bruce.yiu.9's Profile

咁耐冇去旅行，咁岩放工經過呢間餐廳俾佢日本裝修吸引咗入去！超有日本風格嘅餐廳！搞到個人超想去旅行囉！😂一打開餐牌，見到樣樣都好想食！首先我哋點咗幾款刺身食！有油甘魚、新鮮鮑魚、仲有甜蝦！呢度既甜蝦真係要介紹一下！因為都幾特別，係用花酒醃制過，食落特別鮮味！跟住我哋叫咗’黑門魚子多士’超好味！脆卜卜嘅多士，上面有好多唔同種類嘅刺身，有海膽、甜蝦、蟹籽、魚子！超滿足！一次過食晒咁多款刺身🤤🤤我哋仲有叫咗‘燒元貝‘ 侍應喺我哋面前到燒,見佢煮得得甘認真，未食都覺得好味😂 當然食落去都超正！仲有叫左吞拿魚腩卷！吞拿魚鮮到不得了！吾同出面食既壽司卷！呢間餐廳真係值得推介！一定會返嚟再食👍🏼👍🏼👍🏼…Read More

疫情未爆之前，有日好想去食放題，但太多選擇好難去揀，最後就去咗食呢間。咁我就揀咗去食晏晝，當日晏晝12:30去到，已經好多人等緊位，好彩有book位，如果唔係有排都未有得食。而家疫情為咗減少人與人接觸，好多都用Online落單，呢間都唔例外。餐牌入面有太多款式，不能盡錄。至於出面，就有一個大野飲櫃，如果凍飲唔啱，都仲有熱飲櫃。另外出面，仲有啲小食，例如八爪魚丸，螺肉，芝麻八爪魚等等，日式小食相當齊全。落咗嘅嘢食終於上枱，刺身好新鮮，完全唔係啲隔夜，或者有雪櫃味。我最欣賞，係佢個鰻魚。佢個鰻魚燒得好香，同埋好厚肉，一啲都唔渣樓！食刺身點會飽啊，咁梗係要食啲嘢食啦，佢嘅芝麻雞翼，壽喜燒牛肉鍋，同埋燒菠蘿，都係值得推介，同埋食上枱嘅速度都算好快，唔洗掃食者等咁耐…Read More

疫情之下冇得去旅行，唯有就要搵啲居酒屋頂住癮先，今次就去咗尖沙咀廣東道一間樓上居酒屋。入到門口已經感受到好濃烈既日本風，餐廳內嘅裝修，令你好似置身於日本江戶時代一樣，主要以黑色為主。去到居酒屋第一件事當然係嗌啤酒，我選擇左Orion，聞落好香麥味，飲落去反而麥味唔重，仲有啲甜甜地嘅味嘢食方面就叫左-香蔥吞拿魚蓉腩卷，海膽甜蝦茸卷，同埋鰻魚炒飯。首先出場嘅係吞拿魚蓉腩卷，表面好多吞拿魚蓉，食落口唔油膩，值得一讚！之後食嘅係海膽甜蝦茸卷，海膽清甜，連我向來唔食海膽嘅，都覺得好食。甜蝦比較大隻，唔腥，加埋海膽一齊食好好味。最後食埋個關於炒飯，個飯岩岩炒起，用左好濃既鰻魚汁去炒，但食落口唔濕，而且唔咸，好岩口味！如果有思鄉病，不妨喺呢度嘆番一晚，暫時頂住先…Read More

住喺大西北嘅人，有時都好想食日式打邊爐，無奈最近都要去到大埔，而家機會嚟啦，喺上水廣場開咗一間牛摩，二話不說即刻去試一試當日7點左右去到，晚飯時候比較多人，但等咗大約20分鐘就有枱，都算係快。入去之前需要揀湯底先，一埋到枱就有湯底，出去拎再拎完返嚟就有得食。我哋分別揀左博多美人骨膠原啫喱雞白湯，以及壽喜燒。雞白湯個味比較濃，但係唔油膩，如果配埋牛一齊食，會帶出牛嘅鮮味。其次壽喜燒湯底唔太鹹，我比較喜歡，唔會蓋過食物嘅原味。而家好多火鍋店都係半自助形式，呢間亦都唔例外。嘢飲款式好多，菜類丸類都花多眼亂，職員補嘢食嘅速度都好快，唔會長期吉兜。食完之後仲有甜品同雪糕，但已經食得好飽，已經無位再去食甜品。…Read More

由細到大我對素食都冇興趣，但機緣巧合下，去咗呢一間中環嘅西式素食餐廳，試完之後顛覆咗我對素食嘅睇法！呢間素食餐廳坐落喺中環半山區，威靈頓街嘅樓上鋪，餐廳比較隱蔽，注重私隱度，想約三五知己靜靜地食咗餐飯，呢個係最好不過。今次我哋四個人去食，一坐低睇Menu，唔講以為係只係一間主流嘅餐廳。今次我哋叫咗個泰式沙律，水牛雞翼，鵝肝多士，以及威靈頓牛柳！望落呢個泰式沙律，有茄子有青瓜有「牛肉」，同一個普通泰國餐食嘅沙律冇分別。既然講係食齋，又點解會有「牛肉」呢，佢呢度嘅「牛肉」其實係麵筋，識落好真係有牛嘅味道，同埋佢係食到有牛嘅筋嘅感覺，淨係呢一點已經令到我大開眼界！其次下一道嘅係水牛城「雞翼」！呢個水牛城「雞翼」望落真係好似一隻雞鎚，表面嘅汁係酸酸甜甜，類似中國嘅糖醋汁，當你咬落去「雞鎚」時，萬萬都諗唔到，原來「雞鎚」只係一舊椰菜花，但睇佢嘅外型，已經覺得佢係一嚿雞鎚！！第三道係鵝肝多士。望落去真係好似鵝肝醬，但食落去一啲都唔油膩，反而有一陣好清新嘅豆味，再配埋多士，唔講以為真係食緊真嘅鵝肝。再加上火箭菜配黑醋，而黑醋係經過特別處理，煮過後會較甜，零舍開胃！最後去到Main Course，威靈頓牛柳！！！呢個係最令我顛覆對齋既睇法！食落口真係同一舊普通嘅牛柳冇分別，不論係佢嘅質感，味道，甚至乎佢燒汁，全部都係齋菜。再加上廚師好有心，因為有啲地方乳製品唔算係齋，酥皮唔係用牛油去做，食落口冇咁Heavy，完全係無得頂！再加上個薯蓉好香，食落口完全唔Heavy，絕對係同食主流西餐冇分別！如果想試吓食齋，但又未必接受到傳統嘅中式齋，我推介可以嚟呢度試一試，或者會對食齋嘅文化有所改觀。…Read More

喺旺角食咗咁多年，開始有啲厭，東京要搵啲新餐廳新衝擊。今次就嚟到位於旺角同太子嘅中間，一間好高嘅餐廳，佢個景係可以望到大角咀，淨係個景都已經值得去試！一上到去就比佢中間既吧枱吸引住，如果夜晚同朋友去飲野，再望住大角咀，真係好relax。第二特色係佢係用open kitchen，睇到廚師喺入面做緊啲咩。我知道女朋友最鍾意食豬鞍，我叫佢叫黎試下，而我就叫咗個西冷牛扒。首先介紹係豬鞍，舊磚睇落啱啱好，切開仲係七八成熟，呢啲係最好食嘅成數。個味調到啱啱好，佢嗰個汁係燒汁，帶出豬鞍嘅香味之後食嘅係西冷，我叫五成熟，上到枱差唔多五成，水準可以，但佢個薯角要值得一讚，炸出嚟唔乾身唔油膩，仲要熱辣辣，配埋茄汁真係好好味。下次夜晚去，望住同一個景飲住走個感覺又會係點呢？…Read More

今次去呢間就試左4色刺身飯定食，份量雖然有啲小，但總算係有質素。面豉湯方面唔淡，有啲水準，壽司飯有小小黏，醋味幾重，我個人黎講鍾意食呢個口感。刺身都新鮮，但唔係好夠。甜品就最普通既啫喱，包埋罐野飲，都係70蚊左右，都抵食既。…Read More

之前喺煙廠街嗰度食過一次，已經食過返尋味，近排佢開咗分店，一定要去支持！呢間新鋪咗落喺旺角彌敦道，油麻地地鐵站行過去都只係需要3分鐘都唔使，非常之近！上到去已經感覺到好涼快，唔驚食食吓會覺得好熱，同埋因為好闊落，就算三個人坐埋同一邊都唔覺得窄。一坐低都未點嘢食，已經拎定一半雜錦串燒過嚟，非常好服務，可以一路食一路再叫第二轉，嘢飲係自助，款式多。要食款式好似多過煙廠街嗰邊，牛最值得食嘅係美國牛肋腩，佢比較肥同香，如果唔鍾意食肥，可以選擇食M6和牛牛柳，豬方面我推介豬柳漢堡腸，雖然鹹鹹地，但燒完食落好香，同埋一定要食貢丸！！佢嘅貢丸係有香菇，燒完係好香，外面好脆推介多一樣就係燒賣，燒完嘅燒賣再落少少椒鹽，食落極似炸燒賣！！點可以唔試推介食Happy Hour係最抵嘅,一個都係208加一，我會推介呢一間多個煙廠街。…Read More

鮮入為煮呢間野，幾年前已經見過旺角登打士街有一間，嗰時已經好想食，但因為太多人等位所以放棄，點知佢喺尖沙咀開咗鋪，點都要去試一試。佢間鋪坐落於繁華嘅厚福街，上去有清晰指示，一去到件都唔係好多位，但勝在啲位都闊落，坐得幾舒服。第一次食就梗係要試吓佢嘅花膠雞湯，見到原隻半隻雞浸住喺湯入面，侍應仲好好服務咁，自動幫手剪隻雞，值得一讚！隻雞好滑，啲肉好爽，好有鮮味，唔似嗰啲雪藏雞咁。至於個湯好甜，好香花膠味，個湯仲有一塊塊花膠，好抵食！齋飲湯邊度夠，梗係要試吓佢嘅牛肉啦，原本想試封門柳，但點知賣晒，唯有今次試左安格斯先，食落肉質爽口，都唔差，再叫埋個烏冬，襯返花膠湯，真係好夾好好味。埋單講緊每人都係二百零蚊，認真都抵食！…Read More

係第三波疫情啱啱完咗之後，有一次我就去咗佢位於旺角嘅分店度食過一次。果次食完係有驚喜，而且我一定會再食。終於比我等到呢個機會，咁啱呢間餐廳喺將軍澳開咗分店，一於去試一試佢嘅分店水準有冇變到。將軍澳分店位於坑口地鐵站，Popcorn商場入面，就算落雨都唔使驚，同旺角店對比，將軍澳店係好方便。將軍澳分店地方闊落，同埋落單係電子化，而旺角係傳統寫紙仔。出面有個好大嘅自助吧，款式比旺角更加多，醬汁，菜類，飲品，甚至乎熱食都係以自助形式。我發覺兩間分店嘅肉類種類差唔多，但其他方面將軍澳分店係比較好。至於野食方面我會推介豬大腸及雪花牛仔肉。燒豬大腸都係第一次，燒完出嚟係脆卜卜，再加埋生菜吸左啲油係最好配搭！至於雪花牛仔肉，佢薄得來唔會好似燒完變柴皮，入口係仲有肉汁！整體來講將軍澳分店冇令到我失望。:):)…Read More

疫情時好時差，唔知政府幾時又黎封晚市。趁仲有晚市堂食，點都要出去豪一豪佢。今次就去一間位於尖沙咀既燒肉店。每次經過嘉芙中心點都會望到，但從來都未諗過會去食，而今次去呢間係因為俾佢嘅壺漬牛粒吸引到。呢間燒肉店裝修好有日本風，門口擺咗好多日本清酒，座位唔窄。一坐低就即刻點牛肉黎燒，牛肉款式好多，但係最吸引我嘅都係壺漬牛粒，見到呢個名幾新奇，原本以為應該食落去冇乜特別啦，但點知燒完出嚟個味道係意想不到！！呢個牛粒佢燒完唔係成舊柴一樣咁硬，燒起嗰陣時㩒落去仲係軟林林,大約燒到七成左右係最岩品嘗舊肉，當我咬嗰舊肉時，啲肉汁就會喺你個口到爆出黎。其他整體上都唔錯，海鮮方面都新鮮，但最值得食都係肉類。另外呢度嘅酒精飲品係要額外俾錢。呢間我係會返轉頭再食，因為佢個牛粒真係好好味。…Read More

呢間過江龍餐廳，去泰國嘅時候已經聽過佢大名，但因為行程緊密，所以冇得喺泰國食。但佢而家喺香港開咗分店，終於可以試一試。呢間餐廳喺海港城入面，近中港城，門面已經好靚，但入面係用粉紅色佈置，好有少女風。女仔嚟到就只會掛住打卡。坐低第一時間係睇嘢飲，我就嗌左柚子冰茶，而令一位就叫咗荔枝玫瑰蝶豆花茶。柚子茶飲落唔甜，清清地。而蝶豆花茶好靚，打卡一流。之後叫咗冬陰龍蝦湯，牛肉他他，海鮮冬陰意大利飯，以及香茅烤雞。首先上場係牛肉他他，一向食慣生牛肉，佢個汁好香唔辣，亦唔會蓋過牛肉味。之後就到冬陰龍蝦湯，辣辣地嘅龍蝦湯都係第一次飲，幾新奇。跟住海鮮冬陰功意大利飯少少辣，食到10小辣嘅人都食到，有隻大蝦喺上面好有睇頭。由於隻烤雞製作需時，食完大約等咗10分鐘，烤雞先至上到枱，但等咗咁耐都係值得。上到枱隻雞係熱辣辣，唔係預先整定嗰啲。而且好香香茅味。差啲連骨都食埋。整體上第一次食到泰國Fusion菜，如果帶女仔約會，我會推介呢一間比大家。…Read More

早排因為疫情關係，搞到冇得出去食夜晚。有一次行過大埔，見到有滷水鵝就突然好想食。佢間鋪個位置係喺昌運出面，相當容易搵到。去到望吓，價錢我覺得可以接受，而且賣相唔差，決定一試。我揀咗滷水鵝片，鵝腸，鴨舌，鵝腎，滷水蛋同埋豆腐。原本想叫埋鵝肝，但因為鵝肝好好賣，所以冇得食，唯有試咗呢啲先。我見師傅斬嘅時候，唔係就咁斬完放入盒，而係斬完之後，放入身後面既滷水汁入面浸一浸，等啲鵝肉再索一索味。到最後再將啲滷水汁到埋落去，聞到都覺得好香，好期待。返到屋企因為啲鵝肉仲係熱，所以要打開個蓋等佢攤凍。打開蓋果下聞到仲有陣好香嘅滷水汁，已經急不及待偷食左舊。鵝肉食落口唔「鞋」，好重滷水汁味，正！其次係鵝腸好爽，唔騷，好食。其他整體都唔錯，下次一定要試埋鵝肝！！…Read More

經過尖沙咀K11，點都會比佢門口架篤篤吸引停低。起初以為佢係一間泰式按摩鋪，望真啲原來係一間泰國餐廳。門口吸引就原在話下，原來入面都好靚，好有泰國風。見到有放水燈既擺設，令人有種返左家鄉既感覺。以為食啲港式泰菜，但睇到Menu,泰國有特色既都有可以係呢到搵到，好似泰式明爐魚，條魚食落好鮮，肉唔實，熟得岩岩好。酸酸辣辣咁，好開胃。令一道要食既當然係生菜包。啲菜唔係蓉蓉爛爛，完整一片，無黃，賣相已經收貨。餡就有少少辣，唔會食得停，但唔食得辣既可能要諗諗。令外要食既當然係燒牛肉！！係九龍城食過泰餐都知，有一間既燒牛肉係必食！！今次都唔例外，一於試一試！食落唔Un,肉汁唔會留失好多，都好肯定即叫即燒，唔係燒定要先翻熱。直得推希望疫情快啲退，飛返轉家鄉，因為⋯⋯⋯啲思鄉病又發作啦…Read More

呢間韓燒係我食過之中，覺得最值得推介既韓燒。晚市都係$238+10%，同出面既價錢差唔多，起初都覺得有咩咁特別，但當我一睇到Menu，我就認為呢個價錢係值得！餐廳位置係旺角彌敦道，地鐵站一上過馬路就到，唔難搵。上到餐廳人山人海，等左一陣就有位。Menu到手，第一時間睇下有咩肉食，豬牛雞一定走唔甩，但我會重點推介醬汁牛五花肉！呢個牛我覺得個味唔咸，味道岩岩好。同埋唔洗燒好耐，一轉色就食得。令外緊係要睇埋有咩海鮮，有蝦有帶子都不在話下，居然呢到會有扇貝同生蠔！？無錯係生蠔，仲要係連殻唔揸流！淨蠔好寡？仲有蒜蓉芝士生蠔。呢款都好味，蒜蓉味香，芝士味濃，仲要唔差既蠔，咁既價錢，咁都唔抵咩～～至於野飲就任拎，但酒類係要令外比錢。今次食完，希望快啲開返晚市堂食，再去食餐勁…Read More