pansie18's Profile

今次已經係第二次食呢度嘅lunch buffet，依然有水準。食物款式多，今個月以蟹做主題，長腳蟹當然唔少得啦，仲有釀蟹蓋、薑蔥炒蟹，呢度仲有榴槤甜品，榴槤炸彈、榴槤cheese cake、榴槤糯米糍都值得推介。此外，無限任飲茶啡之外，仲有果汁先生橙汁、蘋果汁、汽水等。連Twinings茶包種類都有幾款選擇，真心唔係間間酒店有咁多飲品選擇。價錢方面，Klook, Kkday 都經常有優惠，我今次就係用買二送二，此外仲有長者價、小童價，小童價係指3-11歲，呢啲都唔係好多地方做到。地點又好方便，附近就係荃灣西鐵站或者酒店側門口就係如心廣場巴士總站。…Read More

睇完「想見你」，趕得切返學前食個下午茶餐（5點半前先有），梗係食個下午茶扒餐，勁抵食，只係$65，仲要凍飲唔使加3蚊！以$65可以食塊牛扒、又有煎蛋、又有薯條，真心抵，塊扒仲要幾好味😋，真心推介。…Read More

今次係第二次用「賞你住」優惠到玉庭晚飯，上一次係食套餐，今次係用Dining Credit，可以試小菜。上次經驗都覺得唔錯，今次可以試吓想食嘅小菜更覺得值得讚，所以寫下呢次食評。冰鎮鮮鳳梨脆皮咕嚕肉 - 差唔多枱枱都會order，上枱時有乾冰做出仙氣效果，打卡就必然啦，大人細路都好似睇表演咁。味道方面一流，好脆好好味，老人家冇牙都食到。滷水獅頭鵝片拼盤 - 都係好味，滷水豆腐好滑，鵝肉又唔會好肥，味道又唔會好鹹。金牌脆皮炸子雞 - 皮脆肉滑荔芋鴛鴦鴨煲 - 有驚喜，芋頭夠腍，鮮鴨同臘鴨都啖啖肉，有芋香又滑，臘鴨都唔會死鹹。古法鮑粒鵝香荷葉絲苗 - 份量足夠，好香好好味每味菜式都好出色，家人都食到😋😋😋👍🏻…Read More

由於訂唔到位食中秋做節飯，見到近屋企間酒店係kkday 有優惠，不妨試一試。環境方面，酒店係工業區，行工業風，當然唔係什麼星級酒店，但座位寛敞，枱與枱之間絕對多過1.5米，感覺舒適。取食物區雖然唔大，每款食物都唔係好多，但職員refill 得快，以保持新鮮。食物方面雖然種類唔多，但確實每款食啲啲都好足夠有餘，而且味道有水準，真係意料之外。家人也覺得滿意。當然呢個價錢，唔好期望有好多海鮮、高檔食物等，但以環境及味道質素，絕對合格有餘。推介食品：關東煮、芝士tart、炸魚條、口水雞翼、磨菇湯、waffle、話梅蚊豬手、安格斯牛柳粒、自家製豆腐花…Read More

朋友們想食High Tea, 暑假期間確實唔容易搵，唔係full booking 就話要walk-in，結果無意中見到呢間一間月後可以訂到位，就即管試吓。Tiffany Blue 嘅環境真係幾靚，打卡一流，顧客九成都係女士們，好多仲盛裝打扮黎影靚相打卡啦，我同朋友們就純粹食吓嘢吹下水，盛裝完全唔關我哋事。Tea Set 份量足夠，各層食物都好味，完全比我想像中好，因為一向以為呢啲打卡國際名牌cafe只係有賣相冇味道，真心值得一試。打卡餐廳當然會有限制用餐時間90分鐘，但眼見好多女士只係不停用唔同角度影相，好似齋影唔食咁，全場好似得我同朋友們享用Tea Set 嘅食物，請大家不要浪費食物，食唔晒可以叫店員包裝剩餘食物外賣，個外賣盒同紙袋都好靚架。…Read More

第一次係學校附近食午餐，見到呢間好似好多好評嘅日本餐廳，即管試吓。餐廳細細的，大概二十個座位左右，好彩今日係冇訂位嘅情況下都有位，不過要坐bar 枱，但感覺好似食omakase 咁，等緊上菜嘅時候，見到師傅係度整壽司，都幾好睇呀。午餐選擇都好多，我就揀咗七色魚生飯，仲包埋沙律、味噌湯、燉蛋。沙律菜夠新鮮，個汁酸酸地，好開胃好fresh; 味噌湯唔會死鹹；燉蛋都好滑好好味。主菜七色魚生飯真係堅得，有極鮮味海膽😋，又有大粒鮮甜帶子，蝦又係好大好甜，吞拿魚蓉好大pat，三文魚刺身都好厚好新鮮，加上又唔會太多飯，剛剛好每件刺身加一口飯，真係大滿足。朋友食壽司套餐連牛肉烏冬都非常吸引。總括嚟講，一定會再去試埋其他款式嘅午餐。…Read More

每次有朋友問我邊間自助餐好食，花月庭一定係其中一間。食品種類多，味道又能保持水準，全時段由6點食到10點，可以慢慢食，坊間好多酒店其實都做唔到食足4個鐘。價錢又好多時都有優惠，係公眾假期都有優惠，又有小童價、長者價，家庭飯聚啱晒。性價比真係高嘅。今次復活節假期去食，當然有應節嘅復活蛋，仲有賓尼兔同客人映相，大人小朋友都玩得食得好開心。推介食品：澳洲A5和牛、海南雞飯、長腳蟹、燉湯、燒鰻魚、各式甜品（葡tart、雞蛋仔😋）…Read More

超過一年嘅疫情，晚飯聚會變得十分難得，一放寬四人一枱就即刻約朋友晚飯聚一聚。餐廳環境唔錯，唔似一般酒樓，坐得幾舒服。食物方面，當然要試吓酸菜魚，有好幾款魚，今次試酸菜桂花魚，湯底好味又唔會太辣，魚又夠滑，真心推介。脆皮吊燒雞都有驚喜，夠脆皮，雞肉又夠滑，冇諗過川菜館都有呢個水準。沙嗲肥牛粉絲煲就夠晒濃味，朋友覺得鹹咗啲；乾煸四季豆就正常貨式啦。甜品方面竟然有「菲林卷」之稱嘅芝麻卷，好難得見到，所以要試吓，好味道又唔會太甜，另外叫咗個紅棗糕都唔錯，夠煙韌。總括嚟講，呢間餐廳食物質素幾好，有下次嘅，下次可以試多幾款川菜。呢度有辣有唔辣，應該都滿足到唔同口味嘅朋友。…Read More

早在去年11、12月睇到有關呢間餐廳既報導，係一間手造意粉黃店，見近屋企諗住試吓，嘩，要預早兩個月前訂位，仲要講緊我已經諗住係試平日午餐。Anyway, 一見兩個月後邊日有就訂左先，真心驚會唔記得囉。呢日終於來臨，餐廳其實細細間，裝修簡潔，加埋限聚令，一轉午市其實只係做到10個客左右。呢度係a la carte, 但一坐低都會奉上自家製特式餐包及牛油，好精美。傳統卡邦尼手造意大利麵：份量唔係太多，但味道都唔錯，同出面既carbonara 好唔同，意粉比較煙韌，值得一試。「黃」布和牛千層麵：份量都係唔係太多，味道一般冇特別驚喜，好似普通肉醬意粉但變咗千層麵，只屬可以一試。法式焦糖燉蛋,自家製冰糕：呢個甜品係我同朋友一致認為最驚喜，比起主菜更吸引，完全唔同坊間既焦糖燉蛋，焦糖香脆，蛋夠滑夠濃，又唔會過甜，配埋佢件自家製冰糕，冇得頂，我應該會為咗呢個甜品去再幫襯😋😋另外，值得一讚係，入座時員工會介紹餐牌，每款食物上枱時都會介紹一下個菜式，感覺好似去左酒店餐廳咁。…Read More

雖然聖誕新年長假期，但因為二人限聚令，想約多幾個姊妹下午茶都好難。今日就搵個靚媽姐妹Tea一Tea、吹下水。佢選咗呢間有豬黃店，大家都未食過，即管試吓，仲發現可以openrice online reserve，正，方便。餐廳係樓上舖，唔太大，門口及餐廳內牆壁都有好多特式設計及擺設，值得細看。一入去就充滿芝士味，可能有人order左pizza。始終舊樓樓上舖通風系統真係麻麻，加埋Open Kitchen, 油煙味就要啲時間適應。食物方面就好好味，抵食夾大件。我哋order左個二人餐，有麵包、南瓜湯、一款小食、兩個主菜及飲品，都唔使$300。小食：蜜糖雞翼：香甜美味主菜：燒豬肋骨：好好味既豬肋骨，入味又唔會韌，好味過好多美式連鎖餐廳。主菜：香辣蝦炒天使麵：正常，唔會好辣，麵質同蝦都爽口。總括嚟講，食物味道好，價錢抵，係環境清潔一般，梳化椅因為係布料，都有啲食物漬，洗手間就太污糟，好扣分。…Read More

去完一田超市入貨，順路買外賣午餐，之前試過堂食午餐已經覺得美味抵食，今次試吓買外賣。午市套餐有多款選擇，總有一款啱食。今次叫咗兩個餐，黑醋排骨及乾煸四季豆，每個餐都會包一湯一飯，而且份量十足，唔會因為午餐而細份啲，好似晚餐既小菜份量，價錢只係$55-$60，真係堅抵食。味道方面都有水準，餐湯係冬瓜湯，唔係味精水；乾煸四季豆撈飯冇得頂；黑醋排骨都好入味，酸甜適中。之前堂食試過擔擔麵小籠包餐其實都好好，不過驚呢啲外賣會影響質素，所以都係食外賣小菜餐穩陣啲。…Read More

朋友準備移民到外國，所以我哋係限聚令下都要聚一聚，say 個goodbye 。朋友搵到呢間係市區但又比較偏僻嘅酒樓。餐廳位於係童軍中心，但唔一定要童軍先可以光顧的🤣。因為分枱食，我哋每枱各自叫菜，推介幾款美味菜式：黑豚叉燒皇：勁好味😋，肥瘦適中，一定要試。黑醋一字骨：都係好好味😋，酸甜適中，肉質鮮嫩，都係值得一試。蒸龍躉腩：新鮮，最驚喜佢用子薑舖係魚底，連薑都食埋。炒安格斯牛柳粒：牛柳粒唔韌，配菜係火龍果好驚喜，原來炒過既火龍果都幾好味。生炒糯米飯：爽口，味道唔錯，又唔會好油膩。整體來講都充滿驚喜，唔同一般酒樓，仲要價錢合理，性價比好高。…Read More

又一間打卡餐廳，個粉紅色花海牆絕對不能不影，今次仲安排到座位係正花海中間，冇理由唔影多幾張相。食品方面，今次係食晚餐，主菜就不過不失啦，甜品就好好味，同朋友傾吓偈、食吓野、打吓卡，就絕對合格有餘啦，下次可以既話要試吓Tea Set。…Read More

在灣仔工作一段時間，好少去到呢邊lunch，第一次試吓呢間黃cafe。餐廳裝修以黑白為主，好多位置都好適合影相，一入到Reception 位置，以經覺得好靚，打卡一流。午餐方面，有幾款選擇，主菜選了牛柳，包一件法包、餐湯及飲品。餐湯：粟米湯 - 唔係罐頭湯，似攪碎粟米蓉整，美味主菜：煎牛柳 - 味道正常下次要試吓下午茶，一班女孩子tea 吓影吓相應該唔錯。…Read More

好多年冇去過海洋公園，亦從來冇用過生日免費入場優惠，今年見生日係星期日，即管預約入場行吓。生日唔想係樂園食快餐，所以之前做定功課，鎖定目標餐廳，就係食泰菜，入到場都11點幾，經過目標餐廳已經有10幾人排隊，諗諗吓都係食飽先慢慢玩。12點餐廳開門，以為可以即時入座，點知原來餐廳唔大，加埋人數限制，結果都係要Gulu 攞飛，最後，都係要食第二輪，等位期間就四周圍行吓睇吓。叫咗兩個午餐加個春卷，每個餐有餐湯、沙律、主菜、甜品及飲品，價錢由$208-$248，當然唔算平，但主題樂園餐廳預咗係咁上下，可接受啦。食物方面，評價如下：泰式青木瓜沙律：清新開胃香茅蕃茄湯：充滿蕃茄味菠蘿海鮮炒飯：份量細，但真係有海鮮，味道唔錯紅咖喱燴鴨飯：份量細，好少鴨肉，味道唔錯泰式春卷：新鮮熱辣，夠脆口椰汁千層糕：好味，夠煙韌總括來說，係份量較少，男士們應該食唔飽，但樂園餐廳來講，可以舒舒服服食餐飯算唔錯。…Read More