kikikam613's Profile

呢間一韓燒性價比高叫咗個芝士韓燒餐有齊豬牛雞 再加一周年送嘅50克牛舌最重要係飲品，只需要加$5全部加埋都係八十幾埋單絕對抵食過其他連鎖燒肉店再加上有韓式特別嘅菜式例如芝士年糕 泡菜 等等有別於其他嘅日式燒肉呢度採用自助落單 付款方法多仲有會員計劃但要記得埋單前要登入環境方面都算坐得舒服佢有一人卡位最方便成日獨食嘅朋友一啲都唔會覺得奇怪一個人坐低慢慢燒員工唔會催唔會趕絕對係一個人食飯嘅好去處總括嚟講 食物質素OK 菜式有特色 性價比高得閒會再嚟試吓…Read More

之前黎叫過一次外賣便當，印象中因為便當入邊勁多榨菜類嘅嘢，個人唔係好接受到嗰個口味，見佢人氣咁勁，決定俾多次機會。今次係中午黎堂食，但係依然好高，差唔多12點多啲出到嚟，已經要排隊，排咗10幾廿分鐘之後呢終於有位。今次叫咗個榨菜滷排骨便當，根據之前嘅經驗，就叫咗走菜脯同酸菜，便當一嚟到，真係勁大塊排骨，枱面仲有三種調味粉，有特製麻辣香粉，海苔粉，同埋秘製鹽酥粉。頭幾啖，真係好正，外脆內軟，仲有少少肉汁，加埋啲滷水汁送飯，幾好食。但係食多幾啖之後呢，就開始覺得有少少膩。結果只係食到半碗。滷排骨便當加埋茉莉綠茶係$68。份量好足，但係個人覺得漏咗少少。…Read More

平時都嚟呢度食lunch覺得唔錯，今日夜晚過嚟試吓佢嘅串燒好唔好食。一嚟到服務都唔錯，即刻有人俾咗兩杯熱茶，啲茶幾好飲，少少清甜。我哋叫咗吉列廣島蠔、豚肉荔枝卷、燒菠蘿、牛舌心、炸雞軟骨、日本雞全心、炸雞皮餃子，同埋海蜇。飲品叫咗鹹檸檬雪碧。基本上都係，即叫即燒，樣樣嘢都係熱辣辣送到嚟，但係仲要等得耐少少，夜晚黎呢度慢慢傾吓計，食吓嘢嘅話係幾好。吉列廣島蠔咬落去又熱又多汁，幾有鹹味。豚肉荔枝卷係真係有啲燒豬肉，再加埋一啲荔枝肉，甜甜地幾特別。牛舌心就稍為韌左啲，炸雞軟骨，脆脆地幾香口，啲海蜇幾入味，唯獨是係雞心唔熟，有啲血水出。值得一讚嘅係鹹檸檬雪碧，鹹檸檬同冰係同雪碧另上既，啲冰唔係一粒粒，而係刨冰狀，令到人飲落去嘅時候啖啖清涼。呢餐埋單每人$184。…Read More

今日母親節，黎到Mikiki食牛角，叫咗個放題Set C。平時都食開Set B ，好少食到有海鮮同和牛咁，所以今日就一於集中叫啲Set C先有嘅嘢。首先係牛，有安格斯和牛、安格斯一口牛，同埋和牛赤身。啲牛的確比之前set B既好，唔會太韌，多啲脂肪，香口啲。三款嚟講一口牛比較難熟，亦都會有筋，但整體都真係好食過之前啲牛。前菜試咗牛角明太子沙律，好好食，啲沙律加咗啲醋，再配埋明太子嗰種鹹鹹地，想食完又食，佢仲會有少少薯仔喺面，最後encore左一碗。海鮮方面有蝦，廣島蠔，同埋帶子。啲蝦醃咗啲鹽，燒完之後，有啲鹹香，再加燶燶哋幾好食。帶子加左牛油一齊燒，都唔錯，不過最後嗰啲唔知點解好鹹。最正係廣島蠔，佢加左牛油連埋個錫紙一齊燒，啲壕都幾大隻，幾有鮮味又有汁，最後應該每人食咗八九隻。最後食完仲會有一人一杯Movenpick 雪糕，不過可惜得雲呢拿同士多啤梨兩隻口味，冇得任食。我哋有會員卡，埋單每人$448。…Read More

上次黎食烤魚好大條，今次就黎試吓雞煲，叫咗個川味香辣雞煲，半隻。一坐低就有碟花生做前菜，花生脆卜卜，鹹鹹地香香哋，幾開胃。花生未食完就嚟咗雞煲。雞煲有洋蔥，辣椒，青椒同大蔥頭做配菜，賣相唔錯，煲蓋打開嘅時候雞煲好香。但係唔知係咪淨係叫咗小辣，冇乜辣味，淨係食到好鹹，可能送飯會好啲啦。之後叫多碟手打丸雙拼，啲丸味道幾新鮮，同埋幾彈牙，仲有幾條金菇做配菜添。總括嚟講，雞煲味都冇烤魚咁好，味道偏鹹，味道冇乜層次。…Read More

今日黎到越北食越南河粉，中午黎到唔算多人，我地四個人食唔需要等位就直入有得座。座位都算闊落，每張枱邊都放左魚露等等既調味料，餐具都可以喺每張枱側邊個櫃筒攞到。最後叫左個綜合牛肉湯河，配熱檸水，總共係$69。湯河有生牛肉，牛腩片同埋牛肉丸，再配埋蔥花，炸蒜同洋蔥，啲料都算多，但係湯底有d淡，加左唔少魚露都係無乜味。牛肉丸個口感幾特別，咬落有啲肉汁，同埋有少少筋，幾有咬口。總括黎講味道一般，配菜都足料，個人覺得價錢貴左少少。…Read More

今日突然之間想食印度菜，就嚟咗Roti King叫咗個外賣午餐。呢度賣啲好正宗嘅印度菜，店員都唔識講中文，要用英文落單，我最後叫咗個咖喱雞餐，要薄餅，跟一罐可樂，總共係$58。佢會有個沙律做前菜，係一啲生洋蔥，同埋生青瓜，重口味嘅朋友應該幾啱。之後睇吓個薄餅，薄餅一塊切開咗四件，咬落落好香奶油味，有啲酥脆，配埋個咖喱，就幾夾。個咖喱好似比想像中淡味少少，可以再濃味少少，同埋再辣啲啲。總括嚟講，不過不失嘅咖喱薄餅啦，價錢正路。…Read More

今日叫咗外賣自取，一個辣椒板面，點之前問左個服務員有咩餸，就話有啲肉碎啊蛋啊咁樣，以前試過招牌老鼠粉，味道唔錯，我估辣椒板面都差唔多掛。呢度外賣要加$4係外賣盒，如果要加凍飲，就要再加多$5，好唔化算，最後叫咗杯熱檸水，咁就總共係$62辣椒板面味道都唔錯，有啲辣椒粉，魚乾，花生，肉碎，同埋蛋，仲有少少豉油味。但其實冇我想像中咁重辣味，啲嘢加埋都算濃味，有啲似食緊撈麵咁，係個面份量唔多，細細盒咁啦。總括嚟講，外賣性價比唔高，味道仲可以。…Read More

今日嚟咗廿七窩食午餐，記得以前呢個位係漁小館黎既。呢間廿七窩個餐牌同以前漁小館好類似，係多咗啲特價嘅午餐。今日叫咗個特價午餐，係霸王雞飯餐，係$48，那熱飲仲要同價，價錢幾抵。霸王雞嘅份量都算幾多，好似多過普通例牌嘅份量，佢加咗啲蔥辣椒同埋豉油，都幾送到飯，係啲雞略嫌少少鞋，我諗係雞胸肉多，如果有啲雞上髀會好食啲。叫咗杯凍檸茶少甜，茶味都幾濃，唔會太澀，檸檬都有四塊，幾好飲。總括嚟講，$48一餐，性價比好高。…Read More

見呢度新開左一間八方雲集，夜晚決定呢度試吓。啲服務員好似好忙咁，企咗喺個counter接近15分鐘，都未有人嚟幫我落單。終於有個煮緊嘢嘅哥哥嚟問我食乜，我叫咗一個10號餐，有麵線，五隻鍋貼，同埋一杯豆漿，總共係$41。落咗單之後呢，就俾咗個號碼牌我，咁我就拎住個牌去搵位坐喇，因為新開，啲座位都算企理，啲醬料好齊，每張枱都有醋，有辣椒，有胡椒粉。冇幾耐就有人送嘢食過嚟，個麵線味道一般般，基本上湯有啲鹹之外就冇乜味，就算落多啲醋，味道都係麻麻，配料有豬大腸，貢丸等等。鍋貼就唔錯，唔會煎得太燶，咬落都有啲肉汁，再點啲豆瓣醬，都幾香口。…Read More

今日嚟到港灣豪庭嘅KFC食下午茶，決定叫個蜜蜜燒雞全翼茶餐。間鋪頭好似唔夠人手咁，直頭叫啲客人唔好去櫃檯落單，用手機落單，有少少混亂。搞咗一陣，終於用手機落左單，嘢食又唔算來，差唔多等咗10分鐘左右就有。蜜糖雞全翼係偏細隻，但味道都唔錯，甜甜地，唔會好燶。個蘑菇飯呢，叫咗多汁，好彩個侍應都算大方，肯比多幾羹汁我，多汁嘅蘑菇飯係幾好食。葡撻就係發揮到平時嘅水準，一陣焦糖喺面，咬落去之後有香濃嘅奶味，好食。下午茶餐，總共係$25，都幾抵食。…Read More

今日下晝嚟呢度，諗住食個下午茶，叫咗個榨菜肉絲米粉，配個奶油花生醬豬仔包，再加杯紅豆冰，只係$28，價錢算抵。想搵位嘅時候，發現好似冇人執枱，張張枱都擺着啲食完嘅盤，成間舖都係咁，都幾污糟。人流都幾多，叫完之後等咗十幾20分鐘，終於有得攞嘢食。個榨菜肉絲米粉都幾好食，湯底唔會太鹹，仲有少少辣味，肉絲就唔算多，一碗大概五六條左右，味道唔錯。奶油花生醬豬仔包，好邪惡，不過幾好食，加左奶油之後啲花生醬唔會太乾，好香嘅花生醬，仲有啲Juicy嘅奶油，加埋燶燶哋嘅豬仔包，係絕配。紅豆冰不過不失，唔算太濃味，奶味幾重。…Read More

夜晚叫咗個泡椒酸菜湯肥牛火鍋，再加咗杯柚子檸檬梳打，總共係$74。叫完之後就等嗌Number ，今次有少少耐，等咗十幾20分鐘，終於有得攞。呢度個執枱姨姨都幾快手，我去拎啲餐具嘅時候，已經幫我整好個爐。服務好過其他快餐店好多。火鍋湯底估唔到有又幾好食，酸酸哋仲有少少辣，幾惹味。啲配料都唔少，有餃子，同埋其他各式各樣嘅丸，每樣有一粒，大概有七款，每隻都幾好食，唔係啲平價丸。套餐已經包咗烏冬，唔需要加錢，價錢都合理。杯柚子檸檬茶，有好多柚子喺底，酸酸甜甜幾好飲。…Read More

今日中午嚟到呢度食飯，四個人去到大概12:30左右。今日唔算多人，等一張枱就到我哋，大概等咗10分鐘左右。今日嘅午餐得三個，有蒜蓉豬扒，咖喱雞球，同埋香煎牛脷。既然冇牛扒就叫咗個牛脷配薯菜黎試吓。午餐有包一個餐包、一碗餐湯（可以揀紅湯，或者白湯）仲有嘢飲（凍飲係唔使加錢），連埋個牛脷配薯菜，總共$62，都幾抵食。忌廉湯唔錯，入面都足料，有唔少肉同埋蘑菇，幾好飲。餐飽有附牛油，搽咗牛油之後好好食。個牛脷都唔錯，鹹鹹地，配埋啲蒜蓉汁，係啲薯菜略嫌少咗啲。凍檸茶正正常常，唔算大杯。總括嚟講，呢度價錢合理，食物質素OK，係坐得迫啲。…Read More

今日晏晝黎左呢度叫咗個口水雞套餐外賣，加杯凍檸茶，總共係$53。外賣叫完之後，唔使10分鐘就有得拎，都好快下。個口水雞賣相都唔錯，見到有蔥有芝麻油炸蒜，仲有啲辣油，好似會幾好食咁。雞份量就唔算太多，一般例牌咁，一個人食都夠嘅。食落啲雞麻麻哋，好多都好鞋，雖然香料好似好多，但係食落冇乜味。冇乜辣味，其他料唔鹹唔甜咁，基本上味道好淡，麻麻哋。冇嗰種好送到飯嘅感覺。檸檬茶正正路路，茶都唔太澀，但擺咗檸檬同冰之後份量唔多。…Read More