小川's Profile

簡單講幾句。早餐經常食既係E餐, 有牛扒、法蘭克福腸、炒蛋、多士及飲品。牛扒唔係一般茶記早餐既「柴皮」, 有多少厚度食落口亦唔韌, 飲埋凍飲只售四十幾蚊我覺得幾抵食。午市晚市係呢度就一定係點焗海鮮飯。最吸引我係個飯既芝士同忌廉汁非常夠份量, 唔似一般茶記食到一半已經無晒汁要乾哽炒飯, 夠晒JUICY。…Read More

今日渣車去食，點知唔好彩去到幾個差人叔叔企係度攪到唔泊得車，逼於無耐唯有急急腳叫外賣再叫佢送出黎俾我啦，點左最緊要叻沙湯底同米粉之後就叫士頭婆幫我揀Ｄ撚手菜就衝返上車等，幾分鐘後外賣送到，加上差人叔叔係咁叫我走之下唯有返公司先食喇。返到公司，碗湯凍左少少反而仲好食，連埋Ｄ米粉大啖大啖咁食入感覺好正，粉腸、牛肚真係好正，但估唔到連豬潤都咁正，事關我平時都唔食豬潤既，嫌佢地好粉好難入口，今次趕時間之下誤打誤撞試到呢檔車仔麵既豬潤，感覺真係唔同晒，切得又薄又爽口，令我呢個反豬潤人士都愛上左。…Read More

與太太兩人大約半夜12:30殺到，兩人均點了奶味刨冰+煉奶，雖然可以再選三款配料，但可惜的是該店真正的台式配料實在少得可憐，什麼粉圓、ＱＱ圓、百香果、布丁之類的一概欠奉，逼不得已之下選了愛玉、珍珠及丸子，太太就點了紅豆及珍珠。約三分鐘賣相不俗的綿綿冰送到，綿綿冰的確夠綿，與港式及日式刨冰完全不同，奶味冰加了煉奶味道更濃郁，值得推薦。可惜配料實在叫人失望，愛玉味道太淡，紅豆原粒上未煮爛，靠似咬花生，幸好配料的不足未有影響主角的味道，下次會再光顧。題外話：可能是該店已經略有名氣生意不絕，為我們落單的阿姐態度已開始有點高傲，問她珍珠跟丸子有什麼分別，阿姐答案是：「珍珠咪珍珠，丸子咪丸子囉。」衛生方面亦一般，洗碗阿姐會捧著未乾的碗一邊行一邊滴水滴到成地濕晒。…Read More

星期一九點鐘一支公殺入呢間老店，人唔多亦唔駛等位，伙記帶位之後想我快ｄ落單，介紹回鍋肉俾我話係招牌菜，我心諗唔係丫嘛，難得入得黎呢間老店，梗要試返ｄ平時唔會叫既野食啦，卒之就叫左走油元蹄，再加一籠小籠包。先黎即叫即蒸既小籠包，一客４０大元但有１０隻咁多，牌面已經遠勝市面其他所謂既上海菜名店，小籠包咬入口肉鮮湯甜，爽死！之後主菜上檯，夠晒肥既元蹄撈飯一流，不過一條友食真係吃力，最後都要食剩打包返屋企。埋單＄２２０，可以碌卡。下次會試埋另一最愛既麻婆豆腐。…Read More

星期六晚上去諗住幾個朋友飲杯野，環境已經一般，服務態度仲差到無倫：１）係門口話八位，女侍應聽完就算，等左三分鐘先有個男人帶我地入座。２）話到明八位，結果條友帶我地去一張坐得四個人既高圓檯落腳，之後是但質多三張高椅俾我地就算。３）想落單，完全無人理會，因為個場太大，人手就得三四人，叫都叫唔到。４）有朋友遲黎想食晚飯，但張檯太細又太高根本食唔到，自己行去另一邊有餐檯既地方想入去，負責人話唔得，結果我朋友嬲嬲地去左隔離牛扒先生食。５）有三部車要ｃｕｐ泊車印，想問佢可以坐到幾點，佢話可以坐到１２：３０，之後幫我地轉去外面坐，２００蚊泊到兩個鐘，我地成差唔多十一點先到，諗住兩個鐘乜都夠啦，於是幫趁左佢地成八百幾蚊，諗住之後轉位都可以坐到差唔多成點先走啦，結果到１２：２５分，有個女侍應走黎同我地講，免費泊車送到１２：３０架咋，你唔走既話就會計返你之前既泊車錢，無得免費，真係玩死！…Read More

鹿嗚春，名就聽得多喇，但真真正正去食一餐，就真係第一次。今次食既內容如下：１．紅燒元蹄品嚐入口即溶既肥肉，係人生一大快事２．雞包翅湯底正，翅又夠大塊，仲有個包都好好食（可惜無牛油供應～）３．京燒羊肉羊味夠濃，鐘意食羊既朋友會停唔到口４．炒豆苗真係炒豆苗５．小籠包無乜特別，普普通通６．高力豆沙唔算太甜，個人黎講覺得好食呢餐唔算食得太豐盛，不過之後上的士扣安全帶有頂肚既感覺，可能食元蹄食得太多了！…Read More

今朝有時間特登去試下，點左個８號餐，內容有：炒蛋、炒磨菇、迷你牛角包、雞扒（免治個隻）、炒薯絲、即磨咖啡，另外有杯橙汁送。炒蛋：味較淡，要加茄汁食。不過佢地又好似無茄汁供應咁樣，要成三、四分鐘先拎到俾我。炒磨菇：夠味，好食。迷你牛角包：唔新鮮，較韌，唔脆雞扒：唔熱唔凍，扣分了。炒薯絲：夠味但幾油膩。橙汁：果汁先生好飲ｄ……咖啡：夠濃、夠熱，好。食物ｏｋ，環境非常好，夠寧靜，朝早無事幹嘆報紙、雜誌、打機既最佳選擇。…Read More