k3383's Profile

好少去開屯門，想飲嘢都係搵OpenRice，見呢間評價很好，仲係零負評，好奇去試一下。我叫咗一杯黑糖珍珠牛乳茶，一杯芝士葡萄，全部都叫少少甜少少冰。兩杯試完之後我都非常滿意。芝士葡萄大大杯，味道非常清新，仲有好多果肉食，飲完好開胃。黑糖珍珠牛乳茶，可能因為我叫咗少少甜，所以甜度啱啱好，珍珠嘅軟硬度剛剛好，飲完一啲都唔漏。入嚟之前見佢零負評，仲以為大家都係打手。飲過之後咁好飲，就忍唔住留返兩句，推介大家一齊去。…Read More

本來想試炒米粉，不過午市冇，所以叫咗牛三寶湯麵、黃金鹹蛋黃雞翼、海苔肉鬆起司蛋餅。全部都好好味，冇得彈。牛肉湯麵嘅牛好多好大塊，個湯好正。蛋餅正常發揮，餡料足夠。我覺得最正係鹹蛋黃雞翼，鹹蛋黃嘅油真係好滋味。下次一定再嚟，試佢個蟹肉炒米粉。 我去嘅時候差唔多午市落場，所以要趕快落單。落完單之後，已經聽到麻雀聲，呢間應該係對員工好好嘅餐廳，所以煮出嚟嗰啲嘢食咁好味。終於諗到，唯一不足係冇乜嘢飲嘅選擇。…Read More

冇諗過會難食咗咁多，記得幾年前都食過。當年質素係正常嘅。跳咗兩吋牛一串豬頸肉，以為豬頸肉係唔會錯嘅選擇，點知可以咁啱硬。牛肉也很韌。估計啲肉都放咗好耐。另一個問題就係非常之細串。冇預計要難食到寫食評，所以冇影相。請見諒。…Read More

叫咗個平啲嘅100分鐘餐（M6和牛），冇時間影相。呢100分鐘，實在過得太充實，太滿足。任食嘅小菜有咖喱蝦海鮮，蝦炒飯，仲有非常好食嘅蝦粉絲（真係好好食，但係我提醒自己要留返個胃去食和牛😅)唔使另外加錢可以每人揀一個湯底，我哋2個人叫咗藥膳豬骨湯同喇沙湯。個湯本身味道已經好足夠，打邊爐嘅材料基本上唔需要點醬。但係出面都有好多醬料同埋配料比大家選擇。最好玩就係出去夾蝦，遇到啲生猛嘅蝦，真係有少少難夾，不過真係好過癮！！將生猛嘅蝦放入去打邊爐，感覺當然新鮮啦！全部都係大頭蝦，蝦肉非常結實爽口彈牙，唔算係鮮甜，但係超級多羔，橙色嘅，黃色嘅、深紅色嘅樣樣都有齊。仲有非常多嘅蝦籽，多到整蝦籽撈麵都得。M6 和牛對得住個價錢，個人就更加鍾意牛胸爽，肥而不膩，好香。牛脷都好好食，羊肉都唔錯。不過呢個餐貴啲係因為有M6，所以叫咗好多碟M6。兩個湯底，尤其是喇沙湯，放入大頭蝦同和牛之後，最後攞嚟淥蔬菜… 實在，唔識形容咁正。生果有菠蘿蜜瓜同西瓜，有甜品朱古力蛋糕、雪糕、刨冰…. 但最正係佢嘅芝麻糊… 好香。員工服務態度非常好，牛肉係落單後1分鐘內送到，雖然我叫100分鐘，大概最後15分鐘左右停咗手機落單，不過仍然可以繼續任食蝦、甜品…我埋單之後，都冇趕我走，整個用餐過程感覺良好，所以我覺得有責任上嚟寫食評讚吓佢。今日真係又好玩，又滿足。如果有條濕毛巾俾我抹手就更加好，因為真係剝咗好多隻蝦。…Read More

第一日去完，覺得味道及價錢都很合理，卻在OpenRice找不到。早已想為這間餐廳寫食評，但也擔心寫了食評後，去到要排隊了。連續去咗兩日試咗幾樣餸，蝦子撈麵非常多蝦子，價錢也不貴，配料的份量也很多，無論是豬扒還是蟹黃，味道都很出色。所有肉類都做得很好，例如肥牛、炸豬扒、豬頸肉。飲品也非常特別，味道也很好。唯一失望嘅地方，撈麵的質地及味道有點怪，不是我喜歡的味道。非常喜歡每樣小食，因為份量不大，價錢便宜，可以是很多款，也不會覺得貴。值得再去。…Read More

實在太細份啦！$148 辣炒章魚豬五花，超迷你，得幾片。（唔係under 小食類，menu 係寫熱炒，上菜真係嚇親），不過味道都唔錯。$158 六件柚子炸雞，上枱覺得似KfC出咗新味咁。鷄胸好大件。其他正常，皮脆肉嫰。$88 嫩豆腐鍋 普通平時食韓國菜，正常都有幾少碟前菜，呢間乜都冇。 之前去到邊間都叫得太多食唔飽，今次叫三樣二人食，完全唔飽。優點：好闊落，成間店都冇乜人，坐得舒服。服務都幾好。呢度啱曬想個幫個肚腩同荷包瘦身嘅朋友。…Read More

俾佢個買一送一吸引咗，最後揀咗牛油果奶昔，同埋芒果奶昔。牛油果奶昔加咗$5加咗啲開心果碎。芒果奶昔就加咗桃膠。問咗店員，甜度係冇得揀嘅。一飲落口，真係太甜，已經食唔出果味。第二係飲呢杯嘢都幾唔方便，好彩我屋企喺附近可以拎返屋企飲，打開個蓋發現其實佢都好多料，不過如果喺條街食就真係唔太方便啦。同埋因為實在係太甜，飲嘅時候，淨係飲到甜味材料嘅味道完全冇去到杯嘢飲度。不過再講多次，的確有好多料！不過要讚嘅係店員都好積極，好有禮貌去介紹佢嘅產品，但係始終價錢太貴，買一送一試一次都OK，應該唔會再有下次。…Read More

呢間店都幫襯咗兩三次以上，當然味道好先會再幫襯，不過每一次都係兩個人去，好多嘢想試都未必食得到晒。貪心嘅我哋，每一次都想叫pizza，炸雞，意粉或飯。如果係兩個男仔或者食量好嘅年輕人，應該可以食得晒三樣。每次嚟都想叫多啲款式，眼闊肚窄，叫完好辛苦先食得晒，雖然好滿足，但係辛苦咗個胃。。我會建議帶個胃口好嘅同伴幫手食，又或者餐廳可以推出一啲有一件pizza, 一件雞，加一碟迷你意粉嘅套餐，加埋嘢飲咁就100分啦。講返食物，pizza 我食過三次，每款都好味, 好脆，多芝士。炸雞食過三次，有兩次都係好味啫，，有一次就乾少少。今次食咗新嘅鮑魚肝醬意大利飯… （我影底左個menu)，好特別，可以一試！…Read More

已經食過幾次，呢度嘅雞煲幾好食，啲雞肉好嫩滑，非常入味。雖然之後用嚟放湯，個湯底未必好味，但係可以自己加配料，整一個好好味嘅湯底。佢可以追加嘅所謂靚牛肉，試咗第一碟，相信你都知道可以唔使追加，本身嘅肥牛已經好好味。其他可以點嘅配料，例如五花腩肉，墨魚滑，蝦滑，全部都水準OK，基本上唔需要再加錢再追加其他嘢，不過今次見大家推薦海鮮船，好奇心之下都叫咗一次。不過我就非常之唔好彩，當時鮑魚賣晒，佢同我轉咗帶子，但係帶子非常之薄，亦都唔係好新鮮，所以望到海鮮船嘅時候，不期然感到非常失落。如果嚟呢間我會推薦嘅係出面可以自己夾嘅魚腐、炸墨魚條、粟米同蟹柳，雖然好簡單嘅食物，但係用嚟打邊爐真係好好食。…Read More

睇咗Foodie嘅介紹，好奇試吓。完全冇韓國味，但又幾好味。枱枱都會叫果個$68 芝士章魚仔雞肉烏冬真係抵食，用爐上熱辣辣，芝士超多，我記得介紹好似話係跟五花腩，冇咗係有啲可惜。章魚仔個外型都幾得意，但係冇章魚粒咁有咬口，亦都有啲雪味。不過呢個價錢，呢個地段，（仲有好靚嘅裝修，舒服嘅座位）真係唔可以要求太多。跟足個介紹，我叫埋個蒜蓉牛油炸雞。一上菜我就知食唔晒，大概有六至七件，冇骨嘅啖啖肉，仲要好大件，最後兩個人都係每人食咗一件要打包。味道方面，我覺得係超級似越式蒜蓉牛油炸雞，完全唔似韓式炸雞。我仲叫咗介紹比較少嘅炸醬麵，因為自己本身好鍾意食，呢間餐廳提供嘅炸醬麵係鐵板上，又有芝士，又有煎蛋，仲加黑松露醬，所以好奇一試。呢一碟真係有驚喜，炸醬麵本身應該係一個好重味嘅菜式，但黑松露醬完全掩蓋咗炸醬麵嘅味道，可想而知黑松露醬嘅份量非常多。隻蛋都煎得半生熟，可以撈落個面度食，再加上芝士，淡淡都有拉絲嘅效果。我覺得好好味，不過就完全唔係平日食開嘅韓式炸醬麵。…Read More

多謝OpenRice各位食家介紹咗我去呢間咁好食嘅鰻魚飯店。門口都幾多人排隊大概要等15分鐘。店舖係用電子落單，我叫咗蒲燒鰻魚飯，鰻魚海鮮炒飯，燒白鱔，燒五花腩，燒牛舌，燒雞皮。估唔到電子落單都會出錯，可能因為生意太好，要搭枱，廚師又太忙。最後上晒啲串燒，嗰兩個飯都仲未嚟。串燒白鱔係好正，好鮮味，好脆。其他串燒一般，略嫌太乾身。終於等到個飯，首先係鰻魚海鮮炒飯，鰻魚固然好食，個炒飯都好有驚喜，海鮮非常足料。鰻魚汁嘅炒飯其實係一個絕配。最期待嘅蒲燒鰻魚飯，最後先送到，可能因為先食咗炒飯嘅關係，未來已經麻木咗。不過都水準非常高，鰻魚都非常之多。下次有機會再食過，海鮮炒飯要encore，串燒河麵，再試吓個炭火白燒鰻魚飯。…Read More

身為一個忠實嘅開心果粉，我已經嚟過呢間店幾次。試過佢大部份嘅開心果產品。啱啱試咗佢嘅開心果撻，簡直正到即刻要寫食評。開心果他層次好豐富有一個合格嘅餅底，可以揀朱古力或者原味，我驚朱古力搶咗開心果味，所以揀咗原味，不過不失。開心果醬味道都算幾濃，入邊嘅麻糬好煙靭，最正嘅當然係佢上面嘅自家製焦糖炒開心果碎！呢一堆開心果碎，簡直係佢呢間店舖嘅靈魂。之前食過佢嘅開心果盒，都俾佢上面嗰一堆開心果碎吸引住，其實下面嘅蛋糕，唔算有乜特別，不過都係好食嘅。佢嘅泡芙都唔錯，應該都係差唔多嘅開心果醬，味道都算濃郁。如果可以嘅話，我好想買一大杯自家製焦糖炒開心果碎返屋企🤣…Read More

已經幫襯過好多次，雖然杯牛油果沙冰要$46好貴，但係真係超級足料。久唔久就會想嚟再飲，尤其是天氣咁熱，冇乜胃口，有一杯生果真係太舒服。因為超鍾意食開心果，所以加$8加咗開心果碎，開心果碎會打埋入個沙冰裏面，非常之夾，飲落口感會豐富好多。如果有新嘅產品，有時都會想試吓，今次就試咗桃桃沙冰。白桃非常多，淡淡果味，更突顯咗乳酪嘅味道。非常適合炎熱嘅夏天。每次都會叫少甜，會更突出果味。又懶又想食生果，呢度係個非常好嘅選擇。尤其係牛油果，自己買的話，好多時都會泰山或者太熟，買咗四個可能只係得一兩個食得，即使價錢比較平，最終都係蝕咗。飲一杯牛油果就最有質素保證！…Read More

如果唔係宜記休息，我都唔會幫襯可可店。可可店環境擠迫，好多時都要等好耐位，侍應可能因為太忙，都唔會太有禮貌。唔好彩嘅話叫極都冇人應你，想落單都難。環境亦都好嘈，落單好多時都聽唔到你噏乜，上錯菜嘅機會都好大，落漏單亦都好常見。食物質素方面，同個店名一樣，尚算可以。其中一樣餸係出面茶餐廳比較少有，叫老幹媽蒸豬爽肉。正常我每次嚟都會叫呢個，老乾媽係乜嘢？我又真係唔知，不過豆卜同豬爽肉都係我比較鍾意食嘅，調味亦都唔錯。送飯一流。其他碟頭蒸餸，都幾好餸飯，幾個人叫幾個餸，都會食得幾開心。尋日好熱，所以叫咗兩杯果汁，芒果汁同奇異果汁。唔知道係咪鮮榨嘅，不過味道真係麻麻地。印象中可可店嘅檸茶奶茶都只係一般。不過如果喺深夜，嗰一區其他店都閂晒㗎啦。其實都只有呢一間選擇。…Read More

記得呢間嘢係疫情嗰時開，地點方便，餐廳超大。之後停業咁耐竟然仲撐得住。呢間嘢嚟過好多次，有好，亦都有唔好嘅經驗。最深刻印象係，佢嘅龍城炒米粉，以為可能係乜嘢招牌菜，結果非常難食。第二次係花甲湯飯，以為係啲湯汁令到隻蜆唔開，一咬落去成口都係沙，嚇死。因為方便嘅關係，之後都是有幫襯。瑞士汁雞翼，炸薯條，呢啲嘢中規中矩，可以一試。乾炒牛河都唔錯，不過水準唔穩定。咖喱都幾好食，呢個選擇比較穩陣。尋晚就試咗佢嘅鐵板餐，叫咗牛仔骨，同薯菜。個湯同個包其實真係唔錯。sorry太肚餓不過冇影相。個焗薯我都幾鍾意佢個醬，雖然唔係整得出色，但係我覺得幾好食。好啦，終於講牛仔骨，一上嚟個賣相都幾差，食慾大減，不過就有成五大嚿喎🙄。牛仔骨好多根唔係嚿嚿切得開。用嚟練習吓用刀叉都幾好，食咗一兩啖唔錯嘅就好似抽中獎咁開心。…Read More