SinChow's Profile

小貓三隻都可以食燒肉放題人少少，更加可以仔細品味每舊肉嘅味美。食咗咁多次今次終於記得上嚟打下食評啦！我地連去日本都要食嘅牛角放題，喺香港食當然有分別但都一定要食囉。大概下午嘅五點幾，我哋就去咗旺角雅蘭依間牛角buffet度攞位啦！期間睇一睇個餐牌見到原來仲有早割優惠只要六點前入座就可以平幾十蚊，好抵食呀，而且早啲食都冇咁肥添哈哈。今次揀咗level 3，價錢中規中矩啦，但食物嘅種類同質素性價比就好高喇！物超所值。坐低之後我哋就即刻出去自助吧，攞沙律同埋飲品，仲有自己整番個牛角飯哈哈。好快店員就會端上一份預設嘅牛豬雞，就算係預設既依份肉都唔會hea你之後我哋不斷添食牛肉，肥美得來入口即溶真係一流三百幾蚊有咁嘅質素仲有得任食沙律同埋甜品去邊度搵呢？…Read More

已經唔知幾耐冇飲早茶，琴晚同朋友傾到興起，決定今朝一早入大帽山遊個河，飲個靚茶。去大帽山飲茶當然要去川龍啦！今次我哋嚟到依間彩龍茶樓，原本諗住應該都靜靜地嘅，但去到發現都好多人，搵咗一陣搵到有張二人枱就即時坐低！呢頭嘅茶樓都係自助形式，例如要自己開茶，攞點心！坐低無耐我地已經急不及待即刻泡壺靚茶，然後出去睇吓有咩好嘢食。點心方面，必食嘅就係鵪鶉蛋燒賣另外揀左鳳爪，即拉叉燒腸同埋大包，當然唔少得香口野蘿蔔糕啦！其實食物嘅質素同出面感覺差不多，但呢度嘅環境，人情味，就同出邊爭得遠呀。今時今日社會嘅氣氛都一般，去吓郊外放鬆下心情就啱晒啦。…Read More

星期六踩完單車食咩好？今日我哋去咗荃灣搵食！去返最多嘢食嘅路德圍，揀嚟揀去就揀咗呢間刀削麵啦！睇完餐牌，叫咗一碗水餃雞翼刀削麵，朋友就叫咗水餃牛肚刀削麵，湯底我哋都係揀咗腩汁麵就當刀削麵啦。碗麵熱辣辣，一上枱就忍唔住要立即試吓，第一啖梗係要試吓啲面啦！果然係正宗嘅山西刀削麵，質感厚度岩岩好，廚師唔會淥得太耐林晒！正滷水雞翼大大隻，又入味，唔會有陣雪味！啲水餃就係韭菜豬肉，皮薄餡靚，友人嘅牛肚都好好味！可以encore之選！…Read More

今日去MegaBox睇戲，睇戲前梗係搵嘢醫肚啦！通常我哋都會去10樓food court睇吓有咩食，今次就入咗去一間食日本嘢嘅餐廳。我哋叫咗壽司，串燒，同埋炸物。最先嚟嘅係蟹子壽司，食落去都新鮮彈牙，紫菜亦都唔會話林，幾滿意！跟住嚟嘅就係吞拿魚、三文魚、貝類三食同埋火炙三味。咁多件壽司🍣味道其實都叫中規中矩，係件飯比較細少少！跟住來的係燒雞翼同埋燒牛舌，燒雞翼就比較大真雪味，同埋雞翼都比較薄身，應該係原本比較細隻，所以切開嘅時候就變咗好薄，雖然有另外調味，但係都唔能夠遮掩嗰陣雪味，比較一般。牛舌方面就做得好好啦，牛味相當濃郁，無牛蘇味，而燒嘅時間亦都啱啱好。全晚最失望嘅就係吉列炸蠔，一上枱就見到其實炸燶晒，亦都萎縮左好明顯炸嘅時間太耐！雖然下一次想食日本野嘅時候我都會再戰，但只會選擇性叫某啲食物就算啦！…Read More

今晚收工後同友人去咗定安街搵食，之前食開某間泰國餐館，今日行過路口嘅時候比一間Pizza店嘅香味吸引左，於是乎就決定一試啦！鋪頭位置唔多大概有10個位，不過人客亦都唔多，大概只有兩至四人，相反應該好多人叫外賣，見到好幾位車手不斷出出入入提取外賣。一坐低睇過個Menu，就揀咗個二人餐，二人餐有一個六吋嘅Pizza，味道可以自己揀，另外有四個小食可以揀兩樣！我哋就揀咗一個肉醬意粉，同埋一個小食拼盤，仲有兩個湯或汽水添。我哋將個Pizza加大左都只係加$20，超級抵呀！由六吋升級到去九吋， Pizza我哋揀咗啖啖肉，啖啖肉意思即係有牛、豬，同埋雞，真係啖啖，pizza皮又唔會似食麵包，幾好！招牌肉醬意粉，香濃嘅肉醬加意粉真係無懈可擊！最愛就係食肉醬意粉而小食拼盤有四樣嘢，炸春卷，炸咖喱角，炸洋蔥，炸雞翼，每款都有四件，超級抵食！亦都係啱啱乍起熱辣辣，唔會粉多個餡，仲幾好味添！埋單都只係$136咋超抵食呀！…Read More

星期日嘅早上，係玩電話嘅時間見到某報章介紹呢間嘅粉面店，除咗粉麵之外原來仲有賣包、餃子，等等小食。睇到流晒口水，決定出去試一試，一去到已經見到有好多人買緊粉麵或者水餃，而門口就有個姐姐煎緊韭菜餅，望一望頭上餐牌，除咗韭菜餅，仲有蘿蔔糕，煎水餃，黐飯，糯米糍同埋茶果。第一時間叫返個韭菜煎餅，同埋蘿蔔糕，原本想試埋韭菜餃，但姐姐話要下晝四點先有，有少少失望。韭菜煎餅只係$13 ，蘿蔔糕大大件都係$5咋，好抵呀！煎餅攞上手熱辣辣，咬一啖，香濃嘅肉汁同埋新鮮嘅韭菜味道攻入黎，估唔到真係咁好味，見到入邊有啲姐姐喺度包緊水餃煎餃，就知道真係好新鮮呀！平時食韭菜豬肉類嘅食品，可能會有啲酸味或者雪味，但塊韭菜餅真係好香好好味非常新鮮！而蘿蔔糕方面大大件煎得好香口，質地啱啱好唔會太林或太硬，同樣令人印象深刻。食完之後我哋去咗行街，行行吓其實都四點啦已經，我哋決定返去再試韭菜煎餃！去到之後買咗$10/4粒嘅韭菜煎餃，姐姐送多一粒俾我因為認得我就係頭先買韭菜餅嗰位哈哈，同樣地韭菜煎餃都係好香好濃郁好新鮮，完全冇失望呀！下次再食過！…Read More

今晚喺深水埗食完飯之後，友人提起不如食糖水，即刻諗起康瑞，都好耐冇食，因為坊間愈出愈多花款，試極都未完。大概夜晚嘅八點幾，我哋去到門口發現冇人等位非常之開心，因為早幾個月去嘅時候，都仲係需要等最少10分鐘先有得入，但諗深一層會唔會係人潮已經轉去其他嘅甜品舖呢！坐低之後睇過餐牌，都係揀番芋圓仙草百配，友人就揀咗椰汁紅豆沙芋圓，我哋都覺得味道依舊👍🏻只係可能坊間依家有非常多嘅選擇同埋嶄新嘅口味，令到昔日吸引人潮既甜品變得有點失色，甚至乎平平無奇，但我哋仍然希望貴店生意興隆，繼續保持依份味道。…Read More

九龍灣返工，食嚟食去都係果幾間餐廳！不過，都有一兩間係我哋嘅尋味之選。就好似呢間Big Chill咁，唔止有西式午餐，仲有中式，泰式，日式等等嘅選擇。今日我同同事就揀咗香煎牛扒配薯角，黑椒汁。非常之欣賞佢嘅薯角又熱又香脆,應該係即刻炸嘅，而且仲有少少沙律菜伴碟，沙律菜仲會落埋沙律汁，好少餐廳會做得咁細緻。每次都全碟清，哈哈！煎牛扒雖然唔係啲咩上等貨，但係都食到有牛嘅味道，肉質又唔會好梅，亦唔會落咗太多鬆肉粉變咗食魚蛋咁。另外都要讚一讚店員，非常熱心，每次嚟到都有種被熱烈招待嘅感覺，想食餐好少少嘅，就記住嚟呢度試吓啦。…Read More

今日嘅晚餐去咗觀塘覓食，都係揀返我最愛嘅日式料理！上OpenRice睇嘅時候，搵到呢一間大盛日本料理，於是乎我哋就去咗啦！門口比較隱蔽，但入到去見到個裝修非常之靚，好似去咗日本咁，但可能比較近工業區，全晚嘅客人都比較稀疏，應該冇一半嘅入座率，我哋叫咗鯛魚薄片刺身，因為之前喺日本食過覺得好正，於是就叫黎試吓，但係事與願違，魚切得比較厚，肉質亦有少少梅，但當然唔可以同喺日本食嘅比較，所以都算係過得去！另外我哋叫咗鐵板牛舌，呢個鐵板牛舌嘅做法比較中式，如果你鍾意食中式嘅牛舌你就會好滿意啦。至於吉列拼盤就略嫌佢炸粉厚，但價錢比市面嘅平，如果鍾意食炸嘢嘅都可以一試！壽司方面我哋叫咗炸軟殼蟹卷，火炙鵝肝帶子壽司，火炙三文魚壽司，三文魚壽司同榮螺壽司，壽司其實就比較一半，唯一比較可取嘅係鵝肝帶子壽司，鵝肝味濃厚，帶子尚算新鮮，三文魚壽司就比較一般啦肉質比較梅，而且仲有一件係成件都係筋，食唔到！最後我哋叫咗個冷烏冬！…Read More

星期日總係會瞓得晏D😜一起身梗係食個好味嘅早午餐啦！今日我哋就去咗食珞桐冰室！都好耐冇去啦！而家原來已經唔使排隊！唔通係食物嘅質素唔同左唔理咁多啦！一坐低，睇一睇個餐牌，叫咗雞扒芝士撈烏冬，朋友揀咗蘑菇火腿奄列配焗豆，多士再加杯凍奶茶😍芝士撈烏冬要加$10店員解釋因為會用1.5至2個面底，所以要加多少少錢！一上枱，嘩！真係好大個面！啲雞扒煎香左再加啲炸蒜好香口！食落脆脆地好正！芝士汁唔會太過漏，仲好香芝士味！平日食量唔太大嘅我都爭啲食晒成個面友人叫嗰個奄列就等咗大概5分鐘先有，即叫即做，一切開入邊有啲番茄醬，磨菇同埋火腿，配搭都幾特別！食落去有好濃厚嘅番茄醬，朋友就話好好味，因為佢好鍾意食蕃茄！我就唔慣食有番茄醬嘅所以覺得一般～題外話，見到滷水雞脾好大隻，仲大隻過一個男仔嘅手板，下次一於要試吓先！…Read More

今晚又來明記食飯，記得呢間餐廳係大概一年前朋友介紹，食過一次之後，每隔一段時間又會好想再過嚟食！今晚有成11個人，可以叫到好多唔同嘅小菜水準不變，係基本！今晚亦都冇令我地失望，我哋依然係一邊食一邊大叫好好食🤣下面係其中幾樣我覺得出色嘅菜式，大大碟既豬手，皮脆肉嫩，椒鹽白飯魚炸得香脆好味，招牌豬紅豆腐惹味！最後當然唔少得蠔餅同水煮牛啦…Read More

點解話無下次，因為餐廳嘅衛生情況令人擔心！話說今日同友人一行10人諗住開開心心慶祝生日，食餐好嘅日式放題，點知食到半路中途，就出現咗第一隻小強！小強嘅出現就係係煮蜆煲嘅木板底上邊，當店員放低左煮蜆之後，友人就見到有隻小強從木板上邊走出黎！當時我哋都嚇親，即時同店員講有曱甴，點知一名年輕嘅店員反問我地係咪幻覺咋，而另一名大約40多歲嘅店員亦都以差劣嘅態度同我地講走咗㗎啦（隻小強）！當然友人的確見到隻小強仲喺度行緊，於是乎我哋再同另一位店員講，終於依位男店員拎出紙巾將小強殺死，然後離去！個一刻我哋一行10人其實都呆左，接下落嚟亦都好擔心會否再有小強，亦都唔敢食咁多野！點知，我地檢查另一份煮蜆既木板上會否有小強時就再發現米粒大小既殼類昆蟲.....…Read More

以前食泰國菜就要出九龍城，但而家落樓下就有質素都不錯嫁今日同兩個朋友食飯，今晚佢哋都想食泰國菜所以就嚟咗呢度平我哋叫咗份生蝦，泰式烏頭，海南雞，冬蔭公湯同埋馬拉盞通菜首先講吓個呢度啲生蝦比起其他泰國餐廳相對大隻 厚肉另外叫左今日做特價既烏頭，只係百零蚊咋而個汁亦都好襯 酸酸辣辣海南雞我哋就叫咗半隻 三個人食都好夠，仲好滑冬陰公湯我哋就叫咗個細嘅每人都飲到兩碗超級足料啊最後個馬拉盞通菜都上埋枱喇 熱辣辣 好有鑊氣開心的晚餐…Read More

行經土瓜灣又要搵下有咩食喇今晚見到間應該開左無耐既米線舖就試一試啦！都成10點仲有幾枱人應該唔阻人收舖既叫左碗店長推介既豬扒米線，香辣雞翼，油菜！今日番風吹親要戒下口無得食酸辣估唔到清湯有驚喜呀！依度既清湯唔會好似出面咁帶酸，而豬扒就即整熱辣辣夠香口重要都係$36咋另外仲叫左雞翼，又係即整，勁香，搞到食左三隻先記得影相最後加杯檸茶都係$6，認真抵食！影定menu下次再黎！今次搵食無誤又平又好味！下次要再試埋麻辣米線…Read More

大年初一同屋企人去左行河背水塘簡單易行又舒服行完落番元朗諗住食b仔 但未開 所以就食隔離串燒喇媽媽原本無興趣 但因為真係好香佢都忍唔住話要食我地叫左雞翼 雞腎 司華力腸 雞肉 同墨魚丸點埋沙嗲汁就好味晒喇 不過可能太多人幫襯 條司華力腸中間有少少唔夠熱 希望下次燒透啲…Read More