crisschan1212's Profile

今晚又黎到尖沙咀專食韓國野既呢條街，試左呢間由韓國人主理既韓屋Hanook。都係正宗既泡菜，夠晒辣龍蝦餃子，少少辣，裏面都幾多肉同肉汁，推介！人蔘雞湯，都幾甘香，雞都唔鞋口，幾足料的！加20蚊，加左個蕎麥麵，用黎送個人蔘雞湯，味道都唔錯！再加埋蜜桃汁，有果肉，都幾解膩！…Read More

今日又帶大家嚟食好西，今次想介紹嘅係台灣都好出名食麻辣嘅麻神，喺銅鑼灣嘅登龍街開咗一間分店。台式嘅麻辣似乎係比較重麻香，辣味都剛剛好，店員話左邊嘅麻辣湯底，同埋右邊嘅海藻昆布湯，都係冇加任何味精，係落嘢食之前，大家可以直接飲幾啖湯底，真係幾清，飲完同埋食完成餐飯之後，都無覺得好口渴嘅感覺，而味道亦都好夠，非常好！野飲亦都有好多選擇檸檬蜂蜜特飲，就咁睇睇唔到，用飲管飲落去之後，發現有驚喜！裏面放咗一啲荔枝味嘅爆珠，同檸檬嘅味道幾夾講返嘢食，大大塊既鴨血，建議用刀叉食，將肉汁可以鎖住，外層有少少咬口，裏面嘅鴨血一啲都唔腥，超好味重點推介，西班牙黑毛豬、美國頂級牛小排，淨係睇佢油脂嘅分布，同埋肉嘅色澤，已經覺得好吸引！靚嘅牛永遠都係唔需要淥太耐，10秒內，見到佢啱啱熟咗少少，超級驚喜!牛味非常之出，從來未試過係火鍋食牛可以有咁濃郁嘅夠味，食得出係超級新鮮，黎得嘅都一定要叫！綜合鮮餃拼盤、綜合丸子拼盤丸子亦都幾推介，食得出係人手打，同埋好多粒粒煙煙韌韌既肉喺裏面！手工蘿蔔片每塊都切到薄薄一片，放落去麻辣湯底完全吸晒湯嘅精華南極冰藻、手打瀨尿牛丸冰藻好重骨膠原，女士最愛；手打瀨尿牛丸都係別叫，大大粒裏面亦都裝滿熱辣辣嘅湯，但大家要攤攤佢幾分鐘先放落口食，我比較食得熱，成粒放落口，等佢啲湯係口入邊全部噴晒出嚟係最正嘅！冰菜超級新鮮嘅冰菜，特別嘅口感，加上非常之嫩口，唔鍾意食菜嘅，都會想試下！整體來講都好高質素，幾個朋友嚟到銅鑼灣，可以試一試呢間台灣麻神，誠心推介！…Read More

今次嚟到奧運站，奧海城出咗之後大概行6分鐘左右就到，都幾方便！去富多來新村，你會見到呢間小店係地下嘅位置，入到去坐低左一陣，店員俾我哋睇咗個餐牌，亦都介紹咗比較招牌嘅烤肉俾我哋選擇。我哋兩個人，都加左＄20升級極上岩石燒定食，都多兩份飯、湯，同埋蟹子沙律，都幾抵！我哋兩個人叫咗細分嘅澳洲和牛牛板腱，同埋英國厚切羊西冷，仲有個菇盛會，所有嘅肉都係冇經過醃製，全部都原汁原味，大家見到個肉質真係非常之高質，見佢脂肪嘅紋都分布得好均勻！齋睇已經好想食！靚嘅肉燒好短時間就夠，牛板腱每邊放上去燒20秒就啱啱好，我自己鍾意食生啲，其實10秒多少少就夠，而羊西冷就唔會變燒分半鐘多啲就啱啱好，見到燒完之後嘅顏色都非常之吸引！我自己慣性第一舊都係唔點任何嘅調味料，食落去之後真係超級驚喜，啲肉鮮嫩不特止，估佢唔到齋燒都超香肉味，非常滿足！另外我哋都叫咗一個日式煮蜆蜆肉都幾豐富，個湯辣辣地幾好味，將蜆肉嘅鮮味帶晒出嚟，而且佢其他嘅蘿蔔亦都煮得好林，呢個亦都十分之推介！左邊嘅香草汁係用嚟點羊肉，味道好夾，右邊嘅醬汁同鹽係用嚟點牛肉，我建議點少少就夠，因為最主要係食肉嘅鮮味！或者可以加少少下面嘅意大利海鹽啲肉類咁高質，其實價錢真係超值，兩個人食飽飽之餘，仲要十分之滿足，強烈推介！尤其是拍住拖嚟，呢間係不二之選！…Read More

本身住開將軍澳，食來食去都係嗰啲餐廳，附近嘅將軍澳中心之前裝修左好長一段時間，而家終於裝修完。商場暫時開放左部份嘅區域，見到多咗好多新嘅鋪頭，落到地下G樓，更扶手梯附近，有呢間開放式嘅Cafe ，裝修好有格調，地方非常之企理乾淨，服務唔錯，同埋裏面嘅嘢食睇起上嚟都好吸引，於是選擇左去呢間Cafe食個晚飯！由於係開放式嘅設計，空間感都幾大，坐落去好舒服。其中嘅主菜單，選擇都幾多下，而且好多都幾特別首先為大家介紹嘅係，以下呢杯岩鹽焦糖咖啡沙冰，味道非常之好，一般沙冰上面都係加忌廉，但係佢用咗好creamie嘅雪糕，微微嘅岩鹽味道，吊出雪糕嘅甜味，以下變咗沙冰係出邊好少用咖啡去整嘅口味，估唔到焦糖咁樣加落去係非常非常之夾，呢個係我飲過咁多間最好飲嘅一款沙冰！主食方面，我哋叫咗一碗鵪鶉蛋蔥拖羅蓉飯拖羅蓉一啲都唔吝嗇，厚厚一層淡淡魚蓉嘅味道，撈左蛋漿更覺香滑，魚蓉亦都十分之清新香甜，配埋飯食好滿足！重點推介係呢一道北海道帆立貝車老意大利飯我哋三個人食，三個人都異口同聲覺得呢度碟係非常之出色嘅，汁既味道調校得啱啱好，好惹味，蝦亦都燒得好香口，最正係帆立貝舊舊都大大粒啖啖肉，真心正！迷仔丼配麵豉湯，我哋配左三文魚甜蝦蓉，同埋霜燒魚生第一次食甜蝦蓉，原來比起原隻食嘅甜蝦更加鮮甜清新，另外燒出黎既魚生亦都燒得岩岩好，夠香口整體來講都係超級滿意，黎開將軍澳嘗試下啲新嘢，特別小小嘅，呢間係一個唔錯嘅選擇，而且價錢以呢個食物質素來講，都唔算貴，大家可以參考一下餐牌，誠心推介！…Read More

今日帶大家嚟到灣仔區嘅家賀屋，喺灣仔地鐵站A3出口轉左手邊行5-10分鐘就已經到，今次食豪少少，但睇返個食物質素係極之唔錯，所有用料都非常之新鮮，所以想推介俾大家！食物嘅種類都非常之多，餐牌有好多頁，比大家睇睇其中幾頁。我哋叫咗呢間鋪頭嘅招牌，特選鮪盛，下圖見到有吞拿魚、中吞拿魚腩、大吞拿魚腩。全部吞拿魚同埋飯嘅比例都啱啱好，左邊嘅比較肥美鮮甜，中間嘅入口即溶、層次分明，而右邊嘅亦都係非常之鮮嫩入口即溶，不愧為呢間鋪嘅招牌！另一個重點推介係下邊呢個蔥吞拿魚腩丼。食得出非常之新鮮，完全冇腥嘅感覺，放入口之後亦都係立即溶化，令人想一試再試！另一特選推介係下便嘅海三色丼。想講就係，所有既刺身都超級超級超級肥美！而蝦肉亦都係非常之鮮甜，頭部唔好漏咗！食埋佢超香濃嘅蝦膏！軟殼蟹卷大大隻嘅軟殼蟹，咬落去非常之脆口，食得出係炸得非常之用心！焦糖玉子燒玉子燒食得多，上面加左一層脆脆甜甜嘅焦糖，食落去都幾特別，而且都幾夾，喜歡玉子燒嘅你，可以一試！呢間日本餐廳食物種類多得來，質素亦非常之高，建議可以帶埋至愛或者朋友一齊嚟食餐好嘅！…Read More

得閑就會去捐窿捐罅食好西，友人喜歡食韓國嘢，於是就嚟咗尖沙咀區，相信好多人都會知道，有一條韓國街，即係金巴利街，裏面有好多間韓國餐廳，試咗好多間，搵到呢間特別出色嘅！鍾意食韓國嘢嘅你，見到以下呢張餐牌，我諗都會幾吸引到你！入到餐廳見到有兩個夥計，一個韓國人一個香港人，加上裝修同埋服務各樣，都覺得係非常之正宗嘅韓國料理！同喺韓國一樣，都會有呢隻帶少少酸味嘅前菜，都幾開胃。然後非常之重點推介，呢個火山蛋漿熔岩炒飯係極之有誠意，都係根據正宗嘅韓國餐廳做法，直接喺你旁邊炒，見到每一台都有叫呢個炒飯，我哋亦都記錄左韓國伙計炒飯嘅過程！蛋漿同埋芝士都炒得好均勻，當你筆起嘅時候，所有芝士都係一絲絲，唔會一團團食落去一Pat野咁，呢個必食，推介！另外食得韓國嘢，冇理由唔食炸雞！佢好多款口味，我哋選擇咗蜜糖，其實呢張相已經食咗部份嘅雞，因為太好味佢隻雞炸得香得黎又唔會好熱氣，外面脆脆嘅外皮，裏面係香滑鮮嫩嘅雞肉，完全唔鞋，加上有少少油甘，食完一舊好想繼續再食，下面墊底嘅係薯條，唔同平時快餐連鎖店食嘅薯條，佢用嘅係番薯，加上啲蜜糖，食落去甜甜脆脆，亦都好推介！另外我哋都加左一個蟹膏紫菜包飯，佢都落得幾足料，蟹膏嘅份量都唔少，一啖食落去蟹膏嘅香味已經好出，加埋其他嘅蛋絲青瓜之類嘅配料，食落去都唔會好heavy，呢個紫菜包飯亦都好少系出邊食得到。佢哋嘅服務都做得唔錯，喜歡食韓國嘢嘅你，一定唔會唔試呢一間，點樣都要黎試一次！…Read More

今日嚟到西環區，諗住食個火鍋，由地鐵站開始行，大概10分鐘內，就已經到達呢間十二味熱辣火鍋莊。睇個名都知，呢間火鍋店係食辣為主嘅，同時，佢都有其他嘅湯底可以俾你選擇，如果一大班人來，有啲人食得辣，有啲人唔食得，可以選擇一鍋鴛鴦鍋。落湯之前，大家見到上面有一隻熊貓型嘅物體，其實係牛油，幫佢加咗啲辣湯上去之後，牛油已經融入左係個辣湯底裏面！有你間鋪頭嘅裝修，以至其他嘅餐具都有熊貓，相信係因為呢度食川菜。牛魔王三層塔由上而下，最頂嘅係牛肉粒，中層嘅係牛脷加牛展，最底層嘅係肥牛，每一種牛都有獨特嘅口感，而且佢嘅選材係非常之新鮮！玫瑰鮮蝦丸每一粒都有新鮮嘅蝦可以見到係丸嘅入邊，加上淡淡的玫瑰花香，可以食得出有唔同口感嘅分別，而且仲好爽口彈牙，唔錯！醬爆蟹籽丸同出邊唔同，佢裏面嘅蟹籽非常之豐富，都係真材實料！薯粉加墨魚滑薯粉充分吸收到辣汁嘅香味，啲墨魚滑亦都係非常之爽口，值得一試！我哋除咗調配豉油加辣椒之外，亦都跟左佢嘅教學，調配左最地道嘅調味料，右邊大家見到嘅係香油加蒜蓉，平時打邊爐都係好少有香油提供，今次試一試佢，食落非常之香口開胃，感覺仲可以解到小小辣。四川冰粉食完辣野，整返一個飯後甜品，呢個冰粉當地人都會食嘅，甜甜地，之前嘅濃味，食完呢個甜品之後都會感覺清新好多。以下係呢間火鍋店嘅餐牌供大家研究一下總括來講，所有食物都好新鮮，亦都好足料，大家黎開呢頭，都可以試一試！…Read More

今次帶大家嚟到銅鑼灣嘅登龍街。平時黎開銅鑼灣，都揀唔到嘢食，通常都因為價錢而卻步，但係今次發現，行入登龍街，原來有好多新嘅食肆，見到有一棟大廈叫永光中心，上面多數都係餐廳，而今次我哋選擇咗食呢間日本野。上到15樓，見到眼前有好日式嘅裝修，以木為主調嘅外觀。首先講講呢度嘅服務態度，呢度嘅員工十分之有熱誠，會同你好casual咁傾計，或者介紹吓食物，唔單止我呢一台，其他嘅客人，員工都會問吓嘢食整成點樣，有冇意見比佢哋，感覺非常之有禮貌，服務水平都幾高。至於嘢食方面，我都覺得做得非常之唔錯。先睇一睇前菜，我哋幾個人每人都有一份沙律同埋青豆。食落去都幾新鮮，完全唔會有草青味，食完都幾開胃！十分十分十分之重點推介呢個鰻魚飯，抵食到癲！！！！有誠意到爆，大大條鰻魚鋪係飯嘅面頭，好似一舊放大好多倍版本嘅長壽司，鰻魚亦都好厚，淡淡咬落去都充滿口感，超級肥美嘅鰻魚放係口入邊，加埋鰻魚汁，真係好食到不得了！ 就算系出邊買條鰻魚刺身，冇呢條咁肥美咁大條，我諗都起碼要兩舊水。但呢度＄100左右就已經有，仲要手臂咁大條，呢間餐廳會蝕本嘛？另外介紹一下呢個魚生飯亦都係超有誠意，每樣刺身都有兩件，每款刺身嘅用料都好新鮮，本人覺得全部款都好好味，特別係油甘魚 另外個海膽亦都非常新鮮，呢個價錢好少可食到唔腥嘅海膽，呢個亦都係非常推介大家來試一試。另外我哋仲叫咗呢個串燒配飯佢哋全部都燒到好香口，雞翼夠滑，魚好鮮甜，其他牛同雞亦都好有肉味，全部用嚟餸日本飯都幾正！喺銅鑼灣求其食個飯，下午時段普普通通正正常常嘅都唔平，但呢間日本餐廳開喺銅鑼灣嘅地段，加上嘢食嘅質素十分之高，每人都只係約$100，真係抵到爛。如果下次黎開銅鑼灣，我諗我一定會再上黎食過！…Read More

平日夜晚，嚟到觀塘區，諗住發掘下有冇一啲特別嘅嘢食，於是，收咗入近玉蓮台附近嘅斜路，一個比較少人行嘅位置，見到有間裝修幾特別，啲嘢食嘅外觀又幾唔錯，就走咗入嚟呢間泰國餐廳食。如果各位想來嘅話，建議搭到去牛頭角站，因為會比較近。店面同埋裏面嘅裝修都好古樸風，幾有情調，可以同大家嘅另一半黎試一試呢度嘢食嘅種類都幾多，係餐牌上面仲見到有生蠔，仲有一個火鍋，感覺唔似傳統嘅泰國菜，有啲fushion。今日我哋四個人來，叫咗一個四人餐，每人都食咗好多野，以個價錢來計，都唔算特別貴。凍奶茶加熱柚子蜜奶茶有好香濃嘅奶味，熱柚子蜜清清地，少少酸幾開胃。串燒六串豬牛雞各兩串，雞肉肥美，牛肉同豬肉味道亦都幾香，加以旁邊嘅沙嗲醬，食落更香濃。榴槤Pizza薄薄一層，香脆嘅Pizza底，上面鋪左非常之香口嘅D24榴槤肉，好想一試再試。小食拼盤有炸雞翼、春卷以及魚餅雞翼同春卷都炸得幾香。冬陰公湯非常之惹味亦都好開胃，呢個對比起出邊係比較辣嘅，同時都唔會蓋過咗香濃既椰汁味，刺激味蕾之選！泰式菠蘿炒飯飯炒得夠乾身，食落去唔會一pat，而且菠蘿好香甜，成件事飽肚得來亦都唔會好油膩，唔錯嘅！走地雞似係用咗秘製嘅醬汁，雞肉好嫩口好肥美之餘，加上佢嘅醬汁甜甜地，帶點微酸，唔需要點旁邊嘅醬汁已經好好味最後送上甜品食得出裏面加左芋頭同埋南瓜，用椰汁製成嘅糕點，去食完餐飯之後，食個糕點成個口都Fresh晒總括來講，呢間泰國餐廳無論係裝修、食物嘅質素、同埋價錢，加埋來講，都算幾好，我會推薦大家黎試…Read More

今日放咗工之後，嚟到太子區遊走，係冇咁旺嘅區域入邊，發現有一間好日式裝修嘅小店，諗住來支持一下。呢間店專門做拉麵，一入到門口，以至到食嘅過程入邊，感覺到店員好有熱誠，亦都好有禮貌。再望望個裝修，大部份由木製成嘅裝潢，感覺有啲似去咗日本。佢哋有幾款「魂」，各位可以因應自己喜好，喜歡邊一啲湯底同埋配料，可以揀返適合自己嘅「魂」店員建議我哋用平板去輸入想叫嘅嘢食同埋嘢飲，操作簡單，亦都好方便，當你輸入左之後，唔使叫人，你所選擇嘅，好快就送到你面前！以下呢個係青龍秘製嘅菠菜汁加埋豚骨湯，調校得啱啱好，唔會有一邊搶左另一邊嘅味道，叉燒亦都好肥美，流心蛋都好juicy，最後忍唔住飲埋啲湯佢另外，我哋都叫咗一個太極首先講個湯底，墨魚汁非常足料，濃濃的味道吸收左係成個拉麵底入面，特別推介嘅係，叉燒上面有舊香滑嘅蟹膏，仲有塊金萡喺上面，成件事好high class，味道亦都係非常之好嘅。同傳統嘅拉麵鋪一樣，係平板上面，係可以自行選擇拉麵嘅軟硬度，湯嘅濃度，配料嘅多少，你都可以追加唔同嘅配料，個人認為拉麵嘅軟硬度選擇返中間或者硬會好食啲，有咬口啲加埋個士多啤梨味嘅波子汽水，好懷舊，味道非常之香甜，食完濃濃既拉麵，飲番支波子汽水，嘆！黎開太子區，建議大家都可以試一下呢間質素幾好嘅拉麵店…Read More

最近秋風起，天氣涼涼地，係時候搵返間雞粥食，暖下胃。之前黎開筲箕灣區，每次都唔知食乜好，今次嚟到筲箕灣見到呢間新開嘅粥鋪，係出邊望入去見到裏面裝修得都幾光鮮，幾乾淨整齊，而且餐牌上邊嘅嘢食，款式又多，而且賣相都幾吸引，於是我哋幾個人就入咗去試吓佢好唔好味。小食嘅餐牌如下：睇個名就知道，呢度專門食雞粥為主，點知發現其他嘅小食，其實都做得非常之出色第一道為大家介紹嘅係以下呢一味雞腎未食就已經聞到好香嘅麻辣味，配以酸瓜同埋適量嘅芝麻，而且麻辣味唔算好強，唔會蓋過本身雞腎嘅香味，口感方面都非常爽口，食主菜之前食都幾開胃。然後係下邊呢碟海蜇手撕雞第一啖食落去好特別嘅感覺，因為好少系出邊會將呢兩樣野加埋一齊，但食落發覺原來都幾夾，酸酸地嘅感覺加上適量嘅辣味，最重要係海蜇本身非常爽口，食到停唔到！跟住係重點推介嘅乳鴿出邊好多話出名嘅乳鴿，慢慢質素都下降，可能因為乳鴿嘅用料因為成本關係用啲質素比較低嘅去代替，但係呢間新記雞粥堅持用A級乳鴿，食得出嗰種分別真係爭好遠，食落去你會發覺裏面既油分恰到好處，當你咬落去，裏面既油立即標出黎，而且肉質非常鮮嫩。炸大腸呢個亦都係重點推介，炸得香脆嘅外皮，加上裏面豐富口感嘅大腸肉，我可以話呢間炸大腸係我食過咁幾間之中最好食嘅一間。蒜泥汁脆皮豆腐建議大家上菜時，即刻食咗先，因為呢個時候出邊嘅脆皮熱辣辣，裏面嘅豆腐啱啱好，你會食到外脆，裏面嫩滑嘅豆腐，推介！黎到呢間鋪頭嘅主打，雞粥！我哋加左＄15加帶子，首先講講個粥底，煲得好綿，濃度啱啱好，而且雞肉亦都選材唔馬虎，舊舊都啖啖肉，而且都幾滑，最重要係雞油適中地混和入粥裏面，令到成個粥都好香，有機會再經過呢頭的話，我一定會再叫過！食完咁多濃味嘅嘢，飲番一杯七喜龍眼冰，清一清口，甜甜的，飲完都透心涼整體來講，呢間粥鋪我都十分之推介，除咗以上所講嘅嘢食味道好之餘，而且食物嘅價錢真係唔貴，好平民化，以呢個價錢食到呢個水準嘅嘢，我會比一個好高嘅評價，所以推薦大家可以試呢間嘅雞粥！…Read More

今日同女朋友兩個人，嚟到尖沙咀諗住搵間韓國嘢食下，一路行一路行，行到去金巴利道，呢度有好多好多間韓國嘢食，於是，我哋就選中咗呢間angry oppa。一入門口，望入去都幾鬆動，我哋兩個坐咗埋去最入邊嘅雙人枱度，古樸嘅裝修，抬頭望上去係舊式嘅燈同埋擺設，我仲有一部電視機播着韓國嘅MV，加上店員都似韓國人，好有韓國嘅感覺。望一望餐牌我哋兩個人，叫咗一個韓式熔岩芝士原味比薩批，一個韓式醬牛肉煎餅，同埋一個釜山魚糕湯。等緊食嘢嘅時候，我哋左望望右望望，睇睇佢啲餐具，佢嘅枱同埋碟都係用木製成的，擺設得己有簡約嘅風格。比大家睇睇個前菜先，係用蔥同埋其他調味料醃製嘅甘筍，清清地，酸酸味味嘅味道令人開胃啲。韓式醬牛肉煎餅（ ＄158 ) 煎餅上面，除咗牛肉之外，仲加左蔥，令到成個口感都豐富左，佢既牛肉，有啲似韓國燒烤嗰啲燒牛肉嘅味道，應該用左佢哋嘅醬醃制而成的，如果覺得味道想濃啲嘅話，可以點一點旁邊嘅辣醬。釜山魚糕湯（＄148 )魚糕加魚丸，浸喺濃濃嘅胡椒湯入面。韓式熔岩芝士原味比薩批（$198）厚批，配番茄醬同埋蘑菇，裏面有好厚既一層芝士。…Read More

今日係星期六，又係時候周圍覓食！嚟到荃灣區，見到有一間幾多人讚嘅鋪頭，諗住喺度試一試！今次選擇嘅係日式嘅拉麵小店，大家睇睇個餐牌先！拉麵方面，佢有唔同嘅湯底，另外又有幾款小食，怕唔夠飽嘅，可以叫埋小食就啱啱好。唔同嘅拉麵，都可以自己選擇曲面直面、面嘅硬度、湯底辣度同埋走唔走䓤。係嘢食嚟到之前，我哋周圍望吓，見到裏面嘅裝修都好有特色！抬頭望望，上面有舊式風扇形狀嘅燈，同埋一啲倒吊住嘅劍球，都幾有趣！旁邊嘅係開放式嘅廚房，上面亦都有兩塊日式嘅傳統怪獸圖案嘅布。窗邊嘅吧枱，每個位置都有充電線，嚟食拉麵可以順便充充電！返返去食物方面，先來介紹一下小食。韓式蒜蜜味叉燒（$25）味道幾好，蒜嘅香味加上甜甜嘅蜜糖味，幾開胃。而肉既質感都唔錯，中間嘅油脂分布得幾均勻，有少少油甘日式餃子（ ＄30 )煎得幾香，每隻都大大隻，肉汁都幾夠灸燒芝士豚肉（ ＄18 ）芝士控一定唔可以錯過，豚肉上面鋪滿厚厚嘅芝士，上面亦都加左香草同埋辣粉作調味，感覺唔會太漏。特上黑蒜油拉麵（＄93 )呢款拉麵有好香濃嘅黑蒜味，上面亦加左蒜粒，都幾香口！特上海老湯拉麵（$98）呢個海老湯係周末限定，逢星期六日黎到先至有得食，一嚟就已經聞到好香嘅蝦味，係我哋重點推介！每款拉麵都有豬肩肉、豬腩肉、糖心蛋半隻同埋紫菜跟嘅。豬肉嘅肉質鮮嫩，糖心蛋亦都甜甜嘅，好好味！而直面同埋曲面嘅分別，就係曲面比較有咬口，煙煙韌韌的；直面就有啲似上海麵，比較林身少少，可因應你哋嘅喜好去選擇。海老湯嘅材料十分足，食到底嘅時候，仲有好多蝦粒，難怪個湯咁香！我哋兩個人亦都叫咗兩款特色小小嘅飲品。左邊係抹茶可樂，呢度配搭幾得意，感覺有少少似以前飲過嘅雲呢拿可樂。右邊嘅係山梨桃梳打，好Fresh，桃嘅味道出啲，幾清甜幾開胃！總結來講，呢間小店都做得幾唔錯，裝修有特色，拍拖可以來呢度，因為都幾有格調。而且食物嘅質素亦都唔錯，所以都推薦大家來試吓！…Read More

今晚呢餐真係不得了，好耐都冇食過一間咁高質素嘅雞煲，而且價錢都唔算貴，絕對值得推薦呢間性價比超高嘅爺爺雞煲！見琴日突然間落大雨，天氣又突然間涼番啲，於是又叫咗幾個同事，放咗工之後一齊去食。佢哋內在環境都非常之乾淨企理，唔同出邊其他雞煲嘅鋪頭，佢哋唔會有一種煙燻到好唔舒服嘅感覺，全部卡位，而且位置都算寬敞，坐得都幾舒服！坐低左之後，慢慢睇吓餐牌，見到佢啲嘢食都真係幾平，大家可以先望一望餐牌，因為選擇都幾多。係個鍋黎之前，店員先遞上一盤調味料，有蔥、蒜蓉、蒜粒、辣椒、芫荽任你揀，可以因應你嘅口味，喺個位裏面慢慢去調。雞煲方面，我哋四個人叫咗一個細嘅煲，半隻雞嘅份量其實都夠四個人食，可以留下肚，之後食多啲其他嘅嘢。辣度都可以自己選擇大中小，我哋因為唔太食得辣，但店員都建議我哋叫BB辣，始終食雞煲唔辣真係唔好味。撈勻晒啲蔥同芫荽之後，蔥嘅青味開始吊出辣味，煲嘅香味亦都令人食指大動，BB辣對唔食得辣嘅人來講，都唔會話好難入到口，但如果真係完全唔食得辣嘅話，我建議選擇醉雞鍋。（順帶一提，成個鍋所有野都食得，包括圖中見到紫色嘅蔥，平時我一定會食，但係佢呢個鍋，將蔥都整得好林，完全唔生，而且好清甜）手切肥牛拼牛頸脊呢個絕對係必食之選，不能不叫，我哋四個人異口同聲都大讚，估唔到佢呢間小店，會出咁高質嘅牛！店員介紹話，上面油脂分布得比較平均嘅，係牛小排，以下面嘅，係牛頸脊，食落去兩隻又真係有啲分別，兩種都各有各自嘅好味之處！（牛小排嘅肉味非常之香，因為脂肪分布平均嘅關係，我落去係比較鮮嫩嘅；牛頸脊既肉感非常突出，啖啖肉嘅感覺，比較起上嚟係滑啲啲）自家製響鈴一碟6條大大隻隻響鈴，都係呢間小店自家製嘅，誠意之作！淥落個湯度1秒，千祈唔好多，響鈴外層上吸收晒辣湯底嘅味，外辣內鬆脆，好滿足！都只係30幾蚊，鍾意可以叫多碟！手拍青瓜其實呢度菜好難整得好，但係佢同出邊嘅唔同之處，就係好清甜好爽脆，配合適度嘅辣汁，系好開胃，又健康！蟹籽墨魚滑重點推介，大大粒嘅墨魚滑，都係店主手打嘅！可以筆到20小粒左右，粒粒都好有魚味，最重要嘅係，墨魚滑爽口彈牙，相信用料都好足，值得一試！蒜片和牛粒個和牛粒都好高質素，有少量嘅油脂係和牛粒裏面，外層亦都燒到好香，竟然食到有少少香脆，真係想一試再試整體來講，所有嘢食都係令我哋喜出望外，服務態度、環境等等方面都唔錯嘅，重要嘅係，咁高質素嘅都唔需要好高嘅價錢，放工放假，約埋三五知己或者同事過嚟聚一聚，平平哋又可以奬勵下自己，食餐好嘅，呢度都不失為一個好地方！…Read More

今次帶大家嚟到大圍，唔食西餐，嚟到呢間合發海鮮飯店，食下小炒。去大圍近油站附近嘅位置，有好多間舊式嘅茶餐廳同埋飯店，間間嘅質素其實都唔錯，每一次嚟到都有一種花多眼亂嘅感覺，有選擇困難症嘅你，不妨來呢一間合發試吓佢哋嘅小炒，有好多道菜都整得幾好味嘅！今日放咗工，成班同事約10個人嚟到，叫咗好多個餸，其實佢嘅菜式都幾多，我哋一人叫一個咁上下，都夠咁多人share嚟食，每人又試到唔同嘅餸。由於太多餸嘅關係，以下落嚟，影住其中一版餐牌俾大家睇一睇，各位亦都可以喺嚟之前，諗定有啲乜嘢想食。生滾滑雞粥＄150（一鍋）其實都幾大鍋，咁多人食，每人食啲，都夠食嘅，佢嘅雞幾滑，雞既雞油味慘左落成碗粥裏面，而啲粥都煲得好綿，連平時唔多好食粥既我，都覺得幾好味。蒜蓉炒莧菜莧菜成本其實幾貴，但佢都炒左幾大碟出嚟，菜嘅葉都好鮮嫩，莖都好爽口，炒出來亦好救鑊氣，幾好送飯嘅！菜心菜心亦都炒得好林！香炒蜆仔肉＄55呢一種飯店炒出來既蜆，品質一定有保證，所有嘅調味都啱啱好，將蜆殻同埋蜆肉嘅味道到揮發出嚟，蜆肉亦都好大隻，呢個價錢都算幾抵！椒鹽白飯魚＄85呢度菜最緊要係裏面既肉夠嫩，整得好唔好食，都好睇間餐廳嘅功架，佢哋嘅外皮煎得香脆之餘，裏面肌肉亦都係畫到好似水咁樣，唔錯唔錯！香煎蠔餅＄90呢個亦都唔似出邊，佢哋粉同埋蠔仔肉嘅比例都啱啱好，唔會啖啖都係炸粉，好有誠意！滷水三拼＄105滷水滷出來嘅味道啱啱好，唔會太鹹，而魷魚同埋鵝腸等等，都好爽口彈牙，食得出係用心製作嘅！酥炸大腸＄70開頭都怕你道菜會好肥膩，但係食落去之後，小小脆嘅外皮，加埋裏面豬腸同埋膏嘅分布都好平均，系好爽口，而唔會俾人一種好肥膩嘅感覺，值得一試！紅燒BB鴿＄50隻淨係睇相都已經知道，乳鴿嘅外皮燒得好香脆，裏面嘅肉亦都好入味，忍唔住連骨都要吮埋！酥炸花枝丸＄90點埋沙律醬來食，味道更加多層次，亦都係香脆嘅外皮，包住裏面彈牙嘅花枝丸，相信小朋友會好鍾意食。豉汁帶子蒸豆腐＄90呢道菜亦都非常出色，香滑嘅豆腐，加上上面嘅帶子，用豆豉黎調出佢哋嘅鮮味，一個爽口一個香滑，層次分明！呢度都幾適合一大班人黎食，想飽啲嘅話，你可以加錢加飯嘅，每碗飯＄12 。佢哋仲開到好嘢嚟嘅，夜晚放咗工，或者出完街之後，想搵好嘢食，嚟到大圍有呢一間好選擇！…Read More