WARWOLF1 GrandFat's Profile

食過最差又最貴嘅放題。。。首先環境方面，成個場為左擺多啲枱，搞到個通道勁窄，窄到只係容納一個人通過，每次出去拎嘢一係就要互相讓黎讓去，一係就要前後掂住咁過。行經個廚房，你阿媽個仔，見到入面污糟到成地都係廚餘、食物，又塞住個去水口，好難想像頭先我食嘅嘢係由呢個廚房出黎。服務方面，埋單嘅時候係有+1服務費，但係啲waiter真係完全唔識做，明明張枱執下都已經有位放啲嘢食，嗰啲waiter遞過黎比我拎，好似叫我自己搞掂咁，不如你-1服務費我幫你搞掂埋。明明張紙叫左生蠔&烤魚乾，最後只係黎左生蠔，完全冇人理過嗰魚乾，又講到好似好限定咁，生蠔等4款嘢食係人頭計咁叫，唔可以叫多，而烤魚乾需要兩個人嘅票先可以叫一碟，點知最後黎都冇黎。食物方面係經典，其實食放題我唔渴望啲嘢好好食，啲嘢食正正常常擺到落口就得，始終食放題個aim都係有個地方同班friend吹下水，食下嘢算。哇，啲嘢食難食到，啲魚生係有陣雪味，夾落去&咬落去係硬硬地，完全差過惠康、百佳啲魚生貨色。啲烤肉，有啲係完全咬唔爛，要吐翻出黎。最白癡係嗰19火鍋，黎左個鍋唔比蓋，呢個放題兩個鐘，嗰鍋煲左45分鐘都未煲滾，啲肉係要慢慢“浸”熟先可以食，去到就黎埋單走，嗰鍋先開始識滾。嘢飲款式又唔多，得兩個細雪櫃放嘢飲，而且啲茶係唔擺入雪櫃，食左兩個鐘，我只係係咁叫韓式炸牛奶&炸榴槤，得呢兩個我係覺得算係正常，好過其他嘢食。到最後嘅埋單環節，真係又刺激又火滾，滾過嗰45分鐘嘅鍋，每人三百幾，仲要+1服務費，我想講我食過咁多放題，二百幾嘅都好服務過&好食過呢間，以後唔再黎食，亦唔推薦大家黎食，樓上樓下嘅都好食過呢間。…Read More

我可以總括以上話好食/比正評嘅留言嘅內容（哇！佢係黃店黃店黃店，話知佢難食，點都要讚到佢好食到飛起。）但係即使係黃店都要有質素，唔係掛住黃店呢個名銜係口作一個賺錢嘅工具，之前試過好多黃店真心有質素，比錢都唔會心痛，但係呢間唔係。我自己個人食過一次呢間，唔會再去食，真心寧願去隔離街出名啲嗰間，呢間啲湯淡到好似滾水咁冇味，懶係多嘢揀咁有幾款湯底，我地叫左兩款（沙嗲+腩汁）試過兩款，唔知道係咪中左肺炎定係點，兩款乜味都冇。本人係隔離街嗰間食開鍾意每淡麵都要連湯一齊食，呢間係麵連水一齊食。啲餸嘅味全部都係源自於本身嘅醃料，本身係深水埗翻工，有開自己心目中嘅食堂，但係呢間係blacklist。即使嘢食唔好食，但係入面啲員工大部分都算有禮貌。…Read More