chan.angel's Profile

一行七人新年前終於約齊人，行左大半日街，終於坐底可以食野!之前見新聞有講過呢間麻神，既然行開銅鑼灣就成班食啦!最鐘意打邊爐，因為大家可以叫自己想食嘅!~睇完個餐牌，心大心細，樣樣想食~諗左好耐，我地叫左鴛鴦鍋，因為有人食辣，有人頂唔順太辣，見到麻辣都驚驚地，所以叫鴛鴦最穩陣!食物我地都真係叫左超多，一上台都嚇左跳，爆多肉又多丸!包括牛頸脊、牛胸爽、蔬菜拼盤、菇盤、丸子盤、響鈴、黑毛豬肉、牛丸、蝦丸、鴨血、排骨酥、蜂巢冰豆腐、台灣面等。誇張到，連個度的服務生都嚇一嚇!第一次食蜂巢冰豆腐，估唔到咁特別，佢索哂D汁，超好味，而且佢唔係睇落咁，係鬆身又口感。另外推介個牛胸爽，牛味較濃，入口爽滑，識食一定要食呢個!仲有個果凍鴨血，未試過咁特別，鮮嫩入味，口感滑溜好Q，真係似食果凍。呢度連菜款式都特別多可以揀，又有蔬菜拼盤，又有水蓮菜，喜歡打邊爐的話呢度真係唔錯!幾岩大班人黎，可以一次過食多種款式!最後埋單，先知原來7:30前係有75折，估唔到食左咁多野，都好抵~~~…Read More

今日老闆約左個大客傾野，小女子非常有幸可以跟去學野，仲食到呢餐豪到無朋友既美酒配佳餚盛宴，唔寫返篇食評炫耀下真係對唔住自己！一入到黎個氣勢已經唔講得笑，陣列左好多名酒，成個人都高級左，好在今日都著得幾端莊，如果唔係真係失禮死人~睇睇個menu先，總共有8道菜，期間會飲到4款酒，老闆可能知道我飲得，所以帶我黎見識下，其實中菜不嬲都同酒好夾，今晚注定有口福了~第一杯係Cocktail，可以揀Johnnie Ginger或Johnnie Soda，我揀左前者，未到帶少少辣又好清新，成個胃開晒~有個同事揀左後者，我都偷偷地飲左啖，口感比較rich~之後就開始食第一道菜，叫”龍馬精神”，其實係豉汁馬蹄炒原隻乳龍蝦球~乳龍蝦即係龍蝦BB，可想而知每一啖都係精華，食落嫩滑彈牙，鮮味都好出。跟住就係John Walker & Sons Private Collection 2017，配玉帶龍腰卷同鮑魚扣鵝掌，杯酒味道層次好豐富，配埋味道偏香濃既玉帶龍腰卷，都相當唔錯，而隻鮑魚口感超滑同厚身，靚酒配矜貴菜式認真一流~第三杯酒係Johnnie Walker Blue Label，配搭煙倉魚、豉油皇法國鵪鶉、蟹肉蒸菜苗餃子同埋紅酒燴牛尾配饅頭~呢杯酒餘韻悠長，仲可以平衡食物既膩感~煙倉魚好香，魚油豐富、肉質嫩滑juicy~豉油皇鵪鶉好入味，食到唔好意思啜埋手指~最後飲埋杯John Walker & Sons King George V清清口腔，就可以歎埋個甜品，臨走仲仲有支12年嘅威士忌贈送，都價值成四百幾蚊，呢餐真係又食又拎，好滿足~…Read More

試問有邊個女仔唔想皮膚靚架？！想靚就梗係要由內到外啦，咁先至持久，所以平時食野都好注重，會重點揀d對皮膚好既野黎食~呢度既凍冰花燉蛋已經成為左我既養顏補品，非常味美，又有營養，食落好軟滑，好似食緊布甸咁，凍食更加係透心涼，希望keep住食，遲d皮膚可以好似剝殼雞蛋咁白滑啦！ …Read More

來過幾次，好鐘意呢個32nd St "K-Town" Ramen Burger ($68)，佢將日本料理同美式快餐文化結合，將煎脆既拉麵代替麵包，拉麵餅香脆可口唔覺膩，唔易散開，夾住泡菜同澳洲和牛，加上濃濃既醬汁，非常惹味juicy。雖然漢堡有點容易移位，但口感爽脆，仍保留到拉麵彈牙既質感，又有驚喜！…Read More

今晚老豆叫阿媽唔好煮出街食, 就揀左屋企附近呢間餐廳,老豆提議食胡同烤豬餐(＄365), 包羅萬有唔洗煩!!!唔知點形容胡同烤豬拼爆脆豬伴桂花糕好呢？通常飲宴乳豬係第一道上, 桂花糕就包尾上, 呢度竟然將兩樣混埋一齊, 幾有創意! 烤豬片同餅乾都好脆口, 桂花糕作為夾心清香微甜, 一啖咬落去鹹甜軟硬咩都有, 層次分明.鹽水鴨份量唔少, 鹹鹹地幾惹味, 皮白肉嫩、肥而不膩, 送飯一流.炸小黃魚香酥可口, 咸中帶辣, 魚肉都算滑, 成條連尾都可以食.仲有幾樣食物就唔多介紹喇，整體水準唔錯, 父母都滿意~…Read More

公司秘書出名人緣好、抵得諗，所以大班人一早book左呢度間16人大房同佢食生日火鍋，大圓檯方便大家吹水之餘，仲有四個爐，可以開盡喪食mode。等食物黎之前，梗係"混醬”啦，有9款醬料自由mix & match，good!之前打探過秘書口味，所以一早訂左章紅魚同象拔蚌刺身，師父好細心咁薄切成兩個大拼盤方便我地食，當然要相機食先放閃啦！味道唔洗多講，一個字，"鮮”~仲有一個字，"甜”~人多自然想飲酒，問問老闆意見，話啱啱引入左 "七賢"清酒，配刺身一流，即管試下啦！唔，味道好fresh，飲完再食刺身，感覺鮮味更加突出。有幾個女同事唔太飲清酒，於是再叫左支北海道蘋果酒，甜甜酸酸易入口又消滯開胃，好啱女仔飲。火鍋配料方面，有兩大驚喜位：第一個係 蟹皇餃，以為入面應該係蟹肉，點知原來係蟹粉加魚肚粒，都幾估佢唔到，仲係好鮮味果隻，味道好濃，難得個皮咁薄而d饀又咁豐富，推介！另一個又係估佢唔到既午餐肉，排晒隊一件件勁靚仔，之前係出面食過d好鬆散既，呢度出奇夠實淨，味道仲幾香下，難得難得。秘書好滿意呢個安排，我地都祝佢快D嫁人啦！…Read More

意式薄餅食得多，好好奇怪韓式薄餅又係點既呢？今日同同事黎呢度開餐，見到有個海鮮煎蔥薄餅(＄88)，我即刻上網search下食評睇下，驚中伏嘛~點知比我search到佢既由來，原來韓國人係落雨天習慣要食海鮮煎餅，話係因為逢親落雨小朋友就無得出街玩，媽媽為左安撫佢地所以會係屋企整海鮮煎餅氹細路，後來演變為傳統習俗，聽落又幾得意喎！咁個薄餅食落點先？批邊好香脆，因為餅底夠薄，所以食得到各種食材既原味同鮮味。另外想講下個韓式年糕(＄88)，辣勁好夠，年糕煮得夠透，食起上黎煙煙韌韌，d辣味入到年糕個心而唔係只係停留係表面，滋味滋味。…Read More

唔少打工仔返工既原動力，就係為左捱到午餐，跟住感覺好快又過一日，真係爽！今日同個同事黎呢度食拉麵，上到黎見到勁多人，全院滿座~ 20分鐘後終於有位，坐低一人叫左一碗黑蒜油豚骨拉麵，再每人加20蚊追加每人3隻餃子同可樂~拉麵上枱時首先最吸引既係隻蛋，睇落郁郁下非常糖心；之後試個湯底，飲到濃厚焦香同甘味，層次幾豐富；至於拉麵呢，都算彈牙煙韌，叉燒就肥瘦適中，入口軟嫩，所以呢個lunch都幾滿意既~   …Read More

又到左Happy Friday，又可以同好友飯聚暢談，揀呢度既原因係因為環境型格得黎又帶少少悠閒感，好啱吹水歡聚。打開menu一睇，有好多唔同類型既意粉，所以大家決定黎一個意粉派對~ Broccoli and bacon penne $105忌廉汁西蘭花煙肉長通粉，係較為清新既選擇，因為有朋友揀左一d較濃味既，所以就想揀返一個咁簡單清淡既意粉平衡一下口味。毫不花巧，忌廉汁、西蘭花加煙肉，好有家既感覺~ Carbonara $110意粉既靈魂人物代表又點少得Carbonara呢？雖然好common，但又唔係度度都整得好食架喎，呢度個汁煮得又濃又滑又creamy，仲有唔少煙肉，另加黑椒調味，每條意粉都盡吸精華，食到成口都係汁，yummy~~ Lasagna carne della mama $139原盤焗製熱辣辣上枱既千層麵，芝士溶化喺香濃肉醬入面，賣相已好吸睛，闊條麵、肉醬跟芝士，食落煙韌軟綿，口感層次好豐富，將芝士肉醬配麵包食又會有另一番滋味，麵包唔夠仲可以追加添~ Porcini and Ham Penne $140長通粉煮得彈性有嚼勁，濃稠奶滑既忌廉醬汁入面充滿菌味同火腿既鹹香，d汁滲晒入長通粉中間，食落口感更rich，有去過意大利既朋友話煮法好正宗，下次再黎一定會encore~…Read More

好多女仔朋友都對buffet又愛又恨，雖然超多美食當前，但有人怕肥唔敢喪食，有人就根本好細食，食一兩輪已經話飽，蝕本蝕到入肉~>.<好在近年好興半自助餐，勝在貴精不貴多，前菜、甜品任食，中間黎一個即叫即整又精緻既主菜，咁就唔覺浪費啦~三姊妹黎到呢度，先飲下餐湯同食下中西式前菜頭盤，再一人一款主菜，又可以順道Girls’Talk，真開心~脫脂奶烚白鱈魚($298)：非常啱女仔食，白滑脫脂奶遇上白雪雪既魚肉，齋睇賣相已覺吸引，仲伴埋咁多有益配菜，絕對係健康輕盈之選。海南雞飯($168)：雞肉滑嫩順口，點埋甜豉油、甜酸醬同薑蓉更加係錦上添花。碗飯有種淡淡既雞香味，鬆軟可口，最緊要係唔會太油。慢煮澳洲和牛面脥($298)：大家都知，慢煮既好處就係可以保存同鎖住肉汁，所以食起黎好juicy入味，軟腍無筋。配菜夠多，唔怕食得太多肉。…Read More

現在出街搵地方食飯，發現很多食肆都屬於集團式，所以更加珍惜一些出品有質素的自家小店，這裡就是其中一家。喜歡這裡簡約的設計，還有桌上放有一些聖經語句，令人身心都好平靜。這次點了黑松露醬薯條，想不到兩者竟然咁match，薯條炸得香脆juicy、黑松露醬味道香濃，最重要是價錢經濟，食得特別開懷。芝士焗雞軟骨棒面層舖滿厚厚的芝士，味道甚為濃郁，雞軟骨棒好有嚼口，肉汁豐滿更能帶出雞軟骨的質感。主菜是香煎龍脷柳配牛油檸檬汁，這是一道傳統法國菜，原條新鮮龍脷較冷藏龍脷柳感覺更矜貴，牛油檸檬汁酸中帶香，更能突出龍脷的鮮甜。…Read More

每次去泰國旅行都要吃個夠、吃個瘋狂，因為當地美食實在正宗好味又經濟，好彩在港也能找到價廉物美又夠地道的泰國餐廳滿足口腹~在泰國必吃的當然是生蝦刺身，即剝即食特別爽口鮮甜，而這裡的生蝦刺身肉質緊實富彈性，配搭泰式醬汁更能提升虎蝦的甜味，認真食到lam lam脷~我每次食泰菜都必點串燒。呢度有豬、牛、雞肉、魷魚鬚、雞腎同雞軟骨揀。我地叫左6串，串燒嘅肉有彈性仲有肉汁，食得出好新鮮。而點串燒嘅沙嗲醬味道又香又濃厚，好有風味，極似泰國街邊食到嘅味道，係呢度值得一試既小食~這次還點了招牌菜咖喱炒蟹，螃蟹夠大隻肥美，味道香濃不會太辣，價錢亦相當經濟，難得難得~芋頭海鮮飯比人感覺好足料，面層嘅海鮮同冬菇舖得又厚又滿，個醬汁同d料都幾夾。底層係炒飯底加大大舊嘅芋頭粒，芋頭每舊都好香同好粉，食落夠晒飽肚， 呢個飯充滿唔同嘅味道，好有層次，食落滿足，抵食~泰式炒通菜入面有好咸香豆辦醬味，通菜食落夠嫩唔老，合格；而椰青夠大個，入面多水飲，形狀四正，靚過好多其他泰菜館嘅貨，28蚊個都算平~…Read More

前陣子到首爾旅遊，那邊的炸雞啤酒潮依然吹得狂熱，隨處都能嘗得到；回到香港，十分懷念那份味道，於是特意上網搜尋，找到這家看上去很地道正宗的韓國餐廳，希望能重拾那種令人一試難忘的滋味！鐵板菜式在韓國一向大受歡迎，這裡的芝士炸雞正好包含了炸雞、芝士和鐵板3大人氣元素，一上枱職員就馬上幫客人將芝士及雞件二合為一，邊炒邊傳來陣陣 濃郁芝士味，非常吸引！大家記得要趁熱食，熱熔的芝士包圍著香脆的雞件，一口咬下去即嘗到啖啖肉的嫩滑雞件，與芝士同吃格外惹味，而粟米粒就起了中和膩感的作用，同時豐富了口感。有炸雞，又怎能少得它的好拍檔啤酒呢？這裡的海特真露正進行推廣，合乎我心意，啤酒口感新鮮甘醇，細味頓覺清涼順口，獨特的麥芽香氣更讓人甚為陶醉，感覺自己就像劇中的千頌伊一樣，一口雞一啖啤酒才是王道，不用轉場就能吃得好又飲得盡情！…Read More

天氣一凍，有乜好得過約埋成班friend一齊「烚下烚下」咁過癮？有朋友之前嚟過呢度食，話佢哋食物有水準得嚟價錢亦合理親民，仲不時有promotion益食客，所以我哋一早book定VIP房，8個人邊睇住電視、邊歎美食兼吹水~首先見到呢度搞緊個優惠，$498就可以歎到加拿大象拔蚌刺身及椒鹽兩食（原價$888），大家一致通過要叫~兩種食法一冷一熱可謂各有特色，作為刺身可以食到果份新鮮同爽甜，師傅切得很薄盡顯刀功；而椒鹽就非常香口脆身，見到好多檯都有order呢個兩食，就知抵食啦~由於呢個兩食實在太滋味，大家決定照辦煮碗，再嚟一個章紅魚刺身及椒鹽兩食，章紅魚刺身突顯肉質鮮美、清脆爽口有咬勁；椒鹽章紅魚就炸得好鬆脆，香口中仍能嘗到魚嘅鮮甜~另一個相當吸引嘅promotion，就係每位只需消費滿$200，即可以$1歎重慶麻辣雞煲！濃稠嘅醬汁緊緊包住嫩滑雞件，香辣惹味，雞肉盡吸香料精華同醬香，極為juicy~食到尾聲加湯打邊爐，配埋大大杯巨無霸鹹檸7，真係perfect match~火鍋配料方面，首先要讚讚佢哋個廣島珍珠蠔，蠔身漲卜卜好肥美不在話下，輕灼後入口好新鮮，蠔味濃郁，真係蠔中極品；另外叫左個外面唔多地方有得食嘅冰豆腐，佢係一種表面一層層狀似蜂巢嘅豆腐，唔花啲心機同時間都整唔出呢個效果，特色係呢啲小孔吸收咗湯汁同醬汁，所以食落格外美味。而美國肥牛亦做緊特價，$98大大碟，齋睇啲雪花紋分佈得咁均勻，肉色鮮明，已經可以想像到有幾好食~大家都搶住食，你一塊我一塊，肉質鮮嫩多汁，入口細緻有彈性，好快就畀大家掃清光喇~手打鮮蝦滑彈牙又滑身，仲見到大大粒蝦肉，鮮甜程度唔洗多講；至於瑤柱韮菜餃夠晒皮薄餡靚，咬開啲料好豐富，餃子所用的豬肉全部係新鮮瘦肉，唔會食到成口油，更全無冷藏肉嘅雪味，so nice~炸響鈴係近年最人氣急升嘅熱門火鍋配料，幾乎間間火鍋店都有得食，而呢度嘅炸響鈴酥脆無比，有朋友就咁放入口食，我就鍾意掛少少湯先食，亦有人鍾意浸淋晒先食，不過無論邊種食法都相當滋味，又係眨下眼就無晒~仲有一個優惠，就係食滿$1,000就可以$100換一碟原價$268嘅頂級安格斯牛頸脊（大），呢個promotion仲可以同其他promotion同時使用，認真難得！牛肉色澤紅潤，薄薄一片，放入湯內輕灼已好好味，食落質感軟腍好快融，油潤甘香，果然係頂級靚牛~見到個個都食得咁盡興，真係令人回味無窮，希望快啲再約齊腳嚟歎過啦~…Read More

同行朋友說這是一間曾經叱吒一時的料理店，我們選它的原因是因為不用等位及想搵個地方靜靜地傾計~入得去都預左價錢拿脷架喇，不過如果有返咁上下質素，我地都ok既~我地order左北海丼及極上壽司拼盤， 先說說北海丼，入面嘅三文魚同蟹捧刺身睇落同食落都幾fresh，三文魚刺身肉厚，油份充足，鮮甜美味，分量亦唔少，而海膽入口鮮甜，不過始終同喺日本食到嗰種入口即溶feel仍然有少少分別，算係不過不失，未至於有「大師級」既驚喜~至於極上壽司拼盤就有齊晒最時令既飛機貨海鮮，一碟有10件，三文魚、吞拿魚、拖羅、牡丹蝦、海鰻、海膽、玉子等應有盡有，最令人滿意嘅係拖羅，佢嘅油潤程度同鮮味都屬於上級，甘、香、油、潤、鮮、甜、軟兼備，係最值回票值嘅一件~整體而言味道唔錯，不過又未至於值到收呢個價錢囉~或者人地target既係遊客啦~~…Read More