ikuyyyyyy's Profile

個人真係好鍾意呢間餐廳，地點方便，環境舒服，又有私隱度。佢嘢飲嘅選擇多，以前覺得佢嘅咖啡偏淡，但係太眼瞓，所以都嗌咗杯iced cappacinno，今次再飲，對佢哋咖啡印象好唔同！今次咖啡味好濃郁！食物方面嘅水準就一直都維持得好好，呢個香煎虎蝦意粉，面頭嘅芝士拉絲，個汁調得剛剛好，香辣惹味，意粉又好彈牙。然後就係我最愛嘅西多士，每次嚟我都必點！今次揀咗配楓糖漿，唔會太甜，士多啤梨同藍莓新鮮又甜，連朋友都讚好！特別一提，係佢哋優質嘅服務態度，我同朋友一路傾一路食，唔覺唔覺就坐咗三個鐘，但職員一直保持微笑，態度又良好，冇趕我哋走，係當我哋問起佢哋收幾點嘅時候，先驚覺我哋係時間要離開。…Read More

又黎encore我最愛嘅青醬雞胸長通粉，呢幾年佢嘅質素依然保持得到，通粉煙韌，雞胸嫩滑唔鞋口，重點係欣賞呢度啲main course性價比好高，價錢同份量都好合理。今次叫咗杯熱嘅matcha latte，覺得佢嘅嘢飲比起之前進步咗，味道濃郁咗，仲好似換咗新杯添！甜品方面就叫咗香蕉蛋糕，幾年嚟都冇加過價，呢件蛋糕好足料，好厚實，香蕉味好重。如果想食健康啲，佢又有新酮蛋糕，又有沙律食，其實選擇都真係好多，符合唔同需要嘅人。雖然佢有用餐時間限制，但只要冇人排隊，職員都冇催促。順帶一提職員嘅服務態度非常好！…Read More

好耐無黎！趁暑假送小朋友學嘢，同朋友食個快飯。鍾意呢度人流唔算好多，環境舒服，傾偈冇壓力。每次嚟我都一定叫青醬雞肉忌廉長通粉，因為佢通粉嘅軟硬度好有咬口，好啱我，雞又滑！水準keep到！朋友食齋就叫咗個菠菜芝士意粉，好creamy芝士味好香。我另外叫咗杯iced matcha latte，望住佢已經好療癒。甜品叫咗藍莓合桃蛋糕，一件$33超厚實超大件！有3隻味，仲有香蕉同檸檬，香蕉之前食過，都鍾意！但檸檬好似新出，下次有機會再試！因為每樣野嘅份量都算多，好飽！ …Read More

行過俾佢嘅梳乎厘班戟吸引到，所以坐底試下。先講環境，喺商場嘅開放位置，小朋友一路食一路望住樓下有嘢玩，食都食得快啲。鰻魚飯有驚喜，都算好大塊好厚身，個汁嘅甜度剛剛好，珍珠米嘅軟硬度亦都拿捏得好好。另外叫咗個芝士吉列豬扒蛋包飯，可以揀白汁或者咖喱汁，佢嘅咖喱唔辣，小朋友都食得。芝士拉絲，豬扒夠脆唔會厚粉，不錯。另外都想欣賞佢每個餐都配杯熱茶，幾濃幾消滯，細心嘅安排。最後就係甜品啦，叫咗個原味，實物同相片一致，旁邊嘅cream好畫龍點睛，夠滑夠香。走嘅時候見到原來佢都有早餐食，下次可以試吓；講埋我哋食嘅時候兩位職員嘅服務態度都超級好同細心，值得一讚。…Read More

行完街想搵個地方快速醫下肚，行經有間拉麵就入去試吓。因為我哋係五點幾嘅時候，未係好旺嘅時間，所以可以影晒成個餐廳嘅位置，其實座位唔算特別多。朋友揀咗味玉味噌拉麵，因為佢唔食得辣就揀咗唔麻唔辣。我就揀咗增量叉燒小辣小麻味噌拉麵。首先我哋都好欣賞佢個麵質，好彈牙好掛湯。其次我好欣賞自己嗰碗嘅湯底，好香口好惹味！跟住就係舊叉燒，肥瘦適中，肉質嘅軟硬度主導剛剛好，唔會太淋又唔會鞋，而且粒糖心蛋真係好靚好香，成件事非常有驚喜！另外太肚餓嘅關係，我哋叫埋一碟餃子，即叫即煎，熱辣辣夠香脆，非常滿足嘅early dinner，飲埋罐汽水，圓滿。…Read More

好耐冇嚟過，我心目中嘅親子餐廳。鍾意佢環境夠寬敞，有high chair俾小朋友，又可以家長喺餐廳食，小朋友喺出面空地玩。老公嗌咗個雜錦魚生飯，刺身一如以往大粒又新鮮，一啖有五款刺身，份量又夠多！我自己今次試咗個火炙魚生飯，都有成最少六款刺身。不過今次令我最驚喜嘅係小朋友個牛肉烏冬，可能都關第一次叫事。佢嘅烏冬好彈牙，牛肉都唔係一般質素，係好香牛味，小朋友食晒！因為佢嘅高質素，我都專登望一望仲有乜嘢烏冬揀，我諗下次嚟我自己都會試吓食烏冬！性價比都好高！…Read More

豬骨拉麵成日食，主打牛骨真係未試過，對於鍾意食牛嘅我黎講係幾吸引！我同屋企人一個叫招牌牛骨拉麵，一個試特上A4和牛小麻辣牛骨拉麵。招牌個湯底好濃香，而麻辣就惹味啲，各有特色！不過牛肉嘅分別就好大！有比較就當然覺得A4和牛嘅牛味出好多！口感都唔同層次，雖然價錢都有一段距離，不過個人覺得都值得食好啲！麵質方面，係幼麵，但彈牙！唔會話煮到好淋，欣賞！另外我地仲加配餃子，都脆口，不過不失。野飲嘅選擇都算多，而環境係幾好，舒服。…Read More

見到公司附近開咗分店，勁開心嘅同事去lunch！位於商場入面，呢間分店已經算大間，裝修得好靚，好舒服！Lunch嘅選擇都好多，本身包一杯齋啡，想飲其他都只係需要加少少錢。同事叫咗個香煎虎蝦配辣茄汁意粉，蝦好彈牙。我叫咗個青醬忌廉雞肉長通粉，個人覺得好出色！一嚟我比較鍾意杰身同濃味嘅醬，二來長通粉煮得剛剛好，好煙韌！重點係雞肉有成差唔多十件，好足料，而且一啲都鞋。佢嘅brew coffee最初飲好似冇咩味，但食咗嘢之後再飲，咖啡味好濃郁好香，唔會苦。最後唔少得我嚟親都必叫嘅法式西多，即叫即整。好好味！…Read More

之前嚟過一次食dinner，今次weekend經過食個lunch。日頭喺呢度食又有另一番風味，夜晚浪漫，日頭就比較悠閒，而且weekend都有自選午市套餐。頭盤叫咗個希臘沙律同埋香煎廣島蠔，廣島蠔細細粒，但肥美同好重蠔味，配埋山葵蛋黃醬，有唔同層次嘅口感，同時提出鮮味，讚！南瓜湯飲得多，好難得試到番薯湯，甜甜地好Creamy。配埋佢整熱咗嘅自製麵包，淨係頭盤已經好滿足。Main course叫咗香蒜白酒大蜆手打扁意粉同燒八爪魚意式辣茄醬手打闊條意粉，後者好特別，唔係周圍都有，辣辣地好開胃，值得一試！甜品我就揀咗一隻最欣賞佢哋嘅伯爵茶奶凍，水準keep到，老公就鍾意佢哋嘅藍莓忌廉芝士蛋糕，話夠厚實，芝士味濃。Openrice 有9折現金券，Dinner 訂座每位送兩隻法國生蠔！…Read More

咖哩吉列豬扒飯：真材實料，好大塊好厚肉的嘅豬扒，食落真係啖啖肉，而且用麵包糠炸到非常脆口，粉層啱啱好，最怕太過厚粉，咬一啖就飽晒，呢塊豬扒好有滿足夠，唔配咖喱就咁食都好好味。金牌牛魔王咖喱大四囍飯：好多配料嘅咖哩牛，有牛腩、牛筋、牛脷、牛肉等，味道好濃，少少辣，配飯同薄餅都好食。不過，份量真係幾大，如果細食嘅，兩個人分都好夠食。小食薄餅：睇落好普通，但係真係好好食，送到餐枱嘅時候就聞到好香，食落非常鬆軟，建議就咁試下純薄餅嘅味道，之後再點咖喱食，可以食倒唔同層次，真係食過返尋味咁。香蘇雞：外脆內軟，肉質都唔錯，味到偏淡少少，可能食完濃味嘅咖喱先，影響味覺，但口感幾好。椰子冰、咸檸碧：食完咖喱飲椰子冰好清新，咸檸碧就比較普通。不過呢餐飯好滿足，耐唔耐食餐咖喱好滿足。…Read More

呢間應該係我食過性價比最高嘅日本餐廳，今晚喺附近趕住開會，但又唔想Hea食，個腦即刻就諗到呢度。傍晚五點幾，比較早嚟食，所以未見人流。呢間餐廳地點方便，內裏又夠光猛同寬敞，坐得好舒服。，而且餐廳仲好貼心咁每張凳下面都有個籃俾人擺袋。食物方面係用QR code落單，有食物相參考，而紙本就比較一目了然，個人覺得佢嘅午市套餐同丼飯都好抵食。我黎親都係食海鮮丼，$128有大概四款魚生，每款都肥美又大粒，重點係好難得刺身仲多個飯！朋友揀嘅火炙魚生飯，好香！哈刺身好大條，其他刺身都係厚切，好新鮮好滿足！…Read More

作為半個潮洲妹，真係對潮州菜有一種情意結。今晚提前預訂了在炮台山的潮州私房菜餐廳聚餐，朋友都讚口不絕。前菜方面，梅汁拌海蜇又酸又甜，讓人食慾大開；家鄉豬腳凍連醋吃會令人有驚喜；牙帶魚外皮煎得酥脆，內部卻保持著嫩滑和肉汁。野生菌燉花膠燉湯充滿了滑嫩的花膠、新鮮的野菌和鮮甜的瑤柱，真的好想添多一盅。滷水鵝肝拼一口鮑魚鵝肝的肥美與豆干的滑嫩相輔相成，加上一口鮑魚的鮮甜彈牙，味道不錯。蘿蔔灌漿拼墨魚餅蘿蔔灌漿外酥內軟，內餡好似食緊蘿蔔糕。墨魚餅好彈牙，煎得很香。老陳皮豉汁蒸鱔片鱔片鮮嫩多汁，豉汁中帶著淡淡的陳皮香氣。家鄉馳名鹹鮮雞雞肉質地細嫩，鹹鮮得來也保持雞味。拍蒜蝦羔炒白通菜通菜配蒜香蝦仁，又爽口又鮮美。家鄉芋頭臘味局飯芋頭和臘味原來是如此配搭，十分推介。潮州福果綠豆爽滋潤得來有不同的口感，好高質！最正有反效果，提子好甜，每一粒都好Q彈。整體而言，這餐私房菜真的為我和朋友們帶來一個愉悅的晚上。…Read More

餐廳位於灣仔同銅鑼灣交界，鬧市內比較靜嘅環境。一入到去餐廳都幾大同舒服，有啲位仲落地大玻璃望到風景。自己認為係好適合家庭聚會嘅地方。喺Menu見到有個大澳蝦醬海珊骨，覺得好特別，所以叫嚟試吓。個皮好薄好脆，然後肉質好Juicy，蝦醬味唔會話好濃烈，味道恰到好處。鮮菌安格斯牛柳粒係我全晚最欣賞，真係有牛味，而鮮菌亦都煮得好香！西蘭花好爽口，唔會好似一般餐廳煮到好林。呢度嘅小炒王同出邊嘅好唔一樣，材料好多樣化，有蝦乾同魷魚，加咗雜菇，成件事好似健康好多，而且佢唔會好鹹。最後係我最愛嘅壽桃包，麵包軟熟，蓮蓉唔會太甜，大滿足嘅一晚。…Read More

呢間餐廳好似好多分店我都去過，之前覺得荃灣嗰間嘅環境最好，但相對比較遠。有一日同同事喺呢度附近開會，發現原來開咗間新嘅係鰂魚涌，雖然地點相對冇咁方便，但佢係最大、最靚同最舒服嘅一間！可能因為新開張，所以嘢飲同食物選擇好似相對少咗一兩款。見到佢有lunch Menu ，熱午餐嚟講選擇好多，而且價錢都合理。嚟得呢度又點少得飲咖啡！天時暑熱，我叫咗杯iced cappuccino，佢嘅咖啡味好濃郁！Main就揀咗厚切煙肉卡邦尼，好creamy！意粉夠大牙。最後點少得我最愛佢嘅法式多士，可惜少咗球雪糕，但相對又平啲🤣…Read More

今次黎左醉桃園打邊爐，舖頭裝修好用心，環境舒適，店員仲好貼心教大家野食要淥幾耐，非常輕鬆自在。上鍋之前，店員先上左調味料九宮格，綠色嘅係有藤椒油，麻而不辣。當中最值得推薦嘅係佢地自製XO醬，見到明顯一條條干貝絲、蝦肉，香口惹味。今次要左佢地招牌醉雞鍋，湯頭濃郁，滿滿花雕味，入面仲有好多紅棗、中藥材，補而不燥。雞件已用花雕酒醃製，店員教我地湯底滾左落鍋，翻滾後熄左焗10分鐘，食落非常嫩滑，香氣濃郁。我地仲叫左荔枝蝦球，鮮紅嘅脆脆包住粉嫩嘅蝦肉，口感酥脆彈牙，非常適合單吃。主菜方面，有嫩中帶脆嘅牛舌心、爽口牛黃喉，一碟份量都幾多，擺盤精美。值得一提嘅係，呢度可以好似潮汕邊爐咁點手切牛肉。今次就試左吊籠，肉偏瘦，係近骨位的部位。雖然油花相對少，但牛肉味重，加上湯底紅棗甜味，非常鮮美。墨魚滑清爽彈牙，芥末味吊出墨魚嘅清甜；豆腐質地綿滑，用黎吸收湯汁一流。…Read More