Nicolen's Profile

Bookmark左呢間好耐一直都想試今日來試佢既lunch，但menu好多都無，無乜選擇前菜只有冰菜同烤栗子湯，我地揀左栗子湯。味道好濃郁厚身，但一人飲曬一碗會有點膩。主菜揀左紅蝦意粉及辣菜脯蠔仔意大利飯。都係偏濃味，紅蝦食到有蝦腸，有點扣分。蠔仔意大利飯好足料，好多蠔，味道無乜驚喜。本身我地仲叫左一個甜品，侍應落單時都有重覆一次有落到單，但食完主菜佢就叫我地埋單先，當時都有點愕然，有同侍應講我地仲有個甜品，侍應表示係，但埋左單先，咁我地以為埋完單再上。之後等左10幾分鐘，個侍應就趕我地走，我地再次表示仲有個甜品未到，侍應先拎返張單比我地睇話無落到甜品。成個體驗好差，明明落單覆單時有話有甜品，之後都再講左次，一直都係同一個侍應，點知等左咁耐係無落到單，仲要有種比人趕既感覺，好掃興。…Read More

📍米線陣麻辣蕃茄湯底係我每次去米線陣必叫既湯底。最鐘意佢唔會好油，酸酸甜甜又帶少少麻麻地好過癮。不過佢既辣度好飄忽，即使同一間分店，同一個辣度，但每次都唔一樣，我叫開中辣，有時會好辣，有時就無乜味好淡咁。今次叫咗三個餸肥牛、煎雞扒同黑醋豬軟骨。估唔到原來塊煎雞扒好細塊仲細過隻手掌，性價比有啲低，而且應該係煎起擺咗好耐，一啲都唔脆。同埋唔知係咪因為叫咗三個餸肥牛嘅份量少咗好多，得三四塊左右。最唔開心係我明明只係叫咗走芽菜佢竟然走埋芫荽芫荽係呢個湯底嘅靈魂，冇咗芫荽成個湯底失色不少，失望…Read More

呢排成日喺地鐵見到莆田嘅廣告$218兩款蟶子，今日終於嚟試吓一開始會有一小疊開胃前菜，呢個幾好食，酸酸甜甜，好似係酸菜。而蟶子共有九種食法我哋今次揀咗經典嘅蒜蓉蒸同埋香口嘅椒鹽蒜蓉嗰款超好食，個汁好惹味。但椒鹽嗰款同我想像中有啲出入，佢唔係好脆身，炸衣薄薄地，我唔太喜歡，有啲後悔叫咗呢一個食法揀其他應該會好味啲。佢另外配咗炸茶樹菇，反而茶樹菇個味道幾得意。莆田荔枝肉，其實個味道同咕嚕肉差唔多。有啲失望係佢嘅荔枝份量好少，只係得兩粒荔枝肉。整體嚟講冇乜特別不過不失。黃金荷葉包，呢一個非常好食，個包好脆熱辣辣，外脆內軟。切開個包之後就可以夾啲肉絲同埋洋蔥入去，甜甜地。我哋怕唔夠飽，仲叫多咗個煮食係經典包菜飯。個飯跟埋一啲配料俾你自己撈，有花生碎蝦米仔蔥同埋菜。個飯有荷葉墊底，本身以為會有淡淡的荷葉香，但係食落好失望係一啲都冇。佢只係一個普通有味嘅係有啲濕濕地有一啲似糯米飯嘅質感，相當普通，應該其他主食會好好多，呢個可以唔使叫。…Read More

牛大人可能係香港數一數二性價比最高嘅放題火鍋店。其實上個星期先食完，但係隔咗一個星期已經心郁郁又想食今日我哋揀咗午市120分鐘極上和牛套餐，每人$208，星期六日及公眾假期額外加$10 ，另外我哋加咗鴛鴦湯底加$50。今次我哋揀咗酸辣蕃茄湯同阿嫲養生鍋蕃茄湯揀咗小辣，小辣多滋味😋酸酸辣辣好過癮，阿嫲養生鍋嘅湯底就咁飲都好好味，有淡淡嘅胡椒味。我哋都叫咗啲台式小食，好似台灣腸、鹽酥雞、梅味脆薯。肉類方面我最鍾意就係澳洲m5和牛牛肩卷大大塊好有肉感好滿足。如果鍾意油脂嘅朋友仔就可以揀後腿肉同牛五花。飲品區都有好多選擇，特別想講嘅係佢有冷泡茶專區，有四款唔同嘅冷泡茶。當中桂花烏龍清香解膩，飲完又可以食多幾片肉自助區都有白飯同滷肉任裝可以自製台式滷肉飯，而家牛大人做緊夢王祭加埋隻蛋撈飯就更加Perfect啦。不過提提大家夢王祭就只係晚市限定特別想講吓呢個麻吉燒芝麻味，佢好似湯圓咁，一咬開啲芝麻餡就爆出嚟，超濃郁好好味。千祈唔可以錯過。不過甜品區嘅選擇就有啲少，只係得幾款雪條。…Read More

📍木椰餐廳呢個價位嘅屋邨餐廳，其實對佢食物嘅質素都冇乜要求，只要唔難食就可以。幫襯過幾次覺得佢嘅炒飯同蕃茄芝士焗雞扒飯都幾唔錯。每次我嚟其實都係食呢兩樣嘢。今次叫咗辣椒雞粒炒飯，佢嘅炒飯份量好足好大碟，不過略嫌佢今次炒得唔夠乾身有啲濕。另外加咗個羅宋湯，味道正常。但蕃茄芝士焗雞扒飯嘅份量就明顯好細。雞扒一般餐廳嘅雞扒要細好多。我平時都細食，但食完都係啱啱好冇乜飽嘅感覺。佢呢個焗飯有炒飯底，如果可以加埋菠蘿就Perfect…Read More

📍Sensory Zero科學園真係美食沙漠全部餐廳都有貴又唔好食，起碼都要$70一餐，然後仲要完全唔飽。Sensory Zero算係科學園少有比較好食既餐廳。澳洲M五和牛溫泉蛋飯係每次嚟都必叫之選，牛肉嘅熟到啱啱好，粉嫩得來又夠焦香，配上蛋汁真係好滋味。我哋嗰日仲嗌咗芝麻雞翼，雞翼都出乎意料地好好食，炸得好脆，但同時保留到肉汁，好Juicy，呢個係驚喜既。另外我哋仲叫咗一個蕃茄海鮮意粉，不過呢個就好普通冇乜記憶點。整體嚟講，呢間餐廳其實性價比都唔高，其他食物都普通。唯獨和牛溫泉蛋飯係令人眼前一亮，不過喺科學園搵到稱得上好食嘅嘢已經係好難得，科學園真係美食沙漠。…Read More

📍溫野菜自從溫野菜推出了日本國產牛定食套餐，我哋幾乎每隔一兩個星期就會食一次，因為真係幾抵食，人均$300都唔使。我最鍾意嘅係柚子湯底，不過佢係期間限定，而家已經冇咗🫠希望溫野菜會再推出返呢個湯底，佢真係成間溫野菜最好味嘅湯底。講返個套餐，會有4-5片國產牛。加$30可以升級做肉眼部位。強烈建議大家要升級因為肉眼真係好好味好滿足。套餐仲會配蔬菜盛合、一份雞或一份豬同埋當日嘅鍋肴，仲有兩杯飲品。…Read More

📍Mother of Pizza每次想食pizza都會諗起呢間Mother of Pizza。Summer of love 同My Parma係我永恆不變既選擇。我對唔住意大利人，但係我覺得有菠蘿嘅Pizza先係最好味嘅pizza。Summer of love有菠蘿配辣肉腸，再加上佢個靈魂蜜糖辣椒醬，酸酸甜甜，又帶點微辣，真係超級惹味😭😭💗未試過嘅一定要試吓，求你。另外既My Parma會係一款相對清新嘅味道，Parma Ham嘅份量比得好足，配上火箭菜真係完美嘅組合。不過店內環境比較嘈吵，音樂好大聲。而且食物嘅選擇比較單一，只係得Pizza，如果有多啲小食或者蘑菇湯之類會配埋一齊就更加滿足。…Read More

📍616牛肉火鍋專門店突然好想食牛肉火鍋，發現原來新蒲崗有616，主打新鮮牛肉同超多唔同牛肉部位，即刻去試吓先。我哋叫咗鴛鴦鍋，揀咗麻辣同沙嗲。我平時都唔食沙嗲，但佢嘅沙嗲湯底真係令我好驚艷，超級濃郁惹味，直頭令我愛上沙嗲，係每隔一段日子都會心思思好想再食嘅上癮程度😛💗配埋蜂巢豆腐，索晒啲湯汁真係超滿足。不過麻辣湯底就麻麻哋，冇乜味，唔夠香又唔夠辣，有啲失望。牛肉方面，我哋最鍾意就係吊龍，配埋蛋黃攪勻超滑溜又有肉味口感非常好。另外佢嘅和牛都非常抵食，只係$5-60就有一份。而且佢哋仲推出咗印花咭，一個印仔有七折、兩個印仔有六折、三個印仔直頭全單半價，超級抵！！原本見到OpenRice有食評話服務態度唔好都有少少卻步，但係我去咗兩次服務都好好。不過晚市去嗰次嘢食上枱速度有啲慢，可以改善一下。…Read More