食之美少女's Profile

今日一個人無無聊聊就入咗呢間御滿屋食午市放題，超近旺角地鐵站，一出地鐵站，唔使1分鐘就到餐廳。佢有三款價錢，每款到有唔同種類嘅嘢食，我就揀咗最平嘅$238，都有77種選擇，而家仲好方便用電話落單就得。一入門口就見到冷盤吧，蒜蓉螺肉、八爪魚、海蜇頭、中華沙律、泡菜蘿蔔應有盡有，隨便夾嚟食，旁邊都仲有炸雞薯條同薯塊，幾方便。甜品都係自助吧形式，隨便揀隨便夾。大大個飲品櫃，汽水綠茶基本飲料都有，連啤酒Apple cider都有提供，選擇頗多。刺身都有10種左右，我就每樣都試吓，三文魚油甘魚食落好新鮮，螺肉好彈牙，甜蝦赤蝦都好鮮甜👍🏻👍🏻手卷就叫咗海膽手卷同埋吞拿魚用手卷，細細個好迷你，試到佢嘅味道又唔會太飽，材料都新鮮。同時都叫咗鮑魚軍艦同埋海膽墨魚軍艦，賣相好吸引，材料都好新鮮😝熟食都有唔少選擇，天婦羅基本款都會有，海老天婦羅就啖啖肉，其他蔬菜天婦羅都好Juice，而佢天婦羅嘅粉都唔算厚。蒜蓉焗蠔，蒜蓉整到好香，但係蠔就比較細隻。相反，吉列炸蠔嘅蠔就大大隻，識落好香口同好多汁。燒鰻魚食落都好香，冇乜細骨，辣酒翡翠螺就偏辣，不過螺就好大舊肉。最驚喜就係香辣小龍蝦，小龍蝦整到好入味同好惹味，不停encore😙😙佢都有提供movenpick 同Häagen-Dazs嘅雪糕，但我真係太飽食唔落了😝😝，唯有下次再嚟過…Read More

九龍城出名泰菜就個個都知，但係都俾我搵到一間大隱隱於市嘅日本餐廳，主打懷石Omakase。店舖細細，但係門口就以典型嘅日式建築裝修，非常吸晴同好啱打卡👍🏻，店內就以簡單嘅L形吧枱為主，位置都好有限。午市有兩款套餐選擇—「北」&「斗」，我就揀咗「斗」✨前菜- 漬物 芥末山藥 漬魷魚前菜擺盤好靚，師傅好nice咁逐一介紹各樣前菜。樣樣都不過不失，但係芥末山藥最驚喜，口感爽口清甜，淡淡芥末增加左山藥嘅甜度，顛覆我對山藥嘅既定形象😳😳✨蜆湯擺盤超級吸晴，蜆湯非常清甜可口，入面有一大粒蜆肉同杏鮑菇👍🏻刺身✨柚子帶子配海膽新鮮嘅帶子就會有佢獨有嘅鮮甜味，配上柚子汁，更加清甜開胃，而海膽都好新鮮，一啲苦澀味都冇。✨火炙鰹魚&赤鯥鰹魚就正常水準，而赤鯥表皮燒過之後油香味撲鼻，食落魚味鮮甜，口感豐富👍🏻✨火炙大Toro: 紫菜包住炙燒完嘅大toro入口即融，滿口油香，脷之滿足🤤✨宮城蠔配三文魚籽: 大大隻宮城蠔，飽滿多汁，鮮甜美味，鹹鹹嘅三文魚籽更吊出蠔嘅鮮味👍🏻串揚 ✨串揚京都萬願寺辣椒 師傅介紹出自京都嘅萬願寺辣椒100隻得1隻會辣，可惜我食嘅係另外嗰99隻，辣椒表皮由麵包糠加蛋漿，炸到香脆，食落去鮮甜多汁，十分開胃✨串揚沙錐魚: 表皮脆卜卜但一啲都唔粉，沙錐魚肉質鮮嫩美味，一絲魚骨都無✨串掦子持昆布第一次認識子持昆布，原來係日本鯡魚係昆布上產卵，而魚卵連住昆布就係子持昆布。師傅話出面好多都係人工製造，而佢哋舖頭提供嘅係純天然👍🏻👍🏻 食落去係魚卵脆卜卜嘅口感，表面加咗櫻花蝦同柴魚絲，增加咗鮮味👍🏻✨串揚鯛魚白子： 食落去滑lulu，好似食啫喱咁，配上酸汁令成件白子更加開胃✨明太子龍蝦🦞: 龍蝦肉煙靭彈牙，配埋明太子醬更加惹味✨辣味明太子茶漬飯: 辣味明太子提升咗茶漬飯嘅層次，好惹味✨靜崗縣蜜瓜：果肉鮮甜多汁，完美咁完結左呢一餐特色嘅懷石Omakase…Read More

聽講呢間霸王雞好出名，特登走入元朗試一試。舖頭有室內同室外，我就揀咗室外食，望住街景食好似唔錯，霸王雞賣相唔錯，份量都正常，雞下面就用芽菜打底，表面就灑上炸蒜同蔥花，都幾惹味。但係豉油雞就麻麻哋，啲汁有啲鹹，賣相都一般。雞絲粉皮就完全唔入味，就算落咗好多芝麻醬都食落無味。店員態度一般，面無表情，仲要成日都送錯單。…Read More

今日同朋友去太子西餐廳食生日飯🥳，店員好友善好細心，好主動介紹咗佢哋嘅拿手菜式。主菜就叫咗燒加拿大厚切保濕豬配蜜糖芥末醬，豬肉真係超級嫩滑多汁，表面就燒到香噴噴，就算唔搽芥末醬都好好味，據聞係用一種獨家保濕技術，令到豬肉keep住多汁😯另外要推薦嘅係，蒜香乾蔥牛油忌廉汁煮紐西蘭鑽石蜆配意大利包，蜆肉真係好鮮甜，而且每一粒都係大大粒😍，用咗佢獨有嘅蒜香乾蔥牛油忌廉汁，令到蜆肉鮮味更突出，烤過嘅意大利包點埋個醬汁食，真係超級大滿足呀😎， 忍唔住再加包，絕對冇浪費咗個醬汁。朋友話想食意粉，我哋就揀咗蝦蟹膏蟹肉帶子意粉，醬汁好濃郁，但又突出到蝦味蟹味，扁意粉又可以掛得多呢個醬汁🍝 ，你每一啖意粉都係一大享受，而佢香煎嘅帶子大大粒嚟又好鮮味，仲叫多個蕃茄忌廉汁德式腸車厘茄意粉，同樣都都好好味呀，醬汁濃郁，食到粒粒嘅番茄肉。飲品都冇令人失望，叫左Mango Tree & Many berries smoothie，唔係太甜，好好飲，顏色繽紛打卡都好適合💗當然最後要有甜品收尾，我哋叫咗布朗尼蛋糕，再加多咗雲呢拿雪糕🍦，上枱嘅時候寫埋生日字，原來朋友仔一早訂枱時就已經落要求，真係好驚喜🤣🤣食物方面真係要大贊，感覺是平民價錢，但是食物就係酒店級的質素😍 。仲有依家餐廳做緊活動，只要證件名字同店舖名字有相符嘅英文字母數量，就有唔同嘅優惠待遇。…Read More

西營盤不嬲都美食多籮籮，巴剎雞飯招牌細細，但係開展左我嘅東馬拉美食之旅，選擇唔多唔少，但樣樣都係高質之選🐓🥟🍢巴剎雞飯係招牌之選，當然要試吓啦。雞飯一上枱已經好吸引，雞肉又嫩又滑，配埋佢獨家嘅醬汁，酸酸甜甜超開胃，又帶出雞肉嘅鮮味，油飯粒粒分明，啖啖雞油香，但又唔會太油膩👍🏻👍🏻👍🏻唔講唔知，原來係皮蛋餃係東馬拉嘅特色菜，老闆話每隻皮蛋餃都係佢每日親手製作。酥炸皮蛋餃超驚喜🥰，每隻餃子都用料十足脹卜卜，一咬落去已經食到肉嘅新鮮，而中間嘅皮蛋增加咗餃子嘅香味，餃子皮炸到超鬆脆威化，真係食唔停🤤🤤，我都係第一次食到咁高質嘅炸餃子🥟。好彩有得試埋佢嘅湯餃，餃子皮超滑，皮蛋喺湯餃入面發揮畫龍點睛之效，令到餃子超鮮味🤤🤤串燒都係誠意十足，串燒可以揀豬/牛/雞，我就試咗豬肉串燒，肉質嫩滑多汁，味道校得啱啱好，又香又惹味，配上老闆親手整嘅沙嗲醬，令到串燒又上一個層次🤤🤤今次真係大飽口福，嘢食有特色又夠高質👍🏻。老闆店主都好友善，老闆仲介紹埋佢親手炒嘅香脆胡椒粒，口感脆卜卜之餘胡椒味超突出，又last得耐，加落去啲飯同麵仲可以提升鮮味，不過淨係得堂食有供應。老闆話遲啲仲有獨家新品推出，真係要帶埋朋友一齊嚟食過🤣🤣🤣…Read More

今日行到去北角嗰邊食晏，見到呢間餐廳門面超有台灣風，睇埋餐牌幾吸引就入去試吓。原來lunch淨係得午餐套餐提供，不過都唔少選擇，清清地試咗佢個雞湯湯麵。六合蟲草花濃雞湯麵(特級濃雞湯）麵可揀粗麵或幼麵，我就揀咗幼面，當碗麵送上台後，店員會係面前即時加湯，應該係為咗令啲麵保持口感。雞湯咬到奶白色，一倒湯嗰時就聞到濃濃雞味，飲落鮮甜美味，食得出真材實料，誠意十足。雞肉比雞湯更出色，雞肉嫩滑入味，加埋蟲草花，再多一份鮮味👍🏻👍🏻加滷肉+$15餐餐加多$15又可以試埋佢嘅滷肉，滷肉香濃入味，偏醬香型同多油份，啱晒重口嘅人，送飯一流👍🏻鴛鴦地瓜條 +$18地瓜條好驚喜，佢喺用咗紫薯同黄色蕃薯，炸到脆卜卜，咁表面落咗一啲類似黑糖薑絲，食落甜甜哋特濃雞湯時蔬+$18第一次見咁迷你嘅小棠菜🥬，細細碟入面都有十幾顆，一口一啖超過癮，浸左落雞湯之後超鮮甜👍🏻珍珠奶茶茶味重，珍珠超煙韌咬口，好過坊間啲茶飲店👍🏻午市優惠套餐都幾抵食，小食都係$18 一份，仲可以加選兩份，試多啲野，啱晒咩都想食嘅我👍🏻👍🏻，不過見到佢晚市仲多啲小菜小食同甜品，下次夜晚先嚟再試過…Read More

lunch心思思想食雞煲， openrice下就見到呢間樓上火鍋店都幾多like。捐窿捐罅終於搵到間餐廳，門口大大個招牌「巧得鍋」，餐廳入面都好闊落，啲位坐得好舒服，店員好友善咁招呼我地👍🏻👍🏻Lunch time有提供唔同嘅午市套餐，粥粉麵飯樣樣皆齊，應該都係做開平時工廠區嘅lunch。而我最想食嘅雞煲都有午市二人套餐，半隻雞加個蒜蓉炒娃娃菜/魚湯娃娃菜，仲配多兩個白飯，先盛惠$168，幾抵食👏🏻👏🏻半隻雞嘅份量都頗多，啖啖肉，又香又惹味，雞肉都好入味，仲可以揀辣度👍🏻雞煲入面有洋蔥、彩椒同芫荽，係雞煲醬嘅影響下好鮮甜🤤 店員仲介紹咗佢嘅獨家嘅辣椒粉，鍾意食辣嘅我梗係要試啦，灑咗落件雞度，辣椒嘅香味更加突出，但辣度又唔會維持得耐，正正子🤩🤩，成個雞煲配飯一流😎娃娃菜係魚湯嘅浸禮下，顯得更鮮甜，仲可以解埋辣tim 😌😌除咗原有提供嘅麥茶之外，仲有四款不同口味嘅冷泡茶，我就揀咗白桃烏龍同桂花烏龍，兩款嘅花味都好突出，好順口👍🏻👍🏻👍🏻睇返餐牌，除咗招牌雞煲之外，佢都提供唔同特色鍋底，價錢又唔會架貴，仲有新鮮牛肉同時令海鮮，下次再嚟試下其他火鍋先😌😌…Read More

今次搵野食搵到去工廠區🤓，搵吓搵吓就見到有間叫「榮哥私房菜」嘅餐廳，行入餐廳，店內不大，裝修簡潔樸素，但係每張枱都有屏風隔住，私隱度好高。呢度嘅菜餚都是老闆榮哥親自烹制的，聽講佢係一位多年的私房菜大師，手藝非常精湛，仲攞過好多獎添🥇。我哋今日就叫咗個四人私房菜單，每道菜式都各有秋千，令人回味無窮。✨榮哥自家甜酸齋呢個甜酸齋頗多醬，食落酸甜美味，非常開胃又解膩👍🏻✨脆皮豆腐豆腐粒外皮炸到超鬆化，但係入面仲係滑捊捊，加埋蒜粒，好香口惹味，食個唔停🤤✨本地水耕沙律菜伴芝麻醬：沙律菜好新鮮配埋芝麻醬，一流配搭，十分開胃✨雙色墨魚仔🐙：肉質彈牙，一次過試到兩種口味✨茶燻流心蛋伴黑魚子醬配厚切茄子🍆：茄子令我十分驚喜😍，茄子炸到酥脆，但係依然好多汁，再配埋獨有嘅醬汁，一入口已經感受到成個茄子充滿滲透晒芫荽嘅精華👍🏻👍🏻👍🏻✨原盅燉哈密瓜螺頭黑毛豚肉湯/原盅燉川貝陳皮海底椰鱷魚肉湯兩款湯都係真材實料👍🏻 ，湯水清甜可口，入口順滑潤喉，飲完成個人暖笠笠✨蝦球水芙蓉賣相好吸引，蒸蛋入口即溶，味道清淡得嚟又夠味，表面嘅蝦球肉質彈滑，清甜可口✨韓泡汁煮牛面肉配雙色蘿蔔（微辣）牛面肉燉煮得好入味，肉質口感軟熟，帶有少少辣味，送飯一流✨荷香蟲草花牛肝菌蒸沙欄雞蒸雞很嫩，肉質鮮美，每一塊都浸滿了菇菌嘅鮮味，雞味亦很突出，讓人回味無窮✨米王有機時令鮮蔬菠菜嘅綠色令它看起來非常開胃，感受完肉類嘅濃味，就需要返蔬菜嘅清新係中和味蕾，口感清爽，食到菠菜真係好新鮮👍🏻👍🏻✨農坊獨頭糖心黑蒜炒飯炒飯好有鑊氣，而當中嘅黑蒜咬落酸酸甜甜，炒飯入面仲有帶子粒、瓜粒同炒蛋，令成個炒飯別有一番風味，真係色香味俱全👍🏻👍🏻✨紅糖芝麻湯圓芝麻湯圓大大粒，咬落芝麻餡流心，芝麻味好濃郁，配埋紅糖薑茶，食完之後成個人甜絲絲😝😝「榮哥私房菜」係一個幾唔錯嘅中式私房菜餐廳，菜品豐富，味道極佳，店內的服務也很周到，價格都幾親民，啱曬一家人或者成班朋友一起食。…Read More

行過天后想食碗麵，地鐵站附近就見到呢間餐廳，佢唔係賣普通魚蛋粉都唔係賣米線，而係專做特別手工蘭州拉麵，近近地就入去試吓佢出名食各種牛肉麵，擔擔面同炸醬麵，但都有提供唔同嘅飯類。我就嗌咗個胡同兒炸醬麵，屋企人就叫咗個新疆大盤雞寛麵，見全部都係肉，叫番啲蔬菜配搭下，就叫多個四川泡菜同涼拌木耳。呢間餐廳好特別，來嘅種類都有6款，細睇返原來係唔同形狀嘅麵，我估形狀唔同口感應該都有分別😂😂我叫咗炸醬麵，麵就揀咗二細，肉醬都係由豬肉碎、豆乾、香菇煮成嘅一個醬汁，再搭埋青瓜絲，成碗麵賣相好吸引🤤，食落去面好有口感同彈性，肉醬味道啱啱好，香得來唔會太鹹👍🏻👍🏻未聽過新疆大盤雞，所以就叫嚟試吓，見到由雞件洋蔥薯仔同辣椒煮成嘅一個餸，肉汁濃郁，用嚟撈麵一流，雞肉件數好多，仲要啖啖肉，一個人根本食唔晒👍🏻，而佢寬面就好似刀削麵，面可以掛多啲汁，每啖都好滋味。四川泡菜小辣，涼拌木耳係用陳醋浸，所以食落好開胃，配麵一流。見到佢有做小龍蝦放題，睇落去好吸引，不過留返下次先再試啦。…Read More

雖然餐廳唔近地鐵站，但係一眾車房入面零舍突出，店外大大盞射燈照住，離遠都見到個招牌。店內好寬落，都擺左唔少枱，啱晒两三個知己又或者大班frd 聚會，好彩我一早有book枱，連平日夜晚都full曬🤙🏻🤙🏻▫️前菜-漬蕃茄:酸酸甜甜 零舍開胃▫️日式炒雜菜: 份量頗多夠曬鑊氣，但有少少鹹▫️燒青尖椒: 表面鋪咗柴魚絲，入口時加咗香味，重點係咬咗啲辣椒籽都唔會辣親👍🏻👍🏻▫️燒四季豆& 燒鴨胸▫️照燒手羽: 日式嘅鹽燒雞翼係我最愛❤️，表皮燒到卜卜脆，再加少少🤏🏻鹽花，真係配酒一流🤤▫️豚肉露荀卷: 香脆嘅豚肉包住新鮮嘅露荀，食肉嘅時候又可以解膩🤤▫️燒魷魚板: 甜辣口味▫️燒白鱔: 魚皮燒到脆卜卜，肉質結實，一入口肉汁爆出嚟👍🏻▫️燒雞軟骨: 脆卜卜得嚟又會好香口🤤，啱曬送酒▫️燒雞腎: 一串份量都好多粒，爽口得嚟又唔會太靭▫️燒牛柳 & 鹽燒五花腩: 大大件，嫩滑多汁，肉味重，油脂感一流👍🏻▫️燒櫻花蝦飯團🍙：飯團燒到脆卜卜但又唔會太硬，櫻花蝦🦐好香，令成舊飯加分唔少👍🏻👍🏻▫️月見免治雞肉軟骨棒: 加埋生蛋黃同醬油，令雞肉棒滑入口滑漏，味道多層次，雞肉味更突出🤤🤤串燒種類繁多質素好高，仲有主食牛肉飯或者烏冬提供，唔驚會食唔飽，同埋價錢真係好抵食👍🏻👍🏻。最重點嘅係佢開到凌晨12點，啱晒宵夜想食串燒嘅人…Read More

屋企人想食東南亞菜，諗翻起西灣河附近有一間幾有特色嘅星馬泰餐廳，就帶佢哋去試試。離遠就見到佢個大招牌，餐廳鋪面幾大間，裝修都幾新淨光猛，餐廳職員個個都着曬東南亞風格唧花花恤衫，氣氛好正👍🏻👍🏻。我哋就安排左坐窗邊位，仲可以望住街景嘆午餐。同屋企人每人叫咗一個特色lunch set，叫咗招牌海南雞飯同埋星洲肉骨茶，再叫多個大蝦紙米卷，因為午餐有配餐飲，屋企人仲叫咗好特色嘅桔仔話梅水，呢個我見都未見過😂😂招牌海南雞飯海南雞嘅份量正常，肉質好嫩滑多汁，雞味都頗濃，配埋佢嘅泰式辣醬，好惹味🤤🤤，油飯都好香夠囇味，啲飯唔會太乾太硬同太油，整體唔錯👍🏻星洲肉骨茶（一字骨）肉骨茶個湯底藥材味好正，飲得出真材實料，同埋都有好多一字骨，啖啖肉同埋啲肉都好入味，油炸鬼都好脆口👍🏻大蝦米紙卷米紙卷塊皮好煙韌彈牙，包住大蝦、青瓜絲、蘿蔔絲同埋芒果，配埋芒草醬，入口好清新爽口，中和埋肉類嘅濃味，係一個唔錯嘅小食👍🏻👍🏻桔仔話梅水就酸酸甜甜好開胃，餐飲唔使加錢就可以試到，正🤪…Read More

係大南街行下行下發覺有一間裝修好日式嘅餐廳，個名仲好特別叫八不，見啱啱開門唔洗等位，即刻入去試下先餐廳入面裝修得好日系無印風，牆紙喺日本浮世繪，食物Menu都以木牌形式掛喺牆上，不過佢就用電話落單我叫咗一個吉列廣島蠔烏冬，吉列蠔有三件，仲要係大大件，再搭多兩件吉列野菜，炸物表皮炸到好鬆脆，廣島蠔仲keep住好多汁👍🏻👍🏻，一啲都唔厚粉亦都唔會炸到乾曬，而烏冬嘅湯底有3種選擇，日式清湯、沙嗲湯同辛辣湯，我就揀咗清湯，烏冬煙靭，配料有櫻花蝦、腐皮同昆布，令到個湯底鮮味十足。我再叫多一個小食日本青絲海蜇，入邊有好多海蜇、青瓜絲、昆布同櫻花蝦，海蜇份量都唔少，食落都好fresh幾惹味，如果配埋烏冬一齊食，口感會好豐富👍🏻👍🏻店員都好友善，問佢湯底嘅問題，都好詳細咁解答，同埋見到佢對啲小朋友好Nice😊😊睇翻menu主要都係食壽喜燒、烏冬同埋蕎麥麵，每個item都有唔少選擇，但係價錢又唔算貴，值得一試。…Read More

今日心思思想食吓burger，行到美麗華見到呢間BurgeRoom，大大個紅色招牌超搶眼，睇下Menu都有唔同類型嘅自選漢堡，好多選擇幾吸引喎👍🏻👍🏻餐廳超闊落，好多位置可以選擇，又有唔少打卡位，見到仲有室內同室外位置揀我同大大都各自揀咗個漢堡，再加多兩個小食，鍾意食牛嘅佢就揀咗乜都有啲嘅大雜錦牛肉漢堡，我就揀咗一個大烤菇雞柳漢堡黑松露芝士大烤菇煙肉牛肉漢堡 $130牛肉漢堡好足料，睇落好吸晴，牛肉同大烤茹好juicy，黑松露芝士醬好惹味，一次過滿足晒鍾意芝士同牛肉嘅漢堡愛好者大烤菇雞柳漢堡$115同樣大烤菇好多汁，但係雞柳就有啲偏乾，不過搭埋晒好鮮甜嘅蕃茄片🍅同新鮮生菜🥬，令到成個漢堡好juicy同fresh芝士飛魚子薯條$68熱辣辣嘅薯條淋上芝士醬同新鮮嘅飛魚子，口感好多層次又充滿濃郁芝士味，不過可能淋得太多芝士醬，啲薯條就開始有啲諗，所以呢一個小食要趁熱食香辣單骨雞翼配蜜糖芥末醬（8pc）$60雞翼炸到脆卜卜，一啲都唔太厚粉，香辣嘅雞翼再配埋蜜糖芥末醬，配搭一流…Read More

新年食得多中菜，想食下日本菜，行過荃灣千色匯見到呢間古今二有啲特色創意卷物，又有唔少燒物選擇，就同朋友仔入去試下龍捲風沙律$76呢個沙律好colorful，上面有蟹籽蟹柳中華沙律再淋上千島醬，又加一啲芝士脆脆，成個口感好豐富，而且啲沙律菜好新鮮，食落好fresh黑豚豬頸肉串燒 (1串)$28豬頸肉串燒一上枱超香，肥瘦比例啱啱好，咬落去幾煙靭，表面又會脆脆地，而且佢豬肉味幾膿，唔錯唔錯👍🏻煙花(6件)$79 & 金龍卷(6件)$98呢兩款都係signature嘅卷物，煙花卷上面就係吞拿魚蓉，食得出材料幾新鮮，吞拿魚蓉仲有少少甜。而金龍卷就係炸蝦卷上面再加三文魚，入面嘅炸蝦炸到卜卜脆，而壽司飯唔會太厚，令到成件卷物唔會太Heavy三河極炎活鰻 $78呢份燒鰻魚好surprise，size大過我塊面，表皮燒到脆卜卜，而鰻魚嘅肉質就比較煙靭，唔會好容易散，再加埋去魚皮果層骨膠原，咬落去口感好軟糯，不過就有少少漏，加咗啲檸檬汁就會好味啲…Read More

食得多住家菜總會想食啲麻辣小菜，今日經過西灣河呢間川一，就咁出面睇好似都幾多川菜涼拌菜選擇，就入去幚自己加下餸。酸菜魚 1人份 $88我最鍾意就係食酸菜魚，佢呢個酸菜魚魚片數量唔少，仲要個湯唔算太油，飲落好惹味好開胃，底下仲有唔少芽菜酸菜同薯粉，連兩老都話好味😋涼拌拼盆(三葷送一素) $60涼拌菜都有好多選擇，我就揀咗豬肚、豬耳絲同脫骨香豬肘，佢而家仲送多一個素菜，我就揀咗海帶絲試吓味，店員仲好友善問使唔使要加辣，我就揀咗普通麻辣，涼拌啲豬肉都好入味，又唔會太辣，但又有少少麻，而且份量都唔少🤤秘製泡椒鳳爪 $38我平時都幾鍾意食鳳爪，呢個泡椒鳳爪入晒味，完全感受到泡椒嘅辣味，雖然到幾辣，但真係食到好過癮。店員都好推介佢哋嘅麻椒魚皮，俾咗少少我試下，好驚喜喎，魚皮有口感爽口彈牙，一啲都唔腥👍🏻👍🏻…Read More