bbu1778's Profile

啲野好食既，但環境好嘈，我地坐最尾一張枱，都可以聽到最頭一張枱既說話聲，連續5張枱既嘈吵聲擁哂過黎，食餐飯食到耳膜痛。偏偏後面嗰張枱幾個女人講野好大聲，又成日大笑喧嘩，嚴重破壞餐廳環境。响呢度食飯食得開唔開心，好睇隔離前後坐左啲乜野質素野客。我覺得最好食既係甜品，薑汁撞奶雪糕好小遇到，南瓜撻甜度剛好。燒春雞個皮仲脆既肉眼好食，熟度好好節瓜湯同油甘魚刺身就冇乜特別前菜粟子撻感覺幾清新麵包都正正常常鮑魚飯好食，炆得好夠味，飯都好夠味。…Read More

去開黃埔，去openrice見農耕記有得訂枱，即管試下。去到已經留定卡位枱比我，員工服務熱情有效率，感覺幾好。點菜發覺可以免辣又可以少油，對我黎講又係好好既選項。叫左鰈魚，好食，唔腥，魚肉夠滑有啲彈性，叫左少油但依然見到好多油，若不少油，不能想像。炒福花，炒得幾惹味。燉雞湯就冇咩雞味。肉碎米粉真係太太太太多油，滑到好似食米線咁，成咀都係油，但我又覺得好食喎，可能就係越罪惡越好食真係定律。燉雪梨係驚喜，唔太甜夠潤好食。但價錢黎講，我覺得貴左啲，埋單時收銀話遲啲會跟番大陸菜牌價錢會平番一半。好早之前寫完呢篇食評等批核，不明為什麼會說給過我什麼免費款待及試吃，完全沒有這回事，連加一都收足囉。所以上傳收據証明下。…Read More

入到舖頭既裝修，即時感覺覺得好棧鬼，扮以前既大排檔，但啲燈管又似响街巿咁打開餐牌，樣樣餸都想食，全部都係唔花巧，包惹味好食唔會中伏的菜式叫左盤鱔，魚肉彈牙既，豉汁好餸口咕嚕肉，唔係我最鍾意食嗰隻，但都好食，又係超餸口既菜色串燒正正常常，牛舌都幾大塊，燒得剛剛好叫左2隻蠔，裏面唔係好熟，不過照吞了，食完就胃口唔舒服，疴嘔都有但唔嚴重，後黎胃口唔開睇過中醫，中醫話我應該之前食錯野。我相信係呢隻蠔未夠熟既問題了。但朋友受得住冇事。…Read More

叫左個安格斯牛肉烏冬 (唯獨呢個我覺得有質素既)，但出到黎好細碗，一人食都唔夠刺身正常，不過不失。壽司都係正正常常，冇咩驚喜。二人惠顧了若$1500元，好似叫左好多野，但樣樣野又份量好小，最後都好似冇乜野落過肚咁。服務很一般，員工很多，但冇人添水，唔叫都唔做。在某客人埋單離桌後，有店員就講該客人是非了，此舉不太專業。期間見到有客入座覺得大風要求換位，但服務員竟然沒有提供服務，還說周圍都一樣，但當時店內大把位置，服務員應該可以幫忙一下。這兒的服務確係有待改善。我唔知呢度一面倒的好評是怎樣來的，但綜合而言，我覺得OK而已，而且沒有打算再惠顧。…Read More

首先覺得每個服務員很熱情，服務周到。點了一個大概二千元 的二人晚餐，有一板海胆，海胆質素不過不失，海胆味不算太出，但沒有苦味，新鮮的。刺身普通不算吸引，吃不出魚味燒魚是一個驚喜，燒得剛剛好，又滑又嫩又夠熱。龍蝦正常發揮輪到壽司又是另一個驚喜，飯好夠味，有些魚又漬過，味道很夾，吃完7件後還有點想繼續。甜品是芝士餅，這個覺得有點HEAVY，未能劃上最完美的句好。後話：最可惜的是，隔離坐了一個性情太活躍的女士，高談濶論之餘，飲酒突然噴酒，濺到我身上，枱上，食物上，遇上這個用餐經歷真有點殺風景，幸好服務員應對很周到，重新清潔周邊一番，換過哂前菜杯碟給我。…Read More

好多年前呢間餐廳係做西餐既，當時已經經常惠顧。隔了幾年疫情後再來，竟然變左日式飯，我叫了牛肉牛舌茶泡飯，朋友點了鯖魚茶泡飯，賣相依舊精緻十分好，不過以茶泡飯來說，這個飯太黏太濕太爛了些。餐有件小糕點，相當不錯，在這個餐能劃上完美的句號。以往在這裏會點綠茶LATTE，真的是不二之選。但今次見到栗子LATTE試一試，不太甜，有栗子味，這個是有點驚喜的。當天下大雨，本應心情不太好，這個套餐彌補了我的不快。…Read More

本來訂左張枱7點3，2位，我6點半到左，冇枱比我，然後我就企响度等，之後一直有人Walk in, 2位2位咁比枱人，我之後問佢幾時比枱我，佢竟然話7點3會比枱我，因為我訂7點3。呢啲人係咪唔識轉軚，我到左咪當我Walk in, 咪順序咁比枱我。有咩理由遲過我黎既Walk in客係有位先。你要我企响度等45分鐘，你唔一早出聲？！然後我就離開。然後7點25分再打黎問我仲要唔要枱，呢個員工真係好搞笑，我問佢點解唔係比枱我先，佢竟然答話等張矮枱安排比我，咁點解你唔問下我對枱有冇要求先？你全場得嗰幾張矮枱真係唔知要等到幾時！我有指明要矮枱咩？你啲矮枱又唔係特別濶落！個個月幫襯開屯門巿廣場嗰間牧羊少年，各方面十分好，呢間真係不知所謂。…Read More

今日路經見到初遇，見裝修乾淨企理，餐牌選擇多，所以入去食。三寶麵，牛筋牛腩牛肚都夠淋，麵有嚼勁挺不錯的，不過個人會喜歡軟番啲。醉雞卷，正常味道，酒味未算好入味，但都ok，肉嫰。芋泥酥，炸得好酥脆，芋頭有軟糯感，小小咸蛋黃但冇咸蛋味，正正常常。榨菜肉鬆蛋餅，呢個係最後一個黎，其實我已經食到好飽，但我居然都食到2件，我覺得呢個好食，好足料，雖然蛋餅冇蛋味，似墨西哥餅皮多啲，但榨菜肉鬆好ok。唯一較失望的是台灣奶茶，叫了小甜仍是很甜，而且冇乜茶味，淡色。連埋環境裝修整潔程度，整體算中規中矩，對得住個價錢。至於服務，舖頭冇收加一服務費，有人落單捧餐，有基本禮貌。…Read More

現在的廚師發辦越做越濫，好多間日本料理都又貴又唔得，真係有料到既真係好小。今次終於遇到呢間“令”，上個月黎呢度食過lunch，覺得十分有驚喜，食完之後覺得唔夠喉，都係要黎食埋個Dinner。真係一試難忘，以後任何慶祝都走黎呢度實冇衰。因為只能放12張相，壽司相就skip吧～ 每道菜都充滿藝術感呢～ 賞心悅目的一餐！雖然價錢是有點小貴，但個人覺得是值回票價。酒類選擇也不錯，價錢亦合理，十分滿意。希望令可以一直keep住呢個水準，長做長有。…Read More

現在呢個時代，好多人鍾意整色整水既精緻食物，好多錢就用哂响食具，擺盤，整色整水，食完幾千銀都唔飽，但就大飽眼福....而呢間法國餐廳就冇咁多整色整水既野，好實際，而且份量足，未到主菜我都已經飽左大半，最後甜品都叫唔到。食物味道不過不失，對得住個價錢，以酒店法餐黎計，我覺得算抵食添既。因為叫了海鮮拼盤，所以叫了杯白酒，本身鍾意甜甜地有花香味既，waiter在餐牌內4款中介紹了某款R字頭，不過我覺得好甜，不過都飲得開心。意式咖啡個奶泡打得極好，呢個有啲驚喜既。…Read More

再很早期時經openrice訂了枱，但到達餐廳沒有我的booking, 直接show手機給餐廳，他說沒有record, 但最後都有先給我枱。打開餐牌，覺得很豐富，很多食物都想吃，奈何胃沒有很大。點了紅菜頭芒果米紙卷，芒果不是包在裏面，有點失望，只是出面灑上芒果粒，但米紙卷內的蔬菜很新鮮。燒烤雜錦拼盤可見食材新鮮豐富，唯獨拼盤內的鮮尤是完全冇味的，一定要點汁。有個海蝦檬粉定貴刃，一時忘記了，味道很好，辣椒粉細心的沈响側邊，要幾辣自己決定。炸豆腐比想像中大碟，不過味道欠奉，淡茂茂的，要靠佢個汁先有味。點了凍泰式奶茶小甜，又係淡茂茂，茶唔茶，奶唔奶咁....整體覺得不錯既，服務也不錯。…Read More

今年來呢間新餐廳過結婚週年，每道菜都有詳細講解，每道菜都好精緻，尤其食具美麗漂亮精細可供欣賞，食材新鮮，菜餚美味，確是值得一試。當然位置在K11 Musea，價錢一定有一點點貴。初時見到枱與枱較近，會担心擠迫，不過最後發現不是安排全部坐滿，不會太嘈吵，氣氛都不錯。可惜餐廳樓底感覺較矮而且燈光較暗，多小都有點兒局束。不過因為每道菜太精緻，我食完就覺得唔夠飽，如果main course能份量多些會合理點。…Read More

餐牌很多選擇，見到很多食物都很吸引，可惜只有二人吃不了太多。回鍋肉偏多油，不過都預左，理應就是多油，但豬肉味道不太好食，個人覺得有點豬臭味，而椰菜爽脆，筍的份量也可接受。前菜比較寡，沒有調味似的，雲耳如果有啲醬汁撈一撈會好啲。小籠包有啲驚喜，皮厚薄適中，仲有湯汁在內。煎餃覺得未夠香，似蒸既感覺多些。生煎包普普通通，不夠熱，湯汁不夠。紅棗糕原來不是認識那種方方的，這兒的紅棗糕似馬拉糕，味道不錯，十分鬆軟，有啲驚喜。服務也不錯，迅速利落。…Read More

落雨落左幾日涼涼的，決定食個煲仔飯暖一暖。之前經過呢間點煲數次，次次都有人排隊，所以試唔到。今日早出門而遇著佢已開門，十分好。本來見到食評話服務差，其實我都不太在意，呢啲小店你想要什麼服務呢？可能對服務冇抱期望，反而受到很好既服務喎～ 惠顧當天真係受到極好服務，幾個店員常會留意到茶壼有冇茶，好快就黎添水。落單亦很好禮貌，聽見接外賣order亦好有耐性一一解答食物方面，我主要讚個鱔煲，鱔肉係厚身兼彈牙，好好味！飯有焦香好好食！係覺得份量小左啲貴左啲（唔記得係118定138），我覺得係一人份量咁。二人食又覺得唔夠喉。另外點左啲點心，點心就冇咩驚喜，份量偏小，味道一般，所以下次黎呢度都係叫煲仔飯就得。…Read More

本身鍾意食手撕雞，所以順路過來一趟。因為打開menu好多野都想食，所以叫了二人餐。本來諗住啲野食份量唔會多，點知最後出到黎係隨時夠3人食都得，如果係3個女仔肯定夠。手撕雞我覺得好食既，朋友就覺得咸左啲，可能因為落左華鹽撈，我自己就覺得餸飯好岩。鵝油撈粗我覺得好罪惡，好食既野就多數都罪惡架啦～ 唔係好鍾意食粗麵既我都覺得佢撈得好食。酸辣雲耳我鍾意 雞腎就賣相一般，味道普通啦～ 正正常常，但大大件好抵食豬手.....夠淋，不過覺得唔夠味。但ok既二人餐188元咁多野仲包2杯野飲仲想點？…Read More