Yummy Ting Ting's Profile

上次同朋友去左元朗搵好野食，食左個日韓燒，臨走時見到附近有間西餐廳，眼見比佢高掛既水晶燈吸引住，今日就約左好朋友去呢度一齊慶祝相識5週年既紀念！一入到去餐廳內，中央掛起高高既水晶燈，淡淡既燈光下，環境氣氛整體感覺不錯！我同朋友被安排坐在餐廳一個角落，我地兩個人可以靜靜咁慢慢傾，慢慢飲！一坐低，餐廳服務員即為我地送上兩杯Welcome drinks＂藍莓乳酪梳打水＂，雖然味道比較甜，但亦感覺開一開左個胃......我地簡單直接咁點左一個Appetizer，一份set dinner同另外散叫左一份主菜同甜品，再配兩杯house wine。　Set dinner先來個＂蘑菇湯配蒜茸包＂，個湯飲落有一粒粒既蘑菇碎粒，但味道比較淡，唔算好creamy，相反個蒜茸包反而有驚喜，暖暖脆脆的，超香蒜茸牛油味，好味！Appetizer＂芝士蟹肉焗意大利大啡菇＂，我朋友相當喜好大啡菇之類既菇類，呢道大啡菇特別地用左蟹肉加芝士釀焗而成，超多芝士，好香濃，整體味道不過不失，值得一提係如果蟹肉非用蟹柳，相信會更加加分！主菜＂燒加拿大黑毛豬鞍扒配溫室蘋果蓉＂，聽講係呢間餐廳既皇牌推介，我地當然要試一試，一食之下，我同朋友都不禁大讚，黑毛豬肉質相當嫩滑，入口好soft，絕非一般用野＂那＂過個種肉質口感，相信有機會用左牛奶浸過先有呢種肉質，再配埋酸酸甜甜既蘋果蓉，兩者相當配合，特別開胃！另一道主菜係＂黑松露野菌忌廉鵝肝意大利飯＂，呢道菜相對比前者較為遜色，鵝肝煎得有點過火，而意大利飯亦較腍身，味道較淡，對我而言，要食到比較傳統既Risotto口感，並非間間 (會) 做到！:)最後，當然係甜品時間啦!  我地叫左兩款Sorbet ，一款蘋果味一款橙味(香橙為試味階段)，餐廳經理知道我地今日來呢度食飯慶祝，好細心咁問我地想兩道甜品寫d咩落去?!  心諗估唔到會有呢種野，感覺都幾窩心 (哈哈，很易被氹)!!整體上，餐廳環境氣氛不錯，食物亦用心製作，同朋友食飯相聚呢度絕對係一個可以選擇既好地方，淨係食佢既黑毛豬都已經值回票價啦!!…Read More

元朗不嬲都係一個多野食既地方，好多人仲會特登揸車入去食 ，係屯門入元朗都係幾個字車程，非常方便！今晚收工即興同朋友入去走一轉，Happy Friday最好緊係食一d任食又唔使點諗既野，可以無所顧忌咁盡情食， 咁先夠free! 今晚揀左間日韓燒肉店試試，收費 $208/位， 任食任飲，加$33可以任飲生啤，正！🍻 入到去服務員即鋪上牛油紙開爐（加$6可以無限換），之後推介加$58可以任食松葉蟹腳，我地即管加左試下， 有興趣食蟹腳既朋友可以一試。食物選擇方面都有好多種類，食得韓燒當中海鮮類、肉類、蔬菜類一定唔少得，另外呢度仲設有沙律吧，熱盤同糖水甜品，想食得再重口味D既朋友，仲可以係調味醬區自行配搭醬料增加口味!  刺身壽司吧既刺身亦非常新鮮，三文魚刺身肥美鮮甜，八爪魚刺身爽甜！ 本身燒烤類已經有多種選擇，基本既豬牛羊雞一定唔少得，肉類醃得好入味，但比較值得一提係個羊架 ，肉味醃到剛剛好，質感好Soft，又唔會好SO，鍾意食羊既朋友唔好錯過，其他肉類水準平均，唯獨雞肉比較偏咸。另一驚喜係有原隻燒蠔，我地加左自家mix既調味醬料，連帶超多既蒜蓉，味道超match! 大蝦份量有十足斤兩，絕無欺場，爽口彈牙！ 另外，成晚我自已最鍾意既係燒菠蘿，無辦法，食住呢個一路食燒肉，勁開胃，真係好正，菠蘿香甜多汁，食左咁多款肉類之後，可以refresh 一下口腔個味蕾！ 甜品選擇頗多，啫厘布丁泡芙雪糕，任你選擇！🍮🍦臨走時已經見出面大排長龍，9點後入坐更加抵食，只需要$168/位，夜消磨既朋友又多個食點！整體而要，食物水準不錯，餐廳環境氣氛與食物配合得好好，職員服務態度亦相當不錯，去開元朗既朋友又想食餐飽，「校長」會係一個不錯既選擇！😋😋*松葉蟹段升級 $116*啤酒升級 $66…Read More