ProFatProKat's Profile

呢日路經灣仔，居然俾我見到聰嫂甜品店，以前響坑口同寶琳，成日都會買嚟食。一直都好懷念佢嘅味道，於是立即入去幫襯。榴槤水晶珠：榴槤水晶珠是一道令人驚艷的甜點。水晶珠外觀晶瑩剔透，質感十分吸引人。一咬下去，榴槤的濃郁香氣迅速充滿口腔，讓人陶醉其中。榴槤的味道醇厚，與水晶珠的爽滑口感結合得非常完美。這道甜點不僅滿足了味蕾，還帶來了視覺上的享受。如果你是榴槤愛好者，這道榴槤水晶珠絕對是你不能錯過的絕佳選擇。椰汁紫米芋圓小丸子：這道椰汁紫米芋圓小丸子是一道傳統而美味的點心。小丸子外皮Q彈有嚼勁，充滿了芋頭的香甜味道。紫米的口感綿軟，與芋圓的軟糯相得益彰。椰汁則為整道點心增添了濃郁的椰香，讓整體更加香甜可口。…Read More

嚟到位於天后•亨環頂樓的「宴 • 鐵板燒」，望哂灣仔中環及尖沙咀一帶維景。開年食好啲，就試下佢哋嘅午餐。有幾個唔同價錢選擇，亦有是日新鮮推介可供選擇。我哋就揀咗$448嘅套餐試試7道菜，我哋兩個人就可以試哂唔同款式。季節前菜：松露油加慢煮鮟鱇魚肝打成cream狀，香滑濃郁加上脆脆多士，一啲都唔鯹。季節刺身（2款）：真鯛配上松露鹽+深海池魚，味道鮮甜，口感緊緻。本日精選壽司 （2款）：金目鯛+池魚配上柚子汁，少少調味突出魚肉更鮮甜。自家製的醃漬物：有5款選擇，酸甜開胃，清新解膩。沙巴虎蝦：用埋啲蝦膏去煮個醬汁，燒到非常香脆濃郁，加埋蝦肉爽口彈牙一齊食，口感十足。帆立貝配鮮海苔：配有自家醃漬嘅三文魚子，咸中帶甘甜，帆立貝煎得啱啱好半生熟，嫩口鮮甜美味。香煎鵝肝伴藍莓醬：鵝肝煎到外脆內軟，配上自家製藍莓醬及黑豆，酸中帶甜，啱啱好唔會酸澀，加上多士一齊食，油而不膩。 美國牛柳（厚燒或薄燒）：厚燒5成熟，裡面仲係少少粉紅，口感軟腍充滿牛香。薄燒配大量蔥及蒜片，層次豐富，非常香口juicy。鐵板炒飯配海帶面豉湯：炒飯非常乾身，炒到粒粒分明，加上大量炒香咗嘅櫻花蝦及燶脆既煎蛋一齊食，真係非常滿足。師傅仲有俾啲冇炒過嘅櫻花蝦我哋試，未炒過嘅真係完全冇吸引力。至於海帶面豉湯，香濃但太咸。炒什菜：椰菜甘荀韭菜花芽菜炒埋，配上自家製嘅醬料，非常惹味。整體嚟講，師傅細心照顧每位客人需要，大家有講有笑，食材新鮮，烹調美味，值得一試。…Read More

好多餐廳都冇聲冇聲咁關閉，有幸能係佢地關門前，再去品嚐一吓佢地嘅美食，總算將哪個環境、哪些味道、哪些人… 留一份回憶。呢間位於炮台山韓國餐廳，差不多係附近唯一一間，唔知係唔係因為最近開咗間新派嘅韓國餐廳，一個月之後，佢就結業了，真有啲可惜。以前都嚟過好幾次，啲侍應都係講韓文嘅，感覺幾地道。執咗又少一個選擇。係呢個最後午餐，我哋叫咗鐵板牛肋骨肉、鐵板辣豬肉同炆牛肋骨。😍前菜有泡菜、薯仔、涼拌波菜、炒瓜同牛肉/脷。份量多，味道正常，嗰碟牛肉/脷入味，肉稔，幾好味...每個午餐都包一碗飯同海帶湯，海帶湯淡淡地都有幾多海帶。兩個鐵板份量都偏少，有啲肉又比較碎，不過都幾香口，醃到好入味，有少少鞋。對比下炆牛肋骨，份量足，有蘿蔔、紅蘿蔔、冬茹，肉都多有成5-6舊，真係好好味，清甜唔會好咸。食到停唔到口。😋😋😋整體來講，已經幫襯過咁多次，但真係冇下次了。Good Luck。…Read More

晏晝食得豪，晚餐唯有食平啲同簡單啲，清清地嘅話當然係食啲湯麵食。經過呢間馬祖台灣養生湯麵館，睇睇個Menu全部都係藥膳養生湯底，感覺鬼咁養身… 一於就試下啦。晚餐時段，可以單點麵食，又或者有個一人商務套餐，當中已包含了小食、主菜、飲品。主菜有成廿款，有啲都可以配米線/手工麵或飯，真係唔知揀咩好… 最後揀咗兩個餐：L鹽酥墨魚春捲+11黑蒜藥膳農場雞米線+蜂蜜茉莉花茶同N台灣麻辣鴨血+8藥膳古早牛肉湯手工麵+愛文芒茉莉花茶食物唔夠3分鐘就熱辣辣送到，大大碗，睇落好足料，啲湯香噴噴真係有啲藥味。個農場雞米線，有4舊雞，仲有好多木耳同紅棗，湯底好香甜，亦有濃郁嘅紅棗味，飲落唔係好勁藥材味，同湯底偏油... 啲雞肉嫩滑，算係雞脾肉再搭隻雞亦，唔係雞胸，已經好感恩，米線煙韌，有咬口，唔會好糊。個牛肉湯手工麵，就有3件牛肋肉，燉到入哂味，啲肉又夠稔，另外仲有兩大舊蘿蔔，但好明顯係冇味嘅，又硬又有渣，好唔好食呀! 一啲都冇溶入碗麵到。呢個湯藥膳重啲，但都唔會好濃，飲落清甜，完全同雞湯嗰隻甜味唔一樣。手工麵非常好，唔會好稔又唔會好硬，口感好，啲湯都入到麵度，食落味道一樣。👍🏻👍🏻👍🏻兩個小食，墨魚春捲外脆內軟， 墨魚香滑，味道幾好。鴨血入味，唔算好辣，非常惹味。整體嚟講大件抵食，一份一個女仔應該食唔哂。有機會可以試吓。唔記得講個牛肉麵，食到尾聲，可能凍咗，就有啲一片片油凝固咗係面，即刻唔想繼續食😖😩…Read More

好耐冇Omakase，今日就去咗天后新開業嘅榊原午餐。Lunch time有3個set揀，Semishigure - OMAKASE 16品Kogarashi - 寿司15貫Nagoriyuki - 寿司13貫每個set都包埋茶碗蒸、味噌湯同甜品我哋就揀哋就揀咗Semishigure同Kogarashi。Semishigure包括：刺身4、和食、壽司6、海膽、卷物刺身：深海池魚、活北寄貝、鮫鰈魚、花椒酒牡丹蝦壽司：活劍魚、金目鯛、金鯛、黑鯥魚、 北海道銀雪魚、大拖羅和食：魔鬼魚面頰肉海膽：海膽卷物：蔥拖羅卷 布甸蛋Kogarashi壽司15件 (自選兩款)墨魚、赤貝、呑拿魚、活劍魚、金鯛、瀨尿蝦、右口魚魚鰭、 北海道銀雪魚、鬚長蝦、大拖羅、左口魚、海膽、金目鯛、蔥拖羅卷餐仲包埋茶碗蒸，有好多海鮮和蟹肉、味噌湯唔會好咸、雪糕係北海道椰子，有大絲絲嘅椰絲，都幾特別。整體都好新鮮，好鮮甜，調味恰到好處，帶出魚鮮味。我最鍾意嘅拖羅入口既溶，有啲魚魚油超正，海膽鮮甜，冇怪味，好好食，真係好滿足，招呼周到，師傅亦好禮貌，熱情招待。👍🏻👍🏻👍🏻依家新張期內免收加一，真係好抵呀！好想再約朋友一齊去食😋😋🥰**壽司set，有件唔記得影，同兩個set相同嘅就combine埋一張**～記性差，希望冇記錯啲魚嘅名～…Read More

早排睇Youtuber介紹呢間係炮台山嘅拉麵店，裡面嘅唐揚炸雞非常出名，咁啱今日經過就去試吓。可能已經兩點，Lunch time嘅人潮已過，入到去… 竟然一個人都冇，我都有啲出奇。差啲想行番出去。可能因為佢啲嘢唔算平，一個拉麵或定食都成百錢起，真係未必會有咁多人幫襯。Menu裡面大慨有拉麵、定食、小食揀，淨係唐揚炸都有4款唔同，原味、韃靼沙律醬、白蘿蔔蓉醬同炸蒜辣油。我就揀咗配韃靼沙律醬，感覺加啲醬會冇咁熱氣。定食包埋麵豉湯、白飯、同小食水雲、炸雞就有4舊，即叫即做，份量好足，剛炸起熱辣辣，皮脆肉嫩，又唔會好油。個皮炸到超脆，冇哂油脂，食落脆卜卜，啲肉又唔會炸到好乾，好滑好Juicy, 配埋韃靼沙律醬, 應該係蛋黃醬撈埋切碎嘅雞蛋同洋蔥，酸酸地好開胃，夾埋舊雞嚟食，簡直Perfect Match。仲有啲沙律，車厘茄同生菜，撈埋芝麻醬，又係酸酸地，兩個唔同既味道，可以中和膩嘅感覺，因為雞真係夠哂大舊，食哂超飽。😋😋總括嚟講一間小店，得十幾廿個位，一個店員，一個大廚。衝著唐揚炸雞嚟嘅話一定唔會失望。👍🏻👍🏻👍🏻…Read More

觀塘工廈Café都試過好幾間，今次揀咗係成業工廈嘅Four O Five Coffee & Eatery。行入大廈lobby盡頭要經過另一度門先見到間餐廳，門外亦冇指示，少少隱蔽。我哋入去時差不多7點，都仲有好多位，星期六都唔算Full。蟹肉牛油果🥑他他底層蟹肉撈咗少少沙律醬，中間以蕃茄間開，中層牛油果蓉，頂頭再放多塊大蕃茄同少蟹籽點綴，以心心造型擺盤，非常吸引。食落甜甜酸酸，撈埋嚟食，口感十足。😋✅煙肉芝士薯條🍟薯條新鮮炸起熱辣辣，薯條有啲乾，煙肉碎比較少，芝士醬都比較少，食落都一般，只係好似普通薯條咁。❎香烤單骨雞翼(水牛城)，個水牛城味唔算好辣，炸漿都幾脆，雞肉嫩滑又juicy，非常滋味。✅法式紅酒燉和牛面頰肉配薯蓉牛面頰肉好稔，有牛香，雖然我哋揀咗7成熟，都唔會好鞋，薯蓉好香滑好creamy，啲配菜(露筍、粟米仔、甘筍、蕃茄仔)煮過有味，唔會好乾，但個紅酒汁就.. 好少，而且冇咩味。❎蒜香白酒蜆肉意粉大大粒蜆肉，鮮甜美味，意粉軟硬適中，入口有濃郁蒜香味，又有少少辣，非常惹味。✅法式檸檬撻濃郁嘅檸檬味🍋，餅底鬆脆，酸中帶甜，好好味。✅經典原味梳乎厘班戟即叫即製，個pancake夠哂鬆軟，濃郁嘅蛋香，外脆內軟，簡單配以奶油及新鮮生果🍓🫐，再加上少少楓糖一齊食，口感十足。✅雖然坐低時侍應話限時100分鐘，可能顧客不多，我哋都坐到最後last order。環境舒適，都有好多梳化位。食物… 咸點真一般般，冇咩特別；甜點我哋就非常滿意。三五知己去食吓dessert都唔錯。…Read More

呢個星期六嚟到觀塘駱駝漆揾食，之前已經有啲目標，睇吓邊度唔使等，就去邊度。可能我哋去到都差不多兩點，人潮已過。最後，直入去梅 日本料理，入面仲有幾枱客，座位闊落，夠哂光猛。午餐時段，選擇種類非常多，午餐已有成十款選擇，另外仲有其他壽司、刺身、丼Set選擇。午餐：4品壽司盛配昆布湯烏冬（$78）壽司包括吞拿魚、赤海蝦、八爪魚，三文魚刺身2片，昆布湯烏冬，好大碗，烏冬好煙靭，湯底清甜，昆布偏少，幾好味。再加埋個蟹籽沙律，真係多哂飽。😋梅•極上壽司12件（$142）包蟹籽沙律、一串雞肉棒，6款壽司包括三文魚、吞拿魚、赤海蝦、油甘魚、帆立貝同鰻魚卷，再加件玉子燒。壽司飯有醋味，酸酸甜甜夠哂份量。魚生新鮮冇腥味。三文魚有魚香；吞拿魚夠油脂，入口即溶；油甘魚都夠肥美油香；但赤海蝦、帆立貝普通，冇乜味；鰻魚卷太多汁，不過幾好味，鰻魚冇骨👍🏻講真，周圍環境就真係唔算好居酒屋FEEL，有啲港式日本餐廳，但整體嚟講價錢唔算，食材新鮮，質素已好好。雖然午餐壽司嗰片刺身比另一份係薄啲啲同細啲啲，但70幾蚊，食到捧住個肚，仲冇加一，真係好抵食。…Read More

今日Lunch time又嚟到『Pause it』，之前食過，覺得唔錯，近近地就Encore一下。佢樓底高，空間闊落，環境簡約，又坐得舒服，真係啱哂同朋友短聚，享受時光。。我哋點咗杯凍伯爵茶朱古力，嚟到個樣好吸引，伯爵茶同朱古力味偏淡，奶味太重，亦都好甜。食物就點了牛油果莎莎醬炸薯條，即炸薯條幾香幾脆，份量夠多，唔會好油，上面嘅醬料都好多，旁邊啲薯條都可以沾埋啲醬食，平和咗熱氣嘅感覺。😍鹹蛋黃單骨雞翼，配上少少沙律菜，賣相好吸引，食落炸粉唔會太厚，濃郁嘅鹹香，香香脆脆，又juicy非常滋味。😋食完呢兩樣都已經飽了，但我地都點咗主食虎蝦青醬螺絲粉。送上嚟嘅時候，同我想像嘅差距好遠，餐牌寫明係虎蝦，點解送到嚟係變咗3隻普通大少少嘅蝦，雖然蝦都好彈牙，就係有啲失望，味道都幾好，螺絲粉沾滿青醬，食落清新，加上薄薄芝士片，突出了口味。其實呢啲文青打卡café，食物價錢唔算太貴，份量都ok，都經常會坐滿人，係炮台山呢啲比較偏嘅地方，咁啱路過係可以去試下。…Read More

今日又嚟西環食嘢，入門口已經有啲神秘嘅感覺。鬼混… 包含著中西信仰特色像，帶著點點各地色彩，又有條掛咗好多畫嘅樓梯，打卡一流。牛油果奶昔唔甜，淡淡牛油果味，fresh。草莓宇治抹茶梳打唔甜酸酸草莓味加上梳打，好醒胃。封門牛柳全日早餐，有竹炭多士(香脆咸咸甜甜咁)、封門牛柳(肉香又稔)、炒滑蛋(香滑但稍為乾)、兩條腸(香脆，其中細條有啲辣)、大啡菇(上面有芝士同牛油果醬，有少少咸)、薯餅、沙律同車厘茄。成個早餐都非常豐富，食材新鮮，正。蟹膏蟹肉燉飯，面頭有啲蟹籽同脆脆，幾有蟹味，Risotto唔算太硬，仲有菇撈埋一齊食，食落好creamy，好足料好有口感。巴斯克芝士蛋糕，原味軟心幼滑，夠延身，濃濃芝士味，好食。餐廳環境舒適，食物一流，價錢偏貴，限兩小時，服務一般。但同啲朋友影相打卡分享食物，的確值得再去。…Read More

今晚嚟到旺角打邊爐，鄰近地鐵站，非常方便。我哋一行7 人，幾個星期前已經Book定位，可惜張枱細到…機本上係放哂咁多個位嘅餐具之後，都放唔到其他，好迫好迫… 坐低冇耐就有4款小食送上有炸雞軟骨、中華沙律、陳醋木耳、手拍青瓜，味道正常，雞軟骨都好脆，幾好味。之後我哋就可以揀頭盤，有4款，麻辣雞煲同酸菜魚，兩人為一份，另外仲有1客3隻黑松露芝士焗生蠔同1客半隻芝士焗龍蝦，都係人頭計。雞煲只係叫咗BB辣，夠哂惹味同辣。酸菜魚都辣，魚肉都好嫩。焗生蠔同焗龍蝦，都新鮮、肉嫩口，正。跟住就係主菜打邊爐，首先要揀湯底，都有成10款，我哋揀咗鴛鴦湯底包括養生牛肝菌湯同特濃沙嗲鍋。牛肝菌淡啲，沙嗲好濃好香，啲材料吸咗啲沙嗲湯，夠哂入味。之後就送上一盤一次性時令海鮮拼盤，有海蝦、廣島蠔、日式蟹棒、魷魚仔、大元貝、蛤、鮑魚、鱔片、手打墨魚丸以及蝦丸。啲鮑魚仲識郁，樣樣海鮮都好新鮮，鮮甜美味，啲丸又彈牙。再嚟係一盤一次性安格斯牛肉拼盤，有拼盤包括手切牛小排、牛肩胛、封門柳同牛板腱，肉色鮮紅食落鮮嫩，有牛香。不過由於成盤都冇寫係邊款，食咗都唔知係邊樣… 其他火鍋配料都係用QR Code落單，非常方便，但選擇就唔算太多。主要係美國肥牛同特級黑豚肉；其他就係多款丸類同水餃，仲有炸魚皮、嫩鴨血、時令蔬菜等。我哋咩都叫啲嚟試下，丸還好，啲餃就… 唔叫都冇所謂。最後仲有飲品，種類繁多，有支裝氣水同其他罐裝飲料。本來like佢地社交平台就可以有Movenpick雪糕送，但我哋已經太飽了。無限時任飲任食打邊爐，每位只係$318未加一，一班朋友真係可以坐足成晚，飲飽食醉，非常過癮，抵，值得一試。👍🏻👍🏻👍🏻…Read More

同長老食飯，梗係揀佢地最鍾意既中式食品，又唔想成日食小炒，所以就揀咗上海菜。今次揀咗好幾款前菜，炭燒燻魚，香脆少少甜，魚肉就硬咗少少，魚骨偏多。四喜烤麩，味道正常，略為普通。陳醋水晶肴肉，非常出色，肉嫩通透，底部做咗陳醋啫喱，入口溶化同肴肉混埋一齊，酸酸甜甜食落非常醒胃，價得一讚。👍🏻👍🏻👍🏻小籠包皮薄，個頂都唔會厚硬，肉汁多，唔太特別。主菜叫咗香烤鴨，落單唔夠2分鐘就上菜，連士侍應都覺我出奇，所以食落皮只係少脆，啲肉都唔熱，顏色也一般。不過一個例牌份量都唔少，依家仲做緊優惠$208，仲包埋皮同配菜，一個九宮格咁包起嚟食相當豐富。鴨味都重，肉都夠嫩，略嫌個皮真係唔夠脆。紅燒肉，肉稔入味，肥而不膩，送白飯就好正。火腿津白，味道正常，火腿偏咸。最後，香茹醬鴨炒飯，炒得非常之香，唔會太乾，又唔會太油，好味。😋😋食品水準正常，環境偏暗，我哋5個人俾張4人枱加個主席位，上菜時根本唔夠位擺，侍應都要等我哋隻鴨食得差不多先再上其他主菜。整體而言，可以再幫襯。…Read More

話說義大利人話約我去食🍕，即刻話去啦… 由於義大利人只會去食啲正宗拿坡里pizza嘅地方，選擇不多… 佢話只有香港島先有，所以我地又嚟到Gustaci。今晚我哋揀咗3個款口味4 Formaggi (Mozzarella, Ricotta, Gorgonzola, Scamorza)、Prosciutto (Mozzarella, Parma Ham, Rocker, Parmesan)、Salsicce e Friarielli (sausage, Scamorza)，每個都外脆內軟，waitress送上🍕時已經聞到香濃嘅芝士味，非常之吸引。🍕好食嘅地方在於個餅底，煙韌得嚟最重要係個底要乾爽，唔會有水氣，呢間就做得非常好。👍🏻👍🏻👍🏻好有水準，唔識形容，就係好食，值得推介❤️❤️❤️。另外，我哋都叫咗3款Desserts，Tiramisu係最好，香滑，酒味唔重，好合我口味。Sfogliatella，個千層皮有啲硬同韌，唔係好食到個啲餡係乜味。Gelato Tris ，揀咗開心果（甜冇乜味）👎🏻，黑朱古力（香濃）👍🏻👍🏻，芒果（重芒果味）👍🏻。總體嚟講，食🍕🍕🍕係讚嘅可以encore💯。第一次嚟係星期五晚上，又嘈音樂又大聲，傾計比較辛苦，今次平日晚上，燈亮啲，人少啲，安靜啲，舒服好多，可以好好咁享受食物，唔錯👍🏻。…Read More

今次嚟到位於天后嘅ESC，落地玻璃，有2層高，空間感多，座位不算多。約中午1點嚟到，職員話樓上Full了，我哋只好坐樓下，坐咗係漆黑嘅客房前面。座位舒適，環境安靜，即使坐係Cashier前面，都唔覺好嘈，職員很好，上餐嗰陣見到唔夠位放嘢，即刻推多張枱過嚟，俾我地用。我哋叫咗兩份午餐，係包1杯$50嘅飲品，兩個人Share，所以張枱要放多兩隻碟，就唔位夠擺，哈哈~忌廉墨魚汁扁條麵配雜錦海鮮+Hot Matcha Latte先講講杯Matcha Latte，睇落唔錯，但飲落… 最怕就係熱飲唔熱，初初諗係唔係d泡泡令杯嘢冇咁熱，再飲下面都真係只係微暖，真係… 。個扁條麵，比我想像中有少少出入，味道偏淡，麵冇乜墨魚味，海鮮嘗算新鮮，整體都可以，屬於普通。香煎西冷牛扒配高纖食材和青咖哩醬汁+Homemade Lemonade另一個餐杯Lemonade算Fresh，但飲落都係比較淡；個西冷睇落麻麻，都有少少驚喜。煎到乾乾地，但外脆內軟，有肉味，個沙律有一堆藜麥係中間幾特別，仲有新鮮嘅牛油果、粟米芯、車厘茄、火箭菜同鷹嘴豆，個青咖哩醬… 我個人就覺得有d怪，同平時d唔同，但我朋友話好好味，有椰汁香，唔會太辣，幾清新。總括嚟講，西冷牛扒個Set係幾好，我見好多人都叫呢個；其他就冇乜特別，冇得揀嗰陣，都可以翻抄一下。如果再嚟，我就想試下韓式泡菜芝士千層面配肉醬，又或者其他時段嘅食物。…Read More