kadsuki2005's Profile

今日一早要去啟德辦事，所以為咗就腳揀咗Airside入面唯一一間茶餐廳。環境正常，水要自己行出去斟，QR code自己落單，都係而家最興嗰種全自助嘅方式。平日嘅人唔多，隔離M仔更旺~茶餐廳早餐都係嗰d，第一次嚟就叫最安全嘅沙牛麵話咁快個早餐就上枱啦~杯鴦澀味比較重，唔建議少奶。丹麥多士同火腿正常。隻炒滑蛋就落奶炒嘅，食落個面都好似濕濕哋，但其實個心已經熟曬。更重要嘅係隻蛋薄到... 感覺師傅倒蛋漿落爐個殼應該同一人邊爐嗰個殼差唔多到咗全餐最緊要嘅主角，沙牛麵都正正常常嘅。個麵可以加錢轉一丁/辛辣麵。唔轉嘅話個麵食落唔似公仔/大光。食咗兩啖幫d牛肉轉身，發現最大嗰塊係咁嘅可能係我咁啱唔好彩，佢畀咗煲底痴底嘅肉我啦... 其他牛肉係正常嘅，沙嗲味有d淡，亦當然係冇肉味😆 各位去食嘅時候就祝你哋好運啦~今次有事做就喺Airside呢邊食早餐，如果有時間嘅話，過一街之隔嘅新蒲崗會有好多更架正嘅茶記囉~…Read More

難得朝早喺觀塘出沒，梗係唔可以放過慢慢嘆個早餐嘅機會。成業街有一堆工廠大廈食堂，以前係成日食小皇子前身嘅茶記。咁既然見到茶記執咗，變成小皇子，就試佢一試啦~環境嚟講，餐廳係新裝修，好光猛乾淨。卡位夠闊，整體嚟講係幾舒適。早餐選擇都係大路嘢價錢唔貴。唔想食咁多嘅重有麵包餐，叫個包加$10有杯嘢飲。一場嚟到當然由例牌出發沙爹牛肉麵配火腿炒蛋+餐包先講個麵，沙爹牛肉好嚡，沙爹味有d淡，沙爹醬比較少；麵係普通即食麵，好在都重彈牙；條菜爽口嘅。普通即食麵一碗~餐包正常，暖同鬆軟嘅。火腿炒蛋，火腿正常；炒蛋個size非常‘’精緻‘’，滑嘅，不過無咩奶味，應該純粹係大火多油快炒而成。比較可惜係蛋味亦都欠奉，所以純粹係夠滑。最後係杯鴛鴦少奶，啡味比茶味重，個啡唔多酸味，苦味多dd；茶有少少澀。可惜送上嚟嘅時候倒咗幾啖落隻碟，差d倒埋落枱面:(整體嚟講，小皇子係成業街幾間食堂中比較多人嘅。環境嚟講係好好坐，不過嘢食太過精緻，而且味道一般，隨便食就好。…Read More

今時今日要喺金鐘灣仔搵到果汁唔難，大把Gym、超級市場都有預製好嘅（冷壓）果汁。但係要搵鮮搾嘅就唔係咁易。由於海富2/F嘅鋪頭已經唔賣五青汁，所以今日特登過嚟幫襯天天。鮮搾嘅五青汁，味道清新得嚟草青味唔係好犀利，唔鍾意食青色嘢嘅人應該都可以飲得入口。鮮搾果汁店買少見少，除咗買咖啡／珍珠奶茶，有機會都不妨幫襯吓傳統果汁店~…Read More

見有酒樓新開，特登嚟一試。酒樓唔係好大間，環境唔錯，但人流明顯比唔上商場入面另外兩間酒樓。講到嘢食，先講兩碗粉燒腩仔湯河同叉燒湯河，個叉燒幾香，有少少蜜汁味，肉質唔硬；燒腩仔個皮都脆嘅，兩碟份量都偏少。至於個河粉一般，個湯唔似係燒味骨煮出嚟。黑松露野菌餃，幾香菇味，食落有咬口。紫薯蘿蔔鹹水角，形狀同顏色都好特別。食起上嚟都係脆口嘅，個皮有dd紫薯味，唔太油膩。但係可能要就返個形嘅關係，隻鹹水角接近無餡喺入面:( 3隻無餡嘅鹹水角唔推薦叫濃湯鯪魚球，鯪魚球好細粒，入面有芫荽但無蝦米/果皮。個濃湯都救唔起粒鯪魚球... 都係唔建議叫灌湯餃，個湯幾香。隻餃入面係一大舊肉餡，好實黑蒜排骨蒸腸粉，有好少量黑蒜，排骨無咩蒜味，主要食豉油味。排骨肉質正常無咩雪味，腸粉都正常燒賣，唔係個面擺隻蝦嗰種，食落個餡都似係灌湯餃咁，比較實，不過佢蒸得剛好，上枱都係出煙嘅蟲草花鮮竹卷，上湯鮮竹卷嗰類，味道同餡料同其他酒樓差唔多。相比之下個餡無灌湯餃咁實，重好食d黑毛豬叉燒腸，呢條腸粉個叉燒同上面叉燒湯河個叉燒簡直係兩回事。個叉燒唔知係幾多日前剩落嘅，霉到接近變嘅程度。呢碟係唯一一碟建議完全唔好掂最後講埋壺茶佢係有個火暖住壺茶嘅。呢壺普洱算係有色又有少少茶味。不過可能入面裝茶葉個隔太細，加兩次水就變到清水咁無曬味講埋服務，間酒樓唔係好大，人手都算充饕，唔難搵人幫手嘅，員工亦都有禮貌。價錢方面，佢全日同價，無分早午茶市嘅。呢部分喺黃大仙嚟講真係難d吸引到街坊...總結嚟講，商場另外兩間酒樓都門庭若市，唯獨呢間新酒樓walk-in直接有枱。除咗個位置比較隱蔽之外，佢嘅性價比都係差少少。有嘢值得一試，但係試完又未到想再嚟嘅地步。希望佢捱得住…Read More

疫情之下灣仔咁多茶餐廳頂唔住，而薔紅憑住招牌燒春雞屹立不倒。不過今日唔係食午餐，係食早餐。早餐食評難搵，所以都嚟寫返篇早餐食評等大家晨早搵食有得參考。今日叫咗個三拼麵餐，沙嗲牛肉+炒蛋x2公仔麵配熱奶茶少奶。個餐上枱就係咁：先講個麵，麵底係大光麵，煮嘅時間正常。沙嗲牛肉都係普通雪牛肉，入口即散。沙嗲好淡，無咩花生味。炒蛋係最普通嘅炒蛋，淨係得蛋，唔同而家d餐廳鍾意落奶或者落忌廉。隻蛋炒得全熟，所以咬到入個心都已經實曬。到杯熱奶茶少奶，個茶味唔係好濃，唔知係咪忘記咗少奶，杯茶奶味重過茶味。香滑，但係我都係愛濃茶味多d。重點嚟啦，要喺灣仔突圍而出，薔紅嘅早餐杯餐茶係無限續杯嘅！！所以冒住生腎石嘅風險又叫多杯茶少奶。今次杯茶就真係茶少奶啦~ 飲到茶嘅澀味，茶嘅香味都更濃烈。但係個茶底味道好普通，飲唔出有溝茶葉。最後講環境，平時食lunch薔紅好熱鬧坐得好迫。但係早餐得十枱八枱，佢開半邊餐廳都依然坐得好舒服。不過餐廳全程播住葉倩文嘅歌，鍾意唔鍾意就睇人啦~最後畀埋個早餐餐牌。（午餐晚餐易搵，早餐餐牌真係絕無僅有）…Read More