hk_cyrus's Profile

愈來愈常見d 商廈成躉都係餐廳，有時唔知食乜好，流連下呢d 大廈，睇下地下d 水牌，隨時有新發現。呢間銅鑼灣L Square o既樓上鋪，係食中菜的，鋪頭唔大間，間o左三個包廂廂房之後，出面大廳其實也只剩下三張檯，帶有私房菜o既格調。先來點涼菜，手拍青瓜($58 未加一) 同開胃雲耳($58) 用上高身一d o既碟盛載，感覺精緻。青瓜新鮮juicy，汁液有助中和辣度，而d 雲耳都幾爽口。都估到作為正式湘菜館，d 食物辣起上o黎可以非常勁！所以我地都特意同o左店方講所有o野食，bb 辣就ok～農家小炒肉($128) 非常棒，用上豬腩片，口感肥美，同埋個醬汁又惹味，送飯一流……窩窩頭我聽就聽得多，食就真係第一次，之前o係d 紀錄片中提到係熊貓都可以食o既食物o黎！農家窩窩頭($68/8 個)，佢似饅頭，但自身帶甜，啡啡地色，從英文menu 會揭示佢係由玉米粉造，就咁食已經幾好食；包埋d 餡，會多一種梅菜o既鹹味，但係又好鬼夾～鐵板水晶粉($98) 同埋瑤柱蛋白炒飯($88) 都係掠肚仔之選，前者因為比較多汁，實際辣度都幾高！水晶粉類似紅薯粉，佢除左加入椰菜絲同辣椒、肉片，沉低仲有隻炒蛋的。瑤柱蛋白炒飯同埋清炒萵筍絲($88) 當然就完全唔辣啦～個炒萵筍絲感覺較接近水煮，一d 都唔油膩，味道清新。因為餐廳一由廚房出完菜，會暫時擺一擺o係大廳位置某張未有人坐o既檯，所以睇到好多其他人嗌o既菜式。其中有個乾煸蝦睇落好似好香口咁(雖然應該會好辣)，d 蝦又大隻，下次多人d o既時候要叫埋先得。…Read More

開o係始創斜對面、門口毫不起眼o既地庫鋪日式水產專門店，落到去才感受到佢滿滿居酒屋o既風情，帶點隱世小店o既感覺~日本菜往往有住咁多魚類貝殼類，有時都幾花多眼亂，面臨樣樣都想食要揀來揀去o既煩惱。呢d 時候叫個刺身盛合就最為不過喇，組合由廚師幫我挑選好晒，同埋多數都抵過全散叫！我地今次點o左個「松」象拔蚌盛合($398 未加一)，雖然只係四款盛合入面最平o個款，但一d 都唔輸蝕，CP 值夠晒高！Menu 提到餐廳o既食材係每日空運到港，裡面o既象拔蚌來自加拿大，食落鹹香爽口；赤蝦大隻起膠，真鯛同埋o黎自鹿兒島o既油甘魚腩肥美肉嫩，全部都好正！個盛合本身已有一份海膽，但我friend 嫌唔夠分，所以另外再單點多一份($98)。海膽總係有股好濃郁o既味道，頭先配搭三文魚籽一齊食，而家則配紙菜，同樣咁豐沛滋味。既然o黎到水產店，點都要開番一兩隻生蠔，餐廳o既生蠔係時令價的，quote o左一款$88 一隻o既日本青花瓷漁牡蠣俾我地。以青檸同埋一隻類似啫喱狀o既汁調味，鮮甜嫩滑之中有d 微酸味道。我friend 似乎好鍾意食海膽，加叫完不突止，再要點埋呢個日本熔岩海膽魚餅(四件) ($58)。實物幾得意，外層呈黑色，食落似墨魚丸，裡面則係creamy o既海膽漿，唔使點沙律醬都已經好好食。鵝肝多士($108) 有住兩大片鵝肝，香氣四溢。擺上多士上面一啖咬落去，享受住一淋一脆o既口感，再來一昧油潤o既after taste，食多件都仲得。再嗌d 串燒，極上牛舌芯($48) 食落都係爽口的，免治雞肉軟骨棒配日本蛋($48) 也比我上次食o既另一間日式串燒店好食，上次o個間o係隻蛋度落得太多醬油了……日式蒜蓉帆立貝($38) 也唔錯，蔥同蒜蓉o既味道好出。最後叫埋個蔥花吞拿魚腩蓉丼($108) 掠下肚仔，d 吞拿魚腩俾得也太多了吧……超棒的冰滑口感，令人好滿足。…Read More

以磚頭作為主要設計o既西餐廳，地方非常闊落。約埋三五知己放o左工過o黎食番餐，過一種有品味o既生活。免費o既餐前House bread 以小牛皮紙袋包好，食唔晒都可拎走以免浪費。點上黑醋，是典型的意式食法。地中海魚濃湯($68 未加一) 係o係蕃茄紅蘿蔔洋蔥o既基礎上加入魚骨去煲，有少少似周打魚湯加lasagna o既fusion 味道。24 個月意大利巴馬火腿配油漬蛋黃、黑松露多士($128) 有住幾靚o既擺盤，以脆身多士蘸油漬蛋黃去食都係第一次，感覺幾特別。新鮮青口配意大利羅勒蕃茄醬($118) 係個唔錯o既配搭，鮮甜o既mussels，食完個汁亦都可以點麵包。伯爵茶胡椒慢煮牛面大頰特寬麵($158) o既牛肉好淋好惹味，令人一試愛上。另一個紅酒慢煮意大利牛仔膝配玉米蓉($228) 則大件足料，牛仔膝有住牛筋牛腩，淋上紅酒肉醬，滿足食肉獸的你。下面o既玉米蓉都好有特色，creamy 之中又有d 顆粒感。奶凍配百香果醬($48) 必點，好好食，佢奶香特別重，類似北海道牛乳o個類，最鍾意食呢d……提拉米蘇($58) 一樣咁佳，佢有d 似咖啡mousse o既texture，然後又有一層juicy o既layer，如果日日都有得食你話幾好呢……？…Read More

環境滿分、highly instagrammable o既私房菜西餐廳，近窗o個邊有著如宮廷般o既格調，內裡則由彩繪與掛畫帶出藝術館o既氣息；深紅色o既牆身映襯住snooker 檯，也有股private club house o既味道。檯上太多props 又蠟燭又花花又橄欖油做陪襯，配上油畫設計o既餐墊，隨手hea 影都能影出大師級o既作品，未計餐廳自己d 華麗背景，打咭一流呀！挪威雪蟹田園沙律o既蟹肉鮮甜，而歐陸式前菜小食係一客魚子醬玉子，粒粒黑魚子矜貴之致，微腥口感，豐沛滋味。燒美國豬肋骨配燒烤汁(跟餐$298 未加一) o既醬汁濃厚，味道酸甜，是靈魂之所在～薯角屬於比較生一點o既煮法，配上牛油果醬，富有美式風情。炭燒素漢堡扒慢煮格寧蘭比目魚柳伴炭燒洋蔥焗大啡菇(跟餐$378) 更為吸引，標榜為半素o既健康晚餐，大啡菇食落juicy，漢堡扒雖然係素肉但口感與普通肉無異，另外仲有一份燒蒜，成份餐o既配搭令我很滿意。朋友試o左一杯玫瑰三高茶，menu 提到得到有機認證能夠抗氧化，應該會幾唔錯。我則來一杯水蜜威尼斯(加$28)，係意式風情o既雪糕mocktail，想講超好飲，同埋有住漸變o既顏色，影相夠晒靚……西餐當然唔少得甜品，特別想讚個natvia 法式焦糖燉蛋，佢唔似一般類似布甸o既texture，反而呈膏狀，甜甜的又奶香濃滑，不可多得。…Read More

呢間高級西餐廳雖然環境昏暗，但俾人感覺卻好熱情同熱鬧。唔確定係員工定老細o既職員成日wander around，同完呢檯後生仔吹下旅行，跟住就tum 下隔離檯個family o既小妹妹食飯；幫客人揸機影相時又揶揄自己大份攝唔到鏡，非常好客。高級餐廳自然有免費附送o既house bread。一式兩款，o個位職員建議我食o左白色o個隻先。白色o個舊十分鬆軟，而多士呢則係薄脆的，食起o黎估唔到有少少似印尼蝦片！配上松露醬去搽麵包，如牛油般o既texture，但當然香氣濃郁很多！個店員仲話口味如果唔o岩，可以改為黑醋汁，是貼心的～野菌黑松露忌廉湯($78 未加一) 也係一昧松露油o既氣息，而且野菌碎o既量亦都多，令到佢飲落富顆粒感，成件事感覺高尚矜貴！想講香煎帶子配牛肝菌忌廉汁燴意大利麵($188) 個汁勁creamy，杰身掛汁，同埋真係有大大片牛肝菌o係入面，真材實料～佢比其他菇類軟滑，近乎入口即溶，味道輕微苦澀，連埋d 豆芽，是個清新o既菜式。叫埋個自家製甜品，心太軟配雲呢拿雪糕($78) 一凍一熱，一次過滿足晒兩個願望。個心太軟生熟度適中，亦都非常濃甜，滿載幸福o既感覺。…Read More

位於荃灣邊垂地帶o既串燒居酒屋，就算唔係開o係好熱鬧o既地段，一樣有佢o既吸引力。未點o野食之前，已經欣賞到餐廳d 貼心細位，好似有俾客人裝背囊o既籃、檯上裝骨/棄置竹籤o既兜，仲有一來到已免費附送o既沙律前菜。唔同一般o既串燒店，佢唔會o係燒o既時候已瀋滿孜然粉，以濃味蓋過一切，反而會保留食物原有o既味道，而檯上都有鹽、辣椒粉、七味粉同日本胡椒俾你再調味。百福花($14 無加一) 原來即係椰菜花，也許看似係普通o野，但食落口幾juicy，有d 意外～芝士流心蛋大啡菇($28) 有住足料芝士，好濃o既芝士，燒至微燶再加上流心蛋o既蛋黃口感，簡直係正！豬肉荔枝卷($26) 同豚肉雞蛋卷($24) 都係用豬肉片包住一d o野，特別想讚前者，估唔到同荔枝一齊拼搭，咬落去增添一點酸甜，個chemistry 又幾夾。月見免治雞肉軟骨棒($32) 係浸o係醬油同生雞蛋入面，攪拌後蘸o黎食，成個package 感覺好地道！口感有d 似漢堡扒不過係雞肉，當中會咬到粒粒軟骨。不過如果想蘸多d 生雞蛋個汁就會偏鹹，如果少番d 醬油overall 個比例會更佳！明太子雞翼($22) 好香口呀，口味本身帶辣。日式燒豆腐($14) 外面鋪滿飛下飛下o既木魚碎；另外飯團原來都可以燒，櫻花蝦飯團($25) 外層被燒至脆脆的，愛飯焦o既人必試～叫埋下火o野飲(夏枯草/竹蔗茅根，$15)，等自己無咁熱氣先。我見menu 仲有燒雞子同田雞可以叫，都幾冷門，有興趣o既都可以試下。…Read More

面朝大埔超級城中庭o既coffee shop，小小o既一間，以北歐風裝修，極簡主義之中無需多餘o既奢華，配上純白色o既牆身，木造o既傢俱檯凳，入到o黎已經讓人感到好舒適。叫埋配合環境o既歐洲菜式自然加滿分。慢煮法式油封鴨脾配牛角酥窩夫($138) 以窩夫代替飯麵意粉，最o岩我呢d 鍾意食輕食o既人~配上朱古力醬同楓糖漿，佢同之前o係其他類似地方食過比較硬同脆身o既窩夫唔同，呢間d 窩夫個texture 係真係如同牛角包一般，鬆化而富層次感。顧名思義隻鴨脾以慢煮製成，佢同樣咁鬆化，唔使點切，就咁用叉簡單一扯都撕得開。個人鍾意點埋楓糖漿，甜甜的十分棒！伴菜仲有一隻溏心蛋同埋德國酸菜。青醬雞肉意粉($98) 係我第一次接觸青醬呢個名字，擺入口先會感受到濃濃o既橄欖油氣息，繼而滲出淡淡蒜香之類o既香料味道，感覺會係個好健康o既菜式。朋友點o左一杯熱mocha ($44)，拉上心形的花，冬日之中暖意窩心。我則想淺嚐一d 特別d o既咖啡，餐廳promote 緊一d iced filter coffee，等我都試番杯。四款brew 入面我揀o左貴族拼配配咖啡糖果漿 ($48)，聽起上o黎好high class o既名字！佢係種nutty o既口味，再由少少糖漿中和一下酸味，味道唔錯。…Read More

雖然落得bar 唔多唔少都係傾計吹水飲o野為主，食o野為次，但遇著間decent 又有特色食物o既酒吧，感覺都增值d！先去轉墨西哥，來round 鐵板烤牛配墨西哥薄餅($118 未加一)，唔要牛肉可以揀烤雞。個牛肉因為同埋辣椒、洋蔥之類o既配菜一齊整，所以食落偏辣，口感refreshed～佢附有四款醬汁，包括牛油果醬、酸忌廉、莎莎醬(亦都即係辣味蕃茄粒) 與及芝士碎，比我之前o係另一間美式餐廳食o既版本多o左芝士，而且細看之下其實仲係mix o左深淺色兩種cheese 的！自己包自己卷，靈舍有風味。跟住飛去歐洲，德國o既代表有德國腸拼盤配酸菜、薯條($168)。淺色o個隻腸較油潤juicy，深色o個d 食起o黎有d 似熱狗腸，層皮少少脆身，各有不同。特別想讚o個個啡色醬，絕對是精髓所在，超好味，點d 腸或者薯條都一級棒！去埋隔離法國，品嚐白酒忌廉汁煲仔青口，有兩個size，要o左1/2 kg ($168)。d blue mussel 一大煲夠晒足料，個白汁亦非常濃稠，同d 菇菌互相提味，淨係單獨個湯已經好惹味。千祈唔好o徙，蘸埋蒜蓉包，令人食指大動……飲品我frd 特別讚佢o個杯banana chocolate ($48)，面頭簡單拉o左花很吸睛，o係朱古力o既基礎之下，聞起上o黎又多種淡淡o既香蕉氣息。…Read More

一入到門口，即刻俾眼前o既糖果櫃同朱古力噴泉吸引住眼球！真係任攞唔嬲的嗎……﹖一於一次過滿足晒細個媽媽唔俾食糖糖o既願望，拮番幾粒橡皮糖呀，棉花糖呀，淋上濃濃o既朱古力漿，有得玩有得食。有人說，放題或者自助餐其實大都係勝在款式多，質素唔好expect 會好高；不過想講呢間d 刺身質素都幾ok，尤其係貝殼類o個d，食落特別新鮮~ 北海道帶子一昧冰滑口感，赤貝同象拔蚌充滿海水o既氣息，仲有款泰式生蝦，o係日式餐廳都比較少見。唔點魚露醋，點豉油wasabi，又係另一番滋味。壽司手卷都唔錯，特別想推介一款吞拿魚他他，佢幾特別，有一pat 拖羅放係牛油果蓉上面，再搭上一片紙菜，口感棉滑。趁後生有quota 食多d 炸o野，我地點o左勁多炸物。一口芝士外脆內軟，吉列炸蠔同榴槤炸彈都係裡面熱辣辣，我地仲一口氣落埋鹽燒同芝麻雞翼，各有特色。我有個friend 超級鍾意食鯖魚，食親日本o野都叫，呢個鹽燒鯖花魚就食到佢lam lam 脷喇。而另一個friend 則叫o左碗牛肉烏冬自私食！飲品除o左汽水milkis 呢d 之外，仲有多款啤酒，包括我最愛o既apple cider 同另一隻日本罐裝麥酒。而最令我喜出望外o既係，呢度o既sake 竟然係免費任斟……！即刻試下佢o既梅酒，用上sake 杯，靈舍有格調，甜甜的又易入口。除o左chocolate fountain 同另一個甜品櫃之外，跟人頭每人仲可以點一杯haagen-dazs 雪糕，有多個口味。…Read More

帶點美式古典風情o既扒房，霓虹燈散漫住溫暖o既黃色，映襯舊式梳化同埋木造傢俱，氣氛醉人。烘至微燶o既麵包，火候剛好，少少脆身，仍保留麵包口感，不至於太乾身一咬即斷。紅白二湯任君選擇，我揀o左紅湯，味濃，帶有微重胡椒o既氣息。碌過openrice，確認肉眼扒係店舖名物，人人皆叫，當然要試番下。紐西蘭肉眼扒(二人餐$268 未加一) 非常大塊，並無因為面積大就compromise 厚度，呢個就係正式扒房同普通餐廳o既分別。親自將醬汁淋在鐵板上，作為ribeye steak，佢食起o黎肉質鬆軟juicy，配上medium rare，口感更佳。冰島比目魚大虎蝦同樣值得推介，虎蝦大隻肉地，比目魚經過油炸，魚皮非常脆口，裡面o既魚肉依然嫩滑，並且無細骨、一d 都唔腥，本身比較少食熟魚o既我都覺得很美味。飲品可以揀紅豆冰、黑牛、雪糕柯華田等等，一昧經典o既港式情懷。最後當然唔少得舊式扒房必配o既雪糕，餐廳用上o既係雪米糍，風味依然。…Read More

餐廳o既座椅用上鮮明o既五顏六色，地磚、牆磚滲出滿滿o既異國風情，同時掛上多幅帶點搞笑風格o既marvel 主題掛畫；然後某個角落，又會不經意地發現一d 懷舊o既電話同汽水機咁，個氣氛幾特別，自成一派。朋友一入到o黎已經話聞到好香o既松露氣息，唔叫唔得咁，於是寫o左份脆炸粗直薯條配松露蛋黃醬($58 未加一)。d 薯條本身已經瀋o左味粉調味，附上茄汁同埋o個隻松露醬，識食一定點白色o個隻，超香勁好食～o係焗田螺同青口兩者之間掙扎o左好耐，最後決定要呢個香辣蕃茄白酒煮藍青口($88)。佢可以揀辣度，同埋俾定個兜你裝殼，是貼心的。因為唔係個個都食得辣，我地只係揀o左小辣，不過turn out 食落都幾辣……德國腸拼盤($98) 係特色小吃，當然唔可以錯過。regensburger 帶住煙燻o既氣息、nurnberger 肥美juicy，仲有一款芝士豬肉腸，釀入半熔芝士，睇見都想食！佢下面襯托住o既薯蓉，一樣係加o左芝士去整，好濃郁o既味道。剛剛才得知朋友係all day breakfast 控，去到邊都要叫，佢要獨食晒成個！個Homeland all day breakfast 睇落好大份，先$88，都幾抵食。唔好以為甲羅燒一定要日本餐廳先有得食，估唔到連cafe 都有，有d surprised！個甲羅燒蟹膏燉飯($168) 配搭o既唔係日本飯，而係意式risotto，滿滿fusion 菜o既感覺。舊蟹有住很棒o既鹹香，個飯o既texture 杰身，又加入多多芝士，值得推介。…Read More

間bar 有兩個空間，出面光猛舒適，埋牆梳化d 長凳尤其闊落；播住heavy western music，最o岩放工過o黎chill chill～如果你穿過bar 檯旁充滿sci fi 氣息o既走廊，更會發現裡面有個暗紫o既神秘房間，由調酒櫃同霓虹燈o既燈光襯托住，截然兩種風情。一人獨食，又想多多花款，叫個all day breakfast ($108) 最不為過。不嬲都超鍾意食smoked salmon，另外佢個牛角包有股少少酵母/酒糟o既味道，口感唔錯。煙肉則偏燶同脆身，單食可能會有少少鹹，但夾埋雜菌或者沙律一齊食都ok，佐酒又得~佢有幾隻brewings 我都想試呀，一隻叫「休閒工作狂」，咁我一定唔會係啦，放假梗係要hea 番下！一隻叫「紅塵」，我又好似無咁老……最後揀o左枝「青澀」($68)，係隻香港製造、5% o既青提蜂蜜酒。雖然係由蜂蜜釀製，但飲落無想像中咁甜，接近一般白酒。仲點多o左個甜品獎勵自己，呢個焙茶tiramisu ($58) 係menu 中o既推薦菜式，亦都真係非常好食！佢好濃茶香，質感creamy，少少苦澀，再由朱古力醬補上一點唔會喧賓奪主o既甜味，多重口感，唔試唔得，堅推介呀……！…Read More

大間光猛o既中式餐室，地方闊落，見人推埋bb 車入o黎都仲得。餐廳以QR code 手機點餐的，佢細項比較多，跟飯定麵、跟乜o野餐飲、多唔多冰多奶，加配乜o野小食等等，自由度高，但也容易遺漏一個半個選項，不過慢慢地操作都唔難完成。我地o黎到o既時候o岩o岩搭正兩點，有下午茶餐牌，實在太好喇！一於試盡佢o既招牌菜，先來一客鴛鴦手撕雞撈麵($44 無加一)，一次過有晒鹽焗同麻辣兩隻口味。d 雞幾嫩滑，鹽焗雞帶有沙薑粉o既味道，濃味香口；麻辣o個d 則呈微紅色，辣度幾高，風味唔錯。佢下面o既麵標榜住係鵝油撈麵，聽落好似好矜貴咁~ 麵質都算爽口，食落惹味得o黎，一d 都唔油膩。跟呢個餐會附一小兜雲耳作為開胃前菜，也是幾辣的。第二個餐則點o左銷魂腩叉飯($40)，幾玩味o既名字。Menu 介紹佢係半肥瘦o既腩肉叉燒，實物見佢擁有一間間o既脂肪層，而最上方仲連帶一層皮，都幾特別。另一個朋友唔想食咁飽，想叫d 輕食，嗌o左個腩叉牛角包($39)，裡面都係夾上一樣o既叉燒，不過淋上胡麻醬，配上鬆脆o既牛角包，相信又係另一種滋味。每個餐都可以追加小食，寫o左瑞士雞翼(2 隻，$16) 同埋特濃龍蝦湯($38)。雞翼非常深色，有住甜甜o既醬汁，而龍蝦湯都比一般出面橙色o個d 深色，會飲到好濃郁蝦頭蝦膏o既味道！跟餐會附一個普通o既湯or 餐飲，但o個一個湯其實都唔差，帶點瓜同蘿蔔o既清甜，以頗重o既胡椒調味。其餘兩杯就試o左特色飲品，朋友試蕃石榴四季春烏龍茶(加$10)，四季春好似最近好hit 咁。我自己就要o左杯玉桂咖啡(加$10)，加o左玉桂粉，靈舍有咖啡店o既味道o架~…Read More

好靚o既居酒屋，鋪頭唔大間，一邊d 雙人檯張凳用上玩味又醒目o既黑金色巨型骰仔，背後o既牆身擺o左多個達摩做裝飾，又貼上日式海報，充滿格調。而另一邊，則係掛滿燈籠o既bar 檯位，令人聯想到關東煮d 車仔檔，然後o係另一個corner 尚有一個和室，淨係環境已經加足分~都唔係間間居酒屋都肯做午餐，呢間絕對抵食，有set lunch，一個定食連沙律、前菜、茶碗蒸、味噌湯同餐飲，$70 幾$80 都有好幾個選擇，仲唔使加一！就算我想食好d，叫呢個太郎御壽司八貫+迷你豚骨叉燒烏冬定食，都只係$138！沙律同味噌湯都係standard o野，而o個個前菜就係一客綠色o既海帶芽，食落爽口富芝麻香。茶碗蒸有住滑滑的蛋，裡面釀o左蟹柳，佢精妙在於調過味，唔係齋玉子咁寡，巧巧味呀！d 壽司當中最矜貴當然就係海膽軍艦、蟹肉蟹膏味噌軍艦、大吞拿魚腩壽司同埋三文魚籽軍艦。o個幾舊軍艦壽司各自有隻特別造型o既小碟，甚有氣勢，d 海膽非常鮮味，蟹肉肉嫩唔乾身，搭上creamy 味濃o既蟹膏簡直就係perfect match。三文魚籽一昧鹹鹹o既爆漿口感，而塊大吞拿魚腩呈深紅色，軟滑得o黎入口即溶！其他o既時令壽司也絕不濫竽充數，三文魚厚身，油份好高，帆立貝大粒冰滑，另外仲有深海池魚同油甘魚各一，呢個價錢有咁o既質素真係超晒班呀救命……仲未計個烏冬，雖然係迷你版，但係塊豚骨叉燒真係燒得好香，令人流晒口水！仲未夠﹖跟呢d 定食可以追加刺身或者天婦羅小食，平平地加碟甘蝦刺身($28/3 匹)，咬起o黎帶點起膠o個隻漿口口感，也很唔錯。個餐已跟檸茶/咖啡，或者好似我咁叫杯柚子梳打(加$10)，成餐飯就更完滿了~…Read More

冰室貴為香港上一個年代o既文化產物之一，而家已經買少見少，講緊新開o個d 所謂o既「冰室」，好多都裝飾到好靚，然後menu 總係好大本有好多頁圖文並茂咁；仍會保留傳統o既真係唔多。我幾喜歡呢間冰室o既懷舊式風情。佢無咩特別裝修，只有純白色牆身，搭上舊式階磚；一面有住白色卡位，另一面係——摺凳！！唯一o既menu 就係張檯玻璃下面密麻麻o既字~ 然後for 疫情o既間隔板用上o左綠白色設計，都match 番餐廳個colour tone。好耐之前(都真係好耐之前) 其實o係尖沙咀舊鋪食過佢o既芝士麵，今日難得o黎到，突然好想試番下。一個芝士麵餐($53) 可以配兩個餸，揀o左炸手指魚柳同煙鴨胸。個麵聞起o黎好香，d 芝士醬超級濃厚大pat，絕不欺場！用叉撈一撈，更覺佢完全無多餘水份，d 芝士能滿滿地沾滿d 麵條。我都食過唔少其他餐廳o既芝士麵，好多都係水jer jer，其實只係芝士白汁，同呢d 真材實料無得比呀，果然係店舖名物~o係cafe / coffee shop 食all day breakfast 就食得多，竟然連冰室都有得食，而且講緊只係$65，出面一般最少都$8/90，所以我地另外都點o左一份。佢當中有一個黑松露滑蛋，上檯時又係好香搞到人特別肚餓，同埋你睇下佢先$60 幾蚊，但都算滭得幾多松露……隻蛋呈深黃色，富有蛋香，塊雞扒又係好大塊，其實真係幾抵食。同埋佢附有奶油豬仔包，有足上下兩片，d 麵包烤至脆邊，蘸上奶油甜甜的，非常好食！…Read More