豬妮子's Profile

今日個個女仔朋友黎咗銅鑼灣行街，突然想食酸菜魚，就黎咗呢度試。入座冇幾耐就上咗碟前菜，酸酸辣辣咁幾開胃，不過到埋單個下先知呢個都有計錢😂因為我地兩個女仔食唔到太多，就叫咗個酸菜魚，酸度辣度都可以揀，而我地食呢個就係中辣中酸，我覺得咁樣叫岩岩好，不過朋友就覺得酸咗d，辣度方面我就覺得唔似有中辣咁辣。作為主角既魚都幾出色，夠滑，唔腥，係有少少骨，仲有好多配菜，例如：酸菜、芽菜、豆卜、 萵筍同寬粉，所以絕對夠飽架！如果大食d或者多人食既仲可以另外加錢加寬粉，咁就唔怕唔夠食了。我地一人叫咗一杯椰汁冰黎解辣解渴，呢個就普普通通，我地都覺得味道甜咗dd。望到周圍大部人都係叫酸菜魚/水煮牛肉同饅頭，有機會下次再黎都可以試埋呢d…Read More

好耐冇同男朋友飲茶，search到呢間係附近就黎試下。我地叫咗個金沙脆皮銀蘿腸($26)。雖然一開頭黎錯叉燒腸，但我地同返侍應講既時候，佢都好好禮貌咁幫我地換返。腸粉皮好滑，入面好脆，真係會食上癮之後黎咗個金錢肚($24)，都算入味，不過有舊大舊d既就比較難咬，同埋我啊婆口味，覺得再淋d都可以，佢下面仲有蘿蔔粒，都係好入味架，而且唔會太硬。然後係黑松露菜苗餃($26)，呢個就有d失望喇，食落去完全冇黑松露味，同埋個皮有d過厚，成隻餃味道偏淡。:(我地仲叫咗2粒燒賣($15)，呢個就好食好多，大大隻蝦，又多豬肉，口感紮實，味道岩岩好。之後我地有試埋黑金流沙包($25)，呢個都抵讚，個流心唔會太實又唔會太水，蛋黃又夠香想滋補一下就叫咗個黑蒜螺片燉肉湯($38)， 除咗有黑蒜、螺片、豬肉，仲有2隻雞腳，真係幾足料，黑蒜味道比較重，唔中意既朋友就唔好叫了。最後唔夠食就叫埋個釀茄子，上面有一大舊鯪魚肉，下面既茄子就夠淋夠入味，而且仲好夠熱…Read More

之前已經想同朋友黎試，點知咁岩撞正星期二休息。今日家姐約我食lunch，我就提議咗黎試下。我地等咗唔係好耐就有得入去食。我叫咗黃酒藥膳雞米線，有雲耳、蟲草花、腐竹、杞子、紅棗同雞。雞同米線都好滑，夠入味，而且真係冇味精，差唔多飲曬d湯都唔會口渴，喉嚨仲覺得好舒服添。…Read More

夜晚咁岩同男朋友行駱駝漆，佢知道我中意食烏冬就提議黎呢度食晚餐。入去前都有一條人龍等緊，人流算多。入到去唔算特別好坐，但個場都幾大，容納到幾多人，所以唔洗等太耐都入到去食野。我叫咗個理應係濃味d既咖哩烏冬，雖然預咗佢係偏日式，唔會辣，但都冇諗過好似水咁啖，無論質地定味道都似水，而個烏冬都算煙韌既。之後叫咗個金菇肥牛卷，d牛肉就有d韌，唔係好咬得開，味道就普普通通啦。我地仲叫咗個凍豆腐，有飛魚籽、紫菜同少少青瓜絲，口感同味道都幾夾。男朋友一早叫咗個炸蠔，但等咗半個鐘都未有，就同侍應講如果未整就唔要，個侍應就話炸緊，講完冇耐就到咗，仲好熱，相信係催單個下先整既。另外，男朋友同我講，我後面就係收集碗碟既地方，但完全冇任何野遮掩住，其實望住食野都會降低咗個食欲:(總結以上咁多樣野，唔會再黎了。…Read More

今日專誠同朋友黎食二人餐，好彩地唔洗等就可以入座。雖然位置有d逼，但都坐滿人，同埋唔知係咪有人反映過太熱，今日個冷氣都開得好勁，唔會食到出汗💦我同朋友叫咗二人餐，每人一碗兩餸米線，兩個小食（我地叫咗麻辣鴨血同豬耳），同兩杯野飲（凍/熱）。雖然個麻辣豬耳比較少肉，但份量都唔少，仲有芫茜，夠脆夠香，天氣咁熱食返個涼拌菜就最合適不過喇～我就叫咗酸麻辣（小辣）肥牛、冬菇米線，本身見到得3粒冬菇都覺得少，但再睇真d，原來俾咗好多肥牛我。熱愛菇類既我就覺得冬菇好出色，有燜過，所以好入味，而肥牛就唔會硬到咬唔開。配菜有芽菜、蔥同肉碎，好足料，夠曬飽。最後就黎埋個麻辣鴨血（呢個小食要另外加$10)，有6大塊入味鴨血，仲有大量芫茜、芽菜同金針菇，真係好抵食啊埋單就$148，即係人均$74就食到咁多野仲包野飲，絕對會encore…Read More

適逢今日減肥cheat day，我突然好想食辣野，就同男朋友黎咗食晚餐。入到去已經滿人，環境有d逼。雖然見到好多人都叫小菜食，不過今日都係想食酸辣粉多d，可能下次就試小菜啦。我叫咗個小辣酸辣粉，薯粉，配豬紅、肥牛同海帶絲，個湯底夠酸夠辣，唔會得酸味，同d辣味融為一體，個辣度比出面一般既辣，所以食到我流曬汗💦 而d材料既份量都唔少，仲有唔少酸菜酸豆，夠曬惹味。之後叫咗雞軟骨，我覺得不過不失啦，可能因為冇檸檬汁，同埋覺得咸咗d:(，不過d雞軟骨都算多肉既。最後再叫咗個涼拌酸辣土豆絲，夏天食涼拌野食就最適合不過了，個汁都幾開胃架…Read More

夜晚睇戲前諗唔到食咩好，男朋友就提議黎呢度食，果然有d驚喜我地首先叫咗個麻辣鴨血，入面既份量都唔少，仲有芽菜、娃娃菜同豆腐，個汁都頗為香辣，鴨血好入味，每啖都爆曬汁我地加咗$18要冷泡茶，支茶有d草青味，唔係完全冇味既，不過又唔係甘甜咁樣。之後就叫咗個川味紅燒半筋半肉牛肉麵（加麵）黎share，我地叫咗幼麵，冇乜特別，不過加咗麵個份量都係較少:(，牛肉得2塊，一厚一薄，牛筋都係差唔多得2舊，青紅蘿蔔都係各2舊，然後有條菜咁。我就覺得主角牛肉牛筋既份量可以多返少少，不過味道係唔錯既，食材都夠入味，微辣咁樣，湯底都夠濃，食得辣既朋友可以加d麻辣鴨血既麻辣汁落去食，再惹味d。…Read More

黎過幾次食飯，都係播住經典既懷舊金曲，頗有港式風味。落單只要自己掃qr code就得，可以避免唔少錯誤，不過可能對老人家黎講就冇咁方便。今次同男朋友排咗一陣隊就入到去食晚餐，我地2個都叫咗鐵板餐。鐵板餐係跟免費熱飲同一塊丹麥多士，我叫咗杯熱檸蜜，水溫岩岩好，檸檬唔會太酸，係茶餐廳飲野最怕就係飲到好酸澀既檸檬味。隔離塊丹麥多士都唔錯，好鬆軟，同埋有足夠既牛油，令佢再香d。我叫咗個鐵板西冷牛扒，係冇得揀熟度既，但男朋友叫既牛柳就有得揀。好彩地，我塊西冷牛扒既熟度岩岩好，可能係因為下面有西蘭花同薯條墊住，唔會過熟，但就真係完全一d牛味都冇，要靠個黑椒汁吊味，不過個粟米就好甜，好好食。我地最後加咗$15飲呢個酥皮蘑菇雞蓉湯，酥皮都算合格既，入面就有蘑菇、雞蓉同少量蜆肉，個味就冇乜特別，罐頭湯咁樣既味，同埋個湯比較稀，質地似水，而且比較油，所以我地都冇飲曬。…Read More

身為觀塘友，點可以冇試過呢間水門雞飯！$36一個飯，仲要唔係迷你版，d飯又多又香，濃郁既香茅味令我好快就ko咗佢。貼心既無骨雞肉方便大家進食，唔怕整損個嘴。雞肉仲好滑，不過大食既朋友就可能唔夠食。食膩咗既時候可以食返鋪係雞肉下面既酸蘿蔔青瓜解膩，咁就唔怕食得辛苦了。其實雞肉上面仲有d芫茜，不過我唔中意食，就夾咗比朋友店鋪入面乾淨企理，雖然唔算好大，但都唔會坐到好逼好唔舒服，有d高凳，都有d普通既座位。性價比咁高，絕對會再encore啊…Read More

夜晚行街經過成日都聽到既洪瑞珍，見到入面仲有幾件原味芝士三文治，就決定試一試佢。結果同我預期既差唔多，普通白麵包+芝士+沙律醬，就要成$20。我自己就理解唔到有咩吸引，最多係塊白麵包軟熟d，芝士又唔係特別香。其實自己買白麵包再加靚芝士同醬，可能仲會好食d。…Read More

放工後好肚餓，就黎咗九龍灣搵朋友一齊食飯。我地叫咗半隻口水雞，轉套餐，再叫咗個燉湯飲。口水雞有好多辣椒係面，辣得好過癮岩曬無辣不歡既朋友，雞肉好滑，真係無乜骨，唔怕食到好麻煩，雞皮都厚，如果唔係減肥我都想食曬佢啊:(套餐既飯都好多，我都食唔曬啊。雞肉下面有唔少青瓜鋪底，食雞食到膩既時候可以食返幾舊酸酸地好開胃既青瓜中和一下。另外，跟餐既雞湯都唔錯，唔會太油，仲有d冬瓜清熱。跟餐既娃娃菜都算鮮甜，不過我個人就中意再淋d入味d。最後叫咗個燉湯，有羅漢果、松草花、豬肉、雞腳同龍眼等，飲落喉嚨即刻舒服曬，唯一缺點就係比較油。以為會好鞋既豬肉反而幾淋，仲幾好味，而雞腳都好滑。…Read More

係駱駝漆行完街，有d攰唔想再出去搵野食，就黎咗呢度。我就叫咗慢煮牛腹扒飯，就咁睇相係賣相好好，但野食就冇乜味，湯有點兒太稀似水，牛肉都唔夠香，而隻溫泉蛋都係冇乜濃郁既日本蛋味，不過好彩個飯都有汁，有d咸味。朋友就叫咗個拌麵，評價都係一樣，冇乜味咁啦。仲有店內座位比較逼，冇乜空間移動，太多野攞或者好似我地咁有d大份就可能會辛苦d了😂…Read More

之前氣管病既時候咩都唔食得，就係到食過一次牛腩麵，已經覺得好好食。之後有機會再黎支持下。雖然門面冇咩特別，但重點係野食到。我叫咗四寶河，朋友叫咗淨雲吞，然後我地再share咗一碟菜。四寶河入面有牛丸、墨魚丸、雲吞同魚片頭各2粒，唔會太少，食材都冇雪味，墨魚丸同魚片頭唔會腥，牛丸既牛味都好勁，而湯底都夠味。如果食得辣記得一定要加辣椒油，好香架！…Read More

lunch 時段好肚餓，同男朋友周圍搵食，經過見到就果斷排隊了。出面揀好餐俾錢後，入去就會收到個bibi器，有專人會送餐～唔怕整到。湯、沙律同飯都係任添，岩曬大胃王去食我就叫咗普通美國prime 牛扒（200g），意外地好食，唔會冇味，又唔會熟到well done，仲有幾片蒜片，夠曬惹味啊！…Read More

早前都食過荳子beans，覺得水準唔錯，之後知道荳子開冰室，當然唔可以錯過啦裡面環境乾淨，夠光猛，仲一路播住d懷舊金曲，別有一番風味～晚上7點幾去到都有條人龍，等左一陣就有得入去。入去後自己用qr code落單，夠曬方便開頭叫左個菠蘿咕嚕豬頸肉，唔會太酸，味道剛剛好，好開胃，d炸粉唔會厚，包裹住紮實既豬頸肉，絕無偷工減料，而其他配料如菠蘿、三色椒同洋蔥都好足料。之後叫左個魚香茄子煲，份量唔小，茄子夠入味夠淋，有好多肉碎，仲食到d鹹魚粒，不過我就覺得可以再咸多少少。我加左$35將呢個轉左做個餐，有白飯，菜苗同熱既甜品（芋頭西米露）菜心苗夠淋但係有d苦，一般般啦～最後食既甜品係要叫侍應上先上既。呢個熱芋頭西米露有d驚喜，芋頭多，唔會硬，整體唔會過甜。…Read More