babypink88's Profile

睇到介紹而去，行咗兩轉，第一轉超多人排，冇買，今日再去，冇乜人，就買咗，點知原來係伏！外賣咗幾樣食物，四粒炸手打大魚蛋要38蚊，打開個兜，長條形仲幼過平時小食檔一串串嗰啲！就算話圖片只供參考，但爭咁遠真係太過份！50蚊沙嗲拼盤，個汁勁甜，微辣，一啲沙嗲味或花生味都冇，唔明點解沙嗲汁會係甜，總之難食。介紹仲話之前唔知咩展銷會上大獲好評，難以置信。38蚊菜脯蛋腸粉，只能講極普通，蛋唔知有冇一隻，只有一啖左右，腸粉亦好實好硬，豉油只俾咗一小兜，完全唔夠。街邊小食質素都冇，但收酒樓價，差。同場加映，見到應該係碌卡機，問可否Paywave，收銀嗰位乜都冇答，隻手伸去牆最埋邊張貼紙指下，似係表達「自己睇」，真係有禮貌。等攞食物時見到有貨送入店，兩大箱一盒盒似酒樓定燒味店嘅外賣膠盒，入面好似係已煮嘅鴨件，用黎整鴨嗲粉之類？總之個feel有啲怪，啲鴨肉絲唔係自己煮，係現成撕開only？…Read More

朋友睇咗人哋IG介紹，興致勃勃拉我去陪食，但真係大失所望…6點鬆啲等到7點，等咗超過40分鐘，但其實冇人排隊買或等攞嘢食。然後…啲食物質素真心唔掂😩蟹籽炒飯淡而無味，係真係冇味嗰種好似白飯撈啲白蝦仁，仲只係微暖；乳鴿冰咁凍，講緊係個中心位都冰凍，連少少暖都冇，而且見到下面有cm話個乳鴿係炸，但我哋嗰隻係豉油浸外皮only，而且啲肉仲有啲霉，好似白烚咗先拎去浸豉油咁；芝士豆腐係唯一熱嘅食物，但由芝士條變芝士粉，完全唔係嗰回事；蟹籽炒飯本身送甜品，送哂冇主動講，要我哋問先話送哂，同埋係唔飽，如果超細食女仔可能會飽。我哋體諒店主老人家，但我哋食飯錢都唔係攤大手板喺個天跌落黎，我哋都會肚餓，我哋等嘅時間都係時間，如果我等一個鐘你俾啲超好味嘅食物我，我接受，但俾咁質素嘅食物仲係凍嘅，就算話好平都唔值😮‍💨…Read More

坐低後叫咗女店員一次想落單，佢上緊菜話等等，等完冇回頭。Ok，轉叫男店員落單，叫兩次都冇反應，第三次叫勁大聲，終於應，點解行到埋黎去咗隔離檯冇話要落單的？！人哋見佢行到埋去，話是但落埋啦，人地兩個人，個老婆叫兩個椰子雞米，一個轉雞髀另上，一個唔駛轉，我坐隔離檯都聽到，佢企人哋面對面竟然聽唔到，落咗雞髀另上嗰個後，指住個老公問「佢要咩？係咪唔駛」？！個老婆無言，話我咪話要兩個囉，淨係一個轉雞髀另上。男店員「啊」後就一路撳佢部落單機，然後直接走咗，冇過黎我檯落單，由佢個勢想走，到佢行到返收銀，我地勁大聲叫咗四五次「唔該」，佢都好似聾咗咁完全唔理人。我哋要舉晒手叫多好多次，直至店員見到我哋叫，好大聲叫佢話「嗰邊落單呀」，佢先識過黎，然後我哋想嗌嘢食，佢話等等，跟住企咗喺我哋張枱旁邊幾分鐘淨係篤嗰部落單機，督完先嗌到我哋個兩碗。我哋淨係叫咗兩碗米線，然後等上菜先係精彩嘅部份。男店員首先上錯雞腳小食俾我地，再上錯米線比另一檯，然後又上錯小食同嘢飲比叫兩碗椰子雞米嗰檯，仲要擺低就走咗，完全唔理人哋挨住佢話冇落過，總之全部錯晒。女店員鬧佢「你落錯晒全部單，你唔好再落單，廚房而家好嬲」，跟住我見佢長期係企喺收銀度收錢，連門口有人入嚟要帶定安排座位都唔識，基本上所有嘢係女店員做晒。個米線好味，啲湯都好味，以前食過黑蒜同花雕醉雞都好味，但蕃茄湯真係唔係好掂，甜得好假。但個男店員咁樣做嘢真係好攞命，會搞到人唔敢再去食，而且一個小食嘅價錢基本上等於一碗米線，其實都幾黐線，譚仔碗米線平過佢，啲姐姐又好過佢，真係搞唔掂。…Read More

同屋企人三個食炒蛋好少，碎哂，根本冇兩隻蛋嘅份量啲湯麵湯米，個湯好似清水咁，完全冇味米粉又未煮開，硬到飛起叉燒浸哂落湯，又係冇哂味叫咗個擔擔麵，都加埋肉碎，一片紅油喺湯面，以為點都有味，又係清水一樣屋企人仲加咗個豬肺湯，又係清水咁，湯冇味，料又冇味三個茶餐，全部唔係冇味，就係冇味多士要多烘，又冇多烘基本上廚師好似唔識煮咁，同其他分店爭好好好遠！Btw以前黎過想買燒味外賣，個斬料師傅態度極差得啲侍應姐姐禮貌比較可以…Read More

買咗觀塘東廣場嗰間好多次，之前用膠兜時，個兜次次都係裝滿，無論係一個餸兩個餸定係三個餸都係好滿，滿到個蓋要壓落去先刪到。之後轉咗紙兜今日第一次再買，個紙兜竟然係以前膠兜一半嘅高度！我攞完問老闆係咪縮咗水，點解有啲人係高嘅紙兜？老闆話三餸或以上先係高嘅紙兜，又話個份量冇減少。Ok信佢，返到屋企一打開個蓋就見到分別，麻辣牛柏葉差唔多得返以前三份一嘅份量，以前有好多，滿晒，而家連個兜面都鋪唔平，仲話個量冇變！粉嘅量好似真係冇變，但所有餸嘅量只係得返以前嘅一半或三份一！但價錢完全冇改變，非常呃錢！食完今次真係唔想再幫襯，以前食完會好飽，就算兩個餸都好飽，而家食完簡直只係覺得食咗個杯麵咁嘅量，但要$58！離譜！我以前好鍾意食，差唔多隔兩三個禮拜就想食，多謝佢幫我戒咗！…Read More

同同事夾埋都試咗不下10次想book，2-4位早午晚都試過，個booking system好有問題。搭正00分00秒入去，有好多次都見到至少5個熱門時段已經冇，懷疑根本有後門走，可以提早book。㩒咗時間後，system唔係lock住，係要再鬥快俾訂位費，而我地係每次去到呢度就被彈走。一個餐$138，要人信用卡每人lock $178計位其實已經好無稽。每次彈出後，同一頁面你必須要等60分鐘先可以再入，唔係計有冇人排隊，係個system自動計你60分鐘，因為我地換機入，係即時入得返，而且仲有時段可以book，但同一部機你refresh幾多次佢都唔會俾你60分鐘內再入到。即使close browser再開，佢俾你入，但唔會load時段俾你睇，即亦係有位都唔俾你book。仲要有次同事揀嘅時段system聲稱太受歡已經冇，叫我地再揀過，被彈出後，我地即時轉機再入，發現佢本身揀個時段根本仲available，我地再試多次，但system仍然係話太受歡迎已經冇，再彈出，唔知做乜。得一間，位少，booking system差，真係好趕客，我地都決定咗放棄唔會再試book或去食。然後有經常返深圳嘅同事話，原來深圳都有，仲平啲，少啲人，排隊唔駛book。雖然返深圳我地都麻麻，但你引入呢間店得一間，位少要人咁爭位book，又要hold信用卡又要system差，就算我哋唔去深圳，其實試幾次都book唔到都唔會再想去。唔好同深圳比，試下同自己牛角其他食肆比，成個booking system都已經有問題。真係建議佢整返入自己app做booking，好過仲要開多個booking site。…Read More

其實唔係第一次食牛角，食物係點都唔太需要評論，食開都知有咩食同食物質素、價錢如何。但今次特登寫食評係因為餐廳中兩位男職員實在太好人，我同家人食緊時，店中有兩位穿恤衫嘅男職員已經非常殷勤服務。隨後離開後發現爸爸唔見咗把日本買嘅縮骨遮，爸爸立即返回尋找，兩位男職員幫佢搵枱搵凳搵地下，出動埋手機電筒周圍照，但都冇搵到。之後可能爸爸個樣實在太愁，高高瘦瘦嗰位男職員竟然提出可以幫我哋睇CCTV，睇到坐低後，爸爸把遮喺個袋邊，之後真係唔知點解不翼而飛。職員幫我哋睇晒成段CCTV ，都搵唔到究竟把遮幾時唔見，但就表明佢哋收店後清理會再搵一次，如果搵到就打返俾我 (book枱時有留電話)。本來都唔抱咩期望，點知夜晚11點幾真係收到職員通知，話搵返把遮，叫我哋有時間返去攞！爸爸真係喜出望外，雖然只係把遮，但因為佢喺日本自己精挑細選買，超輕便，佢非常鍾意。真係非常感激兩位職員咁盡力幫我哋搵把遮，講真呢啲真係額外嘅服務🙈，只係小小一把遮，但因為爸爸嘅難過樣佢地就咁幫忙，真係好感激！是次牛角套餐選了Level 2，包括美國和牛及王樣，和牛肉質非常鬆軟多汁，而且脂肪分佈平均，王樣腹胸肉整塊沒有脂肪層，但肉質軟度不輸和牛，有質感但同時軟熟。套餐包含的帶子體積雖然偏小，但每次要二至三份的話都以大錫紙兜提供，牛油燒起來非常入味。…Read More

之前食過油麻地、尖沙嘴、將軍澳分店，甚至深圳都食過兩間，都有叫毛肚，都有整甲，但銅鑼灣店真係兩樣都極反感。我叫親都係普通毛肚，唔係脆脆毛肚，每次食都冇問題，但今日食時，生時冇味，一放落湯煮，就有陣💩味攻出黎。因為一下就冇咗，所以第一下唔為意，以為唔知邊度飄出黎嘅味，點知點埋醬食入口，有醬都蓋唔住，啲💩味係咁攻出黎。我以為只係嗰塊變咗，聞下生嗰碟又冇味，就試多塊，又係一淥落湯嗰下好大陣攻出黎，淥完第一下聞，好似冇咩，但放多幾秒，就越黎越強烈，臭到我作嘔反胃！即刻叫侍應黎講，叫佢聞下，佢唔肯聞，同我講「你叫脆毛肚，係會有少少草青味」。我話「我唔係第一次叫，唔係草青味，你自己聞下，係臭架！」佢話「如果你唔鍾意我幫你退咗佢」。佢肯退，我就算數，但認真佢自己都唔肯聞。食完啱啱排到整甲，個美甲師叫我揀色，點知一望我指甲就問我啲夾喺邊度整，因為我之前見過佢哋啲美甲師話佢哋嗰度嘅工具拆唔到hard gel，我以為佢係問呢樣，我就話唔係hard gel，Soft gel黎。點知佢問我「係咪唔係喺海底撈整？」我話喺其他店整，佢就答我「唔係海底撈整嘅夾我哋唔會拆，你出去拆咗先返嚟再整，我俾張美甲卡你。」食過三次，連埋深圳五次，今次第六次，前五次都有整甲，未試過有一次個美甲師同我講唔係嗰度整嘅甲就唔幫我拆。我唔係成日食，但甲就成日整，所以每次喺海底撈整甲，原本啲gel都係出邊舖頭整，冇一次同我講唔拆出面店嘅gel。我出去單拆甲要$50-$100，但如果整埋單色都係$2XX包拆，海底撈啲美甲師手勢唔係特別好，整完又透光又唔smooth，仲試過兩次整好第二日就gel同夾分離，咁試問如果唔係食嘢免費整，我點解要特登出去俾$100拆甲再返嚟搵你整？我俾多百零蚊去專業nail salon整唔好？！唔知而家係銅鑼灣店差到咁，其實全香港海底撈都已經變到咁差，一開始以前係以服務做招徠，而家連服務都冇，真係唔想再去。…Read More

味道其實唔錯，但呢個價錢一個細杯，個杯竟然有80%係冰同檸檬碎，實質飲到嘅茶可能得20%都冇，$28係超唔值！而且唔知點解個頂要加張牛油紙冚住，支紙飲管篤落去要好用力，雖然話檸檬茶得好少，但紙飲管竟然可以喺我連嗰20%檸檬茶都未飲完，就已經爛咗。膠杯蓋個督飲管位夾爛、吸入口個位又爛、篤到底個位又爛，基本上最後嗰幾啖我係要開杯蓋飲，仲要啖啖都俾啲冰頂住，有冇考慮過啲敏感牙齒嘅人嘅感受？！一句講晒，飲一次就夠。…Read More

買外賣自取兩個麵，一個要蕃茄，另一個加$4要麻酸走辣，揀明走辣。點知拎咗返到屋企，就見到啲辣椒浮喺湯面，飲咗啖，辣到飛起，完全食唔到好在有另一兜要咗蕃茄湯，分咗一半先唔駛食乾麵牛魔王啲牛已經少過以前好多，又肥，而家連湯底都搞錯，離哂譜，仲要收銀員態度勁差，好似啲客買嘢係阻佢收工咁。屋企人早前去食，爸爸坐住由媽媽拎住兩張樂悠卡去買，想每碗送個菜，指埋俾收銀員睇爸爸坐邊，收銀員睇完仲要質疑，竟然要求媽媽除口罩對樣，先黑口黑面咁打單，搞到媽媽好唔開心話以後都唔食。嗰時我聽完本身安慰媽媽話佢兩個個樣後生，但而家睇黎收銀嘅面口係真係差🤯🤯🤯…Read More

同屋企人食，我叫咗芝士辛辣拉麵，屋企人叫咗其他口味，因為唔係第一次食，屋企人食咗幾啖就冇哂，話細碗咗好多，而且舊叉燒以前冇咁多肥肉，而家差唔多半塊都係肥膏。我食時會加佢檯面個黑蒜蓉醬，落湯再撈開，以前用到好底都冇事。但今次食，發現high到醬嘅拉麵有啲酸味，但因為叫咗芝士，而芝士溶成一舊其實都有少少酸味，所以冇特別為意。。。點知真係個醬變壞咗！事關夜晚到半夜到第二朝，足足痾咗三次，個肚痛到往生咁，爭啲平安夜仲要入院，好在痾完第三次就冇再痛，但腸胃有排調理返…Read More

譚仔regular嘅米線同小食不嬲都好食，但間中出新嘢都會身痕想試下。尋晚同屋企人堂食，我食返普通揀餸嘅配搭，好味，屋企人身痕試新嘅撈寛粉，啲餸因為都係米線嘅餸，所以冇問題，但寛粉，唉，個底有1/4碗淥麵水浸住，撈埋出黎啲味冇哂，甚至一路食會一路索汁嘅寛粉索到食完，個底都仲有幾羹水淨，令寛粉冇哂味。走時買外賣俾屋企人冇落黎食嗰個，想要素米線，點知姐姐話冇哂素肉醬所以冇得叫，本來想問可唔可以轉真肉醬，但原來冇其中一味，收銀機就會lock咗嗰個組合，你叫咗轉一味都唔得🤷🏻‍♀️所以又叫返普通配搭加啲小食。都係小食最好味…Read More

父親節帶爸爸公公，一行5人食，啲外公有身體不便，我地早到想揀方便佢出去去洗手間的位，當然店內8成滿，Reception職員帶我媽入場逐個available嘅位睇，任佢揀，仲幫我地hold檯10分鐘，因為公公行得慢，未行到。我同爸媽係第二次食，但公公第一次，見到所有嘢都覺得好新奇，本來唔肯出街，去到咩都肯試，仲主動話落手燒肉，話好好食。埋單走時我地唧雪糕行住食，本來唔食雪糕嘅公公都話要自己唧杯，仲食哂，之後仲肯喺商場行陣先返屋企，心情好好。少貴但大家食得好開心，好值Btw之前喺美麗華分店，因為Reception職員俾錯info所以冇join會員，去到觀塘分店，Reception都叫我地join會員，成個講解好詳細好清晰，仲好有耐性，所以我join咗，當晚食嘅折扣同減埋現金券已經回咗本有多…Read More

之前試過牛角定食，第一次試buffet，食到好飽。Level 2其實基本都夠食，但母親節媽媽想食Level 3啲肉，爸爸想食海鮮，叫咗Level 3。諗住100分鐘好趕，一坐低就不停食，但原來都夠時間輕鬆燒。出面自助counter好多嘢攞，仲有紫菜同雪糕。自己燒考技巧，啲肉片快熟，唔好燒太耐。不過唯一唔好嘅係美麗華分店reception職員對會員講解好唔清晰，話我地食早割就算會員都冇折，而正價時段，因為係母親節，所以就算即場join會員都係冇折，所以當刻冇join會員。但之後父親節去觀塘分店再食，嗰間的Reception職員話會員早割雖然冇折，但正價時段任何日子都有折，而且折後係平過早割，仲有好多優惠券同其他優惠送，仲教我地嗰日join完食咗父親節後，之後會有咩優惠等等，非常仔細，最後父親節嗰餐join咗會員，當晚折扣同用埋現金券仲即時回返哂join會員個價錢。…Read More

以前食過好多即食碗裝同要煮嘅包裝，價錢十幾至廿幾都有，諗住有新鮮嘅去試吓，失望到不得了叫咗「走辣」湯底，點知黎到好辣，臭豆腐辣，鴨血都辣。大大個碗，得個底少少米線，充分表現咩叫「圖片只供參考」，同餐牌上嘅相完全對唔上。所有餸都係得少少，一碗話有牛肉但得兩三塊，但張相有一堆；另一碗話有酸菜，但我爭啲搵唔到酸菜喺邊🙄話湯底用幾多時間煮，但…冇鮮味，唔知煮咗乜？！平時食譚仔會好想飲下啲湯，但佢個湯冇味到唔想飲。更離譜係，個米線係煮定放喺碗好耐，上檯已經結埋一舊，用筷子都爭啲叉唔開。你煮定唔緊要，有人叫，你放返入個煲滾返開佢都好掛？！總括黎講，叫走辣但辣過譚仔5小辣，一個辣到個嘴腫咗，一個辣到灌咗成支水；份量少到喊，女仔食都未必夠，男仔食一定唔夠，你冇咁多俾人，用咁大個碗其實有咩意義？唯一可以讚係新舖，所有嘢都仲乾淨同新，冇喇😐BTW我一星期前lunch行過，想試，點知店員話未開，叫我遲啲再返黎，即閒日1點幾2點，個個放lunch都唔開，係咩玩法？…Read More