ModyHui's Profile

自助落單，QR code超咗時搵人幫手度極惡劣，11:25想order早餐，話11:30截單唔可以再落，好，咁我等個系統11:30 落午餐，但個米線等咗20分鐘都未嚟，我一個人坐二人枱就俾多個人同我搭枱，我隔籬嗰兩個大陸人坐四人枱坐咗一個鐘都未落單，仲要見到後邊張卡位有人走咗即刻話要調過去又唔出聲話佢。啲員工對大陸人仲好過香港人。…Read More

首先，我同朋友慶祝生日，book咗6點準時入座，帶咗蛋糕亦都有同佢哋講個蛋糕會喺度食嘅，但成餐飯除咗啲嘢唔係咁好食之外最嬲就係佢不停比壓力我哋要我哋準時八點交枱，但重點係全餐飯除咗我哋一台五個人只有另外一台兩個女仔，間餐廳根本就冇其他人客。好，講返嘢食先，忌廉蘑菇湯味道正常但唔夠熱，當我地飲完個湯佢先攞麵包俾我地，其實有啲懷疑佢送湯嘅時候唔記得咗攞麵包俾我哋，不過佢就補飛講啲麵包係俾我哋用黎點其他野食啲汁黎食？！帶子酥一般般，個汁好鹹，我覺點冇可能攞嚟點麵包，所以我就問個侍應有冇橄欖油同醋，佢竟然答我個麵包裏面已經有橄欖油成份所以冇橄欖油提供🤷🏻‍♀️慢煮鮑魚啲汁真係唔好食好苦好鹹，所以無點汁同烚鮑魚無分別👎🏻豬鞍/鵝肝牛柳都係凍嘅，豬鞍好似冇乜調味，雖然慢煮啲肉質幾好，但係我覺得慢煮完都可以煎一煎香啲好食啲，而且唔會凍冰冰😮‍💨意大利飯都係偏鹹而且唔熱只係暖暖哋，因為open kitchen好清晰見到個廚房已經有三個人，唔明點解啱啱煮起都係凍，我估佢地無張啲碟預熱，所以天氣凍嘅時候啲嘢食一擺落隻碟度都凍哂，只能說唔夠專業。甜品鵝肝雪糕最大鑊🤮，食落去粉粉地一粒粒，完全形容唔到係咩味道，全部人試咗少少就已經冇食，其中一份係完全冇食過直接叫佢攞走，正常一間法國餐最少都會問你啲嘢啱唔啱食，而一間好既餐廳，見人客啲嘢食唔晒都會問下原因，唔會見到人客一放低唔食，就問都唔問就9秒9即刻收走然後上蛋糕，仲要即刻攞張單嚟叫你埋單俾錢，當時我哋準備影相佢不停催我哋俾咗錢先, 我朋友就攞咗張AE卡出嚟,點知佢見到張卡即刻反眼🙄話：「我哋唔收AE卡」，之後我哋另外一位朋友俾錢，我feel到佢不停吹我哋當時係啱啱好八點，但係成間餐廳除咗我哋同另外一台兩個女仔之外都冇其他人客入嚟，吹到我哋連生日歌都無唱就直接切蛋糕，點知切完蛋糕佢竟然問我要唔要分，喺唔喺度食？我話要，佢竟然「下」左一聲，我當時都O咗嘴，我心諗食個蛋糕要你幾耐時間，而且張單已經出咗你係收咗切餅費$150，我真係未遇過啲咁差嘅服務，我真係冇諗過食6個course嘅法國菜只係預兩個鐘俾人客，遲1分鐘都要黑面反眼不停催，人哋影緊相都不停吹攞信用卡俾錢，最後我哋極速食完蛋糕8:08準備走，餐廳當時仍然冇其他客入嚟，大家就諗住去完廁所就走啦，不過佢呢度得一個女廁，所以我哋五個女仔每人輪流去，去到第二個人個侍應開始又喺度反眼，喺度俾說話我哋聽，所以我哋全部人就去咗門口外邊，然後逐個逐個去廁所，外邊又落雨天氣仲要好凍，仲要有啲朋友冇帶遮，點解我地要咁可憐喺條街度等，其實舖頭一路都冇其他客入去，我真係唔明點解佢哋要做到咁乞人憎，我哋一路喺出邊等call車等到大概8:16我見另外一台女仔都走咗出嚟然後都喺度口噏噏係咁鬧話佢哋：「明明無客點解係咁吹…」我都覺得佢哋好慘因為佢哋好似係遲到可能原本book咗六點但係佢哋遲咗七點先到但係用一個鐘頭時間食咗五個course，我當然明白餐廳要分時段先可以有錢賺，但有時係廚師上菜上慢咗點解要人客食到咁趕呢？而且下個時段都無客點解要不停吹不停吹呢，咁嘅服務咁嘅食物水準唔使錢下次都唔會黎，雖然話法國菜來講$1000人頭算平，但如果食到咁嘅服務我寧願$1000去食其他嘢好過時間5:53入座（準時）6:15忌廉蘑菇湯6:26帶子酥6:39慢煮鮑魚6:56豬鞍/鵝肝配牛柳 （我地一早食完，但佢地唔知點解遲遲都未有個飯）7:36 意大利飯（好明顯遲咗，用了40分鐘）7:52 鵝肝雪糕7:57 上蛋糕…Read More