美食早利亞's Profile

很喜歡佐敦泰泰各種獨特自創菜式，早前喬遷至附近新舖，即刻約朋友嚟食一餐先。先嚟生蝦刺身 $138 及 魷魚遊戲 $168 熱下身，堅持用新鮮蝦做嘅生蝦刺身零舍鮮味，坊間雪藏貨沒有蝦頭的喔，而店子就連蝦頭都炸香，實行一蝦兩食。魷魚遊戲即魷魚沙律，用咗3款不同嘅魷魚，鮮魷魚筒、水魷及秘製小土魷，配上秘製沙律汁，酸酸辣辣好醒胃。一行 8人，蝦多士 $138/4件 要2份先夠滋味，蝦膠彈牙，用米通代替麵包，炸得香脆不油膩，黑金黃金入球 $143 ，用新鮮墨魚滑包著鹹蛋黃蓉再炸至金黃色，切開後造型看似熟蛋，入口外脆內爽彈，加淡淡鹹蛋香，黑色版本是加了墨汁的墨魚滑包著黃金皮蛋黃，一樣好好味。主菜點咗青檸燒牛肉 $238，店子推介多一款星河燒牛肉 $238，比起青檸醬汁嘅酸辣，星河燒牛肉多一份胡椒香，配上豆角香葉用生菜包嚟食，又另一番感覺。粉絲蝦煲 $238 保持水準，最鐘意粉絲完全吸盡鮮蝦精華而且好乾身，食落依然爽滑。本來想食鴨肉生菜包，老闆介紹另一變奏版，小炒王生菜包 $138 ，加入韭菜粒及黃金皮蛋白粒更惹味，配上紫椰菜，又好夾呀。最後差點忘記的清邁酸辣羅非魚 $238，因為造型又名飛天魚，整條魚起骨切件炸起加泰式酸辣醬汁，友人見仲有生菜就包魚塊嚟食，多一點清爽。 店子飲品都做得好精緻洛神花沙冰，芒果沙冰及原個椰青沙冰都啱夏天飲，最後甜品芒果糯米飯滿足埋個甜品胃。…Read More

早前見到報道呢度有匈牙利牛肉飯食，以前好多豉油西餐廳都供應匈牙利牛肉飯，慢慢就好似消失咗咁，所以今次專程嚟西貢想食返以前嘅味道，匈牙利牛面珠登飯 $65先到，味道回憶返晒嚟，牛面珠登仲好軟腍，好味喔。餐廳另一名物係牛脷，厚切牛脷扒飯 $108配沙嗲汁、黑椒汁或匈牙利汁，友人就揀咗沙嗲汁，牛脷都係煮得好軟熟，厚切又有口感，亦有牛脷獨特嘅香氣，沙嗲汁香濃，跟牛脷都夾，唔錯唔錯。店子提供配湯麵、撈麵，甚至炸脆麵，有機會都嚟試下先～…Read More

早幾日行過銅鑼灣利園山道，見到有家歐式麵包店開幕好熱鬧，Bread of Life 主要做歐式麵包、酥類果撻、蛋糕及甜品。首席麵包師傅曾擔任文華東方酒店及麗晶酒店餅師，精心製作的各式歐包、經典牛角酥及創新產品，主打健康無添加，全人手自家製，唔怪得件件賣相吸引，早利亞都忍唔住買咗2件。Sweet corn cream cheese danish $23 酥皮脆身，清甜燒粟米下塗上忌廉芝士，口味特別。而早利亞好鍾意 Pain Suisse $28，有機會睇片就知有幾脆，朱古力甜味剛好。店子還有多款蛋糕，清新麻糬檸檬芝士蛋糕、芋泥麻糬芝士蛋糕、抹茶黑松露忌廉芝士蛋糕、白松露芝士蛋糕及近期大熱的開心果系列，開心果麻糬芝士蛋糕。店子亦提供咖啡、奶茶、奶昔、茶飲等，行街經過可以嚟充充電～…Read More

期待已久嘅SUKIYA すき家 7月18日終於開幕啦，位於以往 Beans 嘅位置，預計會有好多街坊湊熱鬧，諗住過咗熱潮先去食，點知平日午市依然要排隊入座，咁就外賣吧～Sukiya 主打牛肉丼，選用日本產100% 越光米，以和風醬汁烹煮薄切肥牛蓋飯，最基本$29，另提供變奏版可加多種配菜如香蔥溫泉蛋、泡菜、芝士、高菜明太子沙律醬等，而早利亞就睇中以燒肉醬汁燒烤厚切肥牛嘅燒肉丼$39，一樣提供其他變奏版，而且可以加錢轉做優惠套餐包前菜及飲品。雖然好多人，但店員好快手，外賣等十分鐘左右已準備好，如有需要仲可以喺counter 加醬料或紅薑絲，打開見好多件牛肉，入口好滋味，比坊間另一家優勝好多，下次識揀啦～…Read More

嚟到土瓜灣諗起早前嘅珍多美麵包店，店子提供麵包布甸，仲有少見嘅開心果變奏版而聞名。入門口就見到早利亞幾鍾意嘅脆皮雞批，比餅皮雞批多一點層次。今次吸引早利亞係另一款係麻糬系列，顏色鮮艷嘅拔絲紫薯及採用靜岡縣抹茶嘅紅豆抹茶麻糬包，返屋企入爐焗數分鐘，回復些少剛出爐外香脆內軟嘅狀態，唔錯嘅下午茶～臨走仲見到有些鮮果撻、朱古力松露、栗子撻及紫薯撻等，款式靚顏色繽紛，$7件好抵，若果開party 或探朋友都係唔錯嘅 party food 分享～早利亞廚房早利亞的美食感覺…Read More

朋友發現呢家刀削麵就帶早利亞嚟一齊試試，先嚟選麵類，梗係刀削麵啦～酸菜鮮魚片麵，燉牛腩麵轉撈麵加$8，可選香辣、麻辣、剁椒，而早利亞唔食得辣，所以揀蔥香。多叫2款前菜，鹵水豆腐及椒麻手撕雞，豆腐入味，手撕雞惹味不太辣，好食呀～食住前菜見到師傅捧住麵糰即場削麵條，湯麵先到，好大碗份量十足，酸菜湯味道整體調和，唔好以為酸菜湯簡簡單單，好多坊間做得太搶味反而不討好。魚片新鮮，麵條有咬口，比一般麵條好食。再來撈麵，聽到師傅放香料調味落麵條後再灒油，店員送來時已聞到好香，撈勻入口，麵條煙韌十分惹味，而且牛腩粒份量多，推介推介呀～店子才剛開業無耐，暫時只收現金，閒聊幾句，師傅堅持每天搓粉做麵糰，賣晒就收舖，怪不得麵條咁好食，好有誠意，希望店子努力呀，早利亞好快又會嚟再試其他麵食。#早利亞廚房#早利亞的美食感覺…Read More

今日有些事要到土瓜灣做，完成後就周圍行街街，呢家舖頭專賣魚肉及自家製品，魚蛋鯪魚球、手炸魚旦、順德魚腐外，還有雲吞、水餃、魚皮餃、蝦皮餃等，鳳城水餃大大隻好吸引，餃子外還有手打烏冬麵同埋手製魚麵，仲見到坊間少有嘅魚扎，下次一定要買返屋企滾個湯飲。今次就買咗迷你版手包鮮蝦條及墨魚條，正常size 係$20/條，早利亞就買咗迷你版，$50/磅，咁就可以買5條，照磅$28，返屋企切開煎香加餸好方便又好味。…Read More

聖誕假期最後一天嚟到太古城跟友人聚聚舊，這家新開嘅餐廳充滿地中海風情，提供各式 Tapas 及南歐式主菜。我哋共點了5個 set lunch 及 1個兒童餐。每個set lunch 包括2個前菜，1款主菜，咖啡或茶 $198。早利亞想試多幾款前菜，分散order，大家分享。前菜共嚐試了Caesar Salad with Smoked Salmon36 Month Iberico Ham with Crystal Tomato BreadTruffle & Cheese BikiniSoup of the Day - Tomato soupGambas Al Ajillo, Garlicky Prawns with Toasted BreadCrab Vol-au-vent本來沒有好感的番茄湯有驚喜，濃郁有新鮮番茄清香，加cream增添濃稠及奶香味，大蝦有微辣好醒胃，蟹盒及伊比利亞火腿配番茄多士都好滋味。主菜分別係蜆肉意粉Linguine Alle Vongole，肉醬長通Penne Bolognese，Manhattan Pizza，三文魚Teriyaki Salmon Fillet 及西班牙海鮮飯 Seafood Juicy Rice （另加 $40），各款味道及熟度脆感都做得恰到好處，環境又舒服，我哋傾得好開心。聖誕兒童餐$188 毫不遜色，一樣有2款前菜，主菜Penne Turkey Carbonara 份量正常大人份量，仲有甜品Churros with Chocolate Dip，早利亞都想食，可惜只供應 6-12歲小朋友。這家餐廳係太古城6樓，離開喧鬧的太古城商場，環境清靜舒適，見室外都有座位，天氣暖和時都唔錯，值得再嚟。#早利亞的美食感覺…Read More

灣仔快樂餅店8月結業，門口貼上請移玉步到利安的分店，今日早利亞就到馬鞍山利安邨尋找快樂嘅蹤影啦。一到店子已見到馳名嘅奶油筒出爐，另亦有早利亞最愛嘅椰撻、蛋撻、雞批、咖哩角等，提供多款麵包都係街坊價。奶油筒$9 係舊式做法，外皮酥鬆乾脆，奶油對早利亞來說就有點膩，咖哩角$10 酥皮亦非常鬆，餡料係港式咖哩餡，唔算油。蘑菇雞批$10 餡好足料，最鐘意店舖係用金屬撻模而不是即棄錫紙模，撻皮質感會更鬆脆。椰撻$6 依然係早利亞最愛，保持水準。￥9…Read More

星期天陽光普照，天朗氣清，最好到郊外逛逛，早利亞就到香港後花園西貢。每逢周日，西貢也有假日市集，售賣一些本地手作、飾物、油畫、有機食品等，而今天還有有機農墟，售賣有機時令蔬果，非常吸引。行過海鮮街，不想食海鮮，轉入內街後見到這家以卡巴及咖哩做主打的小店，望望 menu，跟以往有點改變，又好，試試先。Coconut Lassi $25，喜歡椰汁的清香。Lamb Donar Roll 轉轉燒羊肉卷 $75，羊肉跟醬汁味道好夾，加上生菜番茄洋蔥等增加爽口感覺，用傳統的熱麵餅包裹成卷形，很不錯。Lamb Seekh Kebab 羊肉串卡巴 $88，熱辣辣鐵板上，配上薄荷醬，亦可灑上檸檬汁，羊肉口感紮實，或許有朋友會覺得少少嚡。Chicken curry with Naan 咖哩雞肉配薄餅 $78 沒有太大期望反而驚喜，以為一般咖喱但入口有多層次，香口又惹味，配飯或厚身的 Naan 非常啱。Lamb Biryani 印度特色羊肉炒飯 $88，羊肉先炆煮，肉質腍滑，炒飯沾上羊肉汁，濕潤飯粒，在座朋友都表示下次來最想 encore 這道菜。跟前小店相比，餐廳菜式細緻了，味道豐富了，但價錢依然親民，性價比高。…Read More

睇報導於烏溪沙站轉彎有家以滋補靚湯作主打的小店，原來甜品都有不少選擇，其中吸引我的是燕窩椰皇鮮奶燉蛋白，唔駛自己開椰皇就有得食，即刻去買個試試先。店員非常友善，仲教我食前放整個椰皇入爐約 7－8分鐘蒸熱，不過最後我要蒸約十多分鐘才能令蛋白中心熱透，熱度足可以提升椰皇的香濃味道。燕窩份量不少，蛋白很滑溜，甜度剛好，感覺很滋潤。等候期間望到原來有木瓜雪耳燉鮮奶，用原隻木瓜來燉，仲有杏仁茶好想試，下次吧。…Read More

聽到傳聞好一段時間，哥斯喵雞蛋仔終於係烏溪沙迎海開店，今天早利亞就買咗伯爵茶雞蛋仔，即點即做，耐心等候約十五分鐘，攞上手熱辣辣，薄身，入口都有脆感，越咬越有伯爵茶香味～仲有好多味道，抹茶及粒粒朱古力都好吸引。小店提供炸物小食如薯條、豬扒、炸餃子、炸鵪春蛋等，下次試～區內亦沒有這類台式飲品店，款式不少，有台灣茗茶、現泡茶、鮮果茶、珍珠奶茶、燕麥茶、芝士奶蓋、巨峰多多、柑桔檸檬及柚子茶等，依家食完lunch 想買杯珍珠奶茶飲都好方便啦～…Read More

相約幾位好姊妹食晚飯，朋友一早訂了枱，這家佐敦新開的泰泰，顧名思義食泰國菜，當然先來泰式活蝦刺身，加上泰式青醬鮮甜醒胃。有別一般店子，廚師將蝦頭炸脆，不單擺盤靚，入口香脆，頗有心思。黃金入球，名字趣緻，原來是用新鮮墨魚滑包著鹹蛋黃蓉再炸至金黃色，切開後造型看似熟蛋，入口外脆內爽彈，加淡淡鹹蛋香，好味喔。目測隔離枱的原隻椰青海鮮冬蔭功很吸引，可惜早利亞吃辣的程度一般，店員提議泰式椰汁雞湯，果然微辣中椰香突出又有雞肉甜味，不錯。泰式青檸燒牛肉，青檸醬汁酸酸辣辣的，牛肉嫩滑，滿口充滿香濃牛肉味，就算早利亞幅相聚焦不當都要比大家睇下牛肉幾粉嫰。半隻泰式海南雞份量不少，雞肉亦相當嫩滑。早利亞覺得泰式粉絲蝦石鍋主角是粉絲，吸盡大蝦精華，口感爽滑，搶了大蝦的風頭。還有清邁酸辣飛天羅非魚及皇牌咖哩炒蟹，配即烤泰式烤酥餅蘸醬汁一流。6人點了8道菜，再加甜品蝶豆花糕、菠蘿糕、椰青糕及芒果糯米飯，好滿足。這晚食得很舒服，店員殷勤友善，食物味道恰到好處，性價比高，過了很開心的一晚。…Read More

銀湖街市外的麵包舖尋日開咗啦～區內一直缺乏呢一類港式麵包店，無論早上返工前買個早餐，或者同學仔放學食下午茶都非常適合。今日行過聞到好香麵包烘焙味道，雖然見到好多人，但都忍不住入內行下。見到有菠蘿包剛剛出爐，個個脹卜卜，非常吸引。另外也有椰絲奶油包、鹹甜餐包、叉燒包、芝士條等，亦有蛋糕仔、杏仁條、合桃酥及懷舊曲奇餅等。買咗花生糯米糍，入口好軟熟，餡料有原粒花生，好特別，幾好食呀～最後都多買了款懷舊曲奇，以後有新鮮出櫨蛋撻食啦～…Read More

近日在社交平台回顧中見到早前釜山之旅的照片，無奈暫時都未能再到當地遊覽，唯有在港食餐韓式炸雞氹下自己。相約好友到韓國釜山人氣炸雞店 Outdark 位於尖沙咀的分店，餐廳型格舒適，燈光調暗加上點點裝飾，感覺像星夜下與朋友進餐，相當 relax。除必點的炸雞外，在 menu 內還見到多款韓式大鍋拼盤很特別，點了一客原祖海鮮辣醬炒年糕 $328，鍋上盛著幾款不同的配料，外層是粟米芝士、菠蘿粒、紫菜飯及泡菜，中央是辣醬煮海鮮年糕，最吸引是上面的炸魷魚，形態立體，擺放得像藝術品，店員讓我影相打卡後便剪開成小件，入口脆香煙韌有口感，選了輕辣版本，完全沒有蓋過魷魚的鮮味。當粟米芝士煮至半溶狀態，可以將配料捲上芝士，有拉絲效果，好食又好玩，再煮耐些，芝士底部會變得鹹香脆身，非常好吃。Outback 炸雞有多款口味，包括原味、醬油、甜辣、辛辣及香蒜，我們二人只點半份 $118，就選原味吧，配合三款醬汁，芥末、甜醬油、香蒜醬油及醃漬蘿蔔，店子還在炸雞中配上香脆炸薯條及薯格，豐富口感又吃得滿足。…Read More