or#tm68714251's Profile

足料炖湯，非常好味，原汁原味家的味道，唔係comercial 嗰種上湯底加料再燉嘅做法。叫咗盅何首烏炖豬𦟌兩個人share，價錢約六、七十蚊左右，真係原盅燉出嚟，唔會有加上湯調味欺騙你味蕾嘅做法，炖出炖湯嘅真諦，絕對係健康養生之選。淨係飲湯唔夠飽(我哋係比較大食嘅)，加咗燒賣，雞扎，金錢肚，啲點心係懷舊點心嘅味道嗰種，未有啲乜嘢驚喜，中規中矩，但絕對唔會中伏。不過淨係飲湯已經值回票價。加上5蚊任飲紅棗圓肉茶，超抵。 因為係第一次去，只係叫咗一盅湯試，下次一定會一人叫一盅…Read More

因為 business trip 返嚟香港， 有間酒店免費俾我住，就响電氣道附近。by chance 行過呢間茶餐廳，梗係要食返我嘅comfort food 加上係我嘅 兒時最愛 : "唔該寫嘢，一個午餐要沙爹牛麵"。同細個嘅時候比，呢間茶餐廳嘅呢個餐 (每間餐廳都有佢哋自己嘅叫法，但都係牛油多士 (以前多數係牛油方包，冇烘底) + 火腿煎蛋 + 沙爹牛麵/雪菜肉絲米/叉燒湯意 咁上下) 真係上上品。第一次食，我叫左另一道唔應該响茶餐廳食嘅菜式:海南雞飯(點解會叫? 因為新加坡嘅海南雞飯，真係好多都唔好食唔，香港啲雞種一定靚過新加坡雞，就咁浸熟嘅雞，雞種本身對味道口感好大影響。 而坡國最名過其實嘅雞飯(新加坡本地人通常就咁叫海南雞飯做雞飯)，我會話係每本旅遊書覩介紹，响一個 hawker centre 入面， 日日天天都排隊嗰間囉，唔開名喇 其實都開咗:)。我哋係開餐廳嘅，亦食過新加坡好多旅遊書 冇介紹嘅嘢食，總雂更加好饂嘅雞飯大有人在，日日天天 排隊呢間，响我嘅排行榜，只係中游(旅行書每本都係左抄右抄，就好似一叠紙跌咗落地之後次序唔同哂，作者都唔知係咪真係有食過先介紹)。講返正題, 咁我太太叫咗呢個午餐定常餐定特餐，可能我試食嗰時，個沙爹汁已經融入咗個湯入面，就好似碗麵係用沙爹湯底咁。第二次去食 (短短4日3夜，已經食咗兩次)我就叫返呢個餐，仲要唔叫丁麵，就咁要即食麵，今次食道佢嘅真身，湯底係溝咗忌廉雞湯嘅底，牛肉嘅沙爹汁脉到撈勻之後會令個湯變埋打邊爐嗰種沙爹湯底。 唯一要彈，就係好多人鍾愛嘅。厚多士，一塊厚多士嘅表面面積，係食過兩塊薄多士，所以受到烘烤嘅面積會細咗，冇咁香脆，再加上本人係prefer 西式麵包嗰種有筋性有咬口又有在感嘅麵包，冇咁鍾情亞洲人鍾意嘅鬆泡泃麵包。但係為咗滿足大部份客人，咁做係無可厚非另外一提，我雖然係食早餐，但係我叫咗個全日供應，多咗塊煎豬扒(有幾仲選擇但係我揀煎豬扒)， 塊豬扒煎得好香，雖然有如一般港式食肆會用鬆肉粉/梳打粉嗱鬆塊豬扒，但係唔會過火。要食唔用粉嗱鬆，有實在肉感嘅豬扒，茶記價錢應該冇可能食到，亦唔係同一個產品，不能比較。…Read More

今次食呢間 Nha Trang , 佢哋個 pho dac biet (粉特別，即係有牛肉牛丸牛𦟌嗰碗湯河) 個湯底好正，河粉亦係用新鮮河粉，夠滑，另外叫咗嗰紫蘇葉牛肉卷，又係好食。聞到隔籬枱有個蟹肉醬湯底嘅粉(响新加坡食過, 叫做bun rieu) 又係好香。講真呢間越南餐廳質素係高嘅，但係奇怪地响openrice 評分唔係好高，响Google 就更低。反而好多年前，响澳洲返嚟去過尖咀另一間好評如潮嘅越南餐廳，我食完之後，厚道啲就講覺得佢嘅用料同味道都係好好好好好一般，真心話係根本嗰間餐廳係垃圾劣食，湯底好明顯唔足料，求其加啲魚露整到有咸味就算，河粉又用低質嘅產品。自此食過so called 好食嘅越南餐都係垃圾質素，都唔係想再响香港食越南菜。唔知係唔係其實好多香港人由細到大都出街只係食中餐同快餐店為主，好少食其他菜式嘅餐廳，或者會覺得唔似粵菜/中菜味道嘅菜式，就接受唔到，覺得唔好食。我自己細細個讀小學開始，屋企成日帶我哋出街食東南亞餐廳 (母親大人好鍾意食越南同泰國菜，以及各國料理，仲之每個weekend 就好平均地乜餐都食，唔會話大部份時間都食中餐)，之後又响好多越南人定居嘅Adelaide讀書，亦响好多越南人住嘅新加坡做十幾年嘢，我响呢兩個地方都成日去啲越南人開而越南客人又佔全部客人百份之九十以上嘅越南餐廳食飯，我絕對相信我比大部份香港人更識品嚐越南菜嘅味道。…Read More

同屋企人食飯，經 openrice 訂枱，訂枱嘅時候有落 remark 呢餐係家庭聚餐，有外國返嚟嘅親戚。可能見我哋同行係有回港渡假嘅人，餐廳職員就幫我哋 arranged 咗一張响窗口前面嘅枱俾我哋，可以一路食飯，一路望住180度嘅維港景色，dining experience 非常正! 我哋一行九人(包括一位老人家)，叫咗個6人餐再加隻片皮鴨兩食，份量好夠，食物水準亦唔錯，每道菜都好食，其中一道係上湯龍蝦炆伊麵，龍蝦新鮮彈牙。另一道係六頭鮑花菇扒時蔬，花菇大隻，鮑魚方面，如果食開鮑魚嘅朋友都應該知道罐頭湯鮑嘅size 所示嘅頭數其實意義不大，一罐有幾多隻，都唔係完全可以代表鮑魚嘅大細。呢道菜啲鮑魚都唔會好細隻，當然唔係大大隻嗰種，不過湯鮑就係湯鮑，品質方面好難有突破，非戰之罪。但係如果真係想食靚鮑魚嘅話，可能要問問部長/經理可唔可以加錢轉做乾鮑。 經Openrice 訂位，散叫 a la carte 菜式仲有7折， 不過套餐就有如一般食肆做法冇得再折。…Read More

燉湯係無敵，叫咗個黑豆何首烏燉豬𦟌 (唔記得餐牌上面嗰名 exactly 係乜)無味精，原汁原味，真材實料，亦唔係用上湯加料再燉嗰種咁commercial 嘅做法。灌湯餃又係另一驚喜，餃本身都係同酒樓嗰種差唔多，但係佢嗰湯又係無敵，雖然無問返店員 fact check，但係我飲到係足料嘅蟲草花雞湯嘅味道，一個字講哂，正到冇得頂。另外，佢茶位只係$5一個人，有紅棗杞子圓肉茶任飲，杞子明目，啱晒而㩒電話已經係我哋無時無刻嘅日常，好健康唯一可以彈嘅係，間鋪好細，我哋下午茶時段去，但如果 lunch hours 去應該好難有位，間鋪一眼望哂，得大約20 個位。 响附近返工嘅朋友， weekday lunch hours 應該要買外賣拎返公司食深知小店生意難做，發文支持良心食肆。中餐唔落味精又做得好味，仲要可以保留香港人飲湯文化，一定要大大力支持。*即使* 粵菜嘅發源地廣州，都俾大中華地區嘅 番茄蛋花湯、紫菜湯 之類只係純粹味道配搭而冇食療素元素嘅滾湯入侵 。希望粵菜入面嘅講求功效，又注重味道嘅無日不湯嘅 飲湯文化，可以响香港世代保留落去。*題外話，正確用語係即使，即便係 "之後即刻"， "隨即"， "跟住就" 咁嘅意思，但係大約十年前開始見到網上有人誤用 "即便" 一詞當做 "即使" 嚟使用，之後全世界嘅文盲就誤以為 "即便" 先係正字嚟跟住一齊錯 (就好似 豉油、豉汁 打成 鼓油、鼓汁。打鼓嘅朋友，你哋set 鼓有冇油或者汁?) 唔通大家嘅便意真係咁强? 大家可以响 Google search "即使意思", " "即使 vs 即便"， 了解有關 即使 同 即便 兩詞嘅意思同用法…Read More