Jane1101's Profile

唔好意思，篇嘢好長。原本都無諗住咁快寫呢間食評，因為前面仲有好多仲等緊。。。不過佢某位員工/合夥人？嘅行為令到我不得不寫佢先。話說因為果日午餐遲左食，3點先食完，不過因為物二日有嘢做要早出所以諗住晚餐早啲食可以早啲返去抖下，跟住5點半左右係citywalk 見到呢間以前排好長隊既和牛漢堡無咩人就諗住試下。佢餐牌普通成人餐係2-3塊100g 既漢堡，而小童就係一塊再加小食。因為我哋未係太肚餓既關係就首先叫左兩個三塊漢堡既餐，再叫左兩杯啤酒。我哋total 4人（兩大兩小），我哋入去之後就有另外兩個都係兩大兩小既家庭都入左嚟，不過佢哋既小朋友就大啲，目測都應該大過10歲。咁我哋叫完餐就係到睇其中一個職員燒漢堡喇，而另一位女職員就係我哋order 完嘢出現左，開始係到上湯同前菜，我發現我哋3個家庭既枱都叫晒嘢食後個女職員淨係上左湯俾對面一個家庭，但我同另一個家庭既湯就遲遲唔肯上，咁因為同屋企人當下傾計既關係就無特別為意，但都有望到個職員拎住成堆單同燒緊個職員係咁講嘢，當下我無諗住理所以就無聽到。跟住我先生事後食完出左間餐廳先同我講返原來個女職員因為我哋叫既食物總額唔夠佢哋既最低消費額：大人$88/位；小朋友$68/位。呢啲都係之後帶位果個職員同我講返我知，我先突然醒覺！原來岩先個女職員唔上湯同埋拎住堆單講緊既就係我哋叫唔夠嘢食！咁其實叫唔夠你直接同我哋講返咪得囉，洗唔洗係背後講啊？仲要專登連湯同前菜都唔上？驚我哋叫唔夠會走？事後諗返個感覺勁差囉，其實佢好似另外一個職員咁講返咪得囉，可能另外一個家庭都同我哋一樣只係睇唔到你出邊貼既最低消費額姐！就照前面所講喇，係我之後睇緊叫咩小食時帶位果個男職員同我哋講返扣除左啤酒既優惠價我哋係未滿足到佢哋既最低消費額，就話如果無再叫其他食物啤酒就會用返正價。咁我原本都諗住叫小食就再叫左個小食。之後佢哋都有送左份毛豆俾我哋，因為叫左兩杯啤酒（不過都係喺個金額終於meet到佢哋要求後）。跟住，因為我食嘢期間我完全唔知呢啲details 喇，我之後其實有隱約聽到個女職員之後又同燒緊漢堡果位職員講咩120cm，但我都無理到。而我先生事後就講返話佢係講緊：大個啲既小朋友都要收返$88/位。 其實都只係相差$20/位，洗唔洗咁？ 同埋可能呢位女職員未做人父母，唔知道小朋友（年齡偏細，10歲以下）有時既食量真係好飄忽，咁岩肚餓或者食到岩佢口味既嘢食佢哋會食好多，如果唔岩食/無胃口佢哋可能食平時食量既一半都無，所以我同先生會等食物上左睇下個份量先，同埋第一轉會叫返比正常少既份量先，之後佢哋食到就再叫，以免浪費。咁我係咪唔適合嚟呢個餐廳食？一開始叫唔夠就無資格食你嘅啲前菜先？同埋諗返真係覺得好衰！因為佢係當眾係我哋聽到既地方係到話我哋，只係當下我掛住影相同傾計無理到佢講嘢既內容。但佢哋第二次講嘢既地方係喺正對面食客前面，連我先生都聽到，咁對面啲客人應該更加聽得一清二楚喇！你要講要提意見既事後員工會議果陣講唔得？有必要當下即刻講嗎？所以，我覺得如果有年齡偏細既小朋友既家庭，或者小朋友食量唔大既家庭都係唔好去呢間食，會有被歧視既感覺，唔好用錢買難受了。…Read More

呢日放假咁岩屋企停電，所以自己去左元朗食午餐。原本想食第二間日式野，但佢未開門所以最後揀左呢間。原本想食pizza,但見到餐牌上有呢個燒肉意大利粉就俾佢吸引左，最後揀左佢🤣個賣相都唔錯，啲燒肉排到整整齊齊，心情都好啲！因為我本身都接受到肥肉，而佢係半所以食落都幾好食，加埋意粉一齊食味道都正常，不過無太多驚喜。可能因為佢啲醬都比較多，食到最後有啲膩，但成個餐既份量都足夠，食完超級飽。而個環境都唔錯，因為我避開左午餐時間食所以間餐廳好安靜，食得都舒服😬…Read More

最近好enjoy 自己一個周圍行下食下嘢 呢日係屯門有嘢做，所以提早去左Beans 食早餐。10點左右嚟到已經有人排緊隊，等左兩張枱左右就到我了。記得上次食果個薄切西冷牛扒幾好食就照叫左呢個餐，包就要左酸種面包。個人覺得齋食好好食！ 飲品方面我今次係叫到咖啡，因為前一晚瞓得唔好飲左咖啡會頭痛。所以要左凍檸蜜，仲平啲添只需加$3 😬個牛扒我覺得呢個價錢嚟講算不錯，係某啲位會有啲筋要咬耐啲，但味道不錯，我口味偏淡就覺得點少少汁已經好夠。 個酸種麵包都同上次食一樣咁好食，慢慢咬下會有啲香味出嚟同埋夠飽肚。而個檸蜜普通啲，感覺偏甜。最後食完見無咩人等又有90分鐘用膳時間坐多左陣先走。…Read More

係附近整完護照後諗住搵嘢食，最後揀左好耐無食既Euro go go, 呢間既店面裝修得幾靚又未食過同埋有啲掛住佢既蒜蓉包所以最後都揀左食佢。我揀左香蒜蜆肉意粉餐，飲品要左泡沫奶茶，再加左個蒜蓉包😋個意粉好夠蒜味，同埋啲粉都夠入味有啲粉狀粒粒痴左係粉到，所以食落有啲層次感。啲蜆食落都無沙，不過有一兩隻就炒到個殼爛左，有一啖唔小心咬左落啲殼到感覺唔太好。。而個泡沫奶茶就無咩特別，最好食都係個蒜蓉包，仲保留到之前既水準，脆脆地唔會好難咬又好夠蒜芥味，正！ 最後食到超飽🤣…Read More

朋友話好耐無去虹橋食嘢，呢日放假lunch 就一齊入左虹橋，揀左間未食過既cafe. 因為位置比較偏都搵左一陣先搵到。我地入到去只有兩張枱客人，我哋係第三枱。原本叫左個all day breakfast and 炒蛋 煙三文魚牛油果漢堡。但佢哋係跟住落order 既次序去整，到整晒前面兩枱客既單要整我哋時店員先同我哋講無晒包，要改其他。果陣已經等左20分鐘以上原本諗住終於到我哋先被告知無晒，果刻感覺唔太好🥲我哋最後轉左要蕃茄海鮮意粉，而係個意粉到之前all day breakfast 已經被我哋極速清晒😂唔知係咪肚餓關係覺得份量偏少，不過佢價錢比起其他鋪既all day breakfast 係抵啲既。 而個意粉都比想像中好食同多料，同埋唔太鍾意食茄汁既我都覺得佢好食，唔係好假既蕃茄味同埋鹹度適中，個意粉既質地都係我鍾意既有少少咬口果種，唔會太硬亦唔會太軟。所以都有8分。算唔錯👍🏻而兩杯飲品就普通，無咩驚喜。…Read More

呢日朋友又嚟搵我食午餐，因為最近迷上左意樂既拉麵所以最後又揀左食佢🤣原本諗住照返拉麵，但朋友叫我我試下叫其他嘢食，接納佢既意見就叫左日式燒汁溫泉蛋牛肉丼飯，再叫多個葡汁芝士焗雜菜。朋友就叫左個日式咖哩唐揚炸雞丼飯，加左個半溶芝士配薯條，仲有個餐湯。個芝士焗雜菜幾好食，係我鍾意既葡汁！而個薯條點埋芝士就偏鹹，不過朋友就話幾岩佢食。而兩個飯都ok好食，炸雞飯既量都幾多，加埋都6-7嚿中等size既炸雞粒，飯都幾多。因為食果陣仲好熱所以係外脆內軟都幾正，不過咖哩汁略嫌唔夠。而個溫泉多牛肉丼就同普通牛肉飯差不多，波子有好大驚喜，不過加左溫泉蛋感覺易入口左，所以最後都成功食晒！…Read More

突然選擇困難症發作，下午茶時間係附近行左成個圈都唔知食咩好,最後因為想食清淡啲都係揀左食上海姥姥。叫左個五香牛肉拉麵加小籠包。第一次食呢個麵又幾好食，個湯清淡得嚟有好香既肉味，啲麵麵煮得岩岩好，係我鍾意既硬度，少少冧唔太硬。啲牛肉都唔錯，有啲筋係到所以唔會太柴，味道方面都正常，無好大陣牛味。唔知係咪太肚餓關係，最後好快就食晒成碗麵。而個小籠包趁熱食都幾好食，咬開少少皮真係飲到湯，個內餡就係普通食開既小籠包子咁，因為我唔食醋就無點到啲醋。總結最後食完都幾滿足😌。…Read More

見呢間韓國嘢都開左一段時間，最近終於少左啲人排隊所以諗住試下。 叫左韓式炸醬麵、泡菜豬肉傳統蒸飯同埋個小食韓式糖醋肉。睇賣相就好似幾吸引咁，第一啖試左個炸醬麵就食到好大陣豬既騷味，同之前係韓國食既炸醬麵完全唔同，好彩同枱既朋友鍾意食就幫手食晒。而個傳統蒸飯味道不錯，$58蚊嚟講都算多料，但未食過傳統蒸飯唔知正唔正宗，但同普通係香港食既泡菜豬肉飯無分別，而個糖醋肉都麻麻地，賣相唔太吸引，味道方面都同中式果啲小酥肉差不多，不過無咁好食。總結下次趕時間都應該會食佢既蒸飯，因為算抵食，其他就應該唔會想再試😅…Read More

有一段時間無食突然又有啲掛住Woodsage,所以呢日第一次嚟食午餐。我同朋友超好彩地坐左最後兩個位，最後我哋叫左流心蛋燒豬頸肉飯、粟米芝士雞肉墨西哥卷配薯條再加個芒果糯米飯。因為全場都係岩岩入座既原因，我哋叫左嘢食上左飲品後，最後等左近半個鐘先有嘢食上🥲好彩最後都無搞到朋友返工遲到嘢食方面，燒豬頸肉幾好食，點埋應該係沙嗲汁一齊食就更好食。 個墨西哥卷朋友話覺得太少料，而我就覺得ok, 個皮剪到脆左幾好食。 最後芒果糯米飯就同平時一樣咁好食😋…Read More

呢日係附近行街，到晚餐時間因為選擇困難症揀症勁耐最後揀左食小王牛肉麵。。。我哋叫左半筋半肉麵、台式滷肉油炸大排飯、胡椒鹹菜粉腸鍋同埋叫左杯香芋珍珠奶蓋。 半筋半肉麵肉既份量都夠多，筋同肉都各有3-4嚿，而最驚嘆係啲肉已經煮到好冧，輕輕一咬就散，有一嚿係係肉包筋，岩晒我呢啲鍾意食筋既人😂而個湯底都好濃藥材湯味，不過有少少偏鹹。 而個大排飯就唔係好岩我，佢落左啲類似香料粉係嚿排到，而啲滷肉都唔係普通係台灣食果啲味，有好濃既香料味。所以最後都係我朋友食呢個飯。 而個鍋應該要配飯食會好食啲，因為驚食唔晒我哋無額外叫飯，原本諗住配滷肉飯食，但點知個飯又唔好食🫠 最後變左齋食個鍋，啲粉腸都煮到好冧，仲加咗啲菇入去，味道雖然不錯，但略嫌啲料太少，如果單點個鍋加飯應該都會覺得啲餸太少。最後個飲品就係普通既香芋珍珠加奶蓋，無特別好飲。…Read More

呢日同朋友係屯門睇完戲再去左好耐無行既屯市行下，行到攰，2-3點既時間朋友提起想食呢間，可以打下卡同埋舒服地抖一陣。我哋叫分別叫左肉醬芝士千層麵同埋明太子蟹肉飯卷，嘢飲就一齊叫左意式咖啡。啲食物睇落麵超吸引，真係好適合打卡😂食落就得紫菜飯卷好食，有好出既明太子醬味道，同蟹肉，紫菜包飯既配搭岩岩好，唔會太鹹，食完會想再食第二嚿。而個千層麵食第一啖覺得好好食，好香既肉醬加埋芝士，但食多一兩啖即刻覺得好膩，最後要同紫菜包包間住咁食先中和到果種膩。最後個飲品就比較普通，飲到最後都係偏膩。…Read More

呢日同細妹係附近行街，咁岩講起細個屋企人整過一種唔係炸既蠔餅，細妹就講起一種用甜豉油既粽。之後點知兩樣都係呢到食到！之前都無留意呢間原來係食福建同閔南菜😂我哋叫左經典菜包飯、福建特色海蠣煎、滷水豆腐 芋泥香酥鴨同埋花生湯。點知超驚喜！ 海蠣煎就係我哋傾計時提起既唔係炸既蠔餅，而個菜飯就好似細個食過點甜豉油既果隻粽！ 食到果刻我哋都超驚訝同時又好開心，終於食到細個既味道。另外個滷水豆腐都好好食，一咬啲滷水汁就噴晒出嚟同埋又唔會難咬，好香豆味，下次食會想再叫！而個芋泥香酥鴨就反而比較平凡，個人覺得芋泥同鴨味道唔太夾，同埋啲鴨有少少柴。最後個花生湯都係小時的味道，之後忍唔住再外賣叫多左碗返屋企無咁飽再食🤣🤣…Read More

呢日同朋友食生日午餐，朋友揀左食屯市既beans.可能因為平日午餐時間，直入已經有兩人枱。 之後我哋叫左黑松露軟殼蟹意粉，一份漢堡同埋一份拿破崙甜品。嘢飲我哋說叫左一杯珍珠奶茶同埋一杯凍咖啡。個意粉中等好食，黑松露醬味幾重，不過個意粉就唔太入味，有少少同個醬分離左既感覺。而個漢堡朋友就話有7分，因為份量都夠食，同埋有埋薯蓉。而個漢堡加埋包一齊食都唔會太乾，肉味都夠。 最後甜品方面，因為係佢分左幾層，有啲難一啖咬晒咁多層，同埋有啲脆脆一咬就跌晒啲碎出嚟。 味道方面就普通，不過幾鍾意食面果塊餅🤣總括嚟講，今餐俾7分，好似無之前咁好食了。…Read More

屋企人趁lunch 時間又買左呢個超好食既芋泥布甸包俾我食！ 真係世一好食！ 中午時間買，放工後7點左右先收到呢個包凍晒咁食都覺得佢超好食，屋企人仲話岩出爐果陣，成間麵包鋪都充斥香濃芋頭香氣。個包既表面印有巨型「芋」字，好布特色，問左屋企人先知原來仲有原味，不過知我鍾意食芋泥所以揀左芋泥味俾我！一啖咬開，中間澎湃的芋泥傾瀉而出，激流心綿滑芋泥帶有少少甜味，配埋Creamy布甸心，味道濃郁又不會太甜！而呢個包整體內餡份量頗多，層次好豐富。不過佢個麵包皮有啲難咬開，應該係為左承托到個芋泥布甸先做到韌啲。所以都係100分🤣🤣…Read More

呢日星期日放假去左葵廣行街食嘢買衫。嚟到後即刻口痕想食左小食先，即刻去左來自韓國慶州的10 Cents Bread（10分麵包），見到佢店內既廣告拉絲效果咁勁，已經超級期待喇！而佢亦係真材實料加入大塊芝士，仲即叫即拎唔洗等。超速完成交易！而食落口感外脆內軟。芝士餅味道似窩夫般充滿蛋香味，內有澎湃飽滿的鹹甜芝士。另外芝士拉絲效果超浮誇，真係拉極都仲有！ 凍左少少都仲做到拉絲效果，真係超正既體驗啊！食完超級滿足😌…Read More