LeStanley's Profile

漢堡包係一樣好邪惡既食物, 成日都想食但又因為佢既卡路里而郤步, 所以係好想食既時候都要揀過先食今次就揀左明明係屋企附近但一直未有機會試既添福漢堡本來諗住去到買完就有得食, 但去到先知原來無堂食, 只可以買外賣攞走係等既過程其實我都幾"不滿", 因為佢D 野食既味道真係香, 可能我又肚餓啦. 個晚我差唔多7點到落order 見到我前面都有五六張單排緊隊, 等左15-20分鐘我哋兩份餐就搞好. 之後仲要行到番屋企先有得食, 成個過程真係好折磨 LOL不過呢個等待係值得既! 我點既係黑松露啡菇牛堡. 我打開包裝見到個菇時其實我係有少少失望, 因為佢唔似出面個D 切碎左再炒香佢會有D汁咁, 而係原隻菇夾落個包, 菇既表面又無汁比較乾身, 我心諗咪會好似後期唔多掂既triple o 咁, 會係一塊有青味半生熟既菇俾我呀.... 但係一咬落去, 嘩, 原來係好熟, 佢好軟身但又唔係冧到咬唔開個d, 係新鮮既啡菇先有既效果! 塊牛肉本身都係軟身多汁都好好味, 但我已經完全俾塊菇既美味吸引左去! 超好味!! 成個餐先五十幾六十蚊, 我覺得淨係個包都值呢個價.跟餐既薯條係粗身個隻, 熱食好好味, 不過可能我哋又外賣加上食完個包先再食薯條, 就有D 變冧左. 但整體黎講水準之下. 呢幾個月我食左幾次漢堡包, 貴過呢到都食左幾次. 但SO FAR 呢間真係最好食!! 好食到連咁耐無寫食評既我都要寫一寫紀錄下!!…Read More

呢間野平時去都好多人排, 但抗疫期間個個都係屋企食飯, 係屋企食左幾日外賣, 趁住要補貨順便去埋食飯. 去到見到佢果然無人排隊, 今日終於可以試下喇.入去坐低, 見到佢餐牌上面居然會有素食. 食左幾日外賣, 都無乜食菜, 所以就揀左個素菜黎扼下自己. 自先到既係朋友既沙嗲牛肉, D 牛肉好嬾, 吵嗲味好香, 好食之後我個黑椒素牛腩都到左. 點素既人都好奇怪, 到左之後都好期待究竟碟野扼唔扼到自己 LOL.  咬落去第一下OK喎, 真係好似牛肺腩咁一層層一絲絲咁. 同埋個黑椒汁都好惹味. 同埋其實佢兩碟餸都好大碟, 早知咁大碟既話我哋其實可以叫一碟餸叫兩個麵都好夠. 叫個主菜加碗麵就送杯野飲. 抵晒!!!…Read More

最近社會動盪不安, 好耐已經無一班人食飯. 經過4個月, 要走既走, 淨底既人今日終於有心情聚埋一齊食飯. 亦都因為咁今日餐飯有成6個主角! 主角太多, 生日蛋糕唔知就得邊個. 最後諗到既然成班都做運動既, 所以個主題不如就健康DD啦.為左就番可以攞蛋糕既人既方便, 就隨手揀左位於九龍灣既Jenjen Bakery. 係佢IG見到佢D蛋糕賣相覺得好靚. 但我係佢哋其中一個POST見到佢哋月頭已經可以接open order 接到下年2月. 因為我哋係星期二訂星期六要, 開頭都驚訂唔到, 好彩佢哋話接單, 如果唔係真係唔知去邊到再搵.最後揀左個 "無油攻瑰草莓伯爵茶戚風蛋糕", 8吋, 低糖少cream. 盛惠$658. Compare to 連鎖既餅舖其實有D貴, 不過都用左咁多時間, 就睇下有幾好食.夜晚食完飯攞個CAKE出黎切, 一攞個CAKE出黎, 個個都話個CAKE好靚, 個顏色好特別. 但當我同佢哋講個CAKE 無油少甜少CREAM, 成班人面有難色. 係成班人之中我係食得最清淡, 雖然話大家都好注意飲食, 但聽到我咁講都不禁倒抽一口涼氣!  但佢哋既擔心好快就釋除左, 因為最為食嗰個食左一啖就讚不絕口, 其他人食完都讚俾想像中好食! 15個人分呢個8吋既蛋糕確實有D唔夠, 因為個個都想再食. 戚風蛋糕既部份軟密幼滑. 中間既部份有D 類似麻糬咁既QQ狀既物體. 雖然少甜少cream, 但可能因為用料好既原因大家都覺得其實好夠味, 甜度仲啱啱好, 唔似本時食嗰D死甜咁. cream 係少左, 但我覺得比例都啱啱好. 老實講我平時唔食cream, 今日我都忍唔住口食左粉紅色既部份. 整體感覺VERY GOOD, 大家話11月生日要再番炒呢一間. 只要肯行多步其實會發覺事情俾想像中容易. 小店真係俾到驚喜你. …Read More

知道新開左間PIZZA舖, 好耐之前已經想試下. 咁啱今星期要係屋企大掃除, 決定LUNCH既時候一試! 上網SEARCH既時候發現佢係PIZZA HUTS既副線時心下一沉. PIZZA HUTS咁唔得, 副線咪會仲衰? 但係見大家對佢既評價一般都係好過PIZZA HUTS, 所以都決定一試~~~~之前行過記得佢話如果外賣自取就可以半價ORDER一個大批+小食. 上網睇下最後我哋決定要個千島醬海鮮芝心PIZZA, 葡汁雞肉長通粉. 唔知係唔係未到最繁忙既時間呢? 打電話去ORDER佢話十分鐘就可以有得攞. 自家外賣速遞員落樓後一陣就番, 未打開盒都已經聞到千島醬既香味. 即刻開餐:千島醬海鮮芝心PIZZA: 雖然唔係我食過最多料既pizza, 但係一定比pizza huts既多! 千島醬既味道好濃, 酸酸地咁確實係好開胃! PIZZA上既海鮮無咩特別, 不過份量足夠, 唔會有一啖係咩都無先~~~ 但係唔知係唔係焗得唔夠耐, 又或者係唔係即場食既關係呢? PIZZA批邊入面嗰D芝士涼左, 只係食到一舊舊既芝士, 無咩芝士味, 又唔流~~~葡汁雞肉長通粉: 唔記住左個通粉個名有無個焗字, 但係食嗰陣就知道D汁係後加上去再放入焗爐到焗左一下咁. 不過個汁既味道都OK既. 叫呢個餐仲送左一個細PIZZA, 名我唔記得左喇, 淨係記得好抵, 咁多野都只係 $119! …Read More

第一城明明有咁多人, 又多學校. 附近仲有幾個屋苑係自己無呢d設施. 大把生意, 唔明點解硬係無一d好食既食肆開入黎! 所以我盡量都唔會係番第一城食飯. 呢幾年有時無辦法都會落街食一兩餐. 今日係無選擇既情況之下揀左呢間打正名當, 和民同一集團既和亭黎食! 未食之前已經有預感佢唔會好食, 不過朋友揀左, 咁就呢間啦.我哋差不多2點先去, 食飯時間既人流啱啱散去. 所以3人枱都係等左5分鐘左右就有得入. 店入面既裝潢係一貫既日本風味. 雖然呢間舖頭新開, 但係我坐入到去既感覺我反而覺得沙田開左幾年既和民好似仲好. anyway, 點左個咖哩豬排飯既set lunch, 包湯, 沙律同野飲!soup: 黎得日本餐廳就一定係麵豉湯. 不過我覺得佢個湯好味精... 沙律: 普通田園沙律, 但係加左一大湯沙律醬. 我毎醬又係鬼咁濃味... 揀左無係旁邊嗰小部份菜食左就算.咖哩豬排飯: 個咖哩無咩咖哩味, 但係我食落去覺得比正常咖哩咸~~~豬扒炸得不錯, 全餐某一一樣ok既野. 凍奶茶: 甜到~~~ 好似飲緊糖水咁... 我懷疑佢係唔係落多左兩次糖水~~~~我哋入去嗰陣已經過左午市高峰期, 但係所有野都好慢~~~ 無人加水, 落左order之後勁耐先出order. 不過原本就無期望, 所以都無話失望! 下次都係去番m記嗰d無咁受罪!…Read More

自從我心愛既main st café 搬離朗豪坊之後, 我已經好少去朗豪坊hea時間喇. 不過今日因為同行友人又話要去hazzgandas到high tea, 所以我再重臨舊地~~~ 係同一個位置, 但係就好多野唔同喇. 以前main st café既裝潢選用一d比較深色既設計, 同而家hazzgandas用白配紅既顏色有好鮮明既對比. 而且hazzgandas既環境清潔好明顯都做得比main st café好好多!朋友話佢今日黎一定要試下佢哋既coffee, 因為佢每一次幫襯時落完order之後佢哋一定問佢要唔要試下佢哋既coffee, 而佢每一次都話下次先, 所以佢今日一定要兌現佢既承諾喎!! 我哋3個人最後決定叫一個royal tea set. 3層既tea set上枱既時候真係覺得佢好高貴呀. 由最上層講起先: 上層係3球雪糕配朱古力撻皮. 另外有3個mini 雪糕配酥皮. 呢個同佢張相有d唔同, 嗰個朱古力撻皮既朱古力唔夠濃, 其實食完雪糕再食嗰個朱古力撻皮其實咩味都食唔到, 我寧願佢俾番個窩夫撻皮我仲好呀. 酥皮盒反而唔錯, 層次分明, 好酥呀真係!第二層係幾個西式既MINI甜品. 其實幾個樣都只係普通野, 同 “好味” 二字好似無咩關係~~~ 合桃批既合桃無咩合桃味, 不過好彩都仲係脆同埋佢用蜜糖合桃, 所以都仲有D蜜糖味! 兩個杯裝DESSERT, 一個係raspberry, 一個係tiramisu慕絲~~~ 我唔係咁欣賞佢哋個口感./ 曲奇餅太乾, 同野都係無朱古力味, 最底層就係新鮮生果, d生果反而幾新鮮同埋全部都幾清甜. 所以成為最快比我哋清枱既一層.第一次試佢哋既咖啡, 估唔到又幾得喎. 佢哋既咖啡係屬於香濃型. 絕對係飲完會訓唔著嗰隻…. 好味!…Read More

少有地係香港食完上海菜之後, 因為係餐牌上面搵唔到吸引既甜品. 我哋最後決定都係埋單去附近既地方搵番個西式既甜品黎食下.諗左好耐, 最後就決定去hazgandaz. 好耐都無試過去hazgandaz到食野喇. 我哋三個人一打開個餐牌都就好興奮. 我幾年前食過一個叫做happy forever既九球雪糕. 難得有有人陪我黎我就梗係不斷咁游說佢哋陪我一齊顛啦. 結果~~~~ 佢哋當時就犯啦, keke!9球雪球都可以比我哋自己揀味, 我哋係到點既時候真係好開心, 因為可以一次過點晒自己平時鐘意既味道之外仲可以點d平時食單球既時候唔會點既味. 其實hazgandaz既雪糕既味道無咩變化, 都係大家已經食慣既味道. 反而係佢用黎墊底嗰塊蛋糕~~~ 唔知係唔係因為同埋雪糕一齊食既關係, 覺得特別好食~~~ 同埋可以令到大家平分3球雪糕之後個口無好漏既感覺, 好味道!食完呢個happy forever, 真係有一種好幸福既感覺呀, 哈哈!…Read More

成班嘩鬼gathering, 因為我哋志在傾計, 不在飲食, 所以初時定地點既時候確實係好傷腦筋, 最後地點定係世貿, cova 或 agnes b 任擇其一. 第一個到場既朋友係睇過兩間舖頭既蛋糕櫃之後就揀左agnes b. 我哋未夠三點到, 去到既時候都仲有幾張空枱. 不過我哋坐底無幾耐就到下午茶時間, 突然好多人都想黎呢個食下午茶, 搞到成間舖頭都有人企左係到. 我哋齊人既時候已經係3點3既事, 本來我哋睇中個lunch set, 點知原來個lunch set只係做到3點鐘. 不過好彩佢哋好好人話可以做埋俾我哋咋. 嘩, 個lunch set 有半件三文治, 一件cake同一杯咖啡都係$65, 我本來諗住我唔食三文治, 淨係叫杯野飲同蛋糕反而仲要貴$3 咁就梗係叫番set啦. 最後我就要左半份洋葱火腿三文治.我哋5個人叫左個4個餐, 一杯淨野飲. 但係佢哋都好似顯得有d手忙腳亂咁. 其中仲有一杯野飲等左半個鐘都唔見問佢哋先問可能唔記得先再整. 但其實 $65 一個agnes b set好似幾抵咁, 有cake有三文治有杯咖啡. 但係講質野都係差少少, 三文治最唔錯, 兩邊麵包係冷藏之前已經焗到金黃色, 仲有搽左層牛油, 中間既洋葱調味調得唔錯. 不過佢上枱既時候都唔係熱既, 所以減左少少分. 蛋糕我本來揀左個唔記得左名, 但應該有榛子味既蛋糕, 但係我係任何味都食唔出~~~ 唔係好得囉, 我食過我個frd個普通cheese cake, ok 過得去, 非常普通嗰隻. 唔值$30單價!! 至於咖啡, 我叫左杯iced cap, 有咖啡味, 不過都唔係好濃嗰種. 但好奇怪, 我同另一個frd都係叫iced cap, 但係兩杯既顏色差好遠, 應該係佢落奶同咖啡既份量唔同既影嚮, 乜... 無指引可以比佢哋亂黎嫁咩?環境就唔錯, 比$65坐左幾個鐘ok, 但如果話d食物就真係唔合格囉!…Read More

朋友之前黎過食完之後經常同我講話呢間野既早餐有幾咁好食, 今個星期得閒決定黎試下佢!我朋友之前一路同我講話係早餐, 我當時都心諗點解applegreen會咁早開黎做早市? 咁早市做一兩鐘又轉番做lunch嗎? 後來先知道原來係weekend bunch, 由12點至5點都有得食! 不過因為朋友話間野成日都好多人, 所以最後都係約早d, 以免等位. 其實applegreen啱啱新開既時候已經領教過佢晚晚fullhouse無得walkin既情況, 最後一次食完覺得d野唔值得我去等所以就無再黎到, 所以今日12點黎到見成間餐廳都無咩人對我黎講真係好奇怪, 不過後來同d待應生驗証過, 呢個日日都係依然咁旺場, 仍然都係晚晚fullhouse~~~~2個人揀左set b: benedict breakfast 同埋 set d: 火腿蛋三文治, 餐飲係凍咖啡!火腿蛋三文治個名非常普通, 但係黎到先發現真係一d都唔普通. 兩塊超厚身既方包, 夾住厚厚既炒蛋同火腿, 加上芝士味好濃既芝士. 真係要不顧儀態劈大個口先可以一啖咬晒所有野. 雖然塊方包好厚, 但係因為中間既材料都有番咁上下多, 所以都唔會出現淨係食到包既情況. 而且佢塊包係"靚包", 即係唔會好似係出面買嗰d方包咁, d發粉太多既麵包會無彈性, 見到佢大大個, 但係一咬落去好似無乜食過野咁. 但係呢到方包就無咁既情況, 好鬆軟. 烘左既面又香脆, 仲搽左層薄薄既牛油. 仲有佢配菜既烤薯仔碎~~~~ 因為係烤出黎, 所以又香口但又唔油, 食得健康呀, 哈哈!只至Benedict breakfast 其實係兩個muffin包, 入面有ham, 一隻半熟水煮蛋同芝士. 佢上枱既時候我無咩驚喜, 但係我就真係第一次見到將成隻水煮蛋放入個包入面. 我朋友話佢上次黎食既時候隻水煮蛋係真係溏心, 有蛋汁, 不過今日我呢兩隻就煮得熟得濟. 我就覺得麻麻, 或者係我朋友嗰個蛋治實在太好食, 相比之下就差少少啦.至於咖啡, 非常的"削", 無咖啡既香濃, 我自己覺得即溶咖啡好過佢!我哋hea下hea下, 坐到點幾, 見到餐廳已經爆滿就走. 其中一樣要讚既係, 雖然餐廳爆滿, 我哋兩個又一早食完, 但係佢哋都無話會想趕我哋走. 下次我要黎試下佢個set a先!!…Read More

Element 有小王子既exehibtion, 係去既途中見到呢到既蛋糕好吸引, 所以決定番轉頭既時候黎幫襯佢. 不過因為佢呢到無堂食既seat位, 所以我哋就買左蛋糕之後再去starbucks到一邊嘆咖啡, 一邊享受咁靚既蛋糕.呢到既蛋糕真係好靚, 我企係個蛋糕櫃前面諗左好耐先作用到決擇. 最後我揀左opera同埋一個本來應該係榛子味既蛋糕, 名就唔記得喇! 不過都唔緊要, 因為兩個蛋糕都食唔到有咩味~~~ 我淨係食到不知名蛋糕d cream幾滑, opera整體黎講幾實淨. 但係味道就無咩~~~ 連opera既朱古力味都無咩! 賣相確實吸引, 但就真係得個樣~~~~~下次見到佢哋, 一定要小心又比佢既外表扼左我~~~~…Read More

相對集團式既餐廳, 我係偏愛好似GU GU 呢種家庭式既小店. 星期日下晏六點, 未到食飯時間, 當然就唔駛等, 但係已經有幾枱人係入面. 一入到舖頭, 笑容可恭相信係韓國藉既婦人即刻上前招呼. 都未坐定, 待應生已經送上兩杯玄米茶. 餐牌我都未打開, 朋友已經問我食咩好唔好, 見佢有備而來咁. 我亦樂得坐係到等食. 係朋友忙於同待應生研究研今晚食咩餸既同時我就俾嗰部不停播住韓國MTV既電視吸引住, 驚嘆韓國既整容技術既出色, 哈哈!兩個人我哋點左3個餸. D野未黎之前本來我朋友見到有個佢想食既野仲想點, 不過我真係覺得太多所以截住左. 而事實係... 好彩我真係截左佢. 3個餸都有D多得濟喇. 不過等緊既時間真係好難捱. 因為我哋就坐係BAR TOP隔離, 所有餸都會經過我哋先. 見到一碟碟熱辣辣既餸, 聞到一陣陣香噴噴既味道, 但係我哋d野又遲遲未上, 真係折磨! 等左15分鐘左右, 終於都可始上菜喇Kimchee魷魚簿餅($80): 亞州式用糯米粉開水既煎成圓形再加KIMCHEE同魷魚.好多KIMCHEE, 啖啖都係, 感覺嗰個"餅"只係用黎做膠水痴住D料. 但係又幾好味喎. 係魷魚切得太細同埋份量唔係好多, 所以好似無咩魷魚咁.Gu Gu韓風醬雞半隻($70): 雞係炸過黎, 炸醬都幾厚下, 有d似kfc既辣雞咁. 不過好彩雞肉係炸完之後仲係嫩, 可惜都係一貫雪藏雞既通病: 雞無雞味! 食既時候就純粹係食雞肉既嫩同埋韓風醬. 好彩個韓風醬辣辣地咁好惹味. 令到呢碟餸變成全餐最好味既一碟.朝鮮風炒蜆($58): 感覺似係普通炒蜆, 不過用既係韓國既醬汁. 不過都係辣辣地咁, 用黎佐酒既話應該好正!食完之後朋友問我呢餐算唔算係正宗韓國餐, 當時我答佢唔到, 因為我係食既時候確實唔係覺得好韓國, 但又未至於去到香港菜扮韓國菜, 可能因為醬汁既問題啦~~~~ 不過而家諗番起, 覺得佢d野都好似樣樣都熟口熟面咁, 有一半香港人血統既韓國菜!…Read More

一講起吉列豬扒, 我就會諗起我朋友一句形容詞. 佢話佢真係好想食到外面crisp入面juicy既吉列豬扒. 一年之前曾經同佢去幫襯當時好hit既丼. 雖然佢哋既豬扒真係好crisp, 但係我哋去食嗰日就食唔到juicy. 後來我都無再點過呢味餸喇. 今日有朋友提議話想食吉列豬扒, 話我知係尖沙咀k11. 當時佢話我知去 "梅林" 我都無咩印象, 心諗係openrice都未見過都應該都只係填飽肚之作. 不過未去過k11, 所以我都決定去試下.睇番食評見到好多人都話要等位. 星期日晚晚上9時, 唔駛等位, 店內都只有幾枱食客. 雖然佢個裝潢係好high end, 好日本. 但係擔心食品質素既問題依然都充斥住我既腦海入面. 行入舖頭, 係一陣此起彼落既日文"歡迎光臨"聲中我同朋友被引領到一個卡位. 每一個卡位門上面都會有一塊擋門巾. 其實當我哋坐底既時候, 呢塊巾並唔會起到任何保護私隠既作用. 但確實為舖頭既裝潢有加分既作用. 坐底即刻有人送上熱茶, 再睇下餐廳內部既環境真係好闊落, 每一台食客之間都有相當大既空間. 比起好多密密麻麻擺滿晒枱既舗頭, 係呢到食都食得開心d. 心裏面之前有既擔憂即時減半.朋友一早做晒功課, 已經諗定晒食咩. 我亦都樂於做等食嗰個. 最後我哋兩個人叫左2個小食, 一個定食:蟹味噌豆腐($32): 凍食既前菜. 炎炎夏日第一道食呢道菜真係有一種清涼既感覺. 醬汁既味道剛好, 唔會太濃. 豆腐好滑. 不過我食唔到有豆味. 炸蠔($64)兩隻: 第一個吉列既餸. 一上枱就見到d旁邊嗰d脆脆係好"細緻" 因為真係好清楚見到佢哋一條條咁. 墊住嗰兩隻炸蠔嗰張隔油紙係我哋影完相夾起嗰隻炸脆既時候都唔係好多油. 放入口既時候... 好脆呀個炸醬, 薄身, 所以唔會有多餘既油份. 但係又足夠完整地包住入面嗰隻蠔. 咬開入面嗰隻蠔仲有水的呀~~~ 好好味呀! 我平時食炸野都會dum左部份炸醬等自己唔好咁內疚. 但今日我真係食晒. 一來無油淋淋既感覺, 所以當時唔會覺得內疚. 二來, 真係好好食.吉列豬扒定食($138): 定食包括湯, 酸菜, 椰菜沙律 & 飯. 試過吉列蠔之後, 對吉列豬扒有好大既期望, 枱邊有三種唔冋既醬汁可以用黎搭配, 但係第一舊我想試下佢既原汁原味. 挾起舊豬扒, 同炸蠔一樣, 包住佢嗰層炸醬好薄, 但係咬落去既時候就好脆, 唔油, 雖然咁香口, 但係豬扒本身既水份仲係到, 真係正宗既外面crisp入面juicy. 分別試過佢嗰三個醬汁, 我覺得芝麻沙律醬同佢最夾. 如果淨係用佢個汁黎送飯都食到一碗呀!食完呢間, 同番一年前既丼相比, 可以用平靚正黎形容. …Read More

lunch食得唔盡興, 啱啱tea time既時候行過去stanley market既時候途經呢間餐廳, 即刻俾佢蛋糕櫃入面既蛋糕們所吸引. 一行埋去已經比佢其中幾款蛋糕吸引住. 但係因為明知道今晚會早食dinner, 所以都唔敢咁貪心, 就叫左一個有cake有野飲既tea set. 雖然已經係咁多件入面揀左幾件, 但係都係做唔到決定. 結果店員就介紹我朱古力比較重既chocolate cake比我, 再叫左杯greentea latte. 我坐係兩個mac既電腦既隔離, 但係兩部腦都無開到, 所以得個睇字用唔到. 等左一陣店員就送上我哋order既野. 我係第一次飲熱既greentea latte, 因為平時都係飲星冰樂嗰種多. 我原來以為會有好重既綠茶味. 但係飲落口我飲唔出綠茶味. 反而可能因為綠茶既質地問題, 反而無一般既latte咁滑, 仲有D綠茶既澀味. 只攞到綠茶唔好既野, 好既就攞唔到. 未至於難飲, 不過有改善既空間.至於件蛋糕, 因為店員介紹話係好chocolate, 所以我都幾大期望, 不過可惜朱古力味唔算特濃, 再加上個蛋糕都有少少乾身, 似係被抽走左部份既水份. 所以口感都唔算咁good, 都係麻麻. 總括而言, 食物一般, 食既係呢到悠閒既氣氛. $70 一個set with 一杯咁大既野飲. 我估佢哋真係唔係好介意你係嗰到長期逗留!!…Read More

平時食米線都會幫襯雲桂香, 唔係話佢特別好食, 只係因為第一次幫佢, 所以之後都好自然都會去番雲桂香. 見呢間野好似都係好出名同好多人等, 今日心血來潮就諗住試下新野就黎左呢到. 晚上7點半都幾多人係門口等, 不過因為米線D人流都幾快, 所以3個人都唔駛等好耐都有位.餐牌一攞上手, 見到米線既餸無水餃或者雲吞揀已經唔開心! 最後係無咩特別合心水既情況之下, 我同媽咪就點左個過橋米線SHARE. 既然諗唔到要咩, 咁咩都有就唔駛諗! 我食米線鐘意多青, 問佢可唔可以比多D我. 佢話份量固定左要多青就要ORDER一份.... 比多幾粒葱我都要收錢. 咁無人情味, 扣分!過橋米線好多餸都有, 最好可以話係條菜... 綠油油幾夾口. 其他包括牛丸墨丸... 細細粒, 一睇就知係勁多粉嗰D. 其他都係無咩特別, 相比之下.... 我下次都係去番雲桂香算喇!…Read More

閒日放假就入左赤柱玩. 閒日赤柱少左好多本地遊客, 再加上為數唔多既外國遊客同埋低密度既建築物. 感覺真係好似去左外國咁. 入到黎赤柱剛剛食飯時間, 一早我哋就決定係美利樓到食, 最後揀左呢間! 臨入去之前先發現原來係King Ludwig, 之前一路都好想去尖沙咀既分店試, 估唔到方便就腳既尖咀分店未去, 反而黎左赤柱~~~ 係外面望入餐廳時以為無咩人, 點知原來d人係坐晒係外面, 行到出去先知原來係勁多人嫁~~~ 不過原來餐廳有個海景view, 咁真係好彩揀左間3樓既餐廳. lunch set 可以揀頭盤(湯 or 沙律) + main dish + 飲品, 我就orde咗個煙三文魚沙律, 海鮮蕃茄醬天使麵, 西冷牛扒, 另外再order左個農夫包. 我本身唔係咁鐘意食幼身既天使麵, 所以就問佢可唔可以轉做其他意粉, 不過佢話我知d天使麵已經撈好晒汁, 唔可以轉.... 咁即係好似m記咁, 一早整定晒?! 我即刻覺得自己食緊一個百幾蚊既快餐.... 落左order之後我就開始欣賞個sea view. 不過其實個露台位唔係好大, 但係佢放左排枱都幾迫下, 枱與枱之間緊緊夠一個人過. 我哋好唔好彩坐係靠牆位, 都唔好意思去人哋嗰邊影相. 唯有嘆下d海風啦.唔知係唔人多既關係, 落左order好耐d野都未黎. 催左兩次之後, 煙三文魚沙律終於都黎. 4舊三文魚既份量仲多過d菜. 食完個沙律, 待應生過黎收野嗰陣先先發現我哋個農夫包仲未黎. 佢話去check check之後一陣子有得食. 農夫包既質地有d似scone, 跟一個牛肝醬同cream, 牛肚醬既味道好濃, 我開頭唔知道切左1/4個包搽左一半牛肝醬... d 味濃到頂唔緊. 再食cream既時候就唔敢搽咁多. 但反而cream既微酸中和左過濃既牛肝味道... 好彩我係食牛肝醬先者~~~可能個農夫包係漏單, 我都未切開個包兩個main course就已經送到. 當我見到嗰兩個main course嗰陣熱氣俾海風吹到散晒既時候我就知大件事喇~~~ 果然, 係我食完個包既時候嗰兩個main course 已經凍到好似未加熱咁. 牛扒凍左特別大件事, 好"UN".... 我個意粉其實賣相好吸引, 又多海鮮, 好彩係酸味味既蕃茄醬, 我唯有同自己講呢個係一個冷盤意粉... 不過我都係食左一半就放棄. 享受天然冷氣既代價....餐飲要左咖啡, 咖啡味香濃, 一上枱我就一飲而盡, 感覺似係想值由溫熱既咖啡將我肚入面既"冷麵"加熱咁. 待應生們, 如果你哋既上菜時間可以掌握得好D, 我呢餐會開心好多嫁!…Read More