FoodIsEverything's Profile

之前係IG見有人推介呢間餐廳，咁岩朋友生日，佢request要打邊爐，於是就帶左佢黎呢間度慶祝。呢度無論係裝修，用具定係擺盤都勁打卡able, 黎慶祝特別日子都勁有face~一開始落左單之後就有職員捧左一大盤醬料材料黎，除左平時好common嘅材料之外，仲有好少見嘅洋蔥同埋芝麻，耳目一新呢度好似比較多人推介食內臟，咁岩我朋友都係一個好鐘意食內臟嘅人，見佢呢度提供咁多款嘅內臟我地都叫左唔少黎試下。內臟嘅部份我地叫左豬潤，豬肚，鵝腸，同埋比較少見嘅粉腸黎試。粉腸我真係成世人第一次食，但朋友極度推介。食落嘅口感都幾特別，外面煙煙韌韌，但咬到入面又有少少豬潤個種比較淋身嘅口感，都值得試下～豬潤非常新鮮，切得厚薄適中，爽口得黎內裡又有D軟淋淋。不過咁多內臟黎講我都係最鐘意食鵝腸，爽口又掛汁，打邊爐食最過癮！湯底方面我地叫嘅係鮮茄雜菜湯，雖然個人黎講打邊爐係比較鐘意食D濃味D嘅湯底，但朋友話太濃味會蓋過左內臟嘅香味，佢生日佢話事啦～但個湯嘅蕃茄味都出，唔會感覺太單調打邊爐嘅重點之一就係牛肉，所以我地叫左一份鮮牛肉，估唔到細份嘅份量都唔少，其實3-4人食都冇問題! 2個人食食到捧住個肚走! 由個色澤睇黎出D牛肉真係好新鮮, 雖然佢瘦肉偏多但食落一D都唔鞋，牛味都好香濃，非常抵食！另外再叫左個日本黑豚肉，肥瘦均勻，煮完一D都唔鞋，豬肉味相對就冇牛味咁出另外叫左三拼丸，有黑松露豬肉丸，金沙牛丸同柚子墨魚3款手打丸。色澤非常靚，口感都好爽口彈牙，不過幾款丸嘅特別口味都唔係好出到，如果黑松露同柚子嘅味道可以更加突出到的話就會更好唐生菜都好新鮮，不過份量就可以再多少少…Read More

大角咀出名多好食嘅小店，今日就同朋友黎揾食～呢間小店係利奧坊附近，超易揾，雖然細細間但好精緻，店外店內嘅裝修都好有格調。座位唔多，寧靜舒服，岩晒想揾個地方好好傾計嘅聚會！餐牌嘅選擇都幾多，好多樣野都想試。不過餐牌嘅價錢可能會唔update，本身叫左一款野食後來埋單先知原來係唔同價錢，雖然價錢唔係差得好遠，餐廳同我地解釋左係未update得切個menu，所以落單前可能要問清楚個餐牌係咪已經係最update會安全D酥炸大啡菇配粉紅汁，其實叫呢個嘅主要原因係想知咩係粉紅汁～食落似係千島醬嘅味，然後有D辣味咁。不過個大啡菇都炸得幾有驚喜，皮好薄，所以好夠脆身得黎又唔會硬，配大啡菇嘅texture係好簡單又夾嘅配搭！加拿大保濕豬鞍配薯蓉，豬鞍嘅份量比預期更大，2-3個人share黎食都冇問題！豬鞍應該係用慢煮嘅方式烹調，所以肉質保持得非常鮮嫩，好juicy，而表皮又烤得微脆，呢個豐富嘅口感好加分！而調味亦都好足夠，就算唔點mustard都已經好好食。薯蓉亦都夠creamy，有淡淡嘅奶香。呢道main 真係幾推介！辣XO醬蟹肉扁意粉，佢呢個fusion 設計得幾有特色。XO醬味好突出，每條扁意粉都好均勻咁有XO醬嘅味道。少少辣好開胃，不過蟹肉嘅份量可以再加多D！開心果gelato，口感似雪糕，食落開心果味都算出，有輕微果仁嘅咸香味…Read More

最近天氣凍左好多，成日都想食D暖笠笠又辣辣地嘅野暖下個人。係荃灣廣場睇完場戲過黎食個dinner好方便。平時食烤魚都係得烤魚同打邊爐，但呢間餐廳一D都唔簡單，烤魚雞煲串燒涼拌打邊爐樣樣都有，有D食材仲要唔係周圍都食到，價錢仲要一D都唔貴，真係超級滿足嘅一餐呀！食辣野好重要嘅一樣野就係飲品！好欣賞呢度有D健康飲品，李乾蘋果茶好清新，蘋果味好香，冬天飲好滋潤！串燒我地叫左羊肉串，雞腎，雞軟骨同白鱔。羊肉串孜然味極夠，勁有風味，而且蓋過左羊肉嘅蘇味，連我呢個麻麻地鐘意羊肉嘅人都好ok!麻辣雞腎，個人覺得比串燒雞腎更出色，調味夠香，食得好過癮～雖然叫左小辣但都覺得幾辣本身店員推介魚味最重嘅草鯇魚，但我地怕食骨，所以就揀左啖啖肉嘅海鱸魚。泡椒口味帶點酸辣嘅感覺，不過上枱真係比佢嚇親，勁多泡椒，好在小辣食落都仲可以接受，普遍香港人都應該食到。魚肉吸收左汁嘅味道好惹味，一啖接一啖！條魚夠大條，4個人share都夠晒食！黎到見到有雞煲食朋友又話想食，鮑魚雞煲4隻鮑魚每人一隻岩岩好～雞肉size 切得幾方便食用，一啖一舊，調味夠香口～不過最令我驚艷嘅係佢打邊爐嘅雞湯同魚湯。我地因為2樣都有叫所以2種湯底都試到。要大讚呢間舖絕對唔敷衍，唔係比D清湯你去打邊爐，越食越淡，而係質素非常高嘅雞湯同魚湯，特別係個雞湯，feel到係勁濃郁勁足料，真係為左個湯黎打邊爐都值！食左咁多野都已經飽左幾成，但都叫左幾款火鍋配料黎食，呢度嘅火鍋配料真係樣樣都係佛心價！呢款冰魔芋係第一次見，好奇之下叫左黎食，豆製品但食落口感似豬皮咁爽口又索汁，幾推介素食者試下～另一個好推介嘅配料係朋友介紹嘅千章豆皮，呢個又係我冇見過嘅產品。用黎打邊爐真係一流，掛汁得黎帶點煙韌嘅口感，同火鍋呢個食法真係perfect match!鴨血都有得食，不過建議可以切返薄片少少，口感會更好…Read More

係千色匯做完facial，心血來潮想食下日本野，就同朋友一齊係度揾間餐廳。千色滙平日人流唔算好旺場，但呢間餐廳都頗有名氣，見到都有唔少人幫襯，所以就入內試一試佢。舖位唔算好大間，但座位都唔會太擠迫，可以舒舒服服食餐飯～柚想蝦你 - 見到好多人推介呢個沙律。份量幾大，柚子份量唔算少，為呢個沙律帶黎左個卜卜爽嘅口感。無論係沙律菜定係蝦都好新鮮，而且有中華沙律係裡面令個口感同味道都豐富左，雖然簡單但好食！蜘蛛 - 我唔係好知點解佢叫蜘蛛～呢個軟殻蟹卷件件都好大舊，有D難一啖食晒。軟殻蟹腳嘅部份炸完之後仲有D微脆！再搭配牛油果creamy嘅口感，係不敗嘅選擇～椒鹽雞腎 - 雞腎愛好者一見到就忍唔住要叫黎食！簡單用椒鹽同檸檬汁黎調味，燒得香口，唔會好乾，保留到雞腎爽口嘅質感大阪自家製炸雞 - 呢個份量唔算好多，但都幾有驚喜。炸粉薄薄一層的，咬落去脆得黎又唔會感覺好邪惡或者好肥膩。雖然肉質稱唔上係好juicy，但仍然係嫩嘅。想食炸野又唔想驚太油的話呢個選擇都唔錯～今晚嘅MVP 係呢個 - 火山！首先賣相已經夠吸睛了，店員會上枱然點著碟外嘅鹽，火大約會燒1分鐘左右，確保有足夠時間影張靚相～唔好睇佢細細碟，其實真正食落去係超級飽肚的！佢大約係由8舊反卷組成，上面仲有一大層有D辣度調味過嘅蟹肉沙律。味道非常惹味，蟹肉沙律單食都好好食，辣度適中，好開胃，忍唔住一啖接住一啖咁食落去！心靈同個肚都得到滿足！…Read More

依家想約人食飯可以慢慢吹水嘅地方真係越黎越少，大部分餐廳都只係得1-1.5小時嘅用餐時間，食完野都冇咩時間剩。約左個好耐冇見兼就黎要移民嘅朋友出黎食飯，真係好需要一個空間可以好好傾計道別。揾左呢間地點就腳又好坐嘅酒吧餐廳，食住野飲住酒咁傾下計。我地黎嘅時間好早，同埋係平日，所以一開始好似包場咁滯。但放工時間就開始陸陸續續有人黎。野食選擇唔算多，但勝在份量都算夠飽。我地叫左個澳洲M2 牛扒，大過我個手掌。店員冇特別問我地要幾成熟，但煮出黎嘅熟度岩岩好。牛扒有少少部份有筋，所以有D 韌。香草意粉就幾有驚喜，有香草嘅清新香味得黎又creamy。Black Cod and Jumbo Scallops Herb Pasta，魚嘅肉質嫩滑，即使簡單調味但一D都唔腥，帶子煎得岩岩好，唔會好乾身Chill下點可以唔叫酒飲～我地每人叫左一杯呢度嘅signature cocktail黎試，好特別嘅係呢度係signature cocktail全部都係以茶調味。愛飲茶嘅我一定要試下。荔枝煎茶超級超級出色！唔係誇張，係我飲過最好飲嘅cocktail! 荔枝本身嘅味道就易入口，而呢杯嘅茶香非常濃厚，唔係走清新路線，但煎茶嘅香味同酒係意想不到嘅夾，加埋一齊不但冇蓋過對方，反而昇華左成件事！回味無窮，好想再飲呀！另外一杯香莓茉莉就係走fresh嘅感覺，不過個人都係覺得莓味嘅酒容易會有藥水味，唔太岩我。…Read More

成日慶祝嘅時候一係食西餐日本野，有少少食到悶，想食D特別D嘅野。今次就揀左呢個聽個名都覺得神秘嘅地中海菜黎試下！我地當日比較早去，係餐廳嘅第一枱客，可以揀位。其實坐窗邊都幾有Feel，不過我地都係揀左普通嘅枱黎坐，闊落舒適D。燈光美，氣氛佳，係約會嘅好地方唔知點解呢度嘅水杯係壽司圖案一開始仲以為自己睇錯黎嘅目標好清晰，就係要食蠔揀左佢嘅mixed set 黎試，有3款蠔可以試，一共有6隻。佢嘅擺盤好搞笑，係用煲仔飯嘅煲裝住。每隻蠔都好大隻，雖然唔係好似D 日本蠔咁漲卜卜，但全部都好肥美店員教我地要由相片入面嘅右邊個款開始食起先，一路向左食，因為蠔嘅味道係由淡至濃，所以咁樣食先會有最好嘅享受，非常講究！除左檸檬汁之外，店家都調制左一款酸酸辣辣嘅汁，幾開胃。不過個人覺得檸檬同tabasco 配蠔先係Perfect match，地位無法被動搖3款蠔都好重海水味，蠔嘅鮮甜味好突出！個人最鐘意食第一款，雖然係叫做味道最淡個款，但甜味同海水味嘅平衡好岩。唔知點解我覺得第二款嘅味道仲濃過第三款！食入口個刻真係濃到嚇親從來未食過咁濃味嘅蠔，不過個種好似膏味嘅味道有點太重，同埋質感食落比較稔身，唔係我鐘意個種蠔嘅type~ Fried fish with arabist sauce，其實主要係想試下個sauce 先係咩味道食落似係蕃茄底再加D香料，中和左個味道唔會太酸。個炸魚嘅口感食落有D似九肚魚咁，肉質嫩滑，而且冇骨！另外要左個西班牙海鮮炒飯，呢個炒飯嘅味同我食過嘅有D唔同。味道食落唔係蕃茄汁做底嘅感覺，酸甜味唔太突出，反而係有陣甘香嘅感覺，唔知邊隻先係正宗嘅味道呢～海鮮份量都唔少，不過飯嘅份量就偏少，如果多人share每人可能都係得3-4啖，建議份量可以比返多少少最後以churros作結，churros 係我甜品嘅top favorite 頭幾名，不過呢度嘅churros 冇玉桂粉，只係得糖係面，冇左陣香味，表現比較失色。不過佢個底嘅朱古力醬就非常有驚喜！超級超級香濃，一食就知係高級野，唔係求奇嘅死甜朱古力醬，唔甜反而係好rich嘅朱古力香，微微Dark chocolate嘅"苦"味會滲出黎，食完繼續有after taste留係口腔入面，超級高質呀！…Read More

我人生都冇幾多次去過葵興 ，最多都係搭車經過，但基本上冇咩係呢區explore過。今次機緣巧合之下同朋友黎呢區攞野，順便發掘下有咩好食。呢間Pizza 店雖然位置好近地鐵站，但畢竟呢度都唔算係人流好多嘅站，除左返工之外應該都好少特登黎呢頭。所以黃昏黎食人流唔算好多，但見到舖頭keep 住出緊外賣單，應該區外都有D知名度。舖頭唔算好大間，但坐得好闊落幾舒服，見到有2枱客似係放工黎食飯飲酒傾下計，都幾寫意～仲要有個小窗口睇到廚師工作，幾得意～黎到就梗係要試下佢嘅Pizza，揀左個2 in 1 Double Happiness，可以一次試晒2款Pizza，分別係印度香料烤雞同肉食愛好者。唔係講笑，呢個L size嘅份量真係超大，每人食2件都已經飽得7788，呢個價錢真係好抵食！呢個批底厚薄度岩岩好，煙韌得黎又帶點脆身嘅口感，唔會只可以鬆軟或姐脆二選其一，非常高質！兩隻味用料都好足，勁多配料又勁多芝士。如果真係要揀一隻味的話，個人覺得印度香料烤雞味道更特別，香料味令到pizza嘅層次豐富左得黎又唔會太濃，恰到好處！另外我地仲叫左個忌廉雞肉闊條麵，呢個意粉食落唔會覺得漏，但就比較清淡一D，調味要重手返D就會好D。見到其他枱嘅人都有叫到雞翼黎食，睇落都唔錯～不過我地太飽食唔落，下次有機會再食～…Read More

大喜屋系列嘅餐廳之前都有食過，但係第一次黎極尚大喜屋食，估唔到佢嘅午市都幾抵食，難怪我平日放假黎食lunch 都成個場坐滿咁濟！呢度嘅食物款式都唔算少，除左手機落單之外，外面都有好多自助嘅冷熱食，飲品同甜品，睇到眼花飲品除左各類罐裝同紙包飲品外，仲有2款自家製冷泡茶，白桃烏龍同洛神花茶，兩款都係無糖嘅，健康又解膩！勁多人都攞黎飲！雖然我麻麻地飲酒但都試左一試D清酒同梅酒，個人覺得梅酒酸酸甜甜好飲D～刺身款式都唔少，仲有比較高價嘅赤貝，象拔蚌同帶子，其中我最鐘意赤貝，幾有鮮味，質素唔錯！壽司我都叫左幾款黎試，最出色嘅係火炙左口魚，燒得勁香！蟹膏蟹肉壽司嘅蟹膏量都唔吝嗇～燒物勁推薦食燒牛舌，燒得香口，而且肉質好爽口彈牙，encore 左幾串燒菠蘿都幾juicy而且菠蘿夠甜，正～炸物最推薦就係炸鮮奶！呢個仲要唔係間間放題都有得食，要好好把握！叫左個中式牛柳黎食，其實平身期望不大，但估唔到一食就驚艷到牛肉唔韌而且好夠味，又有鑊氣，就連配菜都好入味，係有大排檔嘅水準！而且份量唔算太多，唔怕會食到好飽，好值得叫黎食呀！唔知有冇人同我一樣對蟹粥有種無法抗拒嘅感覺每次見到就會想食，理得佢感覺抵唔抵！呢個蟹粥都幾出色，首先D粥煲得夠綿，唔會水還水米還米，雖然談不上超級有鮮味，但甜味仍然係足夠的，朋友本身話唔想食，但見我食得津津有味，佢都忍唔住，食完之後仲一啖接一啖tim甜品極力推介呢款榴槤雪條榴槤控絕對絕對唔可以錯過！超級無敵好食！而且係真榴槤味，唔係假嘅膠味！食完一條完全覺得唔夠喉呀！！！…Read More

日本野係我最喜愛嘅菜式之一，成日都好想食但銀包又唔爭氣所以間唔中就會黎呢間餐廳度食餐滿足下，銀包又唔肉痛呢間餐廳食物質素OK得黎價錢又實惠，所以基本上次次黎親都見到坐爆晒～黎親好似差唔多次次都會叫個沙律, 因為勁大份勁抵食！今次叫呢個温泉玉子牛油果凱薩沙律，菜嘅份量好多，不過牛油果份量就可以再多D～芝士厚燒玉子真係名乎其實，超級厚身！芝士鹹鹹地配合埋厚燒玉子嘅甜味令到整體豐富D！玉子燒都幾滑，不過覺得可以稍稍燒得濕潤返D就會更好！叫左個三點刺身盛share，每樣都有幾件share 黎食就岩晒，價錢又唔貴，過下口癮滿足晒又唔傷荷包白咖哩烏冬配炸雞，呢味白咖喱烏冬越黎越多地方有得食，雖然聽落好簡單但每次見到都會好想叫黎食，咖哩味香得黎又帶點creamy嘅口感，鹹同甜嘅味道互相配合令到佢比普通嘅咖哩更加有層次黑豚肩燒丼份量都唔細，大大碗飯加豚肉有好幾大塊，雖然望落bling bling 但口感唔油膩，豚肩肉色水咁深就知道好夠入味，好好送飯，估唔到仲有泡菜附送黎解下膩！…Read More

呢間舖由一開始要進駐香港嘅時候已經聽聞過，不過一直都未揾岩機會去食，今次經過見未駛等位就終於黎到朝聖。本身目標非常明確就係要黎食海南雞，但原來呢度嘅海南雞又唔止一種選擇，一路睇menu仲要見到樣樣都好吸引，而且選擇非常多，選擇困難症發作如果多D人黎食嘅話樣樣都試到就好啦！店員解釋比我地聽兩種海南雞嘅分別，而我地偏向揀冇骨同埋肉質好相對較滑嘅天天海南雞，雖然係例牌嘅size唔算好大，但雞肉的確係幾嫩滑，佢嘅海南雞醬汁夠味而且有微辣，食起上黎好過癮如果份量大份D就好了芥末花螺呢味小菜都幾特別，賣相非常利害！一上台一陣仙氣湧出黎，非常打卡able~花螺份量都幾多粒，不過芥末嘅味道就唔算好重蒜泥豚肉擺盤都好靚，豬肉唔肥，岩晒我呢D怕食肥肉的嘅人，夾住青瓜多左份清新嘅感覺，醬汁濃味但我覺得蒜味可以再重D最後以個榴槤丸子做甜品，好似煎堆仔咁不過中間充滿住榴槤肉！不得不讚佢呢度嘅野飲真係勁大杯，杯水果茶有整整1L抵飲到痴線，飲完真係要去返幾次廁所先得唔同水果味道都好出，唔會互相蓋過大家，好fresh 好好味！…Read More

週末晚係旺角要揾食真係唔容易，趕時間要快快手揾間餐廳搞掂一餐，見到呢間店面幾企理就入黎試試。呢度嘅餸嘅選擇都幾多，價錢平貴都有，仲有好多小食，可以隨心配搭。菜脯唔辣，夠爽口朋友唔想諗就直接揀個招牌麵，每樣餸都有D。個麵唔會煮得好稔好爛，腩汁比較清淡，個人覺得可以鹹D。湯底唔油。豬皮同辣魷魚都爽口，瑞士雞翼炆得夠稔。另外叫左份炸燒賣，份量都幾多，2人share 每人都可以食到好多粒。炸得香脆，配埋泰式辣醬係一個冇得輸嘅組合！我就叫左炸墨魚卷，冬菇同埋溏心蛋烏冬。沙嗲汁嘅份量唔太夠，如果比多D會更加好。炸墨魚卷有2條，口感幾爽但放左係湯度稔左少少。冬菇超級大隻，彈牙同埋幾香。溏心蛋好出色，甜甜地仲有陣淡淡嘅酒香味，蛋黃嘅形態都煮得岩岩好！麻辣牛栢葉麻香味幾夠，唔會太鹹，唔算好辣，岩晒我呢D食唔到太辣嘅人港式樽仔奶茶雜果冰都有得叫，勁有童年嘅味道…Read More

對觀塘地段唔係好熟路，通常黎得呢頭都係係APM 附近兜下，今次一search下有咩食見到呢間的餐廳咁多好評，即刻決定去試下！作為路痴嘅我揾路揾左一段時間先走到入黎上到黎都有少少嚇親，估唔到有咁大間cafe仲要個裝修都幾靚，有室外又有室內，想要咩氣氛都fulfil到！見到室外仲有人帶埋毛孩黎呢度睇黎走開fusion 嘅style，食物款式雖然唔算多選擇，但都幾有gimmick! 菇菇燻鮭明太子奶油章魚燉飯就咁睇個賣相就已經夠晒吸引啦！大大條章魚鬚夠晒吸睛！加埋隻動L嘅温泉蛋真係睇到都胃口大開！Risotto 好creamy，鐘意creamy 口感嘅我表示ok!但朋友相對鐘意乾身少少就覺得可以收返少少水章魚鬚勁大條勁粗身！爽口彈牙，非常高質！台灣風味牛肉千層麵極度邪惡！周圍都係芝士，再加滿滿一層芝士粉係面頭，簡直不得了，食完個肚腩可以大多一個碼！份量勁大份，就算係4個人或以上share 每個人都可以分到一定份量，我地就食唔晒要打包我地再叫左個甜品share，依家好hit 嘅牛角包窩夫我都係第一次食，都真係幾正，比傳統窩夫多左份牛油香，不過仍然係邪惡嘅代表！…Read More

傳聞中新蒲崗都有唔少好野食，但通常同朋友黎開都係去mikiki食，畢竟唔係太熟呢邊嘅路。但今次有地頭蟲帶路揾野食，就梗係放心跟住去啦！餐廳唔算好大間，人流都非常多！雖然我個日係6點去到但基本上都已經坐滿晒人，再晏D可能就要等位先入得。餐廳嘅野食價錢都好大個range，豐憸由人。我呢D冇咩錢嘅就食唔起太貴嘅野，不過都好有好多選擇！每個野食都會送味噌湯同沙律，味噌湯入面竟然有幾隻硯！幾有驚喜！黎到一間叫海膽仔嘅餐廳點可以唔試下佢嘅海膽！雖然呢個海膽三色丼唔算叫好多海膽，但絕對值得呢個價錢！海膽食得出夠新鮮冇怪味，仲有三文魚籽同拖羅蓉幾樣高級嘅食材，CP值真係好高！另一個就叫左個燒左口魚邊丼，上面有唔少黑松露，左口魚份量真係夠晒多！而且好肥美，作為燒左口魚嘅終實fans 真係非常之滿足！啖啖香味！食完都仲有陣陣魚油香同黑松露香係個口度！…Read More

呢日係大埔行街,  同朋友意外發現呢間酒吧平時去開尖沙咀, 估唔到大埔舊墟入面都有間咁有氣氛既酒吧裝飾有氣氛有得睇波呢個就一定架啦由於未食夜晚所以都叫左D野食呢個德國鹹豬手個皮夠晒脆仲有薯條同蕾薯條配CP值極高呢個墨西哥鐵板烤雞又係要推介鐵板烤雞非常之入味夾埋個墨西哥薄牌簡直一流有三種醬可以慢慢mix仲叫左雞翼三重奏啱晒鐘意試多D唔同味既朋友款款都好高質野飲就叫左杯Afterglow同Ripple都係nocnoc既signature cocktailAfterglow甜甜地啱女士飲Ripple就帶少少酸黎吊出杯野既味調製得有心機, 各位朋友可以根據自己既口味揀總括而言今次物有所值!…Read More

出黎做野之後開始少左去食任食嘅野，因為有時會覺得雖然好似抵食D，但通常質素都未必咁好。今次打邊爐就試下呢間唔係任食嘅黎獎勵下辛苦返工嘅自己。呢間餐廳都幾多元化，除左打邊爐之外都有提供刺身同埋串燒嘅選擇，雖然刺身價錢少許偏貴，但有多D唔同選擇比消費者係好事係打邊爐嘅食物黎到之前我地就叫左串大啡菇黎食先，大啡菇幾juicy同香，燒嘅程度岩岩好:)再叫左一榨青檸梳打黎share，甜度岩岩好，好解渴同解膩！呢種酸度我鐘意叫左呢個養生嘅花膠雞翅鍋，十分足料，湯好好飲！係打邊爐前已經飲左大半鍋！雖然係會有味精嘅成份但係不失為值得飲嘅湯！肉我地叫左一碟醉雞同埋牛柳粒。醉雞好入味，一上枱已經聞到好大陣酒香味，就算煮熟完食都食到好足嘅酒味，食得出唔係就咁放D雞入去D酒就上枱比你值得一試！牛柳粒嘅牛味好重好香，口感都好好，雖然未去到入口即溶，但絕對唔un!呢個黑松露墨魚丸都好好食，黑松露味好香，充滿成粒丸！而且爽口彈牙，一客8粒份量都算ok。萵筍係打邊爐嘅其中一樣好正嘅菜！夠新鮮爽口！最後再叫左個吱吱魚麵黎食。其實今次係我第一次食吱吱魚麵估唔到係咁好食，魚味好香！份量都好多，係烏冬外另一個我好鐘意嘅打邊爐麵類…Read More