umtasty's Profile

今日中午剛好經過apm 順便試吓呢間拉麵，來的時候好少人得兩三圍枱到，之後逐漸多人放lunch，下單後都等10分鐘先上拉麵，我同朋友陸續食完後有個女員工好快就收碗（都好正常的事），最大問題是，我仲飲緊支汽水時個女員工走過來叫我哋快啲搞掂走（但其實我哋食咗半個鐘都冇），話出面啲人排緊隊，埋單時見到有四五個人排緊隊，我哋個枱應該係迫迫地坐到4人，所以咁心急趕我哋呢枱走，但其實佢哋大可以嘗試叫我哋坐埋一邊，之後feel到佢同啲同事都開始𥄫住我哋張枱（好明顯係趕客feel），成件事好唔舒服，之後出去埋單嘅時候剛好係嗰女員工，咁我就順便善意提醒返頭先唔應該咁樣chur我哋，但佢態度還不爽。 其實成個過程由落單都只係食咗大約30分鐘，又唔係食緊快餐店，雖然食物不錯，但真心希望門店可以多加提醒員工注意飲食行業的基本禮貌🙏🏼🙏🏼🙏🏼， 竟呢間係日本過江龍，所以今次嘅體驗真係令我幾失望， 因為日本出名係好服務態度，但今次去食就真係feel唔到😅。…Read More

本人一向好少批評一啲餐廳同埋員工，因為覺得服務性行業一啲都唔容易，但今次真係要大大力「稱讚」呢間餐廳。點解會話佢係一間「社企」餐廳？ 因為佢請嗰啲員工有啲係盲架。當我哋入到去餐廳坐低，已經覺得好焗同埋聞到一陣臭味，似啲嘢一直冇抹嘅味，心諗都算啦，小事嚟。因為覺得好焗，見到附近有人走，咁就轉咗去另一張枱。當我哋轉完枱，然後睇食咩到準備落單嘅呢段時間裏面都冇一個人嚟執枱，我都幾肯定啲員工係見到我哋係新嚟嘅客人，見到我哋枱上有上一枱客人留底嘅碗，因為有其中兩個員工不斷喺我哋身邊經過，有個仲好好笑咁講：「 點解冇人執嘅」 講完之後就走開咗。 其實我都好想知點解☹️。咁到舉手落單，個職員就問你哋係要執枱定係落單， 我心諗：「 呢一條係咩問題？」不過我都照答佢：「兩樣都係唔該。」過五關斬六將咁落好單後，迎嚟嘅係震驚我味蕾嘅食物。我叫咗個焗咖哩雞扒飯，等咗十分鐘嚟嘅卻係鮮茄焗豬扒飯，我見到個飯都懷疑咗一陣，叫咗個職員嚟換。又等多十分鐘(我個陣已經好餓)，終於嚟啱。當我滿心歡喜，擺咗第一啖飯落口嘅時候，我又再懷疑多次，因為個飯係冇味！！！我食多幾啖，勉強都食到有啲味嘅，例如係少少芝士味、醃嗰塊雞扒嘅黑椒味，仲有焗燶咗嘅苦味咁囉， 簡直係震驚我嘅味蕾，真係第一次食咖哩雞扒飯可以係冇咖哩味，好想知個廚師係點做到，實在係高手。最後我抱住唔好浪費糧食嘅精神，食曬成兜飯， 再邁住急速嘅步伐逃離餐廳。總括而言，呢間餐廳有幾樣嘢值得稱讚。第一，佢係一間「社企」餐廳，會請一啲有眼疾嘅員工。 第二，佢係一間「貼心」嘅餐廳，因為佢會請員工講一啲好搞笑嘅說話去娛樂客人，例如「 你哋係要執枱定係落單」。 最後，佢係一間「隱藏高手」嘅餐廳， 因為佢可以將咖哩飯整到冇咖哩味。請我都唔會再去食。…Read More