洵仔8204's Profile

元朗Cafe黎講，位置方便又排晒長龍既，依間都算係代表之一，基本上冇見過佢唔排隊既時候，難得人少少就去試下啦！一上枱相當足料，唔同既芝士鋪晒係面，視覺效果係幾正既，個人喜好有肉醬係面會仲正，不過唔試下又唔可以話一次要有肉醬先正。一入口就係明顯既Lay’s芝士味粟米片，味道太有特色。配上既2個醬一個係黑松露蛋黃醬，蛋黃醬係較酸果一隻，點黎食既時候蛋黃醬味道好搶，黑松露味基本係冇，感覺同粟米片既味道都有啲沖突。另一個蜜糖芥末，同樣酸味好出，味道太突出，同粟米片唔係好夾。感覺上成個粟米片係調味上冇乜用心，好似未係好配搭到成個味道。依種點醬而唔係浸係個醬入面既手法其實幾好，可以自由決定醬既多少。雞翼食落有少少似CP雞，但都唔算大問題。真正既問題係個醬，個味道唔似水牛城醬，偏甜辣度唔夠，完全食唔到水牛城醬既影子，當然如果係創新菜都可以理解，但就係純粹唔係果個味道，只係炸雞翼配左一個甜辣醬。味道唔錯，酸度辣度都恰到好處，配上煙三文魚彼此既味道都唔會沖擊。意粉本身就大路野，微微粗身左少少，依種唔算濃味既意粉，如果用幼身少少既麵條會好啲，唔會食到麵粉味。窩夫薄而脆，最中心點有啲煙韌，唔會似蛋糕，又未去到完全得脆既口感，製作掌控得相當好。偏甜既味道中，用略帶苦既可可粉做中和，味道既平衡都做得好唔錯。入面既焦糖脆脆份量亦恰到好處，唔會太多。成份窩夫平衡感相當好，會想一啖一啖食晒佢。薄荷味非常淡，朱古力味飲落亦係粉開出黎既味道。先唔講份量有啲細，味道真係令人有啲失望。玫瑰荔枝味都係淡淡既，唔算好濃，你可以用清新去形容，個人口味會想濃返少少，不過依種清新都唔會令人討厭。空間環境真係唔錯，係好令人relax既一個氛圍，係會想令人hea一日既小店感。窩夫真係出色既，算係有驚喜，不過其他野食野飲就有待加強喇。如果唔洗排隊，再去食窩夫都可以既。…Read More

-由於👦🏻同👧🏻都中意食日本野，而👦🏻咁岩就係居酒屋關注群組搵到依間位於尖沙咀心臟地帶既居酒屋。仲要竟然可以book到位？！真係令人又期待又怕受傷害。純粹係因為👦🏻去食Omakase好中意食依個前菜，難得見到依度有就嗌黎送下酒，唔會太咸，食到麵豉味既同時又會食到蒜既甜味，好耐冇食過Omakase，所以都幾懷念依個味道。大隻既日本蠔如果唔新鮮好怕會好腥，一見到上枱手掌咁大隻，真係有少少驚。一食入口，加上三文魚籽，其實真係有少少腥，不過好巧妙地運用左辣蘿蔔去中和腥味，好快已經食到應有既鮮甜味，整體感覺唔差，食到咁大隻漲卜卜，滑身口感既蠔都滿足左食蠔既心情。依個赤貝認真麻麻地，個雪左好耐既感覺，好似雪爛左赤貝既爽口質感，雖然味道依然係清甜既，但就冇果種鮮味。海膽質地上水水地，似唔太新鮮，食落味道有少少臭味，食到最後仲有少少苦，食材選取同儲存上都唔係最好既做法。今次最令人失望既野食，帆立貝燒得過熟，而且用既應該係比較初階既帆立貝刺身，所以食落有少少中菜炒帶子既味，蟹羔味亦唔夠鮮甜，無論分拆開一個個元素定成個組合都唔成功。蜆煮得岩岩好，少少生，一啲唔會韌，食落酒味唔算好重，鮮味就幾出。飲個湯既時候會飲到酒味其實都幾濃，只係冇入得太多係蜆肉入面，成個湯都飲到甘香鮮甜，相當足料。燒得相當脆身，入口口感滿分。味道方面，先係食到濃濃既明太子醬味，再黎有濃香既燒汁，2者加埋其實幾咸，而豆腐本身又好甜，令成件事好重口味，一食馬上想飲水，重口味到有少少涸喉。炸漿唔厚，食落幾脆口，紫薯口感已經有少少軟爛，係正當水準既炸紫薯口感同味道，天婦羅既整法冇太大加減分。味道極香，一入口撲鼻而黎既香氣，炒飯亦做到粒粒分明，口感岩岩好，有咬口唔會太爛亦唔太硬，唯一就係有少少油，特別食到底會有簿簿一層油係上面，但除此之外，依個飯真係處理得相當唔錯。居酒屋黎講，酒同氣氛都好緊要，依間居酒屋依2樣野都做到，得係食物上面就差少少，位置係超級方便既地點，基本上只要諗起就可以去，不過依個價錢同依個質素就未必可以做到必食首選。…Read More

近年真係有好多唔同既酸菜魚餐廳出現，自問都試過唔少以不唔同數字做餐廳名系列既酸菜魚，例如十三少、十二味、十十酸菜魚等等⋯⋯ 今次就試下同佢地應該唔同系列既 姚姚酸菜魚 啦。一個好特別既味道，從未食過既香味，依種香料味唔算好濃，但就完美覆蓋左肉味，所以有少少其實唔太知食緊咩肉，而肉既質感亦都已經去到好似比鬆肉粉改變左一樣。佢既炸漿係唔錯既，唔會太厚，亦到幾脆。整體係好香口，有少少略咸，送酒既程度啦，亦唔係唔好食，只係唔太知食緊咩。以為會好辣，但其實又唔會，食落只有香味連小辣都唔算，反而感覺可以有少少辣度去刺激一下。同一般依種處理既鳳爪一樣，質地係好爽，冇乜鳳爪本身既味但香料就入晒味。會忍唔住係咁食，食到後面就會開始麻住個咀喇，依種多麻少辣的確幾過引。佢既酸菜魚除左一盤過都係酸菜魚之外，仲有好多唔同既組合，眼見已經要食放湯既酸菜魚，另一邊就試下避風塘大蝦。先講下個蝦，風味其實幾好，不過絕對唔係避風塘，避風塘係以炸蒜味出眾聞名，但明顯依個係用大量乾辣椒，實質其實係辣子雞果種辣子底料，除左一般底料，你會發現有一種平時唔會見到既薯條，係幾有創意既，但薯條唔脆，又好油咁，其實都幾唔好食，而個蝦就真係唔太新鮮，雖然調味唔錯，但入面既食物就認真麻麻地。黎到酸菜魚，魚入口好滑身，但就好腥，酸菜同辣味都冇辦法蓋過個腥味。第2個重點，湯底，缺乏魚味，酸菜香亦冇乜，只可以算係普通高湯。反而另一個重點酸菜既處理係唔差，酸味淡淡，但相當既香。佢仲可以加唔同配菜入去，今次加左粉絲，量都算對得住個價錢，粉絲吸左湯汁好好味，佢本身冇薯粉係底，所以加粉絲都係一個幾好既選擇。環境黎講真係好有食酸菜魚既感覺，服務上今次既體驗唔太好，每次上菜都邀請👦🏻起一起身，相當唔方便。而野食方面，主打既酸菜魚真係麻麻地，其他野食亦唔算有好大記憶點，所以都未必會再去試了。…Read More

冇得去旅行既日子，唯有去chill下打下卡，今次搵左開打卡cafe好好chill一下。日本主題既cafe，以簡約風做裝飾風格，主要既打卡位係舖頭外面，環境認真唔錯，天氣好既話坐室外真係幾正。餐牌上一系列多士，感覺多士一定係招牌菜，於是就揀左依個有多款多士既早午餐。4款多士分別應該係原味、抹茶、焙茶、蜜糖牛油，點解會用到應該呢，因為除左外型比較容易判斷個味道，食入口既味道真係較淡，當中抹茶算係最有抹茶味，其餘3款麵包本身既味道仲更加濃，多士本身係烤得外脆內軟既，火喉既控制還可以，但要成為招牌菜就欠缺一啲特色。入面既咸食反而仲比較岩口味，甜甜既炒本菇、加上麻油既牛油果、清淡口味既揚豆腐，都可以平衡到骨腸、煙三文魚、溏心蛋既膩口感，係味道平衡上做得相當唔錯，唯一挑剔位係溏心蛋有啲過熟，當然唔需要似流心蛋咁蛋黃成流質，但應該食唔到沙沙地既口感會比較好。飲落口有少少涼涼地，係比薄荷級數低3級左右既涼，後勁係少少蜜糖既甜味，味道幾新奇，係未試過既味道，不過就唔係果種飲完一飲再飲既味道。◍ 肉桂蘋果威士忌特調 $𝟴𝟴 ◍酒味濃郁，依一點好欣賞，絕對唔會係為左少用酒毫無味道果種調酒，個人認為蘋果金寶既味道相對有啲太搶太有特色，其實蘋果金寶味已經唔算好濃，但就同威士忌既味道互相搶得太厲害，令到威士忌既After taste同回甘沖淡左好多，enjoy唔到飲威士忌既享受。雖然話去Cafe好多人都係想打下卡，野食未必需要好好食，但如果真係想chill下都會想搵一間野食同環境可以平衡既地方。野食野飲黎講，唔算太有記憶點。環境上，如果可以係外表打卡位坐下都應該幾唔錯，但果日咁岩落雨，只可以坐入室內，唔知係咪處理緊洋蔥，成個空間都好醃眼😂😂😂，被迫好快食完就走左喇，無辦法好好咁享受，所以成個體驗係麻麻地。不過真係好多遇著岩岩，所以只係今次個人體驗比較差，裝備真係好日系，環境係好慢活，野食野飲擺盤都精緻既。…Read More

打邊爐都有omakase!? 一定要試一試佢啦。除左火鍋，仲主打酒、牛同音樂，聽到依度已經唔可以唔去喇！由於本身位置唔算好多，而且依家都係極火紅，基本上只可以後補Booking，食到食唔到完全靠彩數。Book位既時候已經訂左海鮮同牛肉，點解叫Omakase，就係當日有咩新鮮就比咩你，牛既邊個部位正就比邊個部位你，完全係由佢發辦！依個湯底都係要預訂既，因為每日煲到黎賣既份量有限，所以唔訂就唔會有，先飲湯，飲完再加湯打邊爐。湯底一飲就知道係老火靚湯，而且唔會飲到味精既原味靚湯，豬骨同蜆都相當足料，就黎跌出黎咁濟。蜆肉唔會太老，但湯又飲到底層有淡淡蜆味，似係湯底本身有用蜆煲，上枱之前再加新鮮蜆肉。一黎就會有介紹環節，介紹你訂左扇牯牛皇今日係咩，另外如果想追加老蘭嫩牛四併又會有咩選擇，會係唔同既部位。我地4個人去食，先食左扇牯牛皇，入面已經有4個部位，每個部位每人2至3塊左右啦。未食過扇牯牛，只係聽過牛味會濃好多，果然一食同普通牛係有差別，一塊牛肉好似食緊牛扒咁，果種濃郁既香氣係唔可以係普通牛體會到既，而且每塊都香嫩無比，一啲都唔韌，但又唔會食到鬆肉粉既味道。食過之後就返唔到轉頭，由於有少少唔夠喉，所以就補多左個老蘭嫩牛四併。同樣4個部位，同樣每人2至3塊，其實佢都好好食，比起出面叫既牛級數真係差得遠，但講令人震驚既程度都係扇牯牛皇更勝一籌。不過既然主打牛肉，只要黎到都係2隻食晒嫁喇，一定唔會後悔！◍ 涮羊肉片 ◍足夠既羊味，而且完全唔臊，嫩滑程度只比扇牯牛低一級，都係高質之選，份量上同牛差唔多，但就冇分部位咁講究。平時怕食羊既人都可以試下，唔敢包你一定接受，但如果依個都接受唔到，相信你感受唔到食羊既樂趣。只要打邊爐就不能沒有午餐肉，依個係一代偉人既名言，好似係。炸得脆之餘，又唔會燶，入面亦相當軟熟，而且唔同出面既午餐肉，佢仲可以就咁食，唔一定要放湯。你會話午餐肉可以有咩咁特別，但係就咁開一罐切比你，同炸過，炸得好就可以睇得出店家既用心。次次食任何野都好少會影漏既，今次老闆其實有請食一碟肉，佢都講到明係啲邊邊角角，不過正常都會影相，點解今次冇？完全係因為個氣氛！音樂既共嗚，客人與客人間既互動，個個伙記都拎酒周圍去同啲客人飲，成個氣氛似係酒吧多過似係餐廳。蘭桂芳五花百門既新餐廳，間間都講求IGable，依間珍姐就裝修到成間地痞茶餐廳咁，點解都可以full成咁？除左野食好食，氣氛真係好可以影響到件事。珍姐係少數去完，馬上就plan下次食既日子，真係好想再浸淫係珍姐既美食同氣氛之中。…Read More

由於難得book左港島區既酒店，就搵一間港島區既餐廳啦！韓式中式最近都食左，夜晚又食西餐，Omakase月頭又食左次，所以就決定搵一間日式得黎又唔係Omakase 既野食下，做左一輪功課之後，決定試試依間午餐黎講選擇都算多既 月山 喇。成個環境都好清幽雅致，感覺好似食懷石料理既地方，一入去會見到一艘木船，假如你係食Omakase就會入座依個位置喇。由於今次係食佢既Set Lunch，所以就坐左入面窗邊既位置，更加寧靜，適合約會2個人靜靜傾下計。首先係一個3款既前菜作開始，第一款菠菜金菇，好清，可以食到食材帶少少鰹魚香，作為前菜相當清新，適合喚醒味蕾為黎緊既野食做準備。第二款係一個醃製既梅子，就咁睇以為係酸而脆口既質感，但用筷子一夾就有驚喜喇，係好𣺉身，一入口好似要化開咁，而且係甜既！好似食緊燉雪梨既感覺。最後就係為人熟識既茶碗蒸，材料充足，入口每一啖都會有唔同食材，蛋味香而不膩，亦食到少量高湯味，唯一就係👦🏻比較麻麻地茶碗蒸上面係有芡汁，個人喜好，覺得會影響左茶碗蒸既口感，不過整體係可以既。除左主食，仲可以加錢要3款推介小食，今次就加晒3款試試佢。向來都中意食生牛肉他他，韓式西式都經常食，日式真係第一次，梨同生牛肉係經典組合，不嬲都相當匹配，可能係用左和牛，油份相對比較高，但牛味就唔算太濃，上面有加左少少魚子醬，不過同樣唔算好影響味道，成個感覺似食緊呑拿魚多過牛肉，味道唔差，不過就冇乜特別。日本野最講求新鮮，將佢2大名物，海膽同三文魚子mix埋又點會唔好食丫，而且真係好新鮮，成個鮮甜味出晒黎🤤🤤🤤底層既呑拿魚腩蓉同白蝦味道雖然冇海膽同三文魚子咁出，但依然令成個味度同口感帶黎層次感，淡淡既加多一重鮮。表面相當酥脆，係好輕好薄既一種，牛肉好軟滑，食得出冇用好大量既調味，可以食到牛味，雖然唔算好濃郁，但都好香。食材依然係日本即日空運過黎，食材唔單止新鮮，亦食得出有一定級，最易伏既赤身一啲根都冇，基本上都係中上級數，當然唔會有Omakase既獨特調味，但整體冇乜值得挑剔。外表焦脆，肉味係全日食過最濃既，脂香充滿成個口腔，肉質幼嫩，食落5成熟左右，但完全唔會有血味。上面除左配有芥辣，仲有好似XO醬同炸蒜mix埋一齊既醬料，加埋一齊食又會多一重風味，多變化既味蕾沖擊令人相當滿意。走雅致路線既 月山 ，假如咁岩係係中環想有一個屬於自己既寧靜空間，傾下計食下野，間中慢活一下都十分唔錯。野食既性價比其實唔算特別高，不過加埋環境，同如果你有一個想靜靜地傾下計既計劃， 月山 係一個唔錯既選擇。…Read More

西餐向來都唔係👦🏻👧🏻既首選，不過間唔中食下其實都別有一番風味，今次黎到依間上網睇人介紹既手工意粉餐廳。去到排左半個鐘左右入去，經待應生介紹下試左佢地既Tasting Menu，3+2既組合，可以揀3個意粉2個小食或者2個意粉3個小食，再有甜品，黎到手工意粉既餐廳，當然試3個意粉啦！一絲絲拉絲既芝士加上茄意，好典型意式肉丸既形象，食落肉丸入面冇明顯既肉碎，麵粉既量令佢質感唔似食緊肉，不過味道其實係可以既，整體不過不失，唔會難食，又未到好好食。首次嘗試，完全係唔知咩黎既，最後既理解應該係凍既烤牛肉放左係特濃呑拿魚醬入面？首先依個味道應該唔係好多人可以接受到，👧🏻就唔得喇😂，👦🏻係接受到既，不過果陣特濃既呑拿魚味真係需要少少時間適應，兩者味道其實冇合埋一齊，純粹唔太岩個人口味，下次真係未必會再嗌🫣。每日佢都會有一個廚師推介既Special，今次食到既係茄汁海鮮，果然係主打手工意粉，意粉質感相當唔錯，煮得岩岩好，彈牙口感，食落唔會有麵粉味。至於茄汁既調味亦唔差，酸中帶甜，稀杰度岩岩好。海鮮方面，就似係用雜錦急凍海鮮包，唔係太討好。如果淨係食意粉，分數會相當高。意粉既質感一樣唔需要懷疑，見到個面鋪滿大大塊既黑松露，心入面期待佢既黑松露味大得驚人，可惜入口竟然係忌廉味極濃深既味道，基本上係食唔到任何黑松露味，食耐左亦覺得咸味唔太夠，依款可以話係唔需要再試既意粉。用闊條麵去令意麵可以掛更多汁，成個汁都充滿牛味，牛肉已經燉至軟爛，好似就黎溶入個汁度咁，入口牛肉似食東坡肉咁。只係為左依個意粉就足以再黎食喇！咖啡味唔會太重，甜苦既平衡做得唔錯，會令人想一啖接一啖咁食，雖然好重cream，但一啲都唔膩口，作為一餐既終結相當滿足。假如唔怕奶味，依個都係相當唔錯既選擇，唔會太甜，可以食到果醬味，奶味都幾濃郁，整體口感偏向Cream，而唔會太似啫喱，份量控制得幾好，都係一個出色既甜品。成間餐廳無論裝修、環境、食物，就連待應都係外國人，感覺就去似去左歐洲一間小餐館咁。氣氛加埋手工意粉，真係會想間唔使去食一次。雖然今次野食上未係最最最滿意，但都唔會抗拒再去試多次。…Read More

疫情嚴重既日子真係唔敢四圍走，趁情況好少少帶自己放下風，去左港人最愛既長洲，唔少得搵下當地打卡cafe坐下，依間位置少少隱蔽既cafe一入去就覺得相當舒服，只要野食野飲唔差其實感覺已經可以坐一日。由放上枱既果一刻已經好IGable，呈現既full package都靚，飲入口唔會好甜，亦飲到生果既清新，其實唔係好飲到明確每個生果既味道，已經混合成一個有層次既味道，眼見上面有一層厚厚既cream，以為會好膩口，但成杯野都好fresh好解渴，將cream混合埋一齊之後，加添左一種順滑感，有少少似加左唔heavy既雪糕落去咁。又係一杯味道恰到好處既冰沙，全體係桃味冇錯，但個桃味唔會出到你飲唔到其他味，係平衡方面出得相當出色，令你唔會好留意到單一味道，雖然係冰沙，但飲入口好似飲緊奶昔只係冇左好奶果個味道，依杯果味重啲，佢會甜少少，唔會用fresh去形容，但一啲都唔heavy。一聽個名其實👦🏻有少少抗拒，因為一眼就好甜好膩同好伏，好似係啲製成品撈埋一齊咁。上到枱，又係好靚好IGable，抱住試一試都冇壞既心情，可能冇乜期待，一食入口竟然充滿驚喜。首先以為珍珠係凍既好乾好硬果種，點知唔單止係煮到彈口，仲要暖既，唔係凍唔係熱係暖呀，但溫度已經相當有心機，因為要令珍珠軟化一定要加熱，由於係三文治如果太熱，而且係甜食，客人食入口唔知道咁熱就會辣親，太凍又唔夠軟，所以依個溫度控制得相當恰當。另一個最令人卻步既係甜芋泥，好多都會好甜，而且係死甜，質感做得唔好會好硬身，似食芋頭，太軟身又會流質，依個芋泥微微既甜度，完全唔膩口，質感綿滑，唔會食到硬粒，又唔會似流質。依個三文治看似簡單，但入面既心機，背後既嘗試，可以食得出精心炮製四個字。環境舒服之餘，野食野飲全部係心機之作，所有味度既平衡，品質之高真係令人意想不到。除左係一間IGable既cafe之外，入面係有溫度既服務，每個人同想同客人交流傾計，唔係hard sell既對話，唔係冇感情既關心，真係朋友交流既感覺，佢會係一間就算住長洲只要放假都會想日日落去坐下既cafe，只可以講，如果去長洲，去感受下去relax下，你就會體會👦🏻👧🏻既體會。…Read More

👦🏻身為海鮮愛好者，尋覓好食海鮮係天生既使命，一直都好想尋找避風塘風味，今次係朋友既介紹下黎試依間上左岸既艇家🛶比一般既辣酒個汁為杰身，但味道唔算特別濃，食到花螺本身既鮮味，只係令汁更掛身，令本身唔算好濃既汁充分掛上花螺上，平衡汁同花螺兩者既味道。不過依個辣酒都幾辣下，係愈食愈辣果種，所以唔太食得辣就嗌最少辣啦。咁多樣野食入面，依個炒蜆比較麻麻地，汁既味道主要淨係食到辣味，層次唔太足夠，而且味道亦未完全入到蜆入面。蜆味亦唔夠鮮甜，食材本身係新鮮既，感覺係品種問題，以為最普通既菜式，但最後個風味就最唔夠。淨係睇個size已經相當滿意，成手臂咁大呀，不過瀨尿蝦大細都係其次，新鮮度好緊要，唔新鮮食落會有水水既質感。依隻一食，結實既質感好似食龍蝦咁，正！嗌左2隻，其中一隻仲有成條膏。炸既火候控制得好好，鎖住肉汁之餘，唔會太乾太熟。依道菜可以睇得出師傅既經驗同老練，相當出色。全晚最期待既菜式，係屋企真係好少會整到，唯有出街食，事實亦証明依個選擇十分正確。再一次體會到火候既控制，雖然避風塘依種料理方式相對重口味，但完全冇蓋過蟹既鮮味，咬落啖啖肉，肉汁噴出黎，肉質一梳梳，極新鮮。依種菜式先係令人懷念去避風塘食海鮮既原因。通常去避風塘食海鮮，都會叫埋燒味湯粉，實際既典故係咩真係唔太清楚，但就好似係一個傳統咁。竹家莊亦有燒味湯粉，而且仲有唔少人推介必須食，所以都叫左碗試下，一試馬上知道點解會咁多人推介，湯底濃郁，一飲就好似食緊一隻燒鴨咁，河粉滑嫩，一啖湯一啖河，不知不覺間就食晒一碗。雖然感覺燒鴨反而冇咁似主角，不過燒鴨其實都唔馬虎，係好食既，皮脆肉嫩味濃，只係比起湯同河粉，佢既比重冇咁高姐。價錢黎講，👦🏻👧🏻唔會話佢係好平，但性價比係高既，出得去食海鮮，價錢一定有返咁上下，但食物既品質好多時都好參差，而 竹家莊 絕對有信心保證，可以令你重拾昔日避風塘風味。…Read More

經典扒房入面，文華扒房都算係數一數二多人會有印象既，除左扒房，文華都有唔少令人印象深刻既美，有機會真係要一一去品嘗一下。適逢聖誕節，今次就book左枱試一試佢，因為今次去既日子係12月23號，所以卡左係中間，又未到聖誕節，所以就冇special menu喇。👦🏻👧🏻分別嗌左一個𝟓 𝐂𝐨𝐮𝐫𝐬𝐞 𝐓𝐚𝐬𝐭𝐢𝐧𝐠 𝐌𝐞𝐮𝐧同𝟑 𝐂𝐨𝐮𝐫𝐬𝐞 𝐌𝐞𝐧𝐮。𝟑 𝐂𝐨𝐮𝐫𝐬𝐞 𝐌𝐞𝐧𝐮其中一個可以揀既菜式，👦🏻見到又點可以唔揀呢😍😍😍，款式算多，叫左廚師推介，睇下會有冇驚喜，不過扒房食生蠔其實都唔會期望太高，果然都係中規中矩啦，唔算太令人驚艷，都係淡口味道為主，可能唔想蓋過之後食既味道吧。依個係一個要額外收費既前菜，以魚子醬前菜黎講係額外收費最小既一道，當然係因為魚子醬品質同用量上既分別，其他都係完整一罐既消息，而依道就係一罐入面有7成係蟹肉沙律，3成左右係魚子醬，而且魚子醬味唔算濃郁，不過蟹肉沙律加上魚子醬既味道都係相當match，淡淡既魚子醬味已經可以幫蟹肉沙律加上口感同味道上既層次感，以依個價錢可以試到一道魚子醬菜式其實都值回票價。黎自𝟓 𝐂𝐨𝐮𝐫𝐬𝐞 𝐓𝐚𝐬𝐭𝐢𝐧𝐠 𝐌𝐞𝐮𝐧第一道既自家製煙三文魚，其實味道上同一般煙三文魚分別不大，不過油份確實較少，唔會食到黐立立咁，而且有唔少配料可以夾埋一齊食，最緊要係佢上既時候會成架車推出黎比你切比你，打卡一流！食過唔少生牛肉他他，依個既味道相對較濃，唔係個牛味濃，而係少數佢用左調味既生牛肉他他，食得出佢加左一啲油加強左個油潤感，食落有少少辣，香料既味道濃郁。配上麵包食，其實唔難入口，只係個香料味未必人人中意，如果想搵你心目中既生牛肉他他，佢唔會係你期待中既咁，但係佢新奇既味道係會比到驚喜你既。文華龍蝦湯出名既程度，相信未食過既人都會聽過，今次親身去試依一個湯，果然名不虛傳，龍蝦味相當豐厚，干邑既味道飲得到但唔會苦唔會有酒味，兩種強烈既味道唔會互相影響，反而令大家互相昇華，香純濃滑，加上煮得剛好恰當既龍蝦肉，每一啖都係一個享受。黎得文華，龍蝦湯絕對必試。終於食到主菜，依個主菜亦係要加錢既菜式，而且要佔2個人一個Course先可以嗌。其實我本身對Beef Wellington冇乜期待，將一舊牛肉又包酥皮又加黑松露，又要焗咁耐，幾好食既牛都唔會好食啦，而且依種烹調手法似係用黎處理次一級既食材，事實上我亦食過一間名氣極大既扒房，入面既Beef Wellington令👦🏻震驚，一度有唔想嗌既恐懼，不過見好多人推介既情況下，就試下佢啦。本身話要早48小時訂，即日👦🏻亦有打過去餐廳，都係話太遲，唔會有。點知去到，侍應生話仲有最後一份，好似命中註定咁，唯有嗌啦！牛柳一到，就已經同我印象中既Beef Wellington好唔同，👦🏻👧🏻食既係侍應生推介既3成，望落酥皮好脆，而且表面焦焦地，中間一層黑松露已經似係泥狀，但係牛柳就異當既粉嫩。切落去雖然3層有分離既現象，但自行組合返3層食落去，個味道真係同印象中既唔同好多。首先係個酥皮除左脆之外，仲提供左一種焦香同煙燻既風味。中間既黑松露只有淡淡香氣，完全唔搶味，係點綴既功能。牛柳淋滑，熟度岩岩好，而且牛味豐富。扒房仲有提供唔同既芥辣，牛柳單獨食，或者同唔同既材料醬汁一齊食都有唔同層次既味道。今次總算明白到beef wellington所追求既係乜喇。5 Course Menu 最後一道，唔少經典西餐都會有依一道甜品，只要整得好，基本上都十分討喜。當然 文華扒房 唔會令人失望，表面薄薄一層焦脆，入面Cream狀半固體，岩岩出爐既熱度，配上👧🏻揀既雲呢拿味雪糕，凍同熱加上甜味既融合，幾唔中意食甜品都一定會食返一兩啖。文華扒房 食物上真係經得起歷史既洗禮，佢未必會令你好驚喜，但一定穩陣冇死，約會揀佢一定唔會衰。唯一問題係上菜時間，👦🏻👧🏻食依一餐用左2個半鐘😂😂😂，好似食法國大餐咁，不過如果2個人約會飲少少酒，傾下計咁都可以既，可以提供到一個獨處既浪漫環境比你好好了解下你既另一半。價錢上就絕對唔係入門價，如果有特別日子想慶祝下，追緊女神，體驗一下經典高級扒房，依個錢都係可以比既。…Read More

👦🏻👧🏻對日本料理都冇乜抵抗力，咁岩有野做要係尖沙咀出沒，於是就搵左一間居酒屋式既日本料理試下喇。同日本唔同既係通常香港既日本料理都係乜都有得食咁濟，今次依間亦唔例外，壽司、燒烤、鍋物，應有盡有。種類黎講係可以既，品質算中規中矩，唔算好有驚喜，但又唔會覺得品質唔好。鮮甜度亦都係不過不失，如果比較有印象會係甜蝦同帶子，口感上都感受到唔係低價位貨。依個組合簡真就係👦🏻既至愛，和牛雖然未去到入口即融，有少少筋，但佢果個牛味係愈𡁻愈出。蠔本身有微微灼過，如果好怕全生蠔既朋友應該會比較易接受。牛同蠔兩者味道都好夾，和牛既膩香同𡁻愈咬愈香既牛味，完全唔會比霸道蠔味搶走，反而慢慢融合，昇華去另一個鮮甜味。點依一道純粹係想飽肚啲，咁佢亦都充分發揮到功效，海膽作為主角亦係不過不失，係新鮮，完全唔會有異味。甲羅燒有分2大種類，有額外調味同無調味純鮮味版，依個就係無調味版，會有專人即場幫你燒，熟度各方面都有專人為你準備，而依個專人亦相當專業，控制得相當好。新鮮度十足，烤既人係調味同熟度掌握都相當了得，相信都係工多藝熟。凡立貝最令人難忘，食完仲可以飲埋個湯汁，極鮮甜！以食物質素黎講其實整體都算中上，但係價錢就相對較高，感覺性價比唔係太高，可能因為位於尖沙咀旺區，不過食過一次真係唔會再試。…Read More

朋友既介紹，電視節目既影響下，我地今日黎到 竹青亭 🎋 黎到門口諗住睇下有咩食，依度既菜式名係比較特別，就咁睇係完全唔知佢入面係咩😂😂😂 不過，好彩每個菜式名下面都有解釋到其實係咩黎。而朋友介紹既時候就已經講過”如果真係諗唔到食咩，就食2人餐啦，一定夠！”，沖住依句，加上唔想諗太多就決定嗌個2人餐試試佢喇。 (每日廚師精選餐湯)作為第一樣上場既菜式係有令人驚喜既感覺，打至蓉既椰菜花，加上唔會太膩太濃既忌廉，飲落有種忌廉薯蓉湯既感覺，但就冇咁飽肚，第一次覺得蔥花係一個道菜式入面既重要性，椰菜花本身味唔濃，如果只係椰菜花本身加上淡淡忌廉層次感可能會有啲單薄，但加上蔥花馬上就唔同晒，蔥既香味令成個湯昇華不少。經歷左令人驚喜既湯之後，他他相對係平淺啲，雖然食材上都有一啲特別既粉紅菜頭，亦用上羅漢果藍啤梨啫喱，係外面真係少啲食到，但味道上都唔算太大沖擊。就算係期待值上相對平淡，但整體都係唔差既，不過不失。雖然賣相太草綠令人有少少卻步，諗住會係好草青既味道，結果又唔係喎，調味上有啲偏咸，但有松子仁去做返個balance，都還算可以。食材上主打既帶子就唔太合格，質感上就比較廉價，似係雪貨，令成個菜式扣分不少。(西京燒比目魚配魚蓉薯蓉、關東煮蘿蔔、飛碟瓜、㽢秋葵、炸羽衣甘藍)雖然前2道菜冇乜亮眼點，但依個比目魚西京燒又令人從新眼前一亮。西京燒掌握得相當好，表面焦脆，內裏肉質結實而嫩滑。西京燒食得太耐個甜味會遞增上去，所以佢都建議你單食到咁上下就再配菜再一齊食。關東煮蘿蔔同飛碟瓜既甘香都可以中和到個甜味，同薯蓉mix埋一齊食亦有減輕甜度既作用。味道既配搭做得相當好，有考慮到食既人味蕾既需求。(玄米茶慕斯配米通 檸檬荔枝啫喱)老實講依一度甜品係十分需要先有人講解食既先後次序，如果唔係出黎個效果真係好唔同，可惜今次就冇人作講解，所以一開始就撞左板🙈如果你一黎就食個啫喱，佢既酸同苦會令你一啖都唔想再食，但假如你先食玄米茶慕絲，佢茶香下帶有甘苦，之後再食啫喱，入面既酸苦就會被蓋過，換黎係果香淡甜，其實係幾清新既。不過一定要事先聲明依個苦甜互換既感覺唔係個個會中意，一口氣食晒慕絲先，又未必可以頂得住個苦味，除非你好中意個茶味啦。👦🏻欣賞佢既心思，只係佢唔係一個大眾喜愛既甜品。(香橙茉莉花茶茶凍、楊枝甘露配雲呢拿雪糕)成晚既高潮估唔到會係依個甜品度😍食左成餐其實大約都知道設計餐牌既人大約係想做咩既，每首菜式都係想營造唔同味道既玩法。依一道就充分將味道既層次發揮得淋漓盡致，一食落口有楊枝金露既甜味，跟住有雲呢拿雪糕既香滑，最後有茉莉花茶茶香回甘，成個層次感相當分明，每一啖到可以享受到成個過程，適合較多人口味。打卡一流，賣相相當不錯，以中式茶杯配上中式沙薑雞味cocktail，認真有心思。杯上既係一塊沙薑雞零食，味道相當香濃，脆身口感亦有佐酒小食感覺。Cocktail本身單飲酒味相對比較濃烈，待應生亦有提醒等冰融左少少再飲味道會更好，果然等冰融左之後，酒味冇咁烈，你會飲到酒香中夾雜淡淡沙薑雞味，冇諗過2個味道會咁夾。感覺較似一般果茶，蘋果味相對比較特出，飲完最後會有微甘感，整體感覺冇太大特別，如果有機會會揀其他飲品🤔。香港黎講，以依個價錢食到依種半Fine Dinning式既創意料理的確唔多選擇，👦🏻係台灣都曾經食過類似既，要令食客清楚明白廚師再表達既味道，一個講故事既人好緊要，最簡單菜式食材食既次序都好影響食客感受依度菜式，當然如果可以帶埋背後既故事，點解選用依啲食材，成個menu想營造想表達既係咩，咁就更加分啦。不過以依個價錢，有依個體驗都算合格既，如果2個人黎約會，相信話題都可以不斷，會令成個約會更加分既。…Read More

一聽到係五星級酒店總廚主理就即刻好想去試下🤩🤩🤩位置都算容易搵，環境就一般餐廳樣，不過最緊要都係野食，係咪咁講先😛做得依度主打中既主打，當然要有返咁上下，肉方面，有牛展、肥牛、牛根，先講牛展，一早已經聽聞係好花心思既慢煮牛展，果然好鬆軟好入味，同一般刻板印象中既牛展唔到，筷子一夾就散開，相當令人驚艷。牛根同樣出色，亦係入口即化，同牛展唔同，佢仲更加有滷水味，食到深深處會感受到少少甘甘地果種濃郁。肥牛方面，有少少唔明點解會出現係依碗麵入面，個人認為有少少破壞左個平衡，畫蛇添足左，食落只係普通打邊爐肥牛，同碗麵完全唔夾。湯底方面，真心係正既，順口又有濃厚牛味，冇膩感，但就滿足到你食牛肉麵想要果種充斥口中既牛肉味，加上炸豆皮比你吸收所有精華，的確有一手。配料既蘿蔔同樣出色，特別係紅蘿蔔，抵讚！除左肥牛，就係麵條令人有少少失望，其實好多位到已經令人相當驚喜，就係依少少位再完美啲，依碗麵真係會令人一試難忘，麵條太碎，質感似油麵，唔夠掛湯，如果係用薄身麵感覺會差好遠。以安格斯為肉末既燥肉飯，係好食既，雖然味道有啲偏咸，但係醬汁既調味，淋滑既根肉，加上配菜既脆身口感，你係會想一啖接一啖咁食既。不過佢就唔係肉燥飯囉🤔起碼唔係為人熟悉既肉燥飯，可以話係新派料理，但就一定唔係傳統肉燥飯喇。因為佢既推介嗌左鹽酥雞，一向覺得只係炸雞冇乜值得嗌，得依個炸雞又真係唔錯。其實只係一啲少心思，就真係令件事好唔同。佢都係偏咸既，炸得相當香脆，但雞肉依然保持多汁，雖然係炸雞，但依然食到雞味，明顯唔係冰鮮貨。鹽酥雞有一個問題，就係再好食都會覺得膩，因為食同一個味道太多次，仲要係炸既，佢就好西利咁做左2個味，其實食落好似分別唔大，只係一個咸啲一個冇咁咸，不過中間可以穿插住黎食真係差好遠，唔會咁快味覺疲勞。食完正餐就食下甜品，凍既甜烤地瓜，雖然入面已經咁軟身，但依然可以切得咁薄身，令客人食得相當舒服冇負擔感，甜度既控制亦相當不錯，係食完可以再食既味道。可可味同牛奶味互相都唔會太濃，仲飲到淡淡既玫瑰香，雖然飲耐左會有少少甜，但整體都可以接受，唔係一口氣飲晒，一路食飯一路飲係可以既。如果你係減緊肥，要走甜，依個茶你一定好中意，佢蜜桃味超淡，烏龍味亦唔重，去到最後既回甘先會感覺到個清茶，味道係偏清淡，但茶香依然存在。抱住一個品嘗五星級料理既心情大慨會有啲細微位置會有少少失望，但唔好忘記，以依個平民價錢，可以食到依個水平既料理，其實已經相當唔錯，當然如果佢連依啲細微位置都可以改善埋，一定可以登上更高寶座。…Read More

到底日本匠人打理係咪就可以搵返日本既感覺呢？今次黎到位於旺區銅鑼灣既 秀殿 ，主力由2位日本師傅打理，店內位置不過20位，只接booking，不做walk in，好彩既話2星期後都有位既，所以想食依家就好book定喇🤣🤣🤣一入去，感覺成個格局好似Osmakase，本身有啲擔心價錢會super crazy，坐低睇左menu之後，又唔係咁誇張喎，都鬆返一口氣。主力食炸物既 秀殿 ，亦有唔少佐酒小食，成個menu比你既感覺就係冇可能唔嗌酒，所以佢都有一系列酒類供應，絕對滿足你既需求。除左主menu，牆身都有一系列廚師推介，大部分都係一啲時令食材，好似白子就係其中一樣喇。螢光魷魚沖漬調味同係外面食到既基本相似，但係口感係比較爽脆，而且魷魚既大細亦比出面大，明顯係自家出品。時令食材真係冇得頂，如果中意食依種油潤感，食落似豆腐咁滑既口感，白子一定唔可以錯過。調味上，微酸汁主要係為左避免食得太多既膩感，辣蘿蔔蔥花同昆布就輕輕為本身味道唔濃既白子加添底味，整體食落係輕盈既。生蠔👦🏻本身係蠔既忠實粉絲，見到有蠔就會想食，老實講，依度既蠔不過不失啦，但你唔會想浪費左一個quota，所以建議你食其他野😂😂😂烤至外表焦香脆口，唔係出面買果種死咸味道，用黎送酒一流。醃鰹魚肝芝士唔少居酒屋叫依道菜做芝士酒盜，用濃味既醃鰹魚肝配上同樣濃味既軟芝士，味道既配搭相當特別，十分下酒，但佢就好似榴連咁，中意既人好中意，唔中意既人掂都唔想掂，全屬個人喜好。店長推介之一，一開始以為冇咩特別，薯仔沙律可以有幾神奇，第一次推介比我地，我都冇嗌到，點知第二次佢依然堅持，好啦，就咁試左，點知！真係出乎意外，薯仔本身打成左蓉，入面既材料雖然同普通薯仔沙律冇乜分別，但係每種材料個切法都唔一樣，食落有唔同層次既口感，而且薯仔同沙律醬既部分雖然冰凍，但明顯其他食材就溫度就冇咁凍，所以口感上先保持得住，所以全部都係心機活，小小心思令依個普通既菜式變得非凡。青森蒜頭炸至相當淋，食落好似薯蓉一樣，蒜味相當濃，有平時食牛扒伴既原個烤蒜頭既影子。萬願寺青椒串如果食得太膩，可以嗌一串，當食菜，但味道相對比較普通。水牛城芝士炸得相當香滑，入面已經溶晒，味道香濃，同西式炸芝士相類似，濃烈既芝士味佐酒一流。皮薄香脆之餘，鮑魚本身內裏仲未炸到全熟，外脆內軟食到最後仲有鮮味，加上肝醬作調味，係未試過既味道。推介之一，帶子鮮甜，薄脆口感，加上凍凍既蛋沙律，冷同熱既溫度差已經形成好大既沖擊，再加上三文魚籽比上另類脆身口感，係脆同軟滑中又玩左另一種感受。雖然口感味道複雜，但又平衡得岩岩好，可以食得出師傳巧妙既心思。未食過既味道！！！佢本身係一個漬物，魚籽中間夾住昆布，脆皮下係一個結實既凍魚籽，口感有少少似大塊版既希靈魚，只有魚籽果part，味道主要黎自昆布，唔算重味，主要係食口感。炸海鰻魚可能因為係炸既關係，佢並冇太多醃料做調味，令感覺似炸白身魚，冇乜特別，建議唔需要嗌。對蠔愛好者👦🏻黎講，算係不過不失，但又唔特別到必食，亦係可以唔食都唔會有遺憾。店長推介之一，蝦本身非常新鮮，炸完熟度既拿捏又係完美之作，蝦頭再以話係最畫龍點睛既部分，用左相對高既油溫將佢炸得相當脆身，蝦頭既蝦膏濃香，食完馬上想再食。炸蟹腳相比之下，蟹腳雖然都鮮甜無比，但就比蝦比下去，相對層次感少左，雖然熟度控制都係咁完美，但驚喜度就冇蝦咁大。店家推介之一，雞胸肉炸完依然好嫩滑，但肉本身冇乜調味，主力係明太子醬度，但明太子醬又唔算好濃，飲酒飲到咁上下會覺得味道唔夠，所以依款可能要早少少點先好😂😂😂都係冇乜調味既系列，不過入口口感認真不錯，未去到入口即融，似係溫煮既質感，係牛肉界既豆腐，不過對重口味既👦🏻黎講，亦係唔係必點之選。食依種炸串，一般黎講都係送下酒傾下計，要食到飽基本有啲困難，不過佢都有幾款飽肚既澱粉質供應，茶漬飯調味平衡相當好，茶香明太子咸香再加上香葉鰹魚湯味道，可以幫助解膩，同時又飽肚，係唔錯既選擇。冇諗過一間炸串舖竟然可以食到咁好味既意粉，雖然又係明太子，但經過忌廉調味又係另一種風味，依種和食意粉汁醬較稀身，但味道依然保持到濃郁，意粉煮得岩岩好，可以話比好多和食店做得更好。成個氣氛真係好岩去回味日本道小店，2至4個人去傾下計飲下酒，唔好以為👦🏻一次食左咁多野，係分左2日，仲要係連住2日，你就知到底有幾正，幾值得一去！…Read More

想去旅行喇！！！🥲係依種強烈既感覺下，決定要出發去一次韓國，成個環境感覺到老闆對韓國既愛同細心，除左差左啲阿朱媽，可以話令你0違和感穿越左去首爾。打完一輪卡係時候食下野喇！新鮮炸起，皮薄而脆，十分香口，係會令你唔覺意咁一舊接一舊食落去。個餡料主要係粉絲黎，所以如果食多幾舊其實都幾飽肚。雖然味道唔算特別出色，但作為一個前菜小食，佢已經完美完成佢既歷史任務喇。海鮮泡菜餅既餅漿加入薯仔條，同我想像中既味道唔同，略帶甜味既調味，餅醬本身自帶煙韌口感，薯仔未煮至全軟，咸咸甜甜加上口感既層次，雖然成個都係澱粉質，但一啲都唔單調。雖然本身已經係由唔同製成品加埋一齊既調理，對佢既期待都唔會太高，點知！佢又真係咁平平冇奇喎😂完全係你心入面諗既部隊鍋，如果一定要講，佢入面既用料雖然都係罐頭野，不過都係韓國出品黎既。湯底就冇出面食既咁濃，會清一啲。下次有機會再黎既話，應該都會試其他特色鍋。燒得香脆既，但係選材方面，五花肉未免太肥了，已經唔係五花了，但比例似係7成肥，我本身咁中意食肥肉，食多2舊都唔係好頂得住。份量都相當大，係扺食既，不過肉有咁多，菜就比得唔夠喇，如果想包菜食，我諗只夠一半，依幾個位感覺唔夠細心。依度有獨家米酒特調，諗都唔諗就嗌左黎試下，奶味同米酒既味道好夾，加埋生果既甜味，酒味唔濃，好岩女仔飲，如果你追求燒啤果種解膩，佢未必係你既選擇，雖然好易入去，不過飲晒成支都有啲醉意。荔枝梳打都唔會太甜，個比例都做得好好，淡淡既荔枝香，飲落唔會太化學甜。整體黎講，氣氛環境十分適合打卡，野食份量充足，比起2人約會，更適合嗌埋35知己一齊，可以試多啲野食，本來麻甩既韓式包車野食，有打卡位，飲品又岩晒女仔，人多聚會男女都fit呀！…Read More