JeffreySo123's Profile

我哋喺7月29日去食早餐，嗰日仲要黑色暴雨，本來淨係想同屋企人簡單食個常餐，點知成個用餐體驗好差，食得好谷氣，主要原因係侍應態度極度惡劣，服務質素非常低劣。當時我哋落單講咗想要常餐，但侍應以極不耐煩嘅態度回應「冇喎」，完全無解釋原因，態度冷漠亦毫無禮貌。我哋都唔明白點解冇，就唯有再轉第二款，點知佢又係一樣話 「冇喎，今日星期二呀。」講嘢態度又差，好刻薄。然後當揀好之後，我哋話想要一杯奶茶同一杯咖啡，佢又語氣好古怪咁講句「唔係奶茶就咖啡㗎啦。」完全唔知佢意思係咩，語氣好似責怪我哋咁，令我同屋企人都一頭霧水，基本嘅溝通同尊重都冇，係好差劣嘅人。到食完飯，我哋想再買個三文治外賣，同侍應清楚表示之後，佢竟然話「咩呀？聽唔明喎」，我哋再清楚講多次拎走嘅，佢先話「哦~外賣下嘛」，態度好明顯係玩嘢，非常唔尊重。總之呢間嘢啲侍應服務態度極差，人品係非常低劣，完全唔應該喺服務行業出現。冇禮貌、冇耐性，令人感覺好似去受氣咁，其實食物係咪特別好我都唔記得，因為成個用餐過程已經破壞晒體驗。奉勸大家如果唔想影響心情，等佢成個餐廳換過一批侍應先再考慮幫襯，至少我會等佢換過一批唔係呢班低劣嘅侍應之後先至再幫襯。…Read More

食美登利就係食佢啲魚大大嚿，鮮味，點知佢放題整到勁垃圾，一開始俾個頭盤你就正常size，之後自己點嗰啲壽司就全部都勁細舊，完全食落去冇口感，又食唔到舊魚嘅鮮味，舊舊都變到好垃圾。好似依舊鰈魚裙邊咁，平時係好大嚿食落去好爽口，啲魚油又好香，點知放題切到10分一咁嘅size都得嘅！？食落去完全食唔到平時嘅口感，咁嘅質素我唔使黎食啦，是但一間放題都好過佢啦！完全係令人食完佢呢個放題之後以後都唔想再食佢呢間嘢，明明平時好地地，放題整到咁真係不知所謂！我寧願你收我貴少少，但係俾返平時啲質素我啦！…Read More

尋晚特登去銅鑼灣諗住試吓佢嘅松露包，本身都幾期待，但呢次經歷真係極度失望。佢網上清楚寫明營業時間係到晚上8點，但我7點15分到門口，發現竟然入唔到去，門鎖咗之餘，門口亦冇任何通知，例如「今日提早結束營業」或者「麵包已售罄」之類嘅告示，反而仲擺住一個牌，寫住「營業時間至晚上8點」，完全唔知係發生咩事。咁我又行去另一個出口睇，結果情況一樣，仍然冇任何解釋。我望入舖頭入面，見到有個店員喺度，但佢完全冇諗住出嚟同我講解發生咩事，甚至冇理會我。作為一間喺日本過江新開張嘅店舖，呢種安排同服務態度真係令人失望。如果營業時間有所更改，或者麵包賣晒提早收檔，最基本都應該喺門口貼個告示通知客人，而唔係留個牌喺度，仲要繼續寫住「營業時間至晚上8點」要人自己估估吓。建議有興趣去試嘅朋友最好預咗心情會受到影響，好大機會會摸門釘而唔知咩原因。…Read More

因為中意飲有Oreo嘅奶茶，但好少地方有，見佢呢度有，所以之前都買過一次佢嘅放肆Oreo。上次店員話最少都一定要少少甜，咁我唯有試下啦，但始終都係覺得偏甜。今日想去再買，同店員講想走甜，因為少少甜都係偏甜，但個店員又係死都話冇得走甜。我問佢其實係點解，如果係個奶蓋甜嘅話我可以走埋奶蓋，但佢話會因為會落少少糖漿。咁我就奇怪，既然你係另外落，咁你唔落咪得，因為Oreo本身都有甜味，但佢就話一定要落，因為POS system冇得比佢揀走甜，佢落唔到個單就唔識做。我真係呆咗，明明menu其他野又比走甜，唔明佢做乜死都要落果個糖漿，客人有request走甜只不過唔落糖or糖漿，點會做唔到？成間鋪好似機械人咁好唔識變通，因為部機fix咗就hang曬機咁。咁嘅service同安排，同埋啲嘢又太甜，真係可以唔洗買佢。…Read More

以前成日幫襯，一開始啲豉油雞同沙薑雞好出色，啲雞肉質好好，唔梅唔鞋，實淨有咬口，又有雞味。真係感覺係新鮮同高質嘅雞，係大圍少有做得好嘅餐廳，對得住價錢。點知近幾次買發覺越嚟越差，唔知係咪換左個平啲嘅供應商，定保鮮做得唔好 ，啲肉又梅又鞋，食落去一pat野咁，完全唔想食。無論係沙薑雞定豉油雞都差左，應該係啲雞本身嘅問題，好失望應該會停返一排唔再買住，暫時對佢冇乜信心，希望之後再買果陣可以做返以前嘅水準。…Read More

同路人都好，但我真係未食過一間咁難食既野啊大佬！黃店都好，但啲野好hea，我真係越食越嬲，真係每一道餸都係垃圾去形容！完全唔值依個價啊大佬！😑我叫左個香草燒原隻雞晚餐(大概係咁啦個名)，另外要左個白酒煮蜆。餐有沙律同湯，但一上枱見到就唔開胃。😓個湯稀到水咁，睇落個色似青紅蘿蔔湯，唔講我真係以為佢上左個中湯😑飲落去係好淡，得少少洋蔥味，整體係冇黎紋路唔知自己飲緊啲乜咁。個沙律仲衰，勁少汁，好似就咁𡁻生菜咁，但依個唔知係優點定乜，因為佢個汁係好X難食，係臭既，酸得黎又唔係醋果隻，總之就難食到痴肺😓跟住到白酒煮蜆，我覺得係不過不失，唔係好食果隻，但比起其他我覺得放得落口啦。冇乜酒味但個汁都調得正常ok，啲蜆都可以。😅跟住到戲肉主菜喇😀啲配菜算係可以，但隻雞上菜個賣相以西餐黎講都算差到不得之了，真係就咁一隻雞剁左條頸原隻放上碟比你就算。喂大佬啊你至少都切開一邊，攤平佢咁上，都好睇啲啊，又入味啲😑一切開，入面一堆倒汗水，有幾條香草咁，睇到就唔開胃。隻雞啲皮係算幾香口幾脆，但一切入邊啲肉，好似白烚咁😑又冇味又乾又鞋，唔講我以為食緊滾水煮雞😑佢有個汁比你點，但個汁都麻麻地😑總之成餐我就唔知自己做乜要比幾舊水食啲咁既野，真係好嬲，痴鬼線😓我敢講去食任何一間黃店都一定好食得過佢！我一定唔會再食，都希望大家唔會中伏。希望佢可以改進下，至少對得住個價錢，同埋支持你既同路人啊大佬。…Read More

剛剛買左個鹽酥雞扒肉燥飯，返到屋企一打開，見到入面啲飯熟到好爛。唔緊要，諗住咁至少係可以放落口食。點知一食一啖，啲飯入面原來係混集左一啲完全未煮熟既飯！食多一兩啖發現都係咁，再望真啲先發覺入面原來溝左好多生米！根本係魚目混珠！好明顯係直接將米倒落原先煮好既飯入面不斷再焗，但根本就冇煮透！咁都可以賣比客人！根本差劣，罔顧食客安全！將啲飯叮左兩次都仲係有啲生，咁整法連原先啲雞扒都整乾曬，完全係浪費我金錢既一次經歷，好不滿！…Read More