抵食。室外也有枱，個景也幾靚，有機會秋冬無甘熱要嚟試試。…Read More

同朋友去咗食日本菜，叫咗兩個set——「海言廚師發辦魚生飯（特上）」同「江戶前散壽司」，兩款都非常出色。魚生種類超多，有中拖羅、赤身、甜蝦、白蝦、帶子、海膽、三文魚籽、炙燒魚同各款白身魚，擺盤靚得嚟又好豐富，絕對感受到師傅嘅心思同誠意。魚生夠晒新鮮，入口滑溜冇雪味，海膽特別甜，完全冇腥，魚子亦爆汁，口感一流。配菜有紫蘇葉、醃黃蘿蔔、青瓜、薑片等，平衡咗味道又開胃。散壽司嗰份仲加咗自家玉子燒、稻荷壽司，飯仲加了芝麻薑蓉及傳統漬物，整體味道層次更豐富。兩個餐都包茶碗蒸、沙律及湯。茶碗蒸蛋滑熱辣辣，沙律菜新鮮，混有不同的蔬菜，顏色及口感豐富，醒神開胃。店員服務態度好，會細心介紹魚生種類，仲主動加茶，感覺親切。以質素嚟講，價錢合理，性價比高。成個用餐體驗好滿意，推介俾鍾意食高質魚生嘅朋友！…Read More

呢間叫 CRUCE 嘅西班牙小店真係有驚喜，食物有創意之餘又好味，難怪星期四晚七點幾已經坐滿，幸好我哋有訂位。一開始點咗炸魚片，炸得金黃香脆，魚味濃郁，點埋佢三款唔同醬汁，層次豐富，令人開胃。Octopus Cruce的八爪魚好香及好有咬口，配住炸魚皮食很美味。西班牙火腿奶酪薯波（Spanish Ham Croquette）都唔錯，外脆內滑。之後嘗咗個「和牛鵝肝他他」（Wagyu Foie Gras Tartare Bites），混合咗 A5 和牛、鵝肝、藤椒，四川胡椒麻辣微辛，非常有層次，令人印象深刻。主菜叫做「黑毛豬叉燒西班牙燴飯」，用上番茄底、豬皮豬骨牛湯，燴飯充滿膠質，叉燒一半肥一半瘦，炙燒過後香口惹味，真係食到停唔到口。飲品方面試咗杯 Albarino 白酒，同個燴飯都幾夾。整體氣氛舒服，服務殷勤，侍應細心介紹菜式。埋單兩人唔到千元，以呢個質素嚟講算係好抵。下次會再嚟試埋其他菜式。…Read More

去了鑽石山荷里活廣場行街，見這餐廳幾多人及環境算闊落，便入內試試。頭盤點咗個巴馬火腿哈密瓜沙律，鹹香火腿配上清甜多汁嘅哈密瓜，幾開胃，沙律菜也挺新鮮。主菜叫咗澳洲和牛面肉燴意大利貓耳朵，牛肉炆得夠腍，啲汁香濃，掛晒喺每粒貓耳朵上，幾滋味。至於慢煮BBQ烤豬肋骨，表面燒得焦香，肉質夠嫩，肥度適中，仲有肉汁，醬汁味道也啱啱好。整體嚟講，食物質素算穩定，環境舒服，可坐得耐，價錢也抵食，適合朋友聚餐或自己行街後醫肚。…Read More

睇戲前再嚟這餐廳食晚飯，因佢座住超闊落舒適，方便談天聚會。叫了個「精選二人套餐」。法式蟹肉龍蝦湯湯底超香濃，飲落有啲creamy同海鮮味，但又唔會覺得膩，幾暖胃。煙三文魚凱撒沙律沙律新鮮，煙三文魚帶少少鹹香，配埋爽脆嘅沙律菜，幾開胃。波士頓龍蝦龍蝦汁意大利飯意大利飯煮得入味，用咗龍蝦汁煮到飯粒都有海鮮香，份量超足！西班牙黑毛豬鞍架黑毛豬炸到外脆內嫩，肉味香濃又好大份，食落有啲驚喜，唔會乾柴。甜品甜品選擇幾多，但因我吾食得凍野，唯有叫了cheese cake ，味道不錯。整體嚟講，食物同價錢都幾對辦，商場餐廳來說性價比高，服務態度也幾好，有機會會再去試其他款式！…Read More

啱啱喺大館食咗間超正嘅意大利餐，環境真係冇得輸，好有氣氛，坐得舒服，啱曬同朋友或另一半慢慢嘆。依家仲做緊OpenRice 優惠，點 3 course dinner 自動升級做 4 course，好抵食！頭盤我揀咗小八爪魚配青豆同辣味番茄醬，八爪魚好軟腍入味，醬汁微辣好開胃。燉牛肉螺絲粉配焦糖洋蔥，牛肉超腍，螺絲粉掛滿肉汁，甜甜嘅焦糖洋蔥加埋一齊食層次豐富。主菜烤鱈魚更加精彩，魚肉滑嫩，青豆醬配埋青口、蜆肉同少少辣味嘅義大利辣豬肉油，味道鮮甜又有kick。甜品叫咗土多啤梨吉士千層酥，賣相幾好，吉士香滑，配埋新鮮士多啤梨，飲埋Prosecco，完美嘅ending。成餐感覺非常滿足，服務有禮又細心，值得再嚟！…Read More

呢間係米芝蓮必比登香港推介餐廳，食物有驚喜又有心思。糖醋小排骨外脆內嫩，酸甜汁收得剛剛好，唔會太漏。三絲伴冷麵清新開胃，絲絲分明，醬汁微酸，夏天食一流。最驚喜係鮮藤椒燒甲魚裙，麻得香而唔搶，甲魚裙啖啖膠質。甜品方面，玫瑰桂花湯丸好清香，玫瑰味唔假，桂花點到即止，唔膩。飲品有香茅檸檬薏米水，冰冰涼涼，薏米煮得鬆化，好解暑。另外，香水表舅父有啖啖提子及爆汁珠珠，d珠珠又甜又好味，有口感，好飲到停唔到口。…Read More

今次同朋友去咗官塘一間樓上餐廳食brunch，意外驚喜！星期六兩點多竟都坐了七八成的人，今日時今日，實在難得。我哋點咗幾款菜：沙律可以自選配料，我揀咗牛油果、烤車厘茄加意大利油醋汁，清新開胃，牛油果夠熟又滑，尤其喜歡個甜柑，鮮甜美味。主菜係虎蝦帶子意粉，蝦同帶子都夠大隻，新鮮彈牙，意粉掛汁夠晒味，份量超足。飲品方面，朋友試咗粒粒柑橘鮮橙梳打，橙味天然，氣泡感啱啱好，夏天飲一流；我嗌咗熱抹茶，用咗山政小山園宇治抹茶，香濃唔苦，茶味夠厚，甜度適中。最後甜品係伯爵茶珍珠梳乎厘班戟，唔太甜好好味！班戟厚身又軟綿綿，珍珠煙韌，伯爵茶香好突出，食完好滿足。總結：價錢合理，食物有質素又大份，真心覺得係官塘區CP值極高嘅樓上café。…Read More