golfingfantasy's Profile

今日放工約咗3:00pm洗牙，諗住是但食個quick lunch，呢間n年前食過吓舊舖的晚餐，見到有set lunch，2:15pm去到我先攞位，老公附近泊緊車，睇唔到人齊才可入座的標示，入到去啲枱多數只是1-2人坐，仲有一張吉枱，咪同個中年阿姐講兩位，跟住佢即刻問我人齊未，我話未，但係我哋好趕時間其實食幾個字就走我會即刻叫定兩個set，老公亦行緊過嚟，但佢堅持話人齊先入得，由於我趕時間，咁我就話我而家一位一個人食先，諗住同老公分開食我走先，點知佢咁都話唔得，仲趕我走頭也不回！我只能說我成世人都未見過態度咁差咁冇道理嘅店員，我冇機會食到佢哋啲嘢都忍唔住評論下我遇到的服務，請忽略食物方面的星因為冇得揀不適用。…Read More

今日在隔離街某餐廳搞到一肚氣未坐低就離開，找到呢間餐廳，門面普普通通，但係店員熱情招呼瞬間由地獄上返天堂，幾十蚊的午餐都會介紹一下，知道我趕時間秒速下單出菜，$60肉眼扒午餐連grissini、餐湯、成塊面咁大嘅牛扒、配薯菜飯或飯意粉，牛扒都幾Juicy有牛味煎香，薯條新鮮炸熱辣辣，凍檸茶檸檬唔苦大大杯，老公改黑椒汁又得，性價比非常高，最緊要店員熱愛工作服務態度好，見隔籬枱唔食午餐散叫佢都慢慢介紹推介食物同酒水，服務貼心。下次有機會我都會去Hea下，偷聽到佢話一set六樽啤酒只係百幾蚊。…Read More

週末中午一個人諗住去間靚靚哋的餐廳Hea一Hea，上網成日見到呢間嘢彈出嚟啲相好似好靚，Book mark左一段時間終於有時間去試一試，點知就中伏啦。網上照片好優雅有好多花，其實餐廳非常細好逼夾枱貼枱，最大問題係坐滿人非常嘈吵。侍應係幾個年青的少男少女，冇乜嘢做時都係喺度玩緊手機。一出lift就係餐廳，坐低後見到餐牌感覺已經唔太好冇乜得揀，終於叫咗個好似$140乜都唔包的散叫魷魚墨汁risortto，再加四十幾飲品，埋單二百幾蚊。個墨汁飯基本上冇乜料仲要好淡無味，上邊有隻魷魚筒仲離譜好似白烚咁，唔新鮮仲要好硬咬唔開。嗰杯熱綠茶latte溫度唔凍唔熱好難飲。最尾嗰碟飯只係食咗¼，求其嗱嗱臨飲完杯野就即刻走，因為環境嘈到個頭好痛。本身好少寫食評，但係蒲開油尖旺，二百幾蚊一個lunch求其樓下五六十蚊個set嗰啲餐廳都好食過佢好多，如果環舒適寧靜服務貼心食物質素差少少都可以接受但係呢度真係乜都冇，咁嘅情況我食完一肚氣好後悔冇加幾十揀樓上高級啲嗰啲餐廳，網上相片完全反映唔到事實真係要慎選。…Read More

第一次寫食評，某飲食app有discount去試吓呢間附近好荒蕪的鐵板燒餐廳食個early dinner，主要係近老公公司方便泊車又唔會好heavy.晚餐散叫選擇唔多，叫咗兩款happy hour 串燒（冇折），前菜、厚牛扒鐵板燒同炒飯，價錢接近五星級酒店，服務就好大落差，聽電話同侍應算有禮貌，但係唔可以叫主動。食物貴唔緊要、賣相服務同份量都應該配合。性價比好低，本來唔再去就算，但係個乜乜蝦乾炒飯好油膩，可能有兩三匙羹油喺一碗飯裏面，食完太油膩我即刻肚瀉，仲有已經飲咗五六杯綠茶，老公同我返到屋企都勁口渴要再飮幾柸清水先舒服啲。就算主餐牌折扣後性價比都好低，唔好話正價去食，唔會再去啦。蟹籽沙律望吓同隻匙羹比例就知有幾多，$90， 令人諗起多年前的元綠壽司嗰款一模一樣，冇乜味連蟹柳絲都好少。雞泡魚乾熱熱地有汁幾好味，$110 但係份量好少，仲少過平時第二道食lunch set送嗰啲串燒牛舌好大件 $40（冇折）一串，重口味算最好個樣串燒雞腎ok ?$2x （冇折）一串，正常鐵板燒厚切牛扒 $480，分量合理OK啦有啲根海膽炒飯$190一人份量一小碗，OK乾身蔥花蝦乾仔炒飯$110一人份量一小碗，出事啦一啖已經成口油，好滯食唔晒要俾老公食，行落停車場已經開始搞肚，應該係因為多油。…Read More