Breed a Belly's Profile

食魚生多數就係去日本餐廳，食呢類型充滿夏威夷風情嘅魚生飯就真係少啲。唔想咁大陣仗又想食啲清新嘅嘢，今次嚟到poke go食魚生bowl 。餐廳環境唔錯，枱上面仲擺設左唔少魚造型嘅模型公仔，好有氣氛。嘢食方面我哋就一人嗌一款，望到餐牌有好多選擇，仲可以自選配料同top加份量，今次我諗都唔駛諗就嗌咗有吞拿魚嘅808，同行朋友唔鍾意食豆就嗌有三文魚同蟹棒沙律嘅ONO。呢度嘅bowl份量真係唔少，除咗配料之外，魚生都大大粒，吞拿魚同三文魚食曬啲飯到最尾都仲有剩。先講808嘅醬汁雖然唔會好多，但係配合三文魚子撈埋壽司飯同埋枝仁豆一啲都唔乾，甜味同咸香味都平衡得好好，而且作為重點嘅吞拿魚粒都醃得好好食，唔會比調味蓋過啲魚味。ONO方面蟹棒沙律疊到好高，未食都俾佢吸引咗，配埋青瓜食非常清新，而且唔會有好重嘅草青味，當中一讚嘅係放頂嘅蓮藕片甜甜脆脆幾好食。第二次嚟食嘅朋友，可以試吓唔同嘅配搭，相信可以話係食極唔厭嘅餐廳。…Read More

今次喺尖沙咀發現一間主打泰式街頭小食嘅餐廳《Amazing Thai》，唔止有船麵咁簡單，仲有唔少地道小炒＋泰式串燒＋甜品，食完真係好似飛咗一轉泰國返嚟咁～曼谷”三口”船麵（$38／碗）諗都唔諗，嚟到就嗌哂佢地三款船麵啦！細細碗～方便你一次過食試哂三碗！湯底香濃入味，其中一款我哋嗌咗乾撈，三款都有唔同風味，非常足料，仲要只係$32蚊一碗！
👉🏻我哋食咗三碗都覺得唔夠喉～
好味指數：🌕🌕🌕🌕🌗牛奶烤豬肉（$38／兩串）🥓第一啖已經感受到佢嘅香氣，燒得啱啱好，唔乾唔柴，外皮微脆、肉質juicy，仲滲出少少牛奶嘅香味，幾有特色～
好味指數：🌕🌕🌕🌕🌕蟹肉奄列（$168）🦀呢個真係幾有驚喜！切開見到個蟹肉嘅份量多到嚇一跳！配上秘製醬汁，少少麥芽糖味估唔到又同個奄列幾夾
好味指數：🌕🌕🌕🌕🌕木瓜沙律（$118）🥗份量超多，酸酸辣辣超開胃，青木瓜夠爽，花生碎提升咗口感層次。不過辣度唔算太高，怕辣嘅朋友可以放心試～
好味指數：🌕🌕🌕🌗🌑飲品嗌咗泰式奶茶沙冰 同 芒果沙冰（各$48）🧋🥭兩杯甜度適中～泰式奶茶有茶香、唔死甜；芒果沙冰就好啱夏天解暑！
好味指數：🌕🌕🌕🌕🌑芒果糯米飯（$58）🍚🥭泰國菜必叫嘅甜品，呢度都做得好出色～芒果夠甜、黑白糯米仲暖暖哋咗上，充一啖一啖食唔停口。
好味指數：🌕🌕🌕🌕🌕📝 總結：好難得喺香港食到咁地道嘅泰國船麵＋街頭小炒，仲要環境乾淨舒服，全部Staff服務都好好！📌下次一定會encore嗰碟蟹肉奄列＋牛奶豬肉串，再試埋其他小炒！…Read More

港島區嘅野食俾我嘅感覺都偏貴，但呢間冒菜喺上環呢個地段， 竟然可以做到晚市都只係幾十蚊一大碗麵，環境仲要坐得好舒服，食完即刻忍唔到分享呢間餐廳俾身邊嘅人知。我地各自都嗌咗吉祥套餐，$66 就有6餸，我個碗嗌咗潮汕手搥牛肉丸、潮汕蒜香墨魚丸、滑牛肉、貴州丁家脆哨、鴨血、芫荽配生椰蕃茄湯，嚟到就率先飲啖湯試下味，無諗過椰子同蕃茄味可以咁夾，係清新開胃，就算份量好多都忍唔住食哂成碗麵！本身對於啲餸都唔抱太大期望，話哂都只係 $66， 點知佢竟然全部餸都好出色，私心推薦潮汕手搥牛肉丸、潮汕蒜香墨魚丸同貴州丁家脆哨。啲丸真係同我以前喺潮洲食嘅一樣咁好味，唔同出面間間都係入貨返黎，間間都一樣味。而貴州丁家脆哨呢樣野，menu 竟有介紹話係貴州非遺美食，佢係一粒粒脆脆。我會形容係有啲似豬油渣，但唔會feel 到肥膏，超脆口，一啖麵夾幾粒餸竟然好夾。另外隨餐仲有個沾醬，唔辣，所有餸點落去都好夾。好難形容嘅味道，大家真係要食咗先明！朋友嗌左差唔多嘅餸，但配黃金酸菜湯，辣得好過癮，呢啲秋冬嘅天氣食麵好適合。另外我地都有加個藤椒魚皮，$48 一大碟，食得好過癮。野飲方面，我就希望可以少啲甜，會更加好飲。…Read More

去完旅行返嚟，成日都想食唔同嘅中菜，今次就揀咗呢間喺佐敦嘅陝西菜。位置上唔算超方便，佐敦行過去都要大概十分鐘，但我哋7點前到達，餐廳已經八成滿，所以我哋兩位都要搭枱。餐廳入面不乏內地客，應該真係正宗陝西味道！打開menu, 見到幾抵食，基本上大部份野都 $100 樓下，所以今次都嗌咗好多。映紅飄雪 $34簡單清新嘅菜式，不過好少地方有得食，好開胃！好味指數： 🌕🌕🌕🌕🌑乳香雞翼（3隻）$28雞翼size 都算幾大，熱辣辣，食落有陣陣南乳味。好味指數： 🌕🌕🌕🌗🌑涼拌豬耳 $52豬耳份量都好多，唔會有毛，調味都啱香港人口味。好味指數： 🌕🌕🌕🌑🌑辣子蝦 $172就算整辣子蝦都食得出係新鮮蝦 ，不過呢味餸比較重口味，最好餸飯！好味指數： 🌕🌕🌗🌑🌑干煸孜然豚肉 $62重口味人士之選，但呢款比起辣子蝦容易入口啲，就算唔餸飯，都好易一嚿接一嚿咁食！好味指數： 🌕🌕🌕🌕🌑金沙骨biang biang 麵 $45呢間鋪頭其中一個招牌，我從來無食過biang biang 麵，原來佢係類似涼皮嘅質感，但無涼皮咁滑，都幾特別！好味指數： 🌕🌕🌕🌑🌑…Read More

食越南料理最心心念念一定重口味雞翼，今次嗌嘅法式牛油雞翼份量十足，外皮炸得好香脆，咬落仲啖啖肉。諗住叫多一個小吃，但擔心太Heavy，就叫咗一個平時少叫嘅青木瓜沙律，出面食嘅青木瓜沙律好多都硬骨骨，而今次呢個沙律咬落脆而不硬，食落非常清爽。嚟到主食方面，蟹膏湯檬就一定走唔甩啦，湯底蟹味香濃，豆卜吸飽湯汁，十分惹味。撈檬方面豬扒亦非常出色，食落唔會太乾，質地亦算鬆軟，配料配合醬汁非常開胃。最後我哋仲嗌咗青檸冰同埋三色冰解解渴，值得一題係好耐冇飲嘅三色冰，椰汁唔會好稀材料亦都好足，直頭係有細個飲嘅味道啊！…Read More

喺香港，食居酒屋多數都幾高消費，好味還好味，最大鑊係食極唔飽。所以多數我哋都係特別日子先會俾貴啲去食居酒屋。有晚路過呢間鋪，見到都幾多人，望完個menu 見到啲價錢都好親民，就決定入去試下喇！
首先，諗都唔諗，個人去到居酒屋一定會嗌嘅：味醂魚干$76呢到嘅味醂魚干比起得之前喺其他地方食過嘅厚身啲，有咬口得嚟但又唔會過硬，我鍾意！
份量都唔少，好難得地有種食極都仲有嘅感覺！好味指數： 🌕🌕🌕 🌕🌕我哋嗌咗個明太子玉子燒$76玉子燒煎得啱啱好，最怕個啲煮好耐，變左老蛋。醬汁都幾多，配埋啲木魚絲就一流
好味指數： 🌕🌕🌕🌗🌑
見到其他地方比較少有，就嗌埋唐揚甜蝦$98
甜蝦比我想像中大隻好多，同埋呢到好好，連蝦嘅炸物都用啲新鮮啲嘅蝦，絕無overcooked。以前食過其他炸蝦，俾啲霉嘅蝦我食，勁大陰影。
好味指數： 🌕🌕🌕🌗🌑
最後就黎咗個主食-蒜香牛柳粒黑醬油炒飯$128呢碟等得比較耐，可能係枱枱都嗌，要即叫即炒。老老實實，嗌呢碟本身都係為咗塞飽個肚，點知佢竟然令我驚艷咗。因為佢啲牛柳粒炒完仲好嫩口！！超難得！食得出唔係用啲cheapcheap 牛柳粒整！食完呢碟已經準備想下次再嚟encore 了！
好味指數： 🌕🌕🌕 🌕🌗…Read More

今晚嚟食呢間泰國嘢，完全係比泰北金醬吸引嚟嘅，見到menu 寫住主打手工制嘅醬料同埋波咁大嘅蛋麵，我哋就決定食呢間嘢。食泰國嘢就梗係唔少得叫返兩個小食啦，今次我哋就嗌咗豬頸肉同埋生蝦 ，菜式可以話一啲都唔馬虎，出面嘅生蝦好多都係上碟濕淋淋，今次呢間連放底嘅苦瓜都係清爽嘅，配埋蒜片同辣椒粒一齊食風味十足。豬頸肉方面份量都唔少，個人認為佢係偏向蜜味，所以有啲怕燒到好燶嘅人都適合食。主菜有意外驚喜，我哋嗌咗一個泰北金醬雞麵同埋拋打肉碎豬肉飯，估唔到喺油尖旺晚市都仲有50幾蚊嘅飯餐，拋打肉碎唔會太乾身仲有啲醬汁，太陽蛋就唔使講啦睇相都見到佢煎得好脆，而且肉碎原來有汁撈勻飯食別有一返風味，值得一試！到期待嘅泰北金麵啦，上碟嘅時候已經被波咁大嘅蛋麵吸引咗目光，撈埋幾款唔同嘅配料，食咗第一啖之後就返唔到轉頭，香辛味十足又唔會辣到要係咁飲嘢，驚喜係雞扒唔係一啲炭燒或者煎到乾晒嘅雞扒，雞肉係好滑嘅，撈埋個醬汁一齊食落喉嚨都好舒服。最後嘢飲方面我哋分別帶咗鹹檸七同埋泰奶，特別嘅係佢哋嘅杯係用啤酒玻璃杯去裝嘅，感覺上飲到最尾嘢飲嘅味道都冇俾啲冰溝稀，而且仲keep到好凍嘅狀態值得一讚！…Read More

古今二呢個名驟眼睇，以為係食台灣嘢，原來係一間日本餐廳，之前已經喺其他地區見過呢間餐廳㗎喇，今次就嚟到荃灣嘅呢間分店度食晚餐。餐廳嘅裝潢都幾日式，舖入面仲有一個小型嘅鳥居搭建左喺呢度，一般我哋去食日本嘢都唔少得嗌個沙律㗎啦，今次我哋就嗌咗呢個柚想蝦你沙律，蔬菜嘅份量同新鮮程度都不俗，甜蝦非常新鮮，而且醬汁酸甜開胃，冇令我哋失望。好味指數： 🌕🌕🌕🌗🌑主食方面呢，我哋今次就冇嗌飯麵，選擇嗌咗兩款不同的卷物，其中火山令人有眼前一亮的感覺，口口疊起嘅蟹柳食落口感好豐富，而且醬汁唔會一味四行，配合埋底下嘅卷一啖放落個喉嚨，非常滿足。火山好味指數： 🌕🌕🌕🌕🌑超級龍捲風 好味指數： 🌕🌕🌕🌗🌑雜錦天婦羅炸粉唔會太厚，唔會因為係天婦羅而拎啲差嘅蝦出嚟 好味指數： 🌕🌕🌕🌕🌑食到意猶未盡，我哋最後仲嗌咗一個昭和豆腐，聽到昭和兩個字已經有日本嘅風味，估唔到呢個豆腐都有一啲小驚喜，外皮似炸非炸，內裏口感非常嫩滑，可惜已經食到有啲飽啦，唔係嘅話配個白飯撈埋嚟食就一流啦！ 好味指數： 🌕🌕🌕🌕🌑…Read More

食韓國嘢唔想食一份炸雞就飽到食唔到其他嘢？今次我哋就嚟到Dodam Chicken。店面好寬敞、冷氣都好夠，預咗嚟食辣嘢嘅我哋就唔怕熱到出晒汗啦。今次我哋嗌咗蜂蜜豉油香蒜脆雞，除咗貪佢可以嗌半份之外，見到有蒜片亦都好吸引。雖然係半份但份量都唔少，醬汁適量唔會搞到啲雞淋晒，咬落外皮好香脆又唔會好厚粉，雞肉撈埋醬汁又咸又甜非常惹味，加上上面嘅香蒜一齊食口感好豐富。嚟到韓國舖梗係要叫食辣嘢啦，我哋另外就嗌咗呢個辣卡邦尼Rose炒年糕，菜式不愧為Rose，顏色好吸引，離遠已經聞到有啲香辣嘅芝士味，年糕唔會太大粒，煙靭得嚟又容易咬斷，唔會太硬亦唔會太粉，撈埋醬汁配料一啖擺落口，未食完就忍唔住想食下一啖。…Read More

第一郡呢間越南嘢喺舊舖嘅時候已經想食喇，但係經常行過都好多人排隊，而且當時門面唔太大，所以一直都未有嘗試。而家第一郡嚟咗油麻地開鋪，鋪面闊落咗好多，放工經開呢頭就嚟咗呢度開餐啦。今日返工忙得滯連晏晝都冇食，所以我哋就決定大吃特吃，主食我哋嗌咗蟹膏蕃茄湯檬同埋烤豬肉法包，小食方面就嗌咗大嘅米紙卷，至於嘢飲呢一人一杯沙冰就走唔甩喇。蟹膏蕃茄湯檬湯檬湯底10分香濃，又唔會一味死咸，大啖大啖食都唔會好漏，當中配料最突出嘅就一定係蟹餅，食落啖啖蟹味，蟹膏同蟹肉撈埋嘅味都好突出。好味指數： 🌕🌕🌕🌕🌕米紙卷（大）米紙卷就同餐牌上嘅相一模一樣，大嚿得來好足料，除咗有呢啲食落好清爽嘅配料之外，仲有大大隻蝦添。好味指數： 🌕🌕🌕🌕🌑烤豬肉法包法包方面傳統嘅就食得多，今次我哋就嗌咗烤豬肉法包，估唔到又有另一番風味，燒烤過嘅豬肉就好似食緊串燒咁樣，同埋發包外脆內軟嘅配搭，簡直就係一流！好味指數： 🌕🌕🌕🌕🌕食到咁上下見到隔籬枱嚟咗一碟香茅雞翼，我都忍唔住再嗌咗，食完個雞翼再飲埋杯沙冰就飽到攬住個肚走喇。…Read More

喺荔枝角返咗工幾年，一直都覺得唔算多野食，點知上次經過AEON 見到呢間燒肉咁多人排，就決定試下佢。成間餐廳都幾多一家大細幫襯，可能係因為佢哋有架空中列車送啲肉，見到附近嘅小朋友見到都覺得好新奇，好開心。睇咗menu 一陣，都知道點解佢可以咁多人幫襯-佢真係好抵食！ 最平$48已經可以嗌到個燒肉餐，但我呢啲食肉獸就決定嗌多啲肉，所以總共嗌咗兩個餐，另外散叫少少肉。人氣牛肉三拼套餐 250g $178包括咗美國牛五花、美國牛小排同肩胛牛柳 呢個餐係超多肉， 每款都起碼有四大塊肉本身以為咁平都無好嘢，但肉質算幾嫩，同埋醃得好入味👍🏼 好味指數： 🌕🌕🌕🌕🌑汁燒牛舌套餐 100g $68呢個價錢嚟到竟然有5-6塊牛舌 唔會過韌，真係無野可以complain 好味指數： 🌕🌕🌕🌗🌑厚切泡菜豬五花 100g $28最驚五花肉過肥，好彩佢無，唯一覺得有燒啲時候出大多油好味指數： 🌕🌕🌕🌗🌑韓風辣味雞胸軟骨 50g $22正常發揮，唔會汁還汁，軟骨還軟骨好味指數： 🌕🌕🌕🌗🌑特級雞爽肉 50g $28呢個後加，竟然超好味，隻雞滑到不得了好味指數： 🌕🌕🌕🌕🌗肩胛牛柳 50g $32呢款係套餐入面食過覺得最好食款肉，決定要encore好味指數： 🌕🌕🌕🌕🌗牛油粟米杯 $16 永遠都唔會難食嘅牛油粟米好味指數： 🌕🌕🌕🌕🌗…Read More

無嚟石門一排，又好似熱鬧咗好多 ，多咗好多餐廳，見到呢間選擇都幾多，就入咗去試。呢間拉麵店比起其他拉麵店相當闊落，拉麵嘅選擇都好多。 店員都同我哋推介佢哋新出嘅蟹皇湯拉麵，係佢哋店長自己研發，見到配料除咗圖入面嘅豬軟骨之外，感覺上呢個湯底配雞應該會夾好多，所以我哋就揀咗雞叉燒。蟹皇湯拉麵上碟之後吸睛嘅除咗係蟹鉗之外，見到雞叉燒都有火炙嘅痕跡，放湯底雖然好清澈，但靠近一聞有濃濃嘅海鮮味一嚟就梗係飲個湯底先啦，一啖落肚已經飲到滿滿嘅鮮味，食落去已經非常開胃，雞叉燒有微微燒過，感覺一般慢煮嘅增添了風味。好味指數：🌕🌕🌕🌗🌑第二個拉麵我哋揀嘅係豬軟骨拉麵。我哋就選擇咗醬油加豬骨湯因為擔心淨係醬油嘅話味道會太過單一，果然濃濃嘅豬骨加上啖啖醬油香味道好有層次，唔會一味死鹹。拉麵都好掛湯，豬軟骨味道非常入味，略略有咬口，唔會軟淋淋，適合我呢啲鍾意爽脆口感嘅人士。好味指數：🌕🌕🌕🌕🌑…Read More

大角咀呢間泰國菜食咗可能有十次 ，朋友一講起泰菜，每次都會諗起佢。記得第一次食完，覺得好好食又抵食， 同同事介紹完，再下次幫襯就要排隊🥲進化到連大時大節嗌到會，都會嗌泰嘟嘟🤣 今次收工去到7:30pm，全間鋪都爆滿，俾我哋sip 到最後兩個位一如既往，諗都唔洗諗就嗌咗個二人餐 可以喺A揀一款，B揀兩款我哋嗌咗小食拼盤、招牌蟹肉炒飯同埋泰式經典明爐大蜆煲。小食拼盤入面有蝦餅3件、春卷3件、香葉雞3件、魚餅3唔好睇佢三件三件好似好少咁，兩個人食其實份量真係好多每次都覺得佢蝦餅同魚餅好正，春卷同香葉雞就正常發揮好味指數：🌕🌕🌕🌕🌑泰式經典明爐大蜆煲每次見到都覺得好誇張 ，大蜆有好多隻 ，好似食極唔完咁啲湯酸Maymay 好開胃！ 最底仲有粉絲， 同個湯超夾！ 好味指數：🌕🌕🌕🌕🌑招牌蟹肉炒飯基本上每次黎諗唔到食咩，都一定會食呢個炒飯。 好鍾意佢每次都會炒到粒粒分明，唔會油淋淋，蟹肉都超多。 好可惜嘅係咁岩坐咗喺風口位， 搞到食完第一碗就吹凍咗（不過凍咗都好食）好味指數：🌕🌕🌕🌕🌑…Read More

放工時間想食西餐，又唔想山長水遠走到油尖旺區，好在喺公司附近都有唔少好嘅選擇，今日就嚟到荔枝角億利工業INN食西餐。今次兩個人叫咗兩個前菜加一個主菜。前菜我哋揀咗牛油香煎帶子忌廉菠菜配香脆酸種麵包多士，香煎帶子都有返咁上下大粒，忌廉菠菜配埋麵包多士一齊食味道平衡得唔錯，唔會太重草青或者一未得忌廉味。另一個我哋就叫咗巴馬芝士黑松露薯條，可以見到黑松露醬一啲都唔慳皮，而且薯條唔係得死鹹味，而係芝士帶出嚟嘅咸香味。主菜方面，我哋今次就冇鋸扒啦，叫咗慢煮八爪魚墨汁意大利飯，見到八爪魚份量唔錯，食落唔會好韌，慢慢咀嚼仲會食到醃製嘅香料味，墨魚汁意大利飯飯粒吸飽醬汁又唔會太膩。最後我哋仲嗌咗個甜品做結尾，今次我哋揀咗芒果熱情果忌廉pancake，班戟質地非常有趣，唔似一般喺甜品舖度食到嘅質感，而且配合芒果同熱情果酸酸甜甜，唔會因為搽咗忌廉就會有飽同濟嘅感覺。整體用餐體驗唔錯，而且餐廳環境舒適，枱同枱之間嘅空檔亦都好充足，牆身更會播放有主題嘅畫面同音樂，配合成個環境喺放工時間嚟講都係一個唔錯嘅享受。…Read More

一講起食韓國嘢，相信好多人都會諗起醬油蟹，今次我哋就一於有啲新意，搵另一類韓國嘢試吓。嚟到呢間餐廳，一打開門已經覺得十分有風味，見到牆身嘅佈置-鐵皮拉閘、洗衣機同埋水吧嘅裝飾，好似返咗韓國嘅地攤檔咁。由於我哋去食嘅時候係午餐時段，避免眼闊肚窄，我哋就諗住兩個人share三樣嘢就啱啱好啦。首先嚟到嘅係招牌炒章魚，上菜嘅時候熱辣辣已經覺得好吸引，章魚咬落唔會韌，唔好睇佢個碟以為好少，蔬菜下面冚埋咗唔少章魚粒，甜甜辣辣好開胃。好味指數： 🌕🌕🌕🌑🌑我哋第二樣柯打係泡菜煎餅，泡菜味唔算十分辛辣，但咬落嘅質感同出面餐廳食薄脆嘅感覺有另一番體會，聽店員嘅建議點上醬汁更加將煎餅嘅香味帶咗出嚟。好味指數： 🌕🌕🌕🌗🌑最後係我哋好期待嘅炸雞，我哋嗌咗甜辣同醬油一雞兩味，唔單只係雞髀，連雞胸嘅位置都好嫩滑，唔會鞋颯颯，除咗份量好足外，每舊雞都有足夠醬汁，充分包裹住香脆嘅外皮，最後成功抱住個肚餓離開。好味指數： 🌕🌕🌕🌗🌑兩個人食到行唔喐都係六百蚊有找，有機會經過尖沙咀記住去試下喇！…Read More