話說昨日下午去深圳寶安見客，開完會工廠老闆車我落蛇口，準備經深圳灣口岸返香港。岩岩幫佢做完左單 project，老闆話想請我食飯，當係慰勞我喎！原本唔想去，因為之前同屋企講左話開完會返去食飯！工廠老闆家住蛇口，鄰居最近推介佢去食燒肉，於是建議帶埋我一齊去試。佢囉張咭片出黎俾我睇，張咭片又設計得唔錯喎。其實我嚮香港都經常同一大班朋友去韓國菜館食燒肉，而家有機會去嘗試深圳ｄ燒肉店，當然唔會放過呢個機會，於是發個短訊返屋企，同老婆講話唔返屋企食飯。去到餐廳,，泊左架車嚮餐廳門口停車場。入到去，發覺環境同裝修都唔錯，感覺好舒服，仲有埋音樂，拍得住海岸城裡面ｄ食肆。工廠老闆負責點菜，遇岩餐廳老闆都在場，於是問佢有咩好介紹，老闆話基本上各種肉類都 OK，而且大部份都係進口貨。我同工廠老闆都喜歡食牛肉，於是就點左一份西冷，除左肉類之外，我地都想試下其他野，最後我地總共點左五份菜色，整體都十分滿意，別有一番風味！埋單果時餐廳老闆話佢地有嚮 OpenRice 刊登廣告，見佢咁好人，招呼又好，於是拍心口應承佢上黎俾一俾意見。五份菜色包括：一份西冷、一份鳗鱼、一份基圍虾、一份青口、一份蔬菜拼盤，另外仲點左兩支啤酒，埋單都只係217人民幣，平均一個人108.5人民幣。而家嚮深圳食一個快餐閒閒地都要三十四蚊，如果嚮香港果ｄ燒肉店兩個人食無400蚊都落唔到樓，仲未必食得飽。而家食咁多野坐得得咁舒服都只係一百蚊左右，我覺得十分之抵食。差ｄ唔記得同大家講，鳗魚同西冷都十分之正，蔬菜拼盤好大碟好抵食！打算農曆年前帶埋老婆上黎試，就當係兩個人撐檯腳團年。聽老闆講話如果由深圳灣口岸搭的士去呢度，車程約十分鐘，車費大約廿蚊左右，遲ｄ深圳地鐵仲可以通到呢度，聽講好近地鐵站，交通都算方便～…Read More
