littledaydreamer's Profile

一早係openrice book左枱食晚餐6:00pm，入場果時店員亦都提醒我哋用餐時間為90分鐘，清楚有足夠既用餐時間先入去點菜。食完飯，真係嬲得濟，要寫返篇文講講，如果想食呢間餐廳，希望你睇埋落去再決定去唔去食。6:00 入座，叫我哋用佢哋個app申請加入會員會有折，同行朋友試左幾次先成功登記個會員，個app係有啲問題。之後食物係好快手就送到黎既，呢樣野係要讚既。6:30但當我地疑似就黎食完啲菜餚，就開始瘋狂收碟，每食完一樣就急急腳咁黎收走，都未反應得切答佢未食完，就拎走左碟餸，唔知點解要咁樣收，枱面上面既食物未係完全食晒，非常無奈同感到被冒犯。6:50 有員工走埋黎問洗唔洗再點菜，要last order 叫我哋埋單先，我地都認為唔洗再加，所以同佢講唔再加野。7:00員工不斷收埋仲食緊既食物，已經將碟餸搬近啲我自己表示仲食緊，已經伸手過黎想收走，果時我仲同朋友傾緊計，佢問都冇問，好彩朋友眼利阻止左佢收野既動作。7:10食到咁上下希望員工幫我地斟杯水，冇耐就話下一台食客已經到左，催促咁叫我地離開，成餐飯食得唔安樂，明明有book位，又係你餐廳既定的時間內用餐，實際上，我係7:30前離開就可以了，中途亦都唔應該受到束縛，唔覺得我地要被呢種服務態度對待，仲要收加一？咩世界？以下為用餐資料：柚子大蝦沙律 $118.0呢個沙律整得實在太辣了，味道黎講唔係話好fresh，建議廚師調整下個辣度，基本上等於譚仔中辣以上。惹味拼盤（小）$96.0正正常常炭燒牛肉串燒沙嗲 @$82.0$164.0串燒既味道係好食，所以再有點多一份食用。炭燒豬肉串燒沙嗲 $76.0可能大家口味都麻麻豬肉，試下就算。荔枝菠蘿紅咖喱大蝦 $128.0大蝦正常，咖哩汁似係就咁開粉煮出黎既，唔係好似加左好多功夫既味道，個人有啲後悔叫左。藍蝶花蟹肉菠蘿炒飯 $138.0個賣相真係有啲麻麻，個味道因為有肉鬆呢啲味精野所以ok既。冬蔭公梳打 $42.0冬蔭公味道有啲淡，主要係梳打水，唔值呢個價錢。泰國珍珠奶茶奶蓋 $48.0呢個係幾好飲，如果想叫飲品會建議叫呢個。玫瑰野苺茶$34.0呢個非常奇怪既藥水味，同埋都幾甜下，冇得叫走甜，唔建議飲。油酥手抓薄餅（3片$52.0用黎送咖哩大蝦，正正常常既油酥餅。…Read More

叫左佢個台式蔥油雞扒乾拌刀削麵，首先舊雞扒既炸粉係厚到不得之了，係令到你忍唔住搣走哂佢！冇左厚粉後先令到雞既味道，但好可惜舊雞有一半係有陣臭味，食落仲有酸酸地，都幾明顯係用放到壞左既雞扒去製作，諗住用炸物既方式去掩蓋壞左既事實。刀削麵冇問題，係正常味道。呢個價錢，個主食你比啲咁既野我？真係食到人一肚氣，何文田劣食你都算數一數二啦！好食是良知啊真係幾無良，其他朋友食過佢其他食品，都話冇下次，真係稱得上可一不可再既食物。…Read More

聽人講呢間店舖好出名，有好多memo紙比你寫低啲對香港既心聲，作為香港人既一分子，緊係要親身去見識下啦，一入到去，唔係誇張，由大門直到餐廳既牆上面，全部都係memo紙，好厲害。我地兩個人，就打算叫一個set餐，再另外散叫一個主食。前菜 (沙律 + 湯)個set係有包到沙律同湯，食完仲有甜品添。而呢個田園沙律配熱情果油醋汁，味道方面幾好入口，熱情果既酸酸甜甜味配上清爽既沙律菜，好夾，非常開胃。1.士多啤梨醬燒豬肋骨 set $229呢個真係真心覺得正，首先份量絕對夠哂大份，兩大舊豬肋骨，加上下面有大量焗得好香脆既薯角，一定夠哂飽啦，同埋豬肋骨燒得剛剛好，外層少少脆，内𥚃肉質保持到鮮嫩，再加上店舖自家製既士多啤梨醬一齊食，個醬除左有水果既甜味，仲有微微既辣味，真係好配個肉，多左個層次，非常欣賞！2.桂花雪梨茶 $39 叫左呢杯清清地既雪梨茶，因為唔想搶去其他果醬味，又幾好飲，桂花令到佢有陣清香味，有d雪梨肉可以食埋添。3.煮極黑毛豬扒 配肉桂蘋果汁 $169成日好多人會有個錯覺係覺得牛扒永遠係貴d好食d，但如果有試過黑毛豬，就可以解除對豬既成見，餐廳用左慢煮既方法烹調呢個極黑毛豬，慢煮可以keep到豬扒既肉汁，又唔會過熟，見到入面仲有小小粉紅色咁，呢個係岩岩好嫩滑又食得既狀態黎，咬落去外脆內軟，配埋甜甜地既肉桂蘋果汁，一解夏天既悶熱。4.特製果醬梳打 +玫瑰蘋果 (半價後$22)餐牌上有個「J」既，係代表可以自選果醬，我就揀左玫瑰蘋果，餐廳將蘋果blend成蘋果蓉，再加入玫瑰花瓣，再將呢個果醬加入梳打水度，就成為左呢杯飲品，入口仲有蘋果蓉添，真材實料。Cheese Cake（跟餐）完整既晚餐又點可以冇甜品呢？最後仲有個小小既cheese cake，芝士挺身，口感綿滑，唔會係出面餅店雪左成日硬堀堀咁，估唔到跟餐甜品都咁有誠意。…Read More

朋友就快生日，諗住搵間坐得舒服既餐廳同佢慶祝，食餐好既，比我發現係尖沙咀呢到有間唔錯既餐廳。好啦入到去，裝飾都幾優雅，有個酒櫃同小吧台，配襯大玻璃樓景，感覺安靜又溫暖。成個環境都好好，可以靜靜地咁樣食美食。1.Pan Fried Hokkaido Scallop $168頭盤呢我哋就揀咗香煎北海道刺身帶子配黃梅醬芒果沙沙，上面有啲脆脆，相信係一啲肉乾嘅脆脆，而帶子個底有腌左嘅茄子，味道酸酸地，幾開胃，而且帶子煎得剛剛好，唔會太生，亦唔會太熟，保留到帶子果種鮮甜嘅味道。2.Captain’s Salad $78之後嚟到呢個船長沙律，裏面包括有芹菜，黃瓜，呈小小酸味，都幾開胃，重點係加咗菲達芝士，這種芝士冇外殼，是白色，堅實但易碎，上面有小洞眼及裂縫，味道強烈，有鹽味，令到個沙律唔會太淡味，易入口。3.海鮮拼盤(3款)Seafood Platter A $398我哋之後叫咗海鮮拼盤作為主菜，platter A可以揀三款海鮮，我哋分別叫咗Baby abalone 活鮑魚 3隻，Shrimp 海蝦 10隻，同埋Live Mussel 活青口 10隻，裏面仲有原隻薯仔 ，粟米，同雞肉腸添。配左Cajun garlic butter卡薑蒜蓉汁，呢個醬有少少微辣，會買一啲新鮮嘅海鮮，味道真係好夾，要讚下嘅係，個鮑魚整得啱啱好熟，完全唔難咬，而且海蝦好鮮甜，配埋嗰醬食真係一流，加上佢有薯仔同埋粟米，都相當飽肚㗎。4.Asian Punch $58朋友仔就叫咗呢一杯飲品，係包括薄荷葉，荔枝，乾咗嘅薑，飲落去有淡淡的荔枝香，仲有少少醒神嘅薄荷葉，配海鮮飲，唔會搶走海鮮嘅鮮味。5.Peach On The Beach $58而我呢杯除左有薄荷葉同乾咗嘅薑，仲加左新鮮嘅橙同桃，有少少酸酸地，都感覺清新，好鍾意佢用咗生果嗰種天然既甜味。…Read More

呢日去左銅鑼灣接個朋友仔收工，諗住係附近搵間餐廳去食個晚餐啦，朋友建議食日本菜，有一間佢食過覺得唔錯既，就話帶我去食下。一入到舖頭，都覺得暗暗地有d射燈光幾有日式既feel，同埋牆身有佢地主打既菜式，大大張咁放出黎，離遠都望到好清晰又吸引，而呢間餐廳主打既係日式烏冬，咁當然要點樣食下佢。我地總共叫左兩個主食同三個小食，分別係「黑蒜灸燒極濃黑豚肉烏冬」，「芥末果醋帶子冷掛烏冬」，「明太子雞翼」，「螢光魷魚」同埋「秋葵沙律」。1.螢光魷魚$36叫左呢道冷盤既魷魚作為前菜，魷魚用左少少腌料去調味，所以食落帶有點酸味，都幾開胃。2.芥末果醋帶子冷烏冬 掛烏冬 $85呢個烏冬意外地帶出有小清新既感覺，可能因為冇肉類既關係，有幾片大大既蕃茄同埋沙律菜伴碟，加上主角帶子係經過煮熟再冷藏既方式，令到整體上食落去都比較清淡，啱晒想減肥嘅朋友，而且嗰個芥末嘅果醋同個烏冬好夾，滑嘟嘟嘅烏冬，加上酸酸地嘅果醋，令人食唔停口。3.黑蒜灸燒極濃黑豚肉烏冬 $87呢個烏冬一上枱真係不得了，黑蒜油嗰種香味，加埋豚肉嘅香味，真係令人食指大動，同埋佢嘅豚肉切得好厚，咬落去啖啖肉，肥膏同埋啲肉分布好平均，個湯加埋一啲爽口既木耳，夾埋烏冬一齊食，味道同口感兼備，兼且糖心蛋煮得剛剛好，蛋黃入口即溶，好嫩滑。4.明太子雞翼兩隻$36呢個雞翼同樣都好出色，裏面嘅明太子少少辣辣地，加上雞翼嘅外皮炸到脆卜卜，外脆內軟，而且鹹度適中，我諗送啤酒嘅話應該一流。5.秋葵沙律$48點左肉類，梗係要點番啲蔬菜平衡返，我哋就叫左呢個秋葵沙律，佢亦都係用咗酸酸地嘅汁去配襯秋葵，覺得幾清新，又可以解油膩。…Read More

Bong 係位於紅磡嘉里酒店範圍內嘅西餐廳，之前公司喺嘉里酒店搞annual dinner 就已經留意到呢間餐廳。餐廳亦設有戶外座位，適合想吹吹海風嘅客人或吸煙者。 喺正紅磡碼頭海旁，落地玻璃嘅設計令客人可以邊享受美食，邊欣賞海景。餐廳有大型嘅保溫櫃以存放紅白酒同各款熟成肉類。我地叫咗dinner set B($760)，仲加咗個pasta($230)，分量啱啱好夠兩人食飽。1. 餐包 內暖外脆，餐包塗上牛油，入口即溶；另外仲有果仁，非常香同有咬口！2. 南瓜濃湯 Sweet Pumpkin Cream Soup非常香濃嘅南瓜味，忌廉配合南瓜味道好合拍，口感細滑綿密。3. 沙律 Sous vide Chicken Salad慢煮雞肉嫩滑配合新鮮生菜，非常清新，十分開胃。4. 魚子醬配三文魚 Grilled Scallop with Salmon Caviar三文魚油脂豐富配合甘香嘅魚子醬令味道層次加強，碟上其餘嘅生果都好新鮮。5. 西冷牛排配大蝦 Dry aged Ribeye steak (250g) with King Tiger Prawn-Medium煎到剛好，肉質幼嫩，牛油脂肪分佈均勻，牛味濃郁。大蝦新鮮爽口，配合埋醬令味道更有層次。
有六款調味配合牛排食，令牛排味道有唔同感覺。6. 黑松露蟹肉芝士扁意粉 Crab Meat Chesse Truffle with Homemade Linguine黑松露味道濃但又唔會令蟹肉鮮味被掩蓋，配合自家製作扁意粉口感一流，十分推薦。7. 肉醬意粉 Chef’s Recommended Pasta-Handmade Linguine份量剛好，蕃茄味濃，味道偏酸，但可接受，意粉質感煙韌。8. 雪芭 Sorbet熱情果口味雪芭，味道清新，唔會太甜，十分解膩。9. Today’s Dessert：芝士蛋糕蛋糕鬆軟，與拌碟草莓醬很配合。10. 鮮奶咖啡 Set Latte咖啡味濃郁，幼滑，可自己決定甜度。…Read More

同朋友去完中環飲杯野，有啲肚餓喎諗住搵間餐廳食下野啦，有一間充滿日本特色嘅台灣餐廳，又未食過咁一定要試吓啦。餐廳入邊嘅格局呢都係好日式嘅，有一啲係比四人坐嘅枱，有啲呢就係面向牆邊嘅吧枱，可能都方便一啲打工仔放工自己一個人食飯，又唔洗同人搭枱咁尷尬啦。我地叫左好多野食，分別係「和風牛肉烏龍麵」，「台灣土雞肉飯」，「綜合關東煮」，「鹽酥雞」同埋「仙草冬瓜茶」。1.和風牛肉烏龍麵 $79我就叫左呢個烏龍麵食，麵質地好似扁烏冬咁，軟糯感，係我中意既口感黎，同埋個湯底好清甜，加埋d肥牛一齊入口，味道好夾，同埋加左紫菜同青菜，平衡返健康好多！2.台灣土雞肉飯 $79朋友仔就叫左呢個雞肉飯食，話想有d米飯落肚，個飯有兩塊蘿蔔比你開胃，而個雞肉既肉質就相當嫩滑，同個飯配埋一齊食好入味，而且仲有隻鹵水蛋比你，入味之餘，仲增加左台灣風味添！3.綜合關東煮 $68話明日台混合菜，緊係有返d日式風味係到，呢個關東煮有好大舊既魚糕同粟米蘿蔔，而且魚糕相當彈牙。4.鹽酥雞 $38呢味台灣風味十足既鹽酥雞，外皮炸得酥脆乾爽，唔會有好油膩既感覺，同埋調味剛剛好，唔會太咸，裏面既肉質都保持到鮮嫩既質感。5.仙草冬瓜茶 $24咁多美食，緊係要叫返杯野飲襯托下，呢個台灣特色既仙草冬瓜茶非常好飲，清新得黎好潤喉，可以中和下食左脆物既熱氣感。…Read More

嚟到屯門，聽講喺龍門居樓下有好多好好味嘅小型餐廳，今次我就揀咗其中一間去食，呢一間餐廳係專食一啲慢煮嘅牛扒，叫犇道。佢主打有三款形式既牛，分別係火山牛，松露燒牛排，板燒吉列牛。每一款都好吸引咁，我今次就叫左「松露牛排定食220g」，「厚燒鰻魚飯配黑松露炒蛋」，「明太子手羽」。1. 松露牛排定食220g $156呢道牛排採用左牛嘅牛肩肉，本身以為會好難咬，點知食落去又覺得都幾嫩滑，可能因為用咗慢煮嘅方式，同埋一上枱嘅松露味好香，同牛肉好夾，而且我哋仲將佢升級左做定食，包埋有一碗味增湯，龍蝦沙律，同埋有甜品添，呢個價錢來講真係好抵食啊。而且個龍蝦沙律都做得好鮮味，非常好嘅開胃菜啊。2. 厚燒鰻魚飯配黑松露炒蛋 $121我嘅朋友就叫咗鰻魚飯，佢嘅鰻魚燒得剛剛好，鰻魚汁同鰻魚肉好夾，肉質爽口，再配黑松露上面嘅炒蛋，用咗日本雞蛋去整，果然蛋味好濃，而且相當之滑。3.明太子手羽 $28我哋都叫咗樣小食，呢個雞翼入邊包住左明太子，外面香脆，裏面包着香辣嘅明太子，一啖咬落去，外脆內軟，而且明太子嘅味道好出眾，真係覺得好好味呢。真係好鍾意支持呢一啲小店，鋪頭細細但係可以食得出佢哋係花咗好多心機，令到出嚟嘅成品相當之好，我會再嚟食㗎，支持！…Read More

呢日同左個好耐冇見既朋友約左食飯，諗住好耐冇見，想搵間坐得舒舒服服既餐廳，係銅鑼灣既地舖比我搵到有野好野，緊係要帶佢黎食啦，餐廳似乎幾大，要落一層係地庫，同埋環境好光猛，室內設計都比人有種高級既感覺。一坐底侍應就比左部平板電腦我地，可以係部平板到睇下有咩好食，太多菜式都唔知揀邊樣好，侍應姨姨就推介我地一場黎到點都要試下佢地既招牌菜-北京填鴨啊，同埋水煮魚都出名嫁，咁我地就決定左點「北京填鴨」，「水煮桂魚」，「雞絲粉皮」，同埋「砂鍋雲吞雞」。1.北京填鴨 半隻 $228我地人少少食唔到咁多份量，所以叫左半隻試下，原來半隻份量都唔少嫁，而且配以大葱絲、黃瓜絲、甜麵醬，用薄餅卷着食用，佢既薄餅卷幾透薄，令到食落去既口感唔會太乾，同埋加上片皮鴨既油脂，食落更香，唔錯。2.水煮桂花魚（原條）$288呢個就厲害啦，一上菜發現原來都幾大碟，個魚頭好壯觀，同埋聞到一陣陣好辛辣剌激既香味，睇到表面放左好多辣椒仔，桂花魚既質地好嫩滑，而且非常有魚香味，加上辣辣地，仲好入口，而且魚下面仲有d水晶粉皮係到，質地彈牙得黎又滑，好好味。3.雞絲粉皮 $58另外食中菜必點既雞絲粉皮同樣出色，有少少花生醬點綴下，一齊食好開胃，作為前菜一流啦。4.砂鍋雲吞雞 半份 $198呢個湯真係出乎我意料，侍應服務周到又貼心，首先幫我地將個雞拎出黎拆左肉，方便我地食用，又幫我地裝好哂湯同埋菜，一碗熱騰騰既高湯，非常清甜，可以幫手解左岩岩食水煮魚既辣度，雲呑煮得剛好，相當出色，而且份量唔少，兩個人各飲完一碗都仲可以再添，當我想起身自己再裝湯既時候，侍應即刻黎幫手，真係熱情好客既款待啊！…Read More

放工去咗食新開嘅懷石料理餐廳，喺中環蘭桂坊，喺正串燒店對面。問到師傅點解餐廳名叫 夢 ，南師傅解釋開餐廳係佢嘅夢想，曾經去過墨爾本、悉尼、台灣等地方學師，希望自創特別嘅懷石料理，將飲食文化融會貫通。餐廳內有一半座位能夠近距離欣賞師傅準備菜式，同師傅直接交流，另外，餐廳亦設有露台位置，方便吸煙者。而晚餐嘅價位由1380至1980不等，任君選擇。今次我哋試咗1380 嘅七月季節懷石料理。1. 京都豆腐主要有豆腐，腐皮同高湯木魚啫喱，再配上淺味黑松露，底下仲有啲紫菜。味道清新，豆味濃郁，最特別係個木魚啫喱，咬落去就有淡淡的湯味。2. 八全 懷石料理蕃茄和桃肉粒，味道清淡，酸酸地好開胃。玉子櫻花蝦，配上淡味魚子醬，一入口就有好香嘅鮮蝦味。南瓜百合，質感好似薯蓉嘅南瓜蓉。炸日本白粟米，外表貌似一粒小炸彈，香脆可口松葉蟹球，外面包住一層紫菜碎碎，入面係彈牙嘅蟹肉。低溫八爪魚配士多啤梨醬，八爪魚肉質軟綿綿，配上士多啤梨醬十分清新。3.牡丹蝦配三色米紙 米紙分別有栗米味，墨魚味，同玫瑰花味。整個配搭十分有趣，米紙嘅口感就同平時食開嘅蝦片有啲似。配上牡丹蝦，就有黏笠再加脆片嘅口感，就好似食緊好新鮮嘅零食咁。4.石垣貝，鯊魚皮右口魚薄切貝肉爽口，配上酸汁啫喱更能帶出鮮甜味，非常新鮮。左口魚，脂肪均勻而且肉質彈牙。5.花竹蝦白蘿蔔湯白蘿蔔片嘅面頭有柚子碎，帶出咗整碗湯嘅鮮味，花竹蝦亦十分爽口彈牙。6.海膽創作料理馬糞海膽泡沫配上粒粒魚子和澳洲黑松露，加埋個飯底攪拌食，入口有非常之濃郁嘅海膽鮮甜味，好邪惡啊！7.金錭脆麟燒配龍蝦汁用油淋上去魚上炸麟能夠做到香脆效果，同時保留到肉嘅嫩滑度，鱗片非常脆口，而肉質十分鮮美。加上廚師刻意利用新鮮龍蝦頭同蔬菜炮製而成嘅濃郁龍蝦汁，好香龍蝦味！8.鹿兒島A4和牛和牛配上煎香嘅洋蔥，手指蘿蔔同紫色甘筍，仲有清深縣薯片，油而不膩。個人十分喜歡旁邊嘅日式xo醬，係廚師加入香料烹調，自家製的。9.黑松露Risotto加麵豉湯一般Risotto嘅米都係半生熟，亞洲人可能食唔慣。所以廚師利用日本糯米代替，米飯口感會較黏口。配上黑松露同埋菇菌，仲有蒜片，成個飯非常惹味。份量亦不多不少，剛剛好。10.抹茶奶凍配自家製丸子香甜嘅奶凍係用北海道3.6牛乳製成的，而抹茶嘅甘苦啱啱好平衡左整個甜品嘅味道，上面有銀箔仲有自家製小丸子，紅色係由蘿蔔製成的。餐廳仲有自家雪糕機，有別於一般雪糕，佢地牛奶雪糕加咗蛋白，有少少沙冰嘅質感，配上風乾嘅士多啤梨脆片，十成紅豆，蜜瓜粒粒，同外表有啲似炮谷嘅炸稻米，甜得黎，又有啲咬口，非常好味！遲吓仲會出黑松露口味雪糕，大家期待下啦。…Read More

呢日約左男朋友放工見面食個飯，知佢平時做野都好忙，難得見到面緊係想佢食得開心啦，男朋友鐘意食辣野，咁我就上網搵下附近有冇d專食辣野既餐廳啦，比我搵到呢間係油麻地食四川菜既餐廳，就諗住帶男朋友去試下。一去到餐廳就見到個地方好大，而且已經有好多人入坐，我諗應該係幾好食先咁多人吧，侍應姨姨好快手安排左位置比我地坐，再比埋menu我地睇，都真係幾多野食揀。而我地就分別揀左「麻辣豬耳」，「辣子土豆絲」，「泡椒鳳爪」，「上湯時蔬」，「蒜泥白肉」，「干鍋田雞」，「珍寶大檸檬茶」，「椰子鮮奶」。1.麻辣豬耳 $55呢道麻辣豬耳係涼拌黎，用左辣椒油去攪拌，食落質感好爽脆，加左芝麻令到食落更加香。2.辣子土豆絲 $48呢道薯仔絲每條都切得好均勻，食落去好脆卜卜嫁，但男朋友話，如果可以再辣d，就更加好啦。3.泡椒鳳爪 $45初初點呢個我仲以為係好似泰式鳳爪咁冇骨既添，不過都幾好食既，又係涼拌菜，對於中意食辣既人好岩食。4.上湯時蔬 $48有得揀食咩菜，我就揀左我鐘意食既娃娃菜，都唔錯，娃娃菜食落都幾甜，加上有上湯浸住，更加入味。5.蒜泥白肉 $55多數出面叫既蒜泥白肉既蒜泥並唔似呢個咁綿密，乎合返傳統標準，豬肉每塊都切得厚薄相同，食落口感好，加上蒜泥真係好好味。6.干鍋田雞 $118本來想叫個田雞煲食，男朋友話不如試下干鍋田雞啦，估唔到有驚喜喎，佢保持到表面香脆可口，内裡既肉質鮮嫩，加上大量既辣椒同葱去炒，更加香氣撲鼻。7.珍寶大檸檬茶 $32我就有dd怕辣，就叫左個大杯既檸檬茶去解一解辣，黎到真係幾大杯，但都比我飲哂:)8.椰子鮮奶 $28男朋友就叫左杯椰奶，又幾好味，仲解辣得過我果杯，搞到我想搶黎飲啊，哈哈整體黎講，價錢中等，食物質素不錯，下次再黎食過，解下辣癮~…Read More

同男朋友去黃金海岸游水同陽光玩遊戲後，揸左架車去左深井諗住食燒鵝，咁多間燒鵝店男朋友揀左陳記燒鵝，揀得呢間就係貪佢就腳，同埋都又比較出名，而且有樣幾方便既野就係有得免費泊車，只要埋單果時印返張印仔拎去陳記既停車場就得嫁啦。 今次總共叫左五樣菜，分別係「馳名深井陳記燒鵝」，「芝士生蝦伊麵」，「椒鹽鮮魷 」，「北菇草姑扒時蔬」同埋「蒜蓉粉絲蒸元貝皇」。1.馳名深井陳記燒鵝例牌 $145兩個人分別叫了燒鵝例牌，招牌菜緊係冇令我地失望啦，燒鵝皮脆肉嫩，又唔會油膩感，同埋餐廳老闆娘話佢地d酸梅醬餐廳係自家制既，比其他餐廳從供應商買入的多了份新鮮梅味。2.芝士生蝦伊麵 $108呢道菜既蝦好新鮮，肉質彈牙，而且份量好足，可以見到一碟入面既蝦都唔少，每食一啖芝士配上伊面，味道一絕啊。3.椒鹽鮮魷 $88外皮香脆內裡鮮味，每食一淡一粒，都覺得好滿足，香口野黎講真係炒得幾夠火喉，真正嘅膽固醇萬歲！4.北菇草姑扒時蔬 $88帶山間鄉野清新氣息的草菇扒芥菜，味道清新，草菇鮮甜可口，為左呢餐多肉少菜既飯作為左一個平衡點。5.蒜蓉粉絲蒸元貝皇2隻 $45/隻元貝大隻鮮甜，仲有好多蒜蓉粉絲鋪係面，蒜蓉粉絲的份量真是超多，醬油都比較多 ，整體味道不錯。…Read More

呢日同同事收左工話不如一齊食飯啦，諗諗下都好耐冇食韓燒啦，諗住搵一間又好食，又可以坐得舒服既餐廳，係尖沙咀又比我搵到間好野，緊係要食下啦。入到去，發現個場都幾大喎，可以容納到好多客人。坐底後侍應好快手就比左menu我地睇，揀左一陣，決定左要叫一個「八色珍味拼盤」同埋「醬油蟹」。點好餐之後呢，侍應好快手就開始安排d韓式小菜啦，例如:泡菜，雞髀菇，海帶，白蘿蔔，洋葱，生菜等等。而且仲有三款醬比你點黎食既。上主菜前仲比左盤韓式蒸蛋我地開下胃，真係好貼心。1.八色珍味拼盤 (E03八色五花肉) $538呢個五花肉拼盤主要用左八款味道組成，分別有: 人蔘，黑椒，日式燒汁，大醬，辣椒醬，香草，咖哩，蒜蓉。就咁望都覺得顏色好豐富，我地就由比較淺色既五花肉開始燒起，放落燒盤到一陣，就已經開始聞到肉燒烤既香味，再翻幾翻就已經可以食得，用鉸剪剪到佢適合既大小，再加上豆瓣醬同埋生洋蔥再用生菜包住，韓式風味十足，感覺中和左五花肉油膩嘅感覺。而係咁多款味道既五花肉之中，我地覺得辣椒醬同日式燒汁味比較好食。2.醬油蟹（配牛油飯） $250我地仲點左個醬油蟹試試佢，係韓國就食得多，唔知係香港食既會唔會咁好味呢，果然係冇令我失望既，蟹中央充滿左黃金色既蟹膏，餐廳好貼心準備左手套比我吱d蟹膏同蟹肉出黎，加入去牛油飯中，跟住攪拌嚟食，又食到醬油蟹嘅鮮味，又食到飯素既香味，加左白飯味道比單食醬油蟹來得配合，唔會感覺好漏既感覺。…Read More

餐廳以機場和機艙為主題，裝潢十分有時尚感。座位附近設有離港方向牌，部份座位模擬成飛機靠窗機位，讓客人有種準備離港和置身於機艙的感覺。特選商務艙晚餐（二人套餐） $678餐酒: 白酒 Sauvignon Blanc Caliterra Gls餐酒有紅白酒兩款，今次試咗白酒Sauvignon Blanc，味道不澀不苦，酸度較高，有植物香氣。頭盤: 鮑魚沙律 + 鵝肝多士加有魚子點綴的鮑魚，小而厚肉，味道鮮甜，配上洋蔥，蕃茄和蔬菜等沙律，十分清新可口和開胃。而鵝肝多士肉厚多士脆，配上熱情果，平衡了鵝肝的油脂香，味道剛剛好，一口份量，令人意猶未盡。餐湯: 黑松露忌廉湯 + 花膠龍蝦湯黑松露忌廉湯的質感偏稀，但黑松露味極濃厚，忌廉幼滑。而花膠龍蝦湯的質感較濃稠，花膠的骨膠原充滿了整碗湯，龍蝦味亦十分濃厚，非常鮮甜。主菜: 豬胺配龍蝦 + 帶子黑松露飯豬胺的脂肪分布平均，配合着燒烤醬吃，分量剛剛好，但略嫌有點太熟。還有多肉鮮甜的燒龍蝦，和香脆薯角。而帶子黑松露飯的帶子非常大粒，黑松露飯亦十分香口和滑。餐飲: 綠茶以茶壺浸泡茶葉，整壺端上，味道清新，十分解膩。店員不時會主動加熱水繼續沖茶。甜品: 心太軟 + 焦糖燉蛋心太軟朱古力味道濃郁幼滑，暖暖地入口，令人感到溫暖。焦糖燉蛋表面的焦糖非常之脆，而且蛋既質感細膩入微，不用咀嚼已經划進喉嚨，兩個甜品都很出色。餐廳設有 另收10% 服務費，個人覺得服務都不錯。…Read More

呢日同朋友去咗尖沙咀行街，突然間好想食日本野喎，咁就喺商場行吓搵吓有咩好食啦，比我見到一間餐廳個名好特別，叫別天神，就俾佢吸引左，我朋友講不如就食下呢間啦。一入到侍應就比左餐牌俾我哋睇，原來呢間餐廳係專食拉麵既，咁我同朋友就分別點左兩個套餐啦，分別係「別天神套餐 ($105) +餃子 」同埋「蝦味噌套餐 ($115) +小龍蝦蟹子沙律」。而佢個set分別可以揀配餃子定係沙律嫁，我地各自揀一樣啦，因為都想試哂兩樣。1.別天神套餐 ($105) +餃子 / 小龍蝦蟹子沙律呢個係豚肉湯底既拉麵，配上左日式叉燒，味道有濃濃既豬骨湯味，好香，而且叉燒夠軟冧，入口即溶，同埋要讚下佢個半熟蛋好有蛋香，整得剛剛好係我喜歡既熟度，同埋木耳做配菜，同埋d彈牙既拉麵一齊食，好夾啊！配左小龍蝦蟹子沙律，呢個沙律幾有誠意下，味道相當好，龍蝦肉好鮮味，仲有多幾塊紫菜夾黎食，出色。2.蝦味噌套餐 ($115) +餃子 / 小龍蝦蟹子沙律另一個拉麵呢，就係用左蝦作為主打，以蝦既鮮味加上味噌湯，令到個拉麵未食已經有陣好吸引人既香味，仲有好多既蝦米仔乾調味，令到叉燒咬入口都有陣蝦米味，加上大量香葱，拉麵又彈牙，好好味。再配埋日式煎餃，加上餃子汁，入口外脆內軟，為呢餐飯作一個完美既句號。…Read More