Wymancheng's Profile

今日同幾個同事主要食喇沙同burger，喇沙冇味份量細。自家製burger 空氣佔九成，仲要用嘉頓面包，入面塊牛肉同茶記早餐塊牛無分別。伴碟薯條只有油益味，薯味咸味欠奉。同事形容薯條為”一條條炸左既澱粉質”。失望。飲品方面，有同事形容咖啡似洗腳水味 (恕我愚昧，我唔知洗腳水係咩味🤣)。我只可以形容個咖啡為好淡，好燶，唔香，寧願飲即沖咖啡。佢既定價相對附近食肆黎講算唔平，但大家食完都冇一絲滿足既感覺，只有一腔憤怒同怨氣。。🤦🏻‍♀️…Read More

自從志明重新開返，我地已經食過六、七次，水準保持到不特止，仲好食左添！身為雞翼控既我，最欣賞既係佢既蒜蓉牛油雞翼，其次就係香茅雞翼🤣講緊廢話🤣其他野，例如三寶飯，蕃茄蟹羔湯粉都好食㗎😆不過呢條街返工日就旺，但係一到假期就好靜，所以希望大家可以多啲幫襯呢間小店啦！…Read More

喺宣傳同埋咁多個好評底下，就決定去試吓。點知......以呢個價錢黎講，真係好差。我覺得一二百蚊既韓燒都好食過呢間野。環境。。。好簡漏，又係不值一提。抽油煙效能奇低，燒肉黎講真係暫時最臭。服務。。。乜有服務咩？！最燥係由6:45pm打電話去book位，話full左所以要排waiting list, 有位會通知，直到9:00pm都冇收到電話。太肚餓於是直接剷上去，點知成間野得8成滿。。。算啦，等左咁耐都係照食，所以就中哂伏。戲肉黎啦！店員介紹+28$可以任食和牛，少少錢咪加囉。可惜，睇同食都完全唔覺得似和牛。可能係我唔識食啦⋯⋯好多款肉都醃到好濃味，至於其他牛肉同海鮮。。。算吧啦，我都費事嘥quota食。。。刺身都仲接受到。。。帶子甜蝦仲有啲甜味。。。全餐最好食就係Hagen daz 雪糕🙈總括黎講。。。呢間野唔好嘥錢食…Read More

曾經有唔少朋友都提過樂天皇朝既小籠包好食，再上openrice check吓，咦，睇黎幾真係幾好喎，仲有好多人話食完要再食，食過番尋味！但係結論係，滿心期望咁去，但係失望而回。究竟呢個係咪我既問題？🤔味道：其實食物黎講，味道係正常既，但係就唔值呢個價囉。最出名既小籠包味道一般，只係好過樓下food court少少。好多地方仲好味，唔駛特登去食。但係唯一最最最不滿既就係肉絲薄餅（已經忘記正確既名），啲薄餅乾到好似會吸收哂我啲口水咁，又硬。食左幾塊就怕怕。賣相：除小籠包同心太軟既賣相比較好之外，其他食物既賣相就一般般，仲有啲ＨＥＡ既感覺。環境：坐位有啲窄，同埋布坐墊感覺冇咁乾淨。星期六１點半座位大概８成滿，都幾嘈。服務：唔知喎，都冇乜服務可言。除左帶位姐姐喺我地坐低嗰時一輪咀咁"介紹"點叫野食，同埋有個哥仔放低壺茶之外，同職員就再冇其他交流。…Read More

又平又正面一流汁有味面質好過出面同類食店。老闆娘話用料全部由四川黎，仲要唔落味精。口水雞有味，40蚊有差唔多半隻。蒜泥白肉惹味，肉又彈牙，好少舖頭有咁既功力！可惜，老闆太忙，好似唔記得落蒜蓉。而且，食咁多野都只係120蚊!不過開心酸辣粉既位置比較僻，位置唔多，大家可以選擇外賣。…Read More

如果唔係早左放工，如果唔係download左韓劇，我一定唔會食到呢個芝撻。可能因為冇期望，所以覺得呢個$20既撻好好食。撻撻不斷新鮮出爐，卒之忍唔住買左七個($110/6個; $20/1個)，即場食左一個。嘩，個撻暖暖地，個心就流流地，個皮就脆脆地，仲要好香。☺️☺️☺️攞左半打返屋企，雖然比即場食稍為遜色，但屋企人都讚不絶口！掂！仲俾母親大人賞賜我翌日再買！！！😳😳(玩我咩？？！)…Read More

由北角用$6.5搭船過海,不單只快亦都可以欣賞海上風光, 不失為去紅磡或者九龍城既好選擇(不過每隔半小時先有一班)! 今日探索既地方就係黃埔花園, 真係失禮, 咁大個人都好似未真正踏入過呢個地方。抵達之後, 發覺黃埔花園係咁迫人, 適逢地鐵工程, 街道又窄又人多...有少少後悔, 不過一場黎到都行下街食下野啦...但見屋苑內既食肆都係連鎖店, 大部分都食過, 揀黎揀去都揀唔落手。路經alfafa門口先發覺從未試過, 見入面人少少, 坐得應該舒服, 就二話不說衝左入去, 想盡快避開人群同醫肚。舖內有好多位, 但係只有少於十個客人, 比較隔離既一品螞蟻算好疏落。但係環境好坐得舒服係度過星期六下午既首要條件,所以食物已經唔重要了。正值下午茶時段, 於是揀左:二人英式下午茶餐($98+10%)等左一陣就奉上熱咖啡同凍檸茶(凍飲+$4)。普普通通啦, 偏淡係預料之中既。之後都等左好耐好耐好耐(大概20分鐘?)...先至有得食。但係唔明點解可以咁耐, 因為唯一要時間去預備既就係雞翼。份量小, 之但係下午就係咁架啦! 值等一提就係雞翼幾好味, 似係雞翼外表既ribs...哈哈其他都不過不失, 但係足以serve到我地既purpose, 所以都幾滿足! (我真係好易滿足,哈)食完之後又要再被人海淹沒...無奈…Read More

摸過一次門釘，發現爸爸辣係每日六點後先開舖，直到凌晨！每次行過，都見到幾高既入座率，心諗應該唔差，但係一直以來都鼓唔起勇氣去試！第一次食，正確黎講係第一次食川菜，因為一向對紅卜卜既菜色冇乜好感。openrice只得一篇食評，所以唔知咩係招牌菜，不過都離唔開水煮Ｘ同水煮Ｙ。膽粗粗地叫左以下幾樣野：水煮牛（＄８ｘ）牛唔係好辣，可能浸左唔係好耐，但係菜就唔敢掂，surface area 咁大，應該索左好多辣味。本人覺得食呢類菜式都幾浪費，尤其我地呢啲唔係好食得辣既人，一定唔會食埋啲辣椒同其他配菜。螞蟻上樹（＄５ｘ）呢碟野係粉絲同好少肉碎炒／撈埋一碟，好唔好味因人而異（好明顯我係有所保留啦～），或者可能係我唔識欣賞。我覺得唔係好值。紅油抄手（＄３２／８粒）好細粒好細粒，好似得塊皮咁，但係竟然比水煮牛更辣，意想不到。又係覺得唔值。。。銀菊露（＄２０／楂）紅油抄手既辣令到我地叫左楂銀菊露飲，但竟然係今餐最好味最值既野。。。well...可能我冇食川菜既經驗，亦都唔識叫，所以對今餐有啲失望。水煮得黎唔夠辣，唔辣得黎又唔夠惹味。其實行過兩步既小辣椒仲平仲好味。。。不過唔應該咁快下定論既，咁多人食都一定有原因既。所以我會試多一次，參考下其他人叫咩，可能會發掘到爸爸辣好既一面呢～～…Read More

食完下午茶，直到夜晚九點幾都未想食晚飯，於是直接食甜品作為一日既完結。自從數個月之前王記消失左之後，同區基本上冇哂好食既甜品，唯有榴槤先可以滿足到我地。其實滿記都只係得以下兩樣野比較吸引：榴槤忘返 ($42)個人黎講比較鐘意食呢個，因為黑糯米飽肚又唔太甜，唔會搶左榴槤味。榴槤雪山 ($42)雪山可以揀vanilla或者芒果, 後者配搭比較怪, 下次應該會揀番vanilla。今晚榴槤好甜好大舊，所以好滿足。…Read More

是日身體感到不適。喺屋企附近睇左個好貴既醫生之後，把心一橫，單人匹馬去食個貴早餐！其實之前已經試過呢間野既綠茶蛋卷同綠茶芝士蛋糕，但係真係又貴又唔掂！今次食咸野，都冇乜期望。喺cashier落order之後等左大概五到十分鐘，食得！飲品跟餐唔駛加錢。咖啡不俗，雖然唔夠熱，加埋香滑既cream(大家睇清楚cream, 佢地一早預備好cream, 所以好多塵喺面)，都收貨！煙三文魚炒蛋($88)炒蛋份量非常多，我懷疑有2.5 隻蛋，如身膽固醇高就要同其他人share！炒蛋唔老有蛋汁，仲要吸收左少少，三文魚既香味，所以多多都食得哂。煙三文魚亦足足有四片，請留意上圓，煙三文魚並唔係求其舖上去的，而係緊緊包住炒蛋，可想而知三文魚份量認真多！幾粒生果好甜，焗過既茄子蕃茄可口。多士好香口，熱辣辣！仲有個小薯餅，最後差啲食唔哂。環境普通，唔係特別好坐，有啲似快餐店。但呢餐簡直意料之外咁飽，而且食材豐富，唔媽夫！不過都係建議大家唔好叫甜食！ :)…Read More

雖然好似快餐店，但係竟然有得ＢＯＯＫ位～霓虹燈店名增加左店內既異國風情我地一行三人，order 左兩個burger, 一個ribs, 一客洋蔥圈, 半客雞翼, 一杯tropical milkshake, 一杯berry lover milkshake要0係cashier order同俾錢先~order左兩三分鐘, 食物開始上枱Tropical Forest Milkshake ($43) (跟餐+$32)本身個combination 就有D怪, 又菠蘿, 青檸雪糕, 芒果, 熱情果...飲落都確實幾怪Berry Lover Milkshake ($49) (跟餐+$32)友人點既呢杯milkshake, 我都試左一啖, 不過不失, 比tropical 好, 但係同麥記0個個唔係差得好遠, 不過勝在夠大杯囉...友人都覺得味道有D假, 唔明白點解咁多人話好飲...Golden Onion Rings 洋蔥圈 ($30)洋蔥圈炸得鬆脆, 不過分量真係好少, 一人大概兩件...但係精髓在於個甜辣醬, 似係千島醬再加啲辣既調味料, 連薯條都點呢個醬, 食哂想問staff有冇得refill個醬, 點知要加十蚊...Texas BBQ Burger 德州燒烤漢堡 ($83)個包烘得好脆, 牛肉亦有汁, 冇筋唔韌, 切開兩半之後好容易食, 唔駛壓扁都食到Bird Eye Chicken Burger 香辣烤雞漢堡 ($66)雞肉用香料腌過, 應該係近似印度馬沙拉既味道, 其實都幾辣雞肉漢堡通常都偏乾, 個人覺得呢個burger稍遜於texas bbq burgerRibs ($148)呢個rib少有地好稔, 而且唔老唔乾, 雖然肉味香氣稍欠, 但係勝在非常方便食用三個人分, 都每人食到兩條, 價錢算公道U.S. Chicken Wings 酥炸美國珍寶雞翼 4pcs ($52)炸到過左火, 有D乾, 而且好刮口...食完覺得異常咁熱氣。番到屋企拿拿臨飲包清熱酷同埋D雞翼好唔珍寶, 真係唔推介...另外值得讚賞既係, D薯條炸得好好味, 調味同質感都唔錯, 而且係新鮮熱辣。可以於相中見到薯條不斷伴隨住ribs, burger 出現, 份量真係好多, 我直頭覺得太多, 現場都見到好多人食淨哂...環境、服務黎講都OK。雖然要問先會俾清水, 但係服務員不厭其煩咁幫我地切burger, 本人都好謝佢地, 哈哈~~總括黎講, 呢問burger屬中等啦, 用同等既價錢大可食到更優質既burger...如果你淨係為burger而來的話。我呢排都難免將其他burger同則漁涌既Q-Bay Burger比較, 因為佢地既burger真係令人難忘。…Read More

位於地鐵站B出口附近，喺成坤廣場既後方，韓膳館係一間好細大約有十五個座位既小店。今次已經係我地一個月之內第三次幫襯！認真講，午餐係抵食啲，但係對比同區既韓國野，晚餐既回頭指數係no.1(不過佢地冇韓燒)一坐低，侍應姐姐就奉上熱茶同湯（多數都係海帶白蘿蔔湯），好飲～上次食左水冷面，海鮮大醬鍋，牛仔骨都不錯 今次就挑戰炸雞($160)相比起韓國既炸雞，當然冇得比，但係都可以一試，不過份量偏少囉…再黎就係泡菜五花腩($70~80，唔記得)味道ok,唔好睇佢清一色橙色，其實入面都有幾片五花腩。你明㗎啦，韓國以前好窮，好難得有肉食㗎嘛，所以呢間舖頭都係貫徹韓國傳統啫！哈哈！每個餸都跟飯，可以再添，唔好怕羞，開口就有。但係飲品就要另叫。而最令我地留戀既野就係佢地啦：真係唔好意思，唔記得同佢影番個特寫。。。茶唔係普通既茶，係紅棗茶！佢地煲得好好飲，淡淡地，甜甜地，飲落好舒服，搞到我地要即刻去超市買紅棗同黃冰糖喺屋企試煲，但係失敗收埸。。。不過燥底既你就唔好飲咁多，應該越飲越燥底，哈哈！最後亦都係呢間野最好既就係前菜係任食㗎！！！有泡菜，芽菜，薯仔，青瓜，豆卜，蘿蔔。。。全部都好味 一坐低就好同佢講你想要既前菜，唔好浪費呀！有任添既泡菜真係好幸福 但係感覺上同泡菜炒五花腩overlap左。雖然呢間野坐得唔舒服，而呢餐order既野冇之前咁好食，但係我食左咁多次都好滿意～所以我都係會推介呢間！！…Read More

聽人講呢間幾好食,於是提前一星期BOOK左.六點鐘到左餐廳,招呼不錯. 杯綠茶幾濃味,咁多間放題中算好.坐底一陣,首先有送既鮑魚同牡丹蝦.牡丹蝦好大隻,鮑魚都幾清甜. 不錯不錯點左兩個沙律, 分別係吞拿魚牛油果沙律同埋三文魚蟹肉, 作為頭盤, 分量適中之後就係主角 刺身出場啦~~好大好靚滿滿既一盤! 雖然有幾款刺身係冇order 過, 但係見到大大隻生蝦同鬼拿咁大粒帆立貝, 都冇咩好complain. 不過建議大家去食既時候同職員講清楚先啦~清酒煮蜆, 辣酒東風螺, 牛油粟米, 軍艦等等上台.辣酒東風螺, 牛油粟米 還好, 但係清酒煮蜆真係一般,蜆冇味多沙, 不過呢啲都係小食, 唔打緊我地點左海膽軍艦, 甜蝦蟹膏軍艦, 帆立貝蟹膏軍艦同辣味三文魚, 蟹膏都好香好野味, 紫菜脆口,海膽大大舊,味道偏淡, 但軍艦都普遍唔錯 之後就係惡夢既開始, 先係串燒同其他燒物, 好似雞翼雞軟骨牛仔骨豬頸肉牛柳粒金菇牛柳等等.嘩, 不得了, 全部都太老, 太硬, 冇味道. :(老婆食唔慣咁硬既野, 搞到全部都係我頂哂. 陰公, 好似食柴皮咁! 公道啲講, 其實佢既食材係冇問題既, 但係燒到過哂火囉, 浪費食物...唯一係燒翠玉瓜比較多汁正當我地大戰柴皮之際, 白汁焗蠔上台啦, 心諗呢個都好難難食啦,,,點知,我錯啦, 不論隻蠔本身,同埋啲汁都完全冇味道可言適逢隔離兩張大枱坐滿左一家幾十口既大家族,幫一個幾歲大既細路慶祝生日. 場面何其壯觀, 耳膜何其咁震盪...其實我地都好明白呢啲野店家係控制唔到既, 但係呢個似終關乎食店環境質素, 都要略帶一提.此後, 都冇咩心機食, 天婦羅對於我黎講還可以, 炸得尚算鬆脆, 但係對於奄尖既老婆黎講, 佢就覺得皮太厚.其他炸物都真係一般, 最奇怪之處就係紫芋栗子餅竟然淋千島醫0係上面?!  呢個時候, 我唔可以再向肉類方面進發, 要行蔬菜路線, 於是叫左一個壽喜燒, 滿滿既蔬菜同兩片肥牛塞滿左個煲仔, 仲有即場點火既燃料整熱個壽喜燒,食左佢應該可以排清毒素身體好...但係睇住個鐘, 由七點四十分開始點火, 過左十分鐘, 個煲冇熱左既述象, 之後個火仲熄埋, 於是叫人再加燃料點火, 重頭黎過...但係呢個步驟重覆左至少三次, 到左八點二十分,,,0個兩片肥牛仍然係生既...期間等得唔耐煩啦...就order最期待既雪糕同其他甜品...之後又係一輪等待...終於0係八點幾...有經理埋黎結帳, 仲無端端同我地講:"今日個雪糕櫃壞左, 入面啲雪糕溶哂,咩雪糕都冇, 我地都係五點既時候先知道"(意即我地兩公婆期待左兩個鐘既柚子雪糕同H記雪糕都唔會出現, 何其淒慘) 之後經理仲話:" 憑呢張卷, 下次再黎食就可以額外攞多兩個H記雪糕..."當下我地兩個眼都突埋:"吓?!" 點解我地六點入場既時候唔話俾我地知冇雪糕食?? 點解又會expect我地下次一定會再黎幫襯? 點解明明今次有得食既野, 要下次再俾多次錢先可以享用?! 咩logic?? 真係不知所謂!! 冇雪糕食冇雪糕食...醒起仲有其他唔係雪糕既甜品...但係已經係好耐之前落單,仍未見縱影, 催完waitress姐姐之後,立刻攞黎...牛奶布甸泡芙呢啲都OK...諗住再order...結果俾waitress 姐姐冷冷地一口拒絕:"截左單!"一啲先兆都冇...冇人同我地講過幾點截, 亦都冇人提過我地last order, 咁就截左??!?! 講真, 我地兩公婆食唔少放題, 平到貴既都有, 但係未見過一間係咁離奇既日式放題...一開頭既刺身真係冇得彈, 但係虎頭蛇尾, 之後冇一樣係正常/好食...ps 由七點四十分反反覆覆煲左至少四十五分鐘既壽喜燒都係未滾過, 金菇同肥牛仍然係唔熟...最後就放棄左. 我地都好唔想浪費食物, 但無奈...…Read More