影軒's Profile

晚飯約會朋友想食生蠔，本來但算去另一間專食生蠔的餐廳，但果間星期一休息，於是改蠔站。之前有去過將軍澳店，感覺不錯，今次試尖沙咀店。黎得蠔站必叫最出名抵食$10一隻生蠔，我地都叫左半打。除左$10蠔，其他生蠔有package 叫，半打$219，一打$392，可以叫$39既蠔，叫貴過$39就要補差價。當晚的十一款蠔：上枱：$10蠔雖然味道唔差，但不及貴蠔肥美，相比只下變得失色不少。其他食物方面，頭盤香芒牛油果大蝦沙律味道唔錯但份量略少。粉麵方面，我地叫左香辣蒜香蜆肉扁意粉，很香好好味。辣度岩岩好，唔會一放落口辣到你食唔到，食多幾啖之後先會慢慢感受到辣。蜆比較預期中大，辣油滲透哂入蜆肉，正。薯條做小食，夠哂脆。另外叫左香辣炸雞翼，開頭冇留意餐牌有圖，以為係炸雞中翼，其實比較似韓式炸雞，即係炸完出黎睇佢唔出係翼黎。味道普普通通，不過份量唔少，都幾飽肚的。…Read More

散水餅黎講, 我向來都唔會輕手, 話哂返工日日見, last day 最後一日, 當然唔慳得, 第日山水有相逢丫嘛. 之前聽朋友講過話呢間zoe唔錯, 咁岩又近我公司, 特別得黎價錢唔算好貴, 一般連鎖店西餅真係唔敢拎俾老細.同同事share試左呢幾件, 其他冇入我口就唔寫出黎喇, 下次有份食再寫.有我最愛既朱古力慕絲脆脆, 濃厚既朱古力味, 超正!跟住呢個士多啤梨慕絲, 加左一層啫喱, 入口感覺好清新. 最難得係連粒士多啤梨果都好新鮮, 甜甜的. 其他兩個我都唔記得係乜名喇, 味道都係一流, 不過最令我估唔到既既係佢用黎裝飾既花花, 都係食得落口的, 出面一般蛋糕既裝飾真係食唔落, 唔係話唔食得果種食唔落, 而係真係太難食.…Read More

第一次黎，因為知道五位以下冇得book位，所以一早未夠六點就黎到，即刻入得。侍應都係外國人，全程要用英文溝通，不過英文唔好都唔駛怕，因為主菜只有一款牛排，唔駛揀。主菜唔算好貴，每位$318，飲品黎講，cocktail同mocktail 相對偏貴，連加一接近$120一杯。麵包不過不失，但選用的牛油我覺得很香。全晚主菜，鮮嫩多汁，肉味十足，金屬盤下有火保持著牛排的溫度，可以慢慢同朋友傾計都唔怕食物變冷。薯條新鮮炸，上碟時仲好熱。兩杯mocktails…Read More

第二次來南海一號，貴是意料中事，哥是來吃環境和氣氛的。😎至於食物味道算是中上，不過不失，偶有一兩道菜比較好的。第一道菜是冰鎮鮑魚，煮法比較清淡，適合不喜歡濃味道的食客。口感方面，受到鮑魚被切條影響，咬感不及原隻鮑魚放入口。辣酒煮花螺，酒味不重，有辣味但不會太辣，是走大眾路線吧，應該大部分人都可接受到，味道不錯。主角片皮鴨鵝肝牛柳粒 - 份量偏小，味道還可以軟殼蟹 - 餐牌上寫一份兩隻，這裡是兩份的量甜品 - 生磨杏仁茶，杏仁味不太夠以下兩個甜品忘了名字，味道都是比較普通。…Read More

冬至做節，親戚揀左呢間自助餐。老老實實，同朋友食飯俾我揀一定唔會黎呢間。首先價錢唔平，落樓每位$398，但係食左成晚，冇一樣食物，係令我覺得值呢個價錢。食物種類少，好食既更加係冇。全場比較好少少既係燒牛肉，唯一一款達到一般水平既食物。其他都係below average。即叫即蒸海鮮好似好有綽頭咁，其實蒸出黎唔好味，老虎蝦俾佢地蒸到鞋哂。長腳蟹完全係冇味既。原條蒸魚出左一次之後就變左出魚塊。仲有每次出得十件八件既燕窩蛋撻，但係一人最多可以拎四件，前面排左兩三個就係咁先，下輪請早。成晚我都唔知自己食左d咩，咁就冇左四舊水。呢個價錢好食過佢既出面大把選擇。試過一次就算，當出街跌左錢。…Read More

餐廳未搬之前曾經食過一次，感覺不是太好，因為當時係街邊舖，同朋友用餐之際，聽住假天花上不時傳出砰砰聲，好似幾隻老鼠係度賽跑咁，真係食龍肉都冇味。而家搬左新舖，裝修同以前一樣咁有特色之餘，少左街舖既嘈吵，環境感覺又衛生d。例牌必叫正宗羅宋湯，魚子醬配班戟，一如以往的好味，比較意外既係第一次叫既紅菜頭魚柳沙律，以為會腥腥地點知又出奇地好食，味道好夾。全晚唯一道味道較差既，係烏克蘭香煎薯餅。薯餅黎講，老麥比較好食。主菜亞美尼亞烤羊仔扒，羶味十足，唔鍾意既人應該會頂唔住，我就幾like，咁先似食緊羊架嘛。總結頭盤：正宗烏克蘭羅宋湯（必食）紅菜頭魚柳沙律（推介）小食：魚子醬配班戟（必食）烏克蘭香煎薯餅 （不建議）主食：亞美尼亞烤羊仔扒 （推介）小插曲，埋單之後老闆話請我地試酒，試左幾支伏特加，好正好好飲。真係純粹試酒，老闆完全冇提過有冇得賣，我地亦都冇問，講句多謝咁就走左 xD 老闆完全唔介意 very nice 👍 …Read More

聖誕節前最人齊既一個工作天，成班同事約埋食餐好既慶祝聖誕，午餐set由$108-$188，對我呢d打工仔黎講都算豪豪地一餐。好在甜品係任食，即刻感覺抵返哂。未黎主食先隊左件cake同法式蕉糖燉蛋，味道唔錯，唔會太甜，好味。主菜我揀左羊柳配紅菜頭意大利飯，賣相同我想像中有d出入，紅菜頭既威力令到成碟飯都紅紅地，睇落有點驚嚇，幸好食落都係正常意大利飯應有既味道，面頭幾塊芝士只係裝飾，真正既芝士味完全滲透喺飯之中。整體味道算唔錯，鍾意食甜品既黎食感覺會抵d。…Read More

宵夜時段由十點半開始, 十點三四個字去到已經有一條小小既人龍排隊等入場, 準時十點半先會放人入去.Book左想早少少入就排隊啦, 有book位唔排都應該得既, 遲少少入囉. 冇book位但又照排就唔知會點喇 xD最大賣點係生蠔, 不過只得一款紐西蘭生蠔. 唔算新鮮, 蠔身表面呈暗啡色, 而非白色, 證明生蠔開左一段時間.不過自助餐黎講可以接受, 唔一早開定, 實有排等...仲無限供應, OK啦.其他食物質素大致普普通通, 甜品比較出色, 生蠔唔食得太多既朋友可以攻甜品作為回本之選.不得不提章魚小丸子......說好的章魚呢? 粒章魚細到幾乎食唔到囉....總結, 宵夜自助餐食物款式比晚飯時段少很多, 沒有其他食評上寫的長腳蟹, 沒有蒸魚(只有炸魚塊), 剌身也只有兩款.質素普通, 最大賣點無限供應既生蠔.…Read More

晨早流流, 早左入到黎海怡, 仲有時間嘆返個早餐, 本來想去老麥食薯餅, 點知好似因為商場要開outlet關係執左, 於是落樓下食kfc.見個餐牌, 早餐有個set 有通粉有煎蛋, 諗住都唔錯啦, 點知中伏.成個餐除左杯奶茶, 冇一樣野係熱的, 包括遲出要拎牌等專人稍後送上既厚多士.本身個餐$22.5, 另加薯餅, 承惠$27.5.火腿通粉, 牛油多士, 煎蛋, 薯餅本身味道唔錯, 呢幾樣野亦都好難整得難食,煎蛋同薯餅唔熱我可以理解, 因為一早煮定, 但竟然連火腿通粉都係唔熱既!?以後食早餐唔會去kfc, 呢個價錢, 我相信有更好的選擇.…Read More

上星期日約左令女食飯, 於是就試下呢間新開張~一早知難訂位, 所以電話都冇打去, 諗住早到去排隊, 點知都係遲左少少.餐廳十二點開始營業, 我就十一點十五分左右到場, 都係排唔到第一輪.結果, 等到一點半, 終於入到去.環境裝潢給人一種很舒服的感覺, 好適合同朋友食飯傾計聊天, 可惜窗外得個地盤, 就算起好都係望大廈. 服務員都好親切, 雖然餐廳本身唔收加一, 但係咁好既服務, 唔俾返少少真係有d過意唔去.是日叫左四款食物.小食 & 前菜CRISPY SQUID $60即係炸鮮魷, 好脆, 乾身唔油膩.CRAB & AVOCADO BRUSCHETTA $70幾乎係每枱必叫既菜式, 算係幾特別, 但我唔多食得出蟹味....意粉FRESH CRAB SPAGHETTINI $90/$155味道唔錯, 但係意大利粉比較硬, 硬既程度, 有去一風堂食拉麵選硬咁硬, 唔知本身設定係咁, 定一時失手, 個人唔鍾意食太硬既粉麵.主菜LAMB LOLLIPOPS $220一般配羊肉既醬料都係比較濃味, 目的係遮蓋羊既膻味, 我本身都可以接受到膻味, 所以食羊好少會點醬, 對我黎講濃烈既醬料反而影響羊肉本身既味道.呢道羊架冇乜膻味, 就咁食都好好食, 可能服務員留意到我冇點醬, 所以特登過黎解講, 加分~而呢碟菜最驚喜既地方係polenta chips, 質感介乎炸豆腐與炸薯塊之間, 味道近於炸薯但又唔會好似食薯仔咁有滯既感覺, 個人非常喜歡.兩杯服務生推介唔記得咩名既飲品, 除左太多冰外, 不過不失.小小題外話, 照目前情況如果要係正常食飯時間入到去食, 等1~2應該走唔甩. 當日排隊後邊就有人等左一個鐘頭之後, 服務員話俾佢知可能要再等多個半鐘先入到去, 跟住就發爛渣了, 投訴點有兩個, 1. 太遲通知要等咁耐, 即係點解唔係一個鐘前講要等兩個半鐘. 2. 客人覺得前面唔係太多人排隊, 樓上餐廳應該仲有位, 指責職員唔開哂d位俾人入.作為食客想講句公道說話1. 一間食肆預早話你知要等個半鐘頭我覺得已經好極限了. 老老實實, 我入去食我都唔知自己坐幾耐, 餐廳又冇規例限時交枱, 點話到你知要等幾耐呢? 話你知個半鐘都係估估下, 等你有個心理準備, 早左有得入就係好彩, 等耐左都係唯有等啦.2.我都係一個人排隊, 你估我真係一個人入去食咩? 前面少人排, 唔等於一定少人入的. …Read More